雙重人格
Topic: 10奇遇 Trek
請先看<提示>.

新聞話個殺阿媽青年自己制製造有多重人格,其實我都覺我有雙重人格架!

中四 Ronald教英文,有日一上堂就好嬲,鬧點解 D作文咁差.我心諗:有作文咩?我有無交呢?

佢攞最差個編出黎,張D錯處寫係黑板.我睇完即刻大笑,心諗:邊會錯到咁架!

Ronald扯火鬧我:你笑咩呀Adam Lam!(當然佢用英文講野啦) 我嚇到即刻收聲!

佢攞起張作文:我地睇吓邊個作既!.....然後扮搵個名,用好大聲話:Adam Lam!

我當堂O咀!我寫既?真係我寫既?點解我會錯D咁既野架?我有寫個D咁既野咩?我仲要當住全班笑我自己寫既野?

根住佢鬧乜我都聽唔入耳,到派番編文番黎一睇......真係我D字黎喎,真係我寫喎,但係點解由頭睇到尾都完全無印象既?我作既?咁奇?

當時我就第一次懷疑可能有兩個我.

到中六彭仔教物理,又有日上堂,又係有少少嬲,省我地測驗咁差.我心諗:上個禮拜,好似係有話測驗喎,但係我有測咩?我有請假咩?

佢話:大半班唔合格,咁簡單都唔識答,點考大學呀?得一個答得啱,真係點得架!

我心諗:邊個咁好野,唔通係阿策?

彭仔攞起疊卷,睇吓個名:Adam Lam!

我當堂呆左!我最高分?得我識答?

根住佢鬧乜我又聽唔入耳,到派番份卷番黎一睇......真係我D字黎喎,但係條題目到底問咩呀?點解我會識答架?無人識答無得抄喎!

呢次就第二次,令我更加懷疑唔通真係有兩個我?係一個 Physics比較好,英文比較差既我?

有記錄既野就可以睇得番,但係無記錄既野就睇唔番.我間唔中都覺得自己好似有 D時候既記憶無左,有 D人又會問我: Adam你尋日....,但係又唔講落去,咁即係咩呢?我到底尋日做左 D咩呢?

咁你地有無覺得我有時 D性格行為會無啦啦唔同左架?

冧瞓
Topic: 10奇遇 Trek
請先看<提示>.

我以前好冧瞓,但係而加好醒訓.

細個瞓教,可以瞓十幾個鍾,仲可以瞓教一個姿勢唔郁.我試過特登擺一個姿勢,跟住第日瞓醒,可以完全一樣,無郁過!

直至廿到尾,三字頭,開始夠瞓,十個八個鐘就醒,唔會瞓極唔夠.到左加陣,好反瞓,成晚醒幾次,一醒就反黎反去,有時仲醒左瞓唔番.雖然跟住個晚好眼瞓,但係都仲係反黎反去,係咁醒.

睇黎過多幾年,我要去晨運啦,有無人一齊呀?!

前空翻
Topic: 10奇遇 Trek
請先看<提示>.

硬頸變軟頸,為一既可能,就係因為個次險死還生既意外.

F.5 一堂體育堂,玩前空翻.有Jorge同唔記得邊過一人企一邊,負責幫手轉個空翻動作.輪到我,全場平息靜氣,我以勇往直前之勢,衝呀,雙腳跳上踏板,一彈,一跳,彈唔起喎!我轉,頭下腳上,轉唔到喎!

係呢個千均一發之際,Jorge兩條友居然望左去後面,無幫我轉喎!到我就黎掂地,先擰番過黎扶一扶我.結果,頭頂直插落墊褥,條頸發出扣人心弦既霹靂啪嘞聲!

死梗嘞,斷硬嘞,無命嘞!阿Sir即刻走過黎,睇吓我死得未.我慢慢企番起身,慢慢郁吓條頸,居然唔痛喎,郁得喎,無事喎!YEAH!我無死到呀!

一定係我本身條頸夠粗夠硬,先頂到呢下雷霆一擊,不過肌肉肯定嚴重內傷,震斷經脈,所以慢慢變到幾年後無晒力.後腦仲周不時好似比五雷轟頂擊中咁,電到又痺又痛.不過隨著條頸硬番,就越黎越少發作,最近好多年無電過啦!

所以話做人硬頸,其實都係好野黎架!

