美化侵略
Topic: 12假史 Liestory
請先看<提示>.

其實可能當時我自己都唔願意接受呢個事實,所以就無去問無去諗佢.但係呢幾年,阿港獨之父成日講成日講,話後生仔唔認自己係中國人,大陸政府又成日講成日講,話咩自古以來固有領土,搞到我諗起一D中史既課文內容,所以就上網查下啦.

結果比我搵到兩樣野喎!原來係漢朝頭百幾年,成個珠江流域同埋越南北部,係有個南越國個喎,但係我地讀書個陣,好似完全無提過喎!就咁話楚漢爭霸,漢朝統一天下咋喎!

另外更重要既就係比我搵得番呢一句歷史,証實左我既記憶,亦都証實左我既懷疑.就係呢句:秦滅六國,之後,派左幾十萬軍隊,進入嶺南同越南北部,設立左南海,桂林,同埋象三個郡!

呢句歷史睇到兩件事,第一,証實左珠江流域唔屬於楚國,如果屬於楚國就應該佔領埋先至叫滅左楚國啦!滅左六國之後,先至派幾十萬軍隊進入嶺南,即係唔係楚國架啦!唔係楚國咁係咩呀?大家睇下越南呢個名,越既南部,有越南就梗有越中啦.咁個越即係咩呀?原來係百越國!越南即係百越既南部!珠江流域原本係屬於百越國既,即係我地既祖先,係百越族,唔係北方長江黃河流域既華夏民族!

仲有,呢句歷史睇到D咩呀?幾十萬軍隊進入嶺南!HEEE!大家係咪覺得呢句野好孰口面呢?日本仔都係幾十萬軍隊進入中國之嗎!侵略就侵略啦!無仗打點會派幾十萬軍隊黎呀?打完仗放假去旅行咩!

自己美化侵略二千幾年,夠膽日日鬧日本仔美化侵略廿幾年?你衰過人地一百倍呀,唔知醜!日本仔以後可以正正式式竄改歷史,美化侵略,幾十萬軍隊進入中國,唔使改番,唔使向中國道歉,因為中國人,無資格鬧你!

謊蕪領土
Topic: 12假史 Liestory
請先看<提示>.

話說仲係當年 F.1 中史,除左見到條黃河變左之外,我仲發覺到一D好奇怪既野喎!

點解春秋戰國既地圖,個楚國既地圖咁怪既呢?楚國領土包括左成條長江流域中下游同埋成個珠江流域,咁大,但係點解淨係得長江邊有一兩個城市地名,成個珠江流域都無一個地名既呢?點解楚國咁大,大過秦國咁多倍,乜唔係應該最強大既咩?點解會打輸比秦國既呢?

大家其實發唔發現到架?梗係發現到啦!係人都見到啦,係得我以為自己好醒,得我見到啫!只不過你地唔夠膽講之嗎!可?我唔理你知唔知啦,咁我都會繼續講落去架勒!當講比D唔睇書既人知囉!

一路教落去,成個珠江流域真係乜野都無個喎!珠江流域,魚米之鄉,唔係兵家必爭之地黎架咩?點解春秋戰國幾百年,打到七國咁亂,但係成個珠江流域,一個歷史戰場,一件歷史事跡,一個歷史人物都無既呢?

其實再一路教落去,去到三國時代,又係打到成個中國亂晒龍,但係個珠江流域都仲係一個歷史戰場,一件歷史事跡,一個歷史人物都無個喎!吓?李鄭屋古墓都算呀?

一直去到唐朝先有囉!呀韓愈係潮州寫左篇祭鱷魚文囉!野史就早少少,係南北朝呀達摩坐船黎到珠江上岸,跟住一葦渡江去左北方少林寺囉.但係去到唐朝呀六祖慧能係少林繼承左衣缽,都要比中原人話係南蠻,追殺佢想搶番個衣缽,要番黎嶺南匿埋,老左先夠膽出番黎,將禪宗發揚光大囉!

去到一千四百年前先至有正式歷史,春秋到唐朝中間千幾年咩都無,咁到底珠江流域係咪屬於楚國架?將條國界夾硬"括"理落黎,再油埋同一隻色,就話係楚國既領土?係真唔係架?

