左右反轉
Topic: 10奇遇 Trek
請先看<提示>.

我係左搲就大家都知啦,但係我左右反轉就唔係個個都知喎!

係左右反轉,唔係左右不分喎!左右不分係唔知邊便左邊便右,左右反轉就左一定右,右一定左.

諗一陣,就知道邊便左邊便右,但即時反應就一定係左邊舉起右手,右邊舉起左手!

所以講方向,我通常都會講呢邊個邊,唔會講左定右.

坐車你問我轉左定轉右,我一定答你呢邊同個邊,即係我坐既呢邊,同你坐既個邊,知無?

所以我都從來無諗住學揸車,因為都無左搲車,右腳剎車,我實用左腳踩左油門啦!我肯定好多交通意外都係咁發生架啦!D車廠都無為我地D左搲既人諗吓既!大學應該做呢個統計啦!

其實無論中文英文,都係左右左右, left right left right,左手行先架啦.我叫你D右搲仔左右左右咁出拳,你咪又係出右手先!唔信?你試吓而加坐係到,左右左右咁擰個頭,睇吓你係咪左右反轉?

仲有好搞笑,以前住興華二期對面阿周太,明明係周乜乜既阿媽,但係我永遠都係哎佢陳太,斜對面阿陳太,明明係陳物物既阿媽,但係我永遠都係哎佢周太!不過隔離余咩咩既阿媽余太,我又唔會哎錯個喎!左面陳太右面周太呀嗎,我記得呀!所以周太個老公咪陳生,陳太個老公咪周生囉!之不過周生我都係哎佢陳生,陳生我都係哎佢周生之嗎! Wakaka....

行路唔睇人
Topic: 10奇遇 Trek
請先看<提示>.

大家有乜野特別既習慣呢?我有好多,第一個係行路唔睇人.

細細個屋企都係教行路唔好掛住四圍望,要望住前面,望住條路,所以我一向都係望住前面,人多既時候就望住人同人之間既人罅,一路向住人罅既方向行,完全唔會留意係身邊出現既人.

記得大概中二三,柴灣邨開始拆,阿公無再開番米鋪,柴灣大名頂頂既黃金記就咁就結束左佢既光榮歲月!之後有一排,阿公就係興華二期地下大lift口賣玉,就坐係大圓柱既柱躉個到賣.我每日放學都係到搭lift番屋企,有一日,屋企人傾偈,講開,阿公係樓下賣玉,我話:吓,乜個個阿公黎既咩?

你唔知咩? "我見有個阿伯坐係到賣玉呀,不過我無望到佢個樣喎!" 咁你望住D咩呀? "望住條路囉,望住架lift囉,望住兩架lift上面個顯示牌睇下架lift到未,使唔使追lift囉!"

跟住第二日放學,先見到真係阿公,先識叫阿公!

又有一次放學,係北角健康邨落左校巴轉巴士番柴灣,坐到番柴灣,再轉個彎就到站,坐正我前面個行,全程訓教個兩公婆訓醒傾偈,講潮州話,一聽,點解把聲咁似阿爸同阿媽既?再聽,真係好似喎,一望,真係阿爸同阿媽喎!

我哎:阿爸阿媽!佢地擰轉頭望我:咿,你幾時上車架? "健康邨囉!" 你唔叫我地? "我都唔知!" 你上車見唔到咩? "上車望邊到有位之嗎,都無望人!" 坐低左又見唔到咩? "坐低望窗口囉,你地訓左又無出聲!" 唉到站啦,落車啦落車啦,落左車先講啦......

仲有一次中六七,屋企人傾偈,講開,對面呀周太係興華一期去地鐵樓梯口個間麵包店賣麵包,我話:吓,乜周太係個到賣麵包咩?

賣左好耐啦,你無係個度買麵包咩? "有呀,成日買啦,不過我無見個佢喎!" 咁你買麵包唔望人既咩? "買麵包咪望住D麵包囉!點會望住個人唶?D麵包係個人塊面到咩!" 咁找錢呢? "找錢咪望住D錢囉!"

跟住第二日經過買麵包,特登望吓個人,真係周太喎,先識同周太打招呼!你知啦,屋邨講野,大聲D隔離左右都聽到晒架嗎,佢仲同我講:你D麵包呀,睇吓啦!找錢呀,望住呀!

最搞笑個次,大概十年前,啱啱開始搞公司,我同個拍檔去左尖東,同一間酒店傾搞wireless,走既時侯一路行一路傾偈,諗住搭隧巴番灣仔 Office,行到好遠,去到街尾過馬路,我突然抬高頭,四圍望,問個拍檔:咿?頭先係咪有人哎我呀?

