發夢
Topic: 10奇遇 Trek
請先看<提示>.

大家發夢係黑白定彩色呢?幾十年黎,發咁多夢,但係諗番都無辦法記得到底係咩色,除左一次!

前年年頭有晚發夢,夢見自己無啦啦撞親頭殼頂,跟住就好似電影d特別效果咁,黑白畫面,由頭殼頂中間開始零零捨捨一撻紅色,越變越大撻,最後成個畫面都變成紅色!

跟住第二日,仲諗緊呢個夢咩意思,會唔會鴻運當頭既時候,之前係灣仔夾檔個老細,突然間係外國番左黎,打電話比我,叫我一齊番大陸行下,睇下有咩好賣,睇下有咩好做喎!

嘩!嚇得我吖,梗係死都唔去啦,容乜易真係遇到扑頭黨,番唔到落黎架!

結果佢自己行完番落黎,咪又係話無咩好野搞!咁即係唔係鴻運當頭啦,十成十都係避過一劫啦!耶!

咁係咪即係我發開黑白夢呢?定發開彩色夢呢?又好似多數係好淡好淡既彩色播!有無人知呢?

同埋原來我發夢係第三身,唔係第一身,唔係點睇到自己頭殼頂呢?咁你地呢?

鬧老師
Topic: 10奇遇 Trek
請先看<提示>.

鬧完差佬同呃人既小販,最後就鬧老師!

因為呀媽見2家姐好得,又夾硬要我早一年讀書,結果梗係年年包尾,幼稚園 MISS 次次派成績表,個個都話你個仔幾好吖,前半啦,前十啦,頭幾啦,係得我次次都話你個仔好蠢呀,包尾呀!

後黎升左小學,慈幼就唔使諗啦,結果梗係考唔入柴灣最好既明德,淪入普普通通既卍慈,要第二年先考到明德,同番家姐佢地一齊.所以我變相都叫做冧個班架,威唔威呀?

係呢一年亦都令我知道一樣野,就係坐位好緊要,尤其係低年班.本來上學期雖然坐最後,但係正中間,一向前望就望住先生,所以d成績都唔差,但係下學期調左位去側邊,就即刻唔知係到做乜,望住前面黑板發夢!

同班有個男同學,持住阿爸係到做先生,成日蝦蝦霸霸,有乜事就搵阿爸出頭鬧人.

有日小息週圍走撞到我仲鬧我,我咪鬧番佢轉頭囉,佢居然走去叫佢呀爸黎話我鬧佢,想佢阿爸鬧我喎!

我咪當住阿Sir面鬧佢個仔囉:佢自己週圍走撞到我仲鬧我呀!佢持住你係先生,成日蝦蝦霸霸呀佢!

阿Sir咪當堂將對住我個惡樣變和善樣鬧番佢個仔,叫佢同我道歉囉,佢咪死死地氣咁同我 SAY SORRY囉!

經過呢次之後,佢先唔再蝦蝦霸霸成日鬧人蝦人炸!

我又救番一個黑洞邊沿既垂死靈魂啦,係咪好偉大呢?呵呵呵!

鬧小販
Topic: 10奇遇 Trek
請先看<提示>.

除左鬧差佬,我仲鬧過呃人既小販!

過左一排,呀嗎帶我去街市買餸.我呀爸呀媽都好大膽,成日都話街市污糟,叫我一個幼稚園細路企係街市出便等個喎!

咁以前d街市又真係好污糟既!街市入口係一塊空地,我企係馬路邊,我就睇人賣野.對正入口有檔肥婆A賣西瓜,好多師奶圍住,又有個肥婆B話:d西瓜好靚呀,我要呢個!

肥婆A就用紅膠袋賣左比肥婆B,肥婆B就走左.

跟住有個師奶A又話要買,比左錢,點知肥婆A扮晒人多混亂,唔比西瓜不特止,仲話佢未比錢喎!師奶A吹佢唔漲,死死地比多次錢買.