官員改革
Topic: 11玩嘢PlayPolitic
請先看<提示>.

一.高官問責制:完全無罰則.
幾時道歉?
幾時減人工,減幾多?
幾時炒魷落台?
全部跟公務員處罰準則.
包括特首.

二.特首選舉:有無賄選?
提名委員會:投票選特首.
侯選人承諾比官職公職:即係延後利益.
延後利益:即係賄選.
修改選舉條例:規定類似協議,都係賄選.
無論最終:有無落實協議.
ICAC:都要拉特首同受賄委員.

三.ICAC:點查特首?
警察,ICAC 查高官:停職接受調查.
就算政府,警察,或者 ICAC 內部調查:都要停職接受調查.
ICAC 查特首:當然要停職啦!
如果特首係清白:自己都應該主動停職,比司長署任特首,等人查自己啦.
除非身有屎:先至唔敢放低權力比人查架啫!
查特首唔使停職:哼哈哈!我又睇下你查到幾時囉!

結論:
1.邊個贊成,就知邊個真心為香港解決問題.
2.係呀,我講既野都係錯架,不過而加唔贊成,猛咁話我講既野錯,到左第時邊個改頭換面攞黎用,邊個同意,贊成既,就同我一樣,正白痴.
3.玩政治,就係咁簡單!

諗清睇楚
Topic: 12假史 Liestory
請先看<提示>.

話說又係當年 F.1,有堂中史講到下一課,好似大概去到春秋戰國咁上下,一揭開本書,一睇,咿?咁既?幅中國地圖同前面唔同既?再係咁揭,後面全部都變晒一樣喎!咁奇既?

咁我就問呀SIR:呀SIR,點解幅中國地圖唔同左既?
呀SIR:咩唔同左呀?
我話:點解條黃河既出海口,由山東個 DEUNG DEUNG 下面,走左去山東個 DEUNG DEUNG 上面既?
有個同學就話:印錯左咋下話?
我話:唔係播!後面全部都變晒咁樣喎!

所有人一齊揭揭揭,見到真係喎,唔係印錯喎!
咁呀SIR就起身行出黑板,一路畫一路答啦:其實因為黃河成日泛濫,所以就成日改道變黎變去.其實再以前條黃河係同長江一樣,就咁一條橫線由西向東流,無呢個凸字既河套架.後黎又泛濫大改道,先至變成宜加有個凸字咁樣,同埋因為疏導左,先至無咁易再泛濫嘞.

我就話:嘩!條黃河咁闊咁深,一改道突然間咁多水沖過黎,由平地沖到變條河,咁咪死好多人?唔怪得呀大禹治到水可以有王帝做啦!話唔定條黃河個凸字都係呀大禹治水整出黎架喎!

咁你地 F.1 上中史堂有無人見到條黃河既出海口,由山東個 DEUNG DEUNG 下面,走左去山東個 DEUNG DEUNG 上面呀?有無發現其他科既書入面有奇怪野呢?

乜野叫返學?先生講既野聽得明,書入面寫既野畫既圖記得晒背晒入腦,咁就叫返學呀?咁唔係叫返學,咁叫做洗腦!
點先叫返學?好似我咁,先生講既所有野由頭到尾諗一次啱唔啱,書入面寫既野,畫既圖,登既相,全部睇清睇楚有無唔妥有無問題有無奇怪,咁先叫返學!

議員改革
Topic: 11玩嘢PlayPolitic
請先看<提示>.

百幾年前:社會節奏慢,人少,無咁多問題,立法會議員有時間,做得晒.
今時今日:社會節奏快,人超多,超多問題,立法會議員無時間,做唔晒.
無時間:開得呢個會,缺席果個會.
唔夠人開會:流會.
做唔晒:加班,再加班,都做唔晒.

各級高官:更加多野做.
做唔晒:有大量公務員幫佢做.
開會:有副局長,政治助理,唔使下下自己開.
有病,出埠:有署任暫代.

議員助理:可作署任立法會議員.
如果同香港公務有關既工作,出埠,或者立法會同時開多個會:可由議員助理暫代開會.
橫掂講既野:都係議員助理幫你寫,你講佢講都一樣.
投票決定,問題觀點:助理都知你想點.
但係同香港公務無關既工作,人大,政協,去旅行,或者自己個人私事,公司生意:就唔可以由議員助理暫代開會,唔返仲要扣人工.
區議會議員:一樣方法,用署任議員.