係呀,仲哎到好大聲添呀? "吓,點解你唔話我知呀?" 我以為你扮聽唔到囉! "吓,點解我會扮聽唔到呀?咩人黎架?" 係頭先間酒店D職員黎架! "女仔黎架?" 係呀? "點既樣架?" 幾靚女架!

我心諗:吓?乜我有識得幾靚女既女仔既咩?

過左無耐再去傾第二次,終於見到,原來係 Fanny Man!蝦!原來我起碼都識得一個靚女喎!

我就同佢打招呼:Hi Fanny! "Adammmmm!" 你上次好似哎我呀? "係呀......!" 我聽唔到呀,Hehehe.....

跟住過左一排,又好似去左第三次,我又好似聽唔到佢哎我,無應佢呀!哈哈哈哈哈哈哈!

大家係咪好羨慕我呢?有個靚女哎我,哎到成條街都聽到,我仲要唔理佢!嘩,真係不枉此生呀!

大家有無試過係街見到我,同我打招呼,但係我無應你呢?近呢幾年搬左出黎住,自己買餸左望右望,應該好左D啦,不過如果以後再係街見到我,同我打招呼,哎我都唔應你,走過黎拍我膊頭啦!我唔係扮唔識你呀,係真係聽你唔到睇你唔到架炸!
---------------------------
早排講過我行路唔睇人,哎我都唔理既,醒起原來仲有一單.

廿年前返荃灣,朝朝8點零,沿地鐵站行番公司.有次行到大廈門口,咿?頭先好似有人哎我喎?我就擰轉頭,四圍望.

咁啱有個同事行到我後面:Adam,你做咩呀? "頭先係咪有人哎我呀?" 係呀,有個女仔係巴士上面哎你呀,哎到成條街都聽到呀! "巴士?好大聲哎我?"

我望吓巴士站既個D巴士,同事話:走左啦,去左地鐵站個便啦!

過左幾日,又有人哎我,今次我聽到啦,一望,原來係 Millar Wong! "Hi Millar!"

後尾成班預科同學出黎食飯,先知佢搬左去荃灣,成日番工見到我,仲哎左我十幾次,不過我先應得佢一兩次炸!所以後尾都廢鬼事哎我啦!嘩哈哈哈哈哈哈哈!
---------------------------
我又諗起一單行路唔睇人,有人哎我都唔理佢既CASE啦.

個陣入左U,個幾年日讀夜讀,間唔中悶悶地都會落銅鑼灣行個圈.

有日係SOGO後面行,由金堡行去總統個便,行行吓突然間有人係後面拍我膊頭哎我:ADAM!

我擰轉一睇:嘩!John Liu!好耐無見呀!

原來佢係到番工,係舖頭望出黎見到我,大哎我幾聲我都無反應,就樸出黎捉我.

之後都試過一兩次行過,又係行到好遠先發覺好似有人哎我,先識得擰番轉頭,老遠咁同佢SAY HI,再行番轉頭傾幾句,哈哈哈!
---------------------------
仲有一單,個陣入大學之後開始,差唔多個個禮拜日都去維園跑步減肥,跑左好多年,跑完就行去銅鑼灣搭車.

個陣好多人踢波,我行過有時都會停低睇吓.

有次睇睇吓,咿?頭先好似有人哎我喎?望吓望吓,原來就係我望左好耐呢個場入面踢緊波既人叫我,再望真 D,原來係 Sunny Lam同 Ben Yan 佢地!

我睇左成個字,淨係望住個波,同 D球員既腳法,完全無望過佢地個樣,哈哈哈!

佢地仲叫我一齊踢,我跑完步死死吓,梗係唔踢啦.

之後劇情正正常常,大家都估到,我又好多次跑完步睇人踢波,佢地猛咁哎我,我先識應番佢地,甚至唔應佢地啦,哈哈哈哈哈!

鍾意又唔鍾意
Topic: 10奇遇 Trek
請先看<提示>.

大家有無野係鍾意又唔鍾意既呢?

我都唔知點解,有三樣野都係咁個喎!

鍾意科幻野,科幻片,但係人人都話最正既科幻片---星球大戰,次次睇一陣就唔想睇,無心機睇落去,集集都係咁個喎!

鍾意功夫,武俠片,但係人人都話最正既武俠小說---金庸,次次睇兩版就完全唔想再睇,連電視劇都係,覺得好悶,覺得似愛情片多過似武俠片,啱女仔睇多過男仔睇,本本都係咁,套套都係咁個喎!
 