過左一陣,肥婆A食過番尋味,又話師奶B無比錢喎!師奶B嘈左一陣,無再買就走左.

轉個頭,肥婆B居然攞住袋西瓜番黎,靜靜雞比番肥婆A擠番落去再賣,肥婆A又靜靜雞比番錢肥婆B!

我呀媽買完餸出黎,見我望住檔西瓜,以為我想食,問我買唔買.

我話:唔買呀,去第二到買呀,呢檔野呃人架!

肥婆A肥婆B居然一齊鬧我,哈!

我指住佢兩個,大喝一聲:佢收左人錢扮無收過唔比西瓜人呀,佢買完西瓜轉個頭又比番佢擠番落去再賣呀!

兩個肥婆仲話我講大話,哈哈!!

我再喝一聲:講大話正食屎狗,夠膽做唔夠膽認,正一死縮頭烏龜!夠膽就跟住我講一次吖!唔夠膽講就即係你地講大話!妳頭先買左個西瓜去左邊呀!吓!!!

兩個肥婆望住我,眼定定,無聲出!

師奶B居然神不知鬼不覺行左番黎:哦,原來妳呃人既,快d比番錢我呀!

其他師奶就係到擾攘,我呀媽又不知幾驚!見有巴士黎,即刻拉左我上車!

你d西瓜又唔係假既,做乜要呃人唶,呃得幾多唶?仲要比個4歲細路鬧到無聲出,你話醜唔醜呀!?

鬧差佬
Topic: 10奇遇 Trek
請先看<提示>.

舊年有人鬧差佬,你地有無鬧過差佬?我細細過就鬧過!

上次都講啦,我4,5歲就好鍾意睇大戲,唔係點會睇到任劍輝係女人呀!

每年一到盂籣節就成日叫呀媽帶我去睇神功戲,最後終於都肯帶我去.

個年仲讀緊幼稚園,柴灣巴士廠對出個巴士總站仲係一塊大爛地,圍晒鐵絲網.

大約下晝3,4點落街,去大爛地睇大戲,點知去到前面閘門,成班師奶阿叔係到,差佬唔比入,叫我地去側邊個邊閘口入.

我地跟住大隊就成班人行行行,去到側邊閘口,差佬又話唔比入,叫我地去番正門入.

如是者點左我地5,6次,又番到正門,條差佬仲想點我地行多次去側門!

我就忍無可忍,大喝一聲:你同我地一齊過去啦!你話比個便個差人聽,係你叫我地過去個邊入既!

其他師奶阿叔就附和到:係呀係呀係呀,你去講呀,你去講呀,你去講呀......

個差仔唔出聲,我呀媽都不知幾驚!叫我唔好出聲,但係我都唔驚,我再喝一聲:行啦,帶我地過去呀!

嘈左一陣,佢個阿頭走埋黎問佢咩事,擾攘一輪,阿頭終於都比我地入去勒.

但係呢個時候,d大戲已經做完,無晒鑼鼓聲,咁仲入去做乜!激到我拖住呀媽即走!

搞到我到而家一直都未係盂籣節睇過現場神功戲!死人頭!

你話呀,做乜要做到咁衰,比人鬧先安樂吖?仲要比個4歲細路鬧到無聲出,你話醜唔醜呀!?

當年啱啱有ICAC,d大人驚差佬都正常呀,但係回歸後,d差佬又變番咁抵鬧,而d人亦都變番大多數人都唔敢為正義出聲!唉!真係,無眼睇!

中環燈飾
請先看<提示>.

聖誕快樂!

硬係覺得而家d燈飾好似無以前細個咁好睇咁既!覺啊可!

記得80年開始,有中環同尖東聖誕燈飾.個年既平安夜,呀媽帶我地5隻野,千辛萬苦,塞左3個鐘頭,又巴士又電車,終於由柴灣去到中環,九點幾先見到呀姨同大舅父!

