Mga Liham Para sa Aking Magiging Kabiyak
Pinakamamahal ko,

Isang malaking pagkabigla sa karamihan nang tanggapin ko nang maaga ang pag-ibig mo. Dalawang taong pinakamalalapit sa puso ko ang nagulat at nag-alala para sa akin.

Ang isa ay iniisip na baka magmukha akong "cheap" -na hindi pa lubos ang pagkakakilala natin dahil sandaling panahon pa lamang tayong nagkakasama at ang isa naman ay nag-iisip na nagmamadali lang akong mag-asawa.

Nasasaktan ako, Mahal, dahil parang nawalan sila ng tiwala sa akin. Hindi nila naisip na pinag-isipan ko naman ito ng mabuti. Ipinanalangin ko rin ito sa Panginoon. Alam ko sa puso ko na ikaw ang kaloob ng Panginoon sa kin. Hindi ko naman kailangan ng sobrang habang taon para makapag-isip eh. Dahil me usapan na kami noon ni Lord, pag nakita na kita, malalaman ko yun..Mararamdaman ko.. Dahil di pa man tayo nagkakaharap, alam ko na mga katangian mo. Karugtong ka na kasi ng buhay ko sapagkat ikaw ang itinakda ng Panginoon na para sa akin.

Ganunpaman ay alam kong mahal din nila ko kaya natutuwa sila na masaya ko ngayon sa piling mo. At talagang masaya ko ngayon, Mahal... Bagama't dumadating ang mga oras ng pag-aalinlangan, napapawi naman yun lagi ng pag-ibig mo.

Mga Liham Para sa Aking Magiging Kabiyak
Pinakamamahal ko,

Kung alam mo lang ang nararamdaman ko ngayon. Magkahalong takot, pag-aalinlangan at kasiyahan. Takot dahil isang tao na naman ang napapalapit sa kin. Isang taong unti-unting bumibihag na sa puso ko.Nangangamba ako. Paano kung magkamali na naman ako? Kung hindi pala ikaw siya. Sana, Mahal, ikaw na talaga sya eh. Hindi mo lang alam kung gaano ko pinapangarap sa puso ko na ikaw na nga ang nakakasama ko ngayon...

Napakaraming pangamba at pag-aalinlangan pa rin ang naiisip ko ngayon. Mga agam-agam at malalaking katanungang alam ko naman sa puso ko na dahan-dahang napapawi at nasasagot na ng mga salitang namumutawi sa kanyang mga labi. Kaya nga, parang gusto ko ng maniwala,Irog ko, na ikaw nga ang kausap kong iyon. Hindi ba't sinabi ko ng tanging ang pag-ibig mo lamang ang makakapagpawi ng lahat ng mga pangamba sa aking puso?

Ang panalangin ko na lang ngayon, Mahal ko, kung hindi nga ikaw ang lalaking yun..Sana'y ngayon pa lang ay ipakita na Niya sa akin. Kung ayaw pa rin Niya akong ibahagi sa iyo sapagkat may mga bagay na nais pa Siyang ipagawa sa akin. Ngayon pa lamang ay ipaalam na Niya.. Subalit, Mahal ko, masama bang hilingin ko rin na sana...sana, Irog ko, ikaw na nga siya...

Mga Liham Para sa Aking Magiging Kabiyak
Mood:  caffeinated
Pinakamamahal ko,

Sa araw-araw na dumadaan, isang bagay ang tanging natitiyak ko. Na Siya lamang ang nakakaalam ng mga bagay at kung sino ang taong makabubuti para sa atin.

Sadyang mahiwaga ang mga pamamaraan ng Panginoon...

Mga Liham Para sa Aking Magiging Kabiyak
Mood:  hug me
Aking Irog,

Isang buwan na ang nakalipas... Inakala ko sa puso ko na nakita na kita... Ngunit isa lang palang malaking pagkakamali. Nagtiwala ako sa isang taong punong-puno ng kasinungalingan at pagkukunwari. Mabuti na lamang at mahal talaga ako ng Panginoon dahil hindi Niya hinayaang magtagal pa ang isang relasyong alam Niyang maglalayo lang sa akin sa Kanya. Kung nagtagal pa yun, isang malaking pagkakamali na naman ang magagawa ko sa yo at sa Kanya. Alam ko...sa puso ko... kaya itinulot ng Lord na matuklasan ko agad ang mga bagay na ito sa pinakamaikling panahon ay dahil ayaw Niya na mangyari ang bagay na yun. Madami na kong nagawang kasalanan sa Kanya at sa iyo kaya ngayon pa lang nilayo na Niya ko sa tukso.