鍾意睇波踢波,但係人人都話最正既本地波---南華,同人人都話最正既外國波---巴塞,又係唔鍾意個喎!次次入場睇本地波,都係覺得南華對家好睇D,棒左對面個隊.巴塞幾年前睇左幾次,又係唔鍾意,覺得好似已前西德,行軍打仗,不過快左,變晒機械人咁解.

鍾意又唔鍾意人地口中既最好,呢D係咩野心理呢?真係奇怪!

假肚餓
Topic: 10奇遇 Trek
請先看<提示>.

上次講減肥,有樣野漏左,就係假肚餓.食飽之後3,4個鐘會覺得肚餓,唔使理,原來假既.5,6個鐘又會肚餓,呢個真既.

所以食完晏,4點零鐘肚餓,唔理佢過一陣就無野.6點零又肚餓,可以食生果或者幾塊餅.

7,8點食完晚飯,11點幾又肚餓,又唔使理,咁就可以去到點零鐘先瞓覺都得.

千祈唔好食宵夜,除非晚飯真係唔夠飽,最多食兩塊餅干就夠.

就係呢個假肚餓,令到好多人越食越肥.以後知道原來根本唔使食下午茶同宵夜,咁就唔會再變肥佬啦!

又減肥
Topic: 10奇遇 Trek
請先看<提示>.

今日去做GYM,一磅,151.8!

雖然無舊年咁勁,減左廿磅,不過都減左八磅,哈哈哈,呵呵呵!

不過又唔覺瘦左,條腰無細到喎?瘦左去邊呢?肚腩好似細左小小,唔通個肝瘦左?

舊年既白粥+炒粉麵方法已經習慣左,成四個月一D用都無,所以今年年頭開始又轉方法---唔食早餐,午餐晚餐照食,食到飽.

其實以前D人,甚至而加鄉下,由瞓醒洗米煲粥洗菜煮早餐,到灘凍煲粥食得,都要個零兩個鐘啦,我又瞓得晏,又唔係體力勞動,坐3個半鐘之嗎,係初初比較餓D,習慣左都無乜野,不過超過4個鐘就唔得啦,會頭暈.

而且咁樣仲可以提醒自己窮人日日捱餓有幾慘,所以我建議政府高官同權貴有錢佬都應該學我,就算放假都唔食早餐,咁就有可能講番D人話.

仲有最緊要,早餐乜都唔食,都要飲一杯水,水份好緊要架!有無大便都靠呢杯水架!

最後都係呢句啦,體質因人而異,所以唔好盲目學我,多謝大家.

勸做人
Topic: 10奇遇 Trek
請先看<提示>.

尋晚發左個有鬼夢,本身打側訓,跟住現實一陣狂風係背脊,由頭頂吹到落腳踭,連張咁重既棉被都飄起少少,吹郁左少少.我鬧左句唔好搞呀,跟住停左.諗起d人話被鬼責唔郁得唔叫得唔醒得,我又試下先,郁到呀,開到眼呀,無野呀!

跟住又有d起風想再黎,我就係心中講左一段平時睇鬼片既時候諗過同鬼講既野:

唔死都死左啦,繼續做鬼有咩用唶,比你搞我嚇我咁又點?開心咩?有咩未了心願都算數啦,拿拿聲投胎,重新開開心心咁做人好過啦!

無野,靜左,講多次,訓教,講完.

拜年
Topic: 10奇遇 Trek
請先看<提示>.

新年啦,今年新年都算幾暖喎,記得07年大年初一,成卅度,我仲着 T恤短褲番屋企拜年,仲買左大紅大紫直立式真正向上升年糕番屋企,即係------士多啤梨+藍梅味甜筒!

雪糕都係糕吖!幾有創意?哈哈哈!

新年新計劃,新開始,祝大家老馬有火,非同小可!大家咁話!恭喜恭喜!

水運會
Topic: 10奇遇 Trek
請先看<提示>.

莫講話預感,就算擺到明,真係有問題,都阻止唔到.

一次水運會,散場出泳池,出到維記外,坐在長凳等.見有兩條友,站在長凳上,對正出入口,不知作何事.覺得甚可疑,留心打量看.

每見鬼仔出,手指指一指,望向我右邊,沿視線一望,那班轉校生,耍手兼擰頭,見我望到實,即刻扮唔識.

俄傾老妖出,傻吓傻吓咁,走到疑人後,站於長凳傍,我即行過去,跟他打眼色,留意兩條友,佢只望一望,仍然戇居居,真係激鬼死.

