潮語出處2
Topic: 10奇遇 Trek
請先看<提示>.

話說都係當年 F.1 唔知邊個又無啦啦問唔知邊個 MADAM 靚唔靚,大家係到熱烈討論既時候,我呢個成日睇卡通片既細路就彈左句:直頭靚爆鏡啦!

成班同學就問:咩靚爆鏡呀?
我話:白雪公主個後母咪靚爆鏡囉!
有個同學就話:咁你即係話人醜樣既啫!

自此,靚爆鏡就成為風行海外,明讚實踩既潮語勒.直到大學YR2,有日上完堂係休息室同幾個同學傾偈,講講下有個同學就問大家:如果比個靚爆鏡既女仔做你老婆你制唔制呀?

個個都話唔制,我就話:緊係制啦!點解唔制呀?
佢話:靚爆鏡你都制?
我就話:制!白雪公主個後母,全世界第二靚喎,得白雪公主靚過佢炸喎,仲唔夠靚呀?緊係制啦!
聽到個個呆晒,我繼續話:塊鏡爆唔係因為佢醜樣吖嗎,係因為佢太煩之馬,日日問"我靚唔靚","我靚唔靚",問左幾十年,問到塊魔鏡都頂唔順,寧願自爆都唔想再答佢,仲要臨尾講句"白雪公主最靚,你最醜樣呀,惡毒既女人!",跟住"崩"一聲碎晒,等佢無仇報,激鬼死佢渣嗎!

最後聽到成個休息室D人傻晒,結果,靚爆鏡就變成正反都用得勒.整整下而加連心情都可以講靚爆鏡啦,但係如果唔係原作者既我,你無睇我上面講既野,又點知其實仲可以講下面依兩樣野呢:
1.嘩,你份人既心腸真係.....,惡毒到爆鏡呀!
2.好心你講野唔好咁煩爆鏡啦!

一雞四味,未見過咁好用既潮語呀呢!?另外其實白雪公主呢個故仔,好明顯係反映緊作者阿格林兄弟佢地既老婆有幾煩,日日問老公佢靚唔靚,搞到佢地要寫童話去發洩就黎爆既心情,仲要個個故仔都係有D衰後母衰家姐,可見幾百年前既歐洲女人係幾咁港女呢!

所以真係唔好比女仔睇格林童話,搞到個個唔係當自己係公主,就係學晒白雪公主灰姑娘個D衰後母衰家姐個D惡毒格.格林童話就係港女出現既原凶!迪士尼就係美化呢D童話既幫凶!趕走迪士尼!禁止比女人再睇格林童話!

潮語出處1
Topic: 10奇遇 Trek
請先看<提示>.

話說當年 F.1 唔知邊個無啦啦問個班主任 MADAM 幾多歲,我估都係廿幾歲啦,咁我又諗起"十個女仔,九個認細"呢首歌,廿幾歲都話十幾歲,咁我就彈左句:十九幾歲!

跟住比個同學話:嘩乜你咁粗魯架!
我話:咩咁粗魯呀?"十個女仔,九個認細"吖嗎,廿幾歲扮十幾歲,十九歲加幾歲咪廿幾歲囉!
佢話:你講到好似粗口諧音咁囉!
我就話:哦!咁十八幾歲囉!點知你地諗D咁野啫!

之後傳下傅下就全校都講,傳下傅下就全香港都講,咩十九幾樣工課,百九幾人,千九幾次,萬九幾銀,人人都係咁講.所以你唔好以為噴十九幾兩血係周星馳作架,抄我架炸!

講真話,搵真相.信自己
Topic: 11玩嘢PlayPolitic

受人以魚魚,不如授人以漁業.錯!比魚人食,不如教人捉魚養魚,係唔夠既.

與其教人捉魚,不如教人想出捉魚,搵野食既方法.咁就可以自己決定,無魚捉既話,點樣養豬,放羊,耕田,定種菜,而唔使乜都問人點做.

同樣,講答案比你聽,不如講個得到答案既思考過程,係唔夠既.講個思考過程,就不如直接教你正確既思考方法,等你自己去思考,去諗出自己既答案.

我會教你一個好簡單既思考方法,普通人就算唔鍾意讀書,都一定聽得明,學得識,用得到.不過你係都要等人比魚你食,結果餓死左,咁就抵你死,唔抵可憐.教左你思考,你係都要唔用腦,比人呃,我都吹你唔漲.

好,思考方法,而家就教.聽清楚,只講一次.

另外,"講真話,搵真相"既意思,唔係我會講真話,搵真相,其實應該係"搵真話,講真相",係你要搵出邊一句係真話,係你自己講出個真相.

因為我會特登講到d野錯晒,啱又話錯,錯既又話啱.所以,"信自己"既意思,唔係我信自己,而係你信自己,係你要學識思考既方法,信你自己既思考同分析,得出你自己既結論.

你要記住,我係壞人,我講既野都係錯既,唔好信我.睇我個樣都知我係壞人啦!

仲有,我只會參加電視電台辯論,唔會搞任何競選宣傳,選舉開支我都寫好,選舉經費會係0.如果有人話識我,叫你捐錢,或者呢樣果樣,話幫我競選,請你即刻報警.