Nalulungkot ako ngayon dahil sa nangyari sa amin. Dahil nauwi ang isang magandang pagkakaibigan sa isang walang kabuluhang relasyon na nagbunga lang ng sakit ng loob sa bawat isa sa amin. Oo, mahal ko, patawarin mo ko kung sa sandaling panahon ay sinubukan kong isugal ang puso ko sa kanya. Dapat sana'y kinilala ko pa sya ng mabuti. Dapat sana'y inalam ko kung totoo nga na ang lalaking nagpapahayag ng pagmamahal sa akin noon ay ikaw talaga. Lahat kasi ng mga salitang lumabas sa bibig nya ay ang mga salitang pinangarap kong marinig mula sa yo. Kasalanan ko rin siguro. Gusto ko kasing magkita na tayo eh. Kaya nung marinig ko mga salitang yun sa kanya, inisip kong ikaw na kausap ko. Ganunpaman, ipinagpapasalamat ko na rin na nangyari ito. Sapagkat mas lalo ko pang napapatunayan ngayon na hindi ako pinababayaan ng Lord. Na habang wala ka pa, wala akong dapat maging dahilan ng pangungulila dahil kasama ko Siya. Siya na tunay na umiibig sa akin. Marahil ay hindi pa tapos ang paghubog Niya sa pagkatao ko kaya di pa Siya handa na ipakilala ko sa yo. Upang pagdating ng araw na iyon, mas maging karapat-dapat ako sa pagmamahal mo.

Sa ngayon... patuloy akong maghihintay sa pagdating mo. Ngunit me kapayapaan at kaligayahan kong gagawin yon. Sapagkat wala ka man sa tabi ko, kasama ko ang Panginoon.

Mga Liham Para sa Aking Magiging Kabiyak
Irog ko,

Natapos na rin sa wakas ang mga papeles ko. Mamaya na ang alis ko pauwing Pinas. Excited ako na kinakabahan. Magkakilala na kaya tayo pag-uwi ko? *hehehe* Eto na naman ako eh no? nagtatanong na naman. Haaayyy.. naiisip ko lang kasi. Sabi nga nila, hindi raw kita dapat hanapin eh. Dahil darating ka naman sa tamang panahon. Kaya lang syempre, di ko maiwasan minsan eh. Kaya medyo tumatanaw-tanaw ako. Baka kasi naliligaw ka na talaga kaya ka di makarating sa kin. Paano kung mahina rin ang sense of direction mo? *hehehe*

Me ikukumpisal nga pala ko sa yo, Irog, pag-uwi ko kasi me dalawang tao kong gustong makausap talaga. Isa na rito si Mike. Huwag kang magdadamdam, Irog, gusto ko lang syang makausap para maibigay ko sa kanya ng harapan ang pagpapatawad ko. Nais ko rin sana syang pasalamatan dahil kung hindi kami nagkahiwalay, hindi ko siguro mararanasan ang marami pa palang bagay na dapat kong pagdaanan. Gusto kong sabihin sa kanya na hindi niya ko nasira sa ginawa niyang yun, sa halip ay binigay niya muli sa akin ang buhay ko. Oo, nasaktan ako noon. Subalit mas lalo akong pinatibay ng karanasang iyon. Dahil doon mas napalapit ako sa Panginoon. Napatunayan ko na hindi ko makikita sa tao ang pinakadalisay na pagmamahal. Ang Panginoon lang ang kayang magbigay sa akin nun. Gusto kong mapalaya na siya sa kung anong guilt ang nararamdaman niya pa. Ipaalam sa kanya kung gaano ko kasaya ngayon sa buhay ko kaya't gusto ko rin sanang maging masaya siya at wala ng anumang galit namamahay sa aming mga puso.

Irog, sana dumating ang panahon na maging magkaibigan na ulit kami. Gusto ko talaga yun. Sana nga lang wag kang magagalit kung magkaganun ha. Mahal ko na lang siya bilang isang kaibigan dahil naging bahagi na rin siya ng buhay ko eh. Samantalang ikaw.. iba ka, alam mo ba yun? -Ikaw kasi ang buhay ko.