乍見好友出,又試手指指,閃電飛身揼,本想飛身救,扲凳旋風腿,卻被妖擋住,木立無反應,只得個睇字.

得手分頭閃,欲追卻無從,好友傷不重,只是變豬頭.眾人無頭緒,不知因何事,若非我醒目,記得轉校生,耍手兼擰頭,焉知誰是真主謀?

好在你班友,跟我撈正行,不枉我一心,不離棄好友,若然行古惑,不知每日死幾勻!

舊同學
Topic: 10奇遇 Trek
請先看<提示>.

唉!有時預感靈都唔一定係好事.

當日係好熱既十一月,我一個人係 Library,等緊考 F.7既 Physics LAB,因為儀器唔夠,有半班考先.yo!

有個好黑既人行左入黎,睇真d原來係熟人,好早去左留學,放假返玫記探監,我當然好開心,即刻哎住佢.hey!

同佢傾傾吓,有 d唔對路,你個樣好唔妥,係咪唔舒服?無呀!咁你小心 d,雖然你真係晒得好黑,不過硬係覺得有問題.點樣小心 d呀?總之做乜野都小心 d啦!yo!

講講下又差唔多夠鐘,又見到其他人,咁就一齊行去 Physics LAB,半班考完又半班考,佢就同考完既繼續傾.yeah!

差不多過左成年之後,同學打黎叫我去探佢,原來佢返過去之後,無耐就有意外撞左車!oh no!

每次去探佢都好心傷,佢次次見到我都好大反應,我又唔敢開口去問佢,其實你係唔係想鬧我?吓?

雖然你屋企人話你揸快車,但係事實又有邊個知?會唔會我叫你小心 d,所以你揸得太慢,先至避唔開架對頭車?呢?

你個樣一定係想鬧我,我唔敢再去探你,我無可能再扮唔覺,亦無膽去問個真,若果事實真係咁,我點面對你同你屋企人?我並無心去害你,一心只係想你好,無耐現實太殘酷,事實又會否再傷更多既人?吖!

邊個敢去幫我問?就算問你亦好難答得清,如果你真係想鬧我,我只好係到請你原諒我!假使有日我夠膽去面對你,到時再當面同你講 sorry!唉!

謝師宴
Topic: 10奇遇 Trek
請先看<提示>.

上次發夢算唔算預警,提醒自己小心呢?

咁預感又靈唔靈呢?

大家記唔記得 F.5 既謝師宴呀?幾個月前就定左邊晚,阿 Sir叫我地報名啦,唔知點解我好唔想去喎,方 Sir問我點解啦.

我個腦一片空白,但係把口居然咁答喎:.....我......個日唔舒服呀!

成班個個嘩嘩聲,方 Sir話唔緊要,唔想去唔好勉強人.

考完會考放暑假等放榜,有日無端端發燒,燒到我鬼死咁辛苦,拍左兩粒藥都頂唔住,諗住聽朝先去睇醫生,訓到半夜有電話,我最近所以起身聽,電話居然係搵我,原來係 Lionel 呀媽!

奶媽:你知唔知 Lionel係邊呀?

我死死吓:吓?唔知呀!

奶媽:你地謝師宴幾點散呀?

我死死吓:吓?乜今日謝師宴咩?我唔知呀!

奶媽:你無去咩?

我死死吓:無呀?

奶媽:你做咩無去呀?

我死死吓:我發燒呀!

奶媽:咁 Lionel去左邊呀?

我死死吓地發脾氣:我都話唔知囉!

奶媽:哦咁咁咁好啦好啦,拜拜.

我呀媽聽到我講電話,就問我:你發燒咩?

我死番上床,死死吓:係呀!(之前都講過啦,我病左個樣精神過平時,就算屋企人都無人知我病加嗎!)

媽:今日謝師宴咩?

我死死吓:係呀!

媽:咁你交左錢點呀?

我死死吓:我無交呀!

媽:點解無交呀?

我諗諗吓,死死吓:我一早知今日病吖嗎!

媽:吓?一早知?

我死死吓地發脾氣:係呀!我好唔舒服呀!

媽:有無食藥呀?

我死死吓:食左啦!

媽:訓啦訓啦!

雖然之後出黎聚會,都有同 Lionel SAY SORRY,不過係到都再講多次 SORRY Lionel,發你奶媽脾氣,真係唔好意思!

咁謝師宴個晚其實你地去左邊呀?去咪去左過大海!?快d講~~~~~~~~~!