所以讀中學都唔鍾意去玩,就係咁解!

大舅父鍾意影相,影燈飾,我地一路行一路影,中環行到上環,又行番到中環.

話咁快就12點,咁出黎個陣,係隊道口見尖東d燈飾都好靚,諗住過海再影.

行到去匯豐對出,皇后像廣場過馬路落隊道去舊天星碼頭個燈位,一望,尖東居然黑咪蚊!

搞錯!中環呢邊都無熄燈!

又唔想咁早返屋企,又唔知去邊好,就企左係燈位隔離,傾偈,四圍望.

當時都好多十幾二十歲既青少年,同我地一樣,無聊地行行企企.

我更無聊地睇紅綠燈轉燈,睇人過馬路,睇停車,開車,睇司機.

本來週圍人多,車都唔算開得快.

過左陣,一架好快,經過我面前,司機係面紅紅的鬼佬,明顯飲過酒.

跟住,又一架仲快,仲衝紅燈,塊面紅過關公的鬼佬!

衝前二,三十米,碰!撞到人,係個女仔.

女仔想起身,未企穩,鬼佬想走,再比油去,再撞前少少!鬼佬直頭發酒癲!

女仔再跌低,周圍幾個後生仔見到,開始行埋去.

鬼佬又比油,又撞一下!女仔根本未起到身!

我大哎:鬼佬飲醉酒揸車衝紅燈撞到人想走仲撞多兩下呀!

成個皇后像廣場,幾百個青少年,衝晒埋黎,圍實架車!

鬼佬再比油,再向前撞兩野,想嚇走d人.

所有人當場起哄,拍車,推車,搖車,跳上車!

呀媽呀姨大舅父見狀,心知不妙,即走,去搭車返屋企.

一轉面,走幾步,有兩名警察,到場察看何事.

我話:有個鬼佬飲醉酒揸車衝紅燈撞到人想走仲撞多兩下呀!

警察即call台,大舅父則帶我地沿電車路急步往金鐘,等呀媽同我地上巴士.

我問大舅父:你地呢?"我同你呀姨返西環."你地仲返轉頭呀?一齊返柴灣啦!"得架啦,走啦."

呀媽:小心d呀!"拜拜."

再次千辛萬苦,返到柴灣,沖完涼,3,4點,訓教.

次日,訓醒,呀姨來了我家.

聽到新聞報導前奏音樂,以為訓到1點.望真,原來6點半,訓了成日!

頭條,當然係昨夜中環暴動,燒車,追打鬼佬.政府當然隱瞞鬼佬飲醉酒揸車衝紅燈撞到人的事發起因啦!

我跟呀姨說:這不就是我們昨晚走時開始的嗎?咁咪即是我搞到暴動囉!

呀姨笑着輕聲說:he he,唔好咁大聲呀,因住比差人拉你呀!

不是我大哎:"有個鬼佬飲醉酒揸車衝紅燈撞到人想走仲撞多兩下呀!"就真的不會搞大件事嗎?

大家話,是我搞到暴動,還是那鬼老呢?

我只是講出事實唶,無理由有罪掛,不要拉我呀,我不想坐監呀!!!!!!

不過我明明記得是80年,但是上網查番,所有記錄都話是81年平安夜暴動既?點解呢?

任劍輝
Topic: 10奇遇 Trek
請先看<提示>.

除左早排講既救護員之外,仲有一次我係令到成條走廊都起哄個播!

唔使驚!唔係又講鬼古!

大家覺得自己既觀察力強唔強勁呢?

過左一排,如常咁返學放學,番到屋企一路食晏一路睇午間新聞,跟住如果套粵語殘片好睇既,呀媽都會比我地一路睇一路做功課既.

果時d電視好貴加嗎,為安全計,家家都擺到鬼咁高,唔比d細路掂到,唔睇仲要柵埋門.我屋企都一樣,擺到上櫃頂,大人都要遞高手開機,又得個十幾吋,仲要黑白,所以睇乜都好細粒!