軟頸
Topic: 10奇遇 Trek
請先看<提示>.

我雖然硬頸,但係有幾年都好軟頸喎.

讀大學 YEAR 2,暑假要去公司實習,有日食晏一個人落街,一出大堂,轉右,行左兩步,咿!點解我會見到迎面而來個條友,係正佢後面個個靚女個樣既?

原來我個頭側到掂到膊頭咁濟,我自己都唔知,搞到我好似係到裝個女仔咁,幾鬼尷尬,即刻用手扮捽頸,一路行一路左右擺吓個頭!不過話時話,個個女仔真係好鬼死靚!

之後發現個頭成日都係咁,所以決定練番條頸D肌肉,每日用手推住個頭,再用頸力頂番正個頭,前後左右都做幾十吓,最後條頸先有番力,個頭先正番!

後尾無做一排,條頸又好似軟番,個頭又30度角,所以直到依家我都日日有做,仲做成兩三次六七十吓,所以就算無細個咁硬頸,要硬係上黎,都好硬吓架!

硬頸
Topic: 10奇遇 Trek
請先看<提示>.

你地硬唔硬頸既呢?

我細個好硬頸,每次去飛髮舖飛髮,個飛髮佬推我個頭,無論係前後左右,都推唔郁,條頸自動同佢鬥力,要好大力先撳得低我個頭,佢都話未見過咁硬頸既人!

大個左之後去剪髮,都係我見人推我個頭,自己控制郁條頸,費事同人鬥力.

咁你地覺得我硬唔硬頸呢?

着褲
Topic: 10奇遇 Trek
-----------
請先看<提示>.

你地着褲習慣着邊隻腳先呢?左搲左腳先,右搲右腳先?

我發覺着長褲同短褲係唔同個喎!

長褲右腳先,短褲左腳先,再短D,底褲又變番右腳先喎!點解呢?

根據我既研究,係同着褲個動作既危險程度有關.

着短褲,着第二隻腳比較危險,企得穩D既重心腳會着先.所以我左搲就係左腳嘞!

着長褲同底褲,着第一隻腳比較危險,企得無咁穩既非重心腳會着先.所以我就右腳嘞!

除褲就自然掉番轉.大家試吓睇吓你地係咪咁樣?

電拖板
Topic: 10奇遇 Trek
請先看<提示>.

七月十四啦,講吓應節野先!!!!

大家屋企實有電拖板啦,咁有無D每個插蘇位都有個開關掣同燈仔,開就著燈無開就熄燈既電拖板呀?

咁有無D插蘇位明明無著到,但係盞燈都會半光半暗咁著左,閃吓閃吓咁呀~~~~~!

千祈唔好行埋去搞佢呀!可能有個D野係度吸緊D負能量架~~~~~! 嘩~~~~~~~~!

夠無聊未!?

不良姿勢
Topic: 10奇遇 Trek
請先看<提示>.

大家有無一D唔正確既習慣姿勢呢?

我記得,有一日,幾個中學同學傾偈.Peter Tam 問我,點解我個頭成日歪埋一邊?

我話:有咩?無呀! 佢同第二個同學都話:有呀!

我嘗試打側個頭,佢地話唔係咁,係左右擰個隻打側.

我叫佢幫我擰正個頭,嘩!我先知我平時個頭歪得咁勁!

諗諗吓,應該係因為右眼有近視,所以依賴左眼,搞到個頭側晒都唔知.

我再問仲有無其他,佢地話我成日好似無黎神氣,對眼成日好似向下望.

我話:我而加咪望住你對眼囉! Peter話:你而加好似望住我心口!

我望佢心口,佢話似望肚臍,我望佢頭殼頂,佢話似望對眼!

我撐到對眼最大,Patrick 就話而加似正常,唔似眼訓,叫我平時都係咁.

嘩!我要成日撐大對眼,仲要望人頭殼頂,先似正常望人,好辛苦唶!撐大對眼一陣,額頭D肌肉都唔知幾攰,對眼又乾,又鬼咁光!

結果我都係照平時,個頭歪就歪,對眼無神就無神,望人心口即係望人對眼,理得你點睇我!

我諗我而加應該都無變,因為成日就算冬天著晒大褸,我係街頭見到街尾既女人,肥婆,阿婆,甚至豬扒,佢地離遠見到我,都會用手掩住心口!痴線!你地著住大褸架!傻婆!