開會齊人:無得點人拉布.
幾多問題:都可以盡快處理.
唔使加班:無得呃OT.
仲可以:培養政治人才,一舉七得.

結論:
1.邊個贊成,就知邊個真心為香港解決問題.
2.係呀,我講既野都係錯架,不過而加唔贊成,猛咁話我講既野錯,到左第時邊個改頭換面攞黎用,邊個同意,贊成既,就同我一樣,正白痴.
3.玩政治,就係咁簡單!

潮語出處2
Topic: 10奇遇 Trek
請先看<提示>.

話說都係當年 F.1 唔知邊個又無啦啦問唔知邊個 MADAM 靚唔靚,大家係到熱烈討論既時候,我呢個成日睇卡通片既細路就彈左句:直頭靚爆鏡啦!

成班同學就問:咩靚爆鏡呀?
我話:白雪公主個後母咪靚爆鏡囉!
有個同學就話:咁你即係話人醜樣既啫!

自此,靚爆鏡就成為風行海外,明讚實踩既潮語勒.直到大學YR2,有日上完堂係休息室同幾個同學傾偈,講講下有個同學就問大家:如果比個靚爆鏡既女仔做你老婆你制唔制呀?

個個都話唔制,我就話:緊係制啦!點解唔制呀?
佢話:靚爆鏡你都制?
我就話:制!白雪公主個後母,全世界第二靚喎,得白雪公主靚過佢炸喎,仲唔夠靚呀?緊係制啦!
聽到個個呆晒,我繼續話:塊鏡爆唔係因為佢醜樣吖嗎,係因為佢太煩之馬,日日問"我靚唔靚","我靚唔靚",問左幾十年,問到塊魔鏡都頂唔順,寧願自爆都唔想再答佢,仲要臨尾講句"白雪公主最靚,你最醜樣呀,惡毒既女人!",跟住"崩"一聲碎晒,等佢無仇報,激鬼死佢渣嗎!

最後聽到成個休息室D人傻晒,結果,靚爆鏡就變成正反都用得勒.整整下而加連心情都可以講靚爆鏡啦,但係如果唔係原作者既我,你無睇我上面講既野,又點知其實仲可以講下面依兩樣野呢:
1.嘩,你份人既心腸真係.....,惡毒到爆鏡呀!
2.好心你講野唔好咁煩爆鏡啦!

一雞四味,未見過咁好用既潮語呀呢!?另外其實白雪公主呢個故仔,好明顯係反映緊作者阿格林兄弟佢地既老婆有幾煩,日日問老公佢靚唔靚,搞到佢地要寫童話去發洩就黎爆既心情,仲要個個故仔都係有D衰後母衰家姐,可見幾百年前既歐洲女人係幾咁港女呢!

所以真係唔好比女仔睇格林童話,搞到個個唔係當自己係公主,就係學晒白雪公主灰姑娘個D衰後母衰家姐個D惡毒格.格林童話就係港女出現既原凶!迪士尼就係美化呢D童話既幫凶!趕走迪士尼!禁止比女人再睇格林童話!

潮語出處1
Topic: 10奇遇 Trek
請先看<提示>.

話說當年 F.1 唔知邊個無啦啦問個班主任 MADAM 幾多歲,我估都係廿幾歲啦,咁我又諗起"十個女仔,九個認細"呢首歌,廿幾歲都話十幾歲,咁我就彈左句:十九幾歲!

跟住比個同學話:嘩乜你咁粗魯架!
我話:咩咁粗魯呀?"十個女仔,九個認細"吖嗎,廿幾歲扮十幾歲,十九歲加幾歲咪廿幾歲囉!
佢話:你講到好似粗口諧音咁囉!
我就話:哦!咁十八幾歲囉!點知你地諗D咁野啫!

之後傳下傅下就全校都講,傳下傅下就全香港都講,咩十九幾樣工課,百九幾人,千九幾次,萬九幾銀,人人都係咁講.所以你唔好以為噴十九幾兩血係周星馳作架,抄我架炸!