有次做任劍輝白雪仙喎!咁出名,又未睇過,梗係要睇啦!

套戲雖然係大戲,但係唔係大花面,個個角色都有樣睇.終於都見到任劍輝白雪仙啦!

睇下睇下,而~倚~!唔係好妥播!再睇多陣,比我睇清楚嘞,咁我就問呀媽:呀媽!點解任劍輝要扮男人呀?

呀媽好明顯唔信我,笑住咁話:傻仔,任劍輝男人黎架!

我:任劍輝女人黎架!

二家姐停低支筆,抬高個頭,望住我話:任劍輝男人黎架!

我:一睇就知啦,成個女人樣!男人邊係咁樣架!

二家姐:任劍輝男人名黎啦!

我:藝名黎之嗎!

呀媽:男人黎架!

我唯有使出絕招:任劍輝無喉核架!你地自己睇啦!

成屋女人同我就一齊望住部電視:拿,係咪呀,過個男人幾大粒喉核,任劍輝無喉核架!任劍輝女人黎架!

我呀媽同我3個姊妹,望住部電視,無聲出!

係咪當年任劍輝好靚仔,所有女人,大細老嫩都好鍾意佢,好難相信呢個事實呢?!

我再問:點解任劍輝要扮男人呀?

我呀媽淨係係到笑,無答我!

唔答我,咪繼續一路睇一路做功課囉!

到5,6點做完功課又到出走廊玩既時候,玩玩下記起喎!咁我就問2舅父:2舅父你有無睇大戲呀?"有呀!"你識唔識任劍輝白雪仙呀?"識呀!"任劍輝點解要扮男人呀?"任劍輝男人黎架!"任劍輝女人黎架!"點解你話任劍輝係女人呀?"一睇就知啦,成個女人樣!男人邊係咁樣架!

跟住隔離個私奶咁啱又行出黎,又答爹:任劍輝男人黎架!

我唯有再次使出絕招:任劍輝無喉核架!

2舅父:你係邊到睇到呀?"電視囉!"咩電視呀?"頭先晏晝套粵語殘片囉!"任劍輝無喉核咩!"係呀,其他男人好大粒喉核,任劍輝無喉核架!"

隔離個私奶同其他街坊就開始起哄:哎也,任劍輝係女人呀!任劍輝係女人呀!.....

始終都係無人答到我喎!

可能當年無咩人知戲班個d歷史,一百年前淨係得全男班全女班掛!

未咁快完~!又過左幾日,唔知係歡樂今宵定係乜野表演,呀盧 david就話:最近有傳聞話,話,話呀任劍輝,係,係,係女人喎!不如我地等佢自己講啦!有請任劍輝!

任劍輝好淡定咁行出黎,就話:各位,我任劍輝,確係女人!如此這般如此這般.......

呀盧 david:哦原來任劍輝係女人呀,咁,咁我地以後好似白雪仙咁叫啦,白雪仙叫仙姐,任劍輝,叫你任姐啦,呀任姐!.......

嘩,係戲棚睇大戲,離遠化晒大花面就話唶,我一個5,6歲細路對住部十幾吋黑白電視都睇到啦,你d大人係戲院,仲係以前d戲院咁大個銀幕,咁都睇唔出?以前d人係咪真係咁好呃呀?

咁其實電視台係咪有人住興華邨既呢?次次我講乜你都知既?

各位朋友仔,咁你地又係幾時知道,任劍輝係女人呀?

有無用d強勁既觀察力,睇到d得你最早發現既野呀!

買樓
Topic: 10奇遇 Trek
請先看<提示>.

賭錢唔好,咁買樓保值,好啦掛!

唔好得幾多架炸!

升左值,賣左,賺左錢,賣比邊個呀?

後生仔女囉!大家既下一代下兩代囉!