左右反轉
Topic: 10奇遇 Trek
請先看<提示>.

我係左搲就大家都知啦,但係我左右反轉就唔係個個都知喎!

係左右反轉,唔係左右不分喎!左右不分係唔知邊便左邊便右,左右反轉就左一定右,右一定左.

諗一陣,就知道邊便左邊便右,但即時反應就一定係左邊舉起右手,右邊舉起左手!

所以講方向,我通常都會講呢邊個邊,唔會講左定右.

坐車你問我轉左定轉右,我一定答你呢邊同個邊,即係我坐既呢邊,同你坐既個邊,知無?

所以我都從來無諗住學揸車,因為都無左搲車,右腳剎車,我實用左腳踩左油門啦!我肯定好多交通意外都係咁發生架啦!D車廠都無為我地D左搲既人諗吓既!大學應該做呢個統計啦!

其實無論中文英文,都係左右左右, left right left right,左手行先架啦.我叫你D右搲仔左右左右咁出拳,你咪又係出右手先!唔信?你試吓而加坐係到,左右左右咁擰個頭,睇吓你係咪左右反轉?

仲有好搞笑,以前住興華二期對面阿周太,明明係周乜乜既阿媽,但係我永遠都係哎佢陳太,斜對面阿陳太,明明係陳物物既阿媽,但係我永遠都係哎佢周太!不過隔離余咩咩既阿媽余太,我又唔會哎錯個喎!左面陳太右面周太呀嗎,我記得呀!所以周太個老公咪陳生,陳太個老公咪周生囉!之不過周生我都係哎佢陳生,陳生我都係哎佢周生之嗎! Wakaka....

行路唔睇人
Topic: 10奇遇 Trek
請先看<提示>.

大家有乜野特別既習慣呢?我有好多,第一個係行路唔睇人.

細細個屋企都係教行路唔好掛住四圍望,要望住前面,望住條路,所以我一向都係望住前面,人多既時候就望住人同人之間既人罅,一路向住人罅既方向行,完全唔會留意係身邊出現既人.

記得大概中二三,柴灣邨開始拆,阿公無再開番米鋪,柴灣大名頂頂既黃金記就咁就結束左佢既光榮歲月!之後有一排,阿公就係興華二期地下大lift口賣玉,就坐係大圓柱既柱躉個到賣.我每日放學都係到搭lift番屋企,有一日,屋企人傾偈,講開,阿公係樓下賣玉,我話:吓,乜個個阿公黎既咩?

你唔知咩? "我見有個阿伯坐係到賣玉呀,不過我無望到佢個樣喎!" 咁你望住D咩呀? "望住條路囉,望住架lift囉,望住兩架lift上面個顯示牌睇下架lift到未,使唔使追lift囉!"

跟住第二日放學,先見到真係阿公,先識叫阿公!

又有一次放學,係北角健康邨落左校巴轉巴士番柴灣,坐到番柴灣,再轉個彎就到站,坐正我前面個行,全程訓教個兩公婆訓醒傾偈,講潮州話,一聽,點解把聲咁似阿爸同阿媽既?再聽,真係好似喎,一望,真係阿爸同阿媽喎!

我哎:阿爸阿媽!佢地擰轉頭望我:咿,你幾時上車架? "健康邨囉!" 你唔叫我地? "我都唔知!" 你上車見唔到咩? "上車望邊到有位之嗎,都無望人!" 坐低左又見唔到咩? "坐低望窗口囉,你地訓左又無出聲!" 唉到站啦,落車啦落車啦,落左車先講啦......

仲有一次中六七,屋企人傾偈,講開,對面呀周太係興華一期去地鐵樓梯口個間麵包店賣麵包,我話:吓,乜周太係個到賣麵包咩?

賣左好耐啦,你無係個度買麵包咩? "有呀,成日買啦,不過我無見個佢喎!" 咁你買麵包唔望人既咩? "買麵包咪望住D麵包囉!點會望住個人唶?D麵包係個人塊面到咩!" 咁找錢呢? "找錢咪望住D錢囉!"

跟住第二日經過買麵包,特登望吓個人,真係周太喎,先識同周太打招呼!你知啦,屋邨講野,大聲D隔離左右都聽到晒架嗎,佢仲同我講:你D麵包呀,睇吓啦!找錢呀,望住呀!