講真話,搵真相.信自己
Topic: 11玩嘢PlayPolitic

受人以魚魚,不如授人以漁業.錯!比魚人食,不如教人捉魚養魚,係唔夠既.

與其教人捉魚,不如教人想出捉魚,搵野食既方法.咁就可以自己決定,無魚捉既話,點樣養豬,放羊,耕田,定種菜,而唔使乜都問人點做.

同樣,講答案比你聽,不如講個得到答案既思考過程,係唔夠既.講個思考過程,就不如直接教你正確既思考方法,等你自己去思考,去諗出自己既答案.

我會教你一個好簡單既思考方法,普通人就算唔鍾意讀書,都一定聽得明,學得識,用得到.不過你係都要等人比魚你食,結果餓死左,咁就抵你死,唔抵可憐.教左你思考,你係都要唔用腦,比人呃,我都吹你唔漲.

好,思考方法,而家就教.聽清楚,只講一次.

另外,"講真話,搵真相"既意思,唔係我會講真話,搵真相,其實應該係"搵真話,講真相",係你要搵出邊一句係真話,係你自己講出個真相.

因為我會特登講到d野錯晒,啱又話錯,錯既又話啱.所以,"信自己"既意思,唔係我信自己,而係你信自己,係你要學識思考既方法,信你自己既思考同分析,得出你自己既結論.

你要記住,我係壞人,我講既野都係錯既,唔好信我.睇我個樣都知我係壞人啦!

仲有,我只會參加電視電台辯論,唔會搞任何競選宣傳,選舉開支我都寫好,選舉經費會係0.如果有人話識我,叫你捐錢,或者呢樣果樣,話幫我競選,請你即刻報警.

由今日開始,所有人都同我無關,邊個都唔好話識我,你死你事,關我鬼事,我死我事,亦都唔使你理.

老花
Topic: 10奇遇 Trek
請先看<提示>.

早幾年開始有老花,人地話老花會令近視變番淺,我亦都覺有陣時睇野好辛苦,但係又唔係以前近視深左個重感覺,而真係度數太深對眼夾硬去對焦咁.

頂左兩年決定走去試下配淺50度啦,幾好呀睇近野易左對焦,遠野小小朦過一排就慣啦.以前初初帶眼鏡都無配足啦,係有少少暈,過幾個禮拜都無野啦.

再過多年又有的睇野好辛苦,咁又去配啦,佢一度居然話兩隻眼度數都啱喎,咁即係近視真係淺左啦,咁梗係再配淺多50度啦.再過兩年舊年又配淺多25度啦.

早排攞番D舊眼鏡出黎睇下,嘩配最足同減50個兩副真係睇唔到個喎!-100同-125呢兩副就最清,差唔得幾多.

哦,睇番記錄,原來百幾度個隻眼只係配淺左-50同-25兩次,二百幾度個隻眼先至有第二次-50,咁即係老花對深D既近視影響勁D播!

咁大家有老花不妨都可易試下配淺D啦,配太足棧搞到D近視無得變淺既啫!-50驚太多可以-25先囉!

二手煙
Topic: 10奇遇 Trek
請先看<提示>.

以前無論搬到去邊都成日被迫食二手煙,開門又食二手煙,開窗又食二手煙.早幾年決定柵埋窗柵埋門,唔再食二手煙,夏天寧願開冷氣,條氣好似好左DD,跑步無咁喘氣.

但係最重要既原來係廁所既二手煙,自從舊年年頭,成日係廁所食煙既人走左之後,舊年年中開始,沖涼既時侯,就算沖到尾,D水蒸氣充滿晒成個廁所,都唔會再咳.換左以前?一吸氣,D水蒸氣就帶埋D黐住係廁所既二手煙,一入氣管就即刻想咳想咳,等我仲走去睇醫生以為個肺有事!

而加沖涼唔再咳,呢一年黎跑步條氣直頭好順,就算跑得耐過以前,都一D都唔喘氣,以前跑一陣都真係喘哂氣,就算減肥最勁得百三磅個陣都一樣,所以肯定係唔使再食二手煙既關係.

大家都盡量避開D二手煙啦,食煙既都唔好比二手煙屋企人食啦,千祈唔好係廁所食煙啦,最好就唔好食煙啦,你開窗開門食煙,隔離屋同樓上都要食你D二手煙既啫,係咪?