你以為靠你自己本事呀?你同其他人一齊,壓榨緊你既子子孫孫炸!

買地買樓買屋,啱唔啱?你自己諗啦!

未有公屋之前,梗係買樓好過租樓啦,木屋都要買啦,唔通訓街咩!

發明左公屋,就唔應該再賣地起私樓啦!

所以我從來無諗過買樓,所有人住公屋就最好啦!

咁樣先有機會,同有學識有教養既人做鄰居,學好野,做好人.

咁樣先有機會,同有錢仔由細玩到大,娶個有錢女,d有錢仔先唔會對得d窮人打工仔咁衰加嗎!仲使鬼搞窮富翁大作戰咩!

而家?邊有咁多機會學做好人?邊有咁多唔衰既有錢仔?

買啦買啦,唔使理下一代架啦!而家唔買,遲早比大陸人買晒,公屋都無得你買,訓天橋底架啦!

計我話,原居民天生就有丁屋,市區人都應該天生就有一間公屋,租都唔使交,咁先公平加嗎!係咪?!

而家直頭腫濁奇事啦,一於獅發福瞎啦!

賭錢
Topic: 10奇遇 Trek
請先看<提示>.

六合彩一注9千萬呀,嘩!

大家有無買呀,有無中左呀!?

有無諗過點解成日有新聞,中呢d頭獎,倒頭黎最後都會無晒,行衰運呀咁呢?

你以為係運氣好呀?抽左稅做左善事呀?咪又係賭錢!

你贏d錢係邊到黎呀?咪又係輸左個d人到黎!咁咪即係損人利己囉!

你打工幫人做左野賺錢就話唶,無做過野就攞左人d錢,唔係損人利己係咩呀?

打牌仲衰,贏自己親戚朋友d錢!

損人利己啱唔啱呀?梗係唔啱啦!

點解可以立法,合法咁損人利己呀?痴線!

損人利己都無錯,咁仲使咩講道理,講法律唶,鬥損人利己得啦!自相矛盾!

所以真係贏左都攞番大半出黎做善事啦,唔係 lucky money 黎架!

仲有唔好買3T添呀!346,唔係馬會輸比你架,係你預支左三世祿炸,贏左都窮番三世呀!

普通聖誕,公司抽獎個d,就無所謂!

我就從來未去過澳門,亦都無諗過將來去澳門啦,賺埋呢d錢,做人都做得唔舒服啦!

以前細個唔識諗就話唶,讀完大學都唔去諗下呢d問題,咁就真係,搞錯!

無諗過呢個問題之前,賭錢,買六合彩,試過!

我仲試過十幾年前有次行過投注站附近,突然個腦出現我自己把聲,講"7既倍數"呢句說話.咩7既倍數呀?投注站?六合彩?跟住入去買左條7,14,21,28,35,42,結果開7,14,21,28,中左200蚊添!

不過而家?賭錢?唔使預我!

同我賭?好呀!輸左聽我唱歌啦!笨!贏左比你唱囉!

刷牙
Topic: 10奇遇 Trek
請先看<提示>.

除左消滅暗瘡,我又嘗試消滅飛滋添!

細個個陣就話要刷牙,大個左就話要刷埋牙肉,十年前又話要刷埋脷苔!舉一反三,好明顯遲早都話要刷晒成個口架啦,咁我就諗住唔使等你講,開始成個口都刷晒啦!

牙肉出面,入面,上顎,下顎,脷面,脷底,脷尖,脷則,面珠登,口唇,連喉嚨椗都差d刷埋!不過又唔使刷過龍,唔使太用力搏命刷,刷牙咁細力就得啦,我都係朝早刷一次牙架唶!

頭幾年都無乜效咁,梗係啦,積左幾十年既細菌係個口入邊!

不過幾年後就開始見效囉喎!以前1年都起碼兩三次飛滋,但係近呢5年,咬唔到既位,真係未痛過咁滯,記憶中得1次,可能有兩次飛滋咁多囉!