最搞笑個次,大概十年前,啱啱開始搞公司,我同個拍檔去左尖東,同一間酒店傾搞wireless,走既時侯一路行一路傾偈,諗住搭隧巴番灣仔 Office,行到好遠,去到街尾過馬路,我突然抬高頭,四圍望,問個拍檔:咿?頭先係咪有人哎我呀?

係呀,仲哎到好大聲添呀? "吓,點解你唔話我知呀?" 我以為你扮聽唔到囉! "吓,點解我會扮聽唔到呀?咩人黎架?" 係頭先間酒店D職員黎架! "女仔黎架?" 係呀? "點既樣架?" 幾靚女架!

我心諗:吓?乜我有識得幾靚女既女仔既咩?

過左無耐再去傾第二次,終於見到,原來係 Fanny Man!蝦!原來我起碼都識得一個靚女喎!

我就同佢打招呼:Hi Fanny! "Adammmmm!" 你上次好似哎我呀? "係呀......!" 我聽唔到呀,Hehehe.....

跟住過左一排,又好似去左第三次,我又好似聽唔到佢哎我,無應佢呀!哈哈哈哈哈哈哈!

大家係咪好羨慕我呢?有個靚女哎我,哎到成條街都聽到,我仲要唔理佢!嘩,真係不枉此生呀!

大家有無試過係街見到我,同我打招呼,但係我無應你呢?近呢幾年搬左出黎住,自己買餸左望右望,應該好左D啦,不過如果以後再係街見到我,同我打招呼,哎我都唔應你,走過黎拍我膊頭啦!我唔係扮唔識你呀,係真係聽你唔到睇你唔到架炸!
---------------------------
早排講過我行路唔睇人,哎我都唔理既,醒起原來仲有一單.

廿年前返荃灣,朝朝8點零,沿地鐵站行番公司.有次行到大廈門口,咿?頭先好似有人哎我喎?我就擰轉頭,四圍望.

咁啱有個同事行到我後面:Adam,你做咩呀? "頭先係咪有人哎我呀?" 係呀,有個女仔係巴士上面哎你呀,哎到成條街都聽到呀! "巴士?好大聲哎我?"

我望吓巴士站既個D巴士,同事話:走左啦,去左地鐵站個便啦!

過左幾日,又有人哎我,今次我聽到啦,一望,原來係 Millar Wong! "Hi Millar!"

後尾成班預科同學出黎食飯,先知佢搬左去荃灣,成日番工見到我,仲哎左我十幾次,不過我先應得佢一兩次炸!所以後尾都廢鬼事哎我啦!嘩哈哈哈哈哈哈哈!
---------------------------
我又諗起一單行路唔睇人,有人哎我都唔理佢既CASE啦.

個陣入左U,個幾年日讀夜讀,間唔中悶悶地都會落銅鑼灣行個圈.

有日係SOGO後面行,由金堡行去總統個便,行行吓突然間有人係後面拍我膊頭哎我:ADAM!

我擰轉一睇:嘩!John Liu!好耐無見呀!

原來佢係到番工,係舖頭望出黎見到我,大哎我幾聲我都無反應,就樸出黎捉我.

之後都試過一兩次行過,又係行到好遠先發覺好似有人哎我,先識得擰番轉頭,老遠咁同佢SAY HI,再行番轉頭傾幾句,哈哈哈!
---------------------------
仲有一單,個陣入大學之後開始,差唔多個個禮拜日都去維園跑步減肥,跑左好多年,跑完就行去銅鑼灣搭車.

個陣好多人踢波,我行過有時都會停低睇吓.

有次睇睇吓,咿?頭先好似有人哎我喎?望吓望吓,原來就係我望左好耐呢個場入面踢緊波既人叫我,再望真 D,原來係 Sunny Lam同 Ben Yan 佢地!

我睇左成個字,淨係望住個波,同 D球員既腳法,完全無望過佢地個樣,哈哈哈!

佢地仲叫我一齊踢,我跑完步死死吓,梗係唔踢啦.

之後劇情正正常常,大家都估到,我又好多次跑完步睇人踢波,佢地猛咁哎我,我先識應番佢地,甚至唔應佢地啦,哈哈哈哈哈!