由今日開始,所有人都同我無關,邊個都唔好話識我,你死你事,關我鬼事,我死我事,亦都唔使你理.

老花
Topic: 10奇遇 Trek
請先看<提示>.

早幾年開始有老花,人地話老花會令近視變番淺,我亦都覺有陣時睇野好辛苦,但係又唔係以前近視深左個重感覺,而真係度數太深對眼夾硬去對焦咁.

頂左兩年決定走去試下配淺50度啦,幾好呀睇近野易左對焦,遠野小小朦過一排就慣啦.以前初初帶眼鏡都無配足啦,係有少少暈,過幾個禮拜都無野啦.

再過多年又有的睇野好辛苦,咁又去配啦,佢一度居然話兩隻眼度數都啱喎,咁即係近視真係淺左啦,咁梗係再配淺多50度啦.再過兩年舊年又配淺多25度啦.

早排攞番D舊眼鏡出黎睇下,嘩配最足同減50個兩副真係睇唔到個喎!-100同-125呢兩副就最清,差唔得幾多.

哦,睇番記錄,原來百幾度個隻眼只係配淺左-50同-25兩次,二百幾度個隻眼先至有第二次-50,咁即係老花對深D既近視影響勁D播!

咁大家有老花不妨都可易試下配淺D啦,配太足棧搞到D近視無得變淺既啫!-50驚太多可以-25先囉!

二手煙
Topic: 10奇遇 Trek
請先看<提示>.

以前無論搬到去邊都成日被迫食二手煙,開門又食二手煙,開窗又食二手煙.早幾年決定柵埋窗柵埋門,唔再食二手煙,夏天寧願開冷氣,條氣好似好左DD,跑步無咁喘氣.

但係最重要既原來係廁所既二手煙,自從舊年年頭,成日係廁所食煙既人走左之後,舊年年中開始,沖涼既時侯,就算沖到尾,D水蒸氣充滿晒成個廁所,都唔會再咳.換左以前?一吸氣,D水蒸氣就帶埋D黐住係廁所既二手煙,一入氣管就即刻想咳想咳,等我仲走去睇醫生以為個肺有事!

而加沖涼唔再咳,呢一年黎跑步條氣直頭好順,就算跑得耐過以前,都一D都唔喘氣,以前跑一陣都真係喘哂氣,就算減肥最勁得百三磅個陣都一樣,所以肯定係唔使再食二手煙既關係.

大家都盡量避開D二手煙啦,食煙既都唔好比二手煙屋企人食啦,千祈唔好係廁所食煙啦,最好就唔好食煙啦,你開窗開門食煙,隔離屋同樓上都要食你D二手煙既啫,係咪?

生活大小智慧
Topic: 10奇遇 Trek
請先看<提示>.

生活小智慧:
洗頭的泡塞住耳仔,好唔舒服,可以點做?
可以係耳仔後面向前襟,襟到隻耳仔冚住隻耳,一下唔得就兩下,D泡就會咇番出黎,隻耳即刻通左,舒服晒!

生活大智慧:
有人話唔慣坐係到開大,又話有研究踎係到開大真係暢快好多,咁有無得坐係到都咁暢快呢?
所以我又試下研究下,又比我得左!我發覺只要模擬踎廁個姿勢,就已經可以好過真係踎係到.
雙腳泊埋,跟住趷高對腳,再"烏"前個身貼住對腳,咁樣其實九成同踎係到相似,而且泊埋對腳仲有效過擘開添,直頭就係"頂DUM"一聲,呀~,舒服晒!簡直就係人生一"大"快事,正呀!

壓力
Topic: 10奇遇 Trek
請先看<提示>.

最近好多學生跳樓,其實我當年讀大學都好大壓力!

個陣入U無耐,真係好大壓力,乜都無時間做,真係得閒死唔得閒病,要搵方法處理.咁 HKU周圍都貼好多 COURSE出黎唔使錢比人上,咁我就明明無時間都報左個壓力處理班啦,無時間都要死 D時間出黎架,唔係點啫!

個 COURSE好似係4,5堂每堂一個鐘,話佢無用都有 D用既,教下深呼吸靜坐冥想咁啦,都可以減下壓既.好似到左最後一堂4,5條友得番一兩個,去到課室阿SIR同另外果個未到,咁我一個人就靜靜地諗下野啦,諗諗下比我叮一聲諗通左喎!

我發現其實好多感覺都係自己搵D野去比較先產生既.好似悶,係你諗番D興奮既時候黎比較,你先覺得悶,唔去比較,就唔會覺得悶.節奏慢,你諗D快既時候黎比較,你就覺得慢,但如果你同D更慢既比較,佢又唔慢囉喎!壓力都一樣,你去諗番D輕鬆既時候黎比較,梗係有壓力啦.咁唔去比較,咪唔會有壓力囉!

於是我就叫自己提自己,一發現自己有壓力,去比較,就即刻叫自己唔好比較,唔好諗:死啦死啦,好多野無時間做呀,死梗啦!改為諗:嘩!好多野做呀!好!做完呢樣做果樣,做完果樣再做呢D,之後再做果D,比心機,衝呀!

跟住上堂同個阿SIR講,佢仲話我好野,咁都比我諗到!

初頭幾次都要提自己:嘩,我咁