其他野都可能有關既,譬如年年換牙刷啦,無論睇落幾新淨都照換,所以我用十蚊3支個d架炸!

牙膏都唔會用死一隻,用完就買第二隻,隻隻都用下,隻隻好處都有d,隻隻菌都殺下咁啦!其實我所有化學野都幾隻輪住用,皂液,洗頭水,潤膚膏,潤唇膏,洗潔精,洗衣粉,眼藥水....,費事d有害物質長期積聚啦!而加d野全部大陸做,真係怕怕架!

仲有呢幾年晚餐之後用牙線啦,因為我兩隻智慧齒都生歪左,牙刷牙籤都無符,成日都係個兩隻攝牙罅,有隻仲因為咁蛀左剝埋,所以而加我得29隻牙炸!

點解唔係31隻?因為我從來都無出過下面個兩隻智慧齒囉,證明我得上等智慧架啦!

所以都話唔好太依賴化學野啦,簡單,直接,天然,一樣咁掂啦!

不過點解過左咁多年,d專家仲未叫人刷晒成個口架?起碼都叫人刷埋脷底啦,唔係咁點顯得我醒目過人呀!依牙!

暗瘡
Topic: 10奇遇 Trek
請先看<提示>.

幾十歲人,食少少熱氣野,都仲生暗瘡,有無搞錯!

諗起 F.1 第一次生暗瘡,都幾搞笑.

個陣比個同學(無謂再話佢啦)傳染左生左粒暗瘡,咁我同 Lionel講,呀邊個的暗瘡會傳染架,佢唔信,我咪用閃電既手法,點一點粒暗瘡,再點一點佢塊面囉!唔信?睇下你生唔生!

第二朝番學,佢話尋晚搏老命洗面,今朝都係生左成大粒暗瘡出黎!

咁我就同佢捉呀邊個同班主任 King Kong投訴啦,叫佢睇醫生啦,會傳染就唔好番學啦,一係就攞醫生紙證明唔會傳染啦,咁呀 King Kong就唔信啦,唔信呀?咁我就梗係黎多次啦,用快過閃電既手法,點一點 Lionel粒暗瘡,再點一點 King Kong塊面,咁你話唔會呀嗎!(我係咪好抵死呢!)

結果第三日,King Kong就梗係同 Lionel同一命運,生左粒大暗瘡啦!唔信唔得啦,結果死死地氣,叫呀邊個去睇醫生囉!

到左第四日,呀邊個話睇左醫生,醫生話唔會傳染喎,但係叫佢攞醫生紙證明,就梗係死都話無啦!

後黎,我就梗係生到成面暗瘡啦,Lionel同 King Kong,唔知係咪傳上傳無咁毒,好似好快就無事.

個隻死人名牌暗瘡膏,都無鬼用既,查左好番係隔離就再生,再查好番再隔離又生,查左4,5年,到左 F.4,5,越查越多,把幾火,唔查啦!

點搞好呢?塊面咁多面油,一於成日去廁所濕下塊面,抹左d面油佢!於是返學,小息,lunch time,放學,返到屋企,黃昏,食完飯,臨訓教,一日抹足7,8次!

仲有咩搞呢?d毛孔塞住晒,咁多細菌,一於搏命洗面!每日沖涼,就對住花灑,用條毛巾係咁卒塊面,卒卒卒,卒佢一百下!

初初d暗瘡好似不受控制咁,仲係越爆越多,但係幾個月之後,開始減少啦,大半年後,終於無晒,仲又白又滑添!Yeah!

早知一早就學 Lionel咁,搏老命洗面啦!

大慨10年前,我堂家姐個女又係16,7,又係成面暗瘡,又係暗瘡膏查極都唔好,我就教佢抹面油同搏命洗面呢兩招,結果又係靚番晒,掂呀!

所以有時真係唔使靠化學野,簡單,直接,天然,仲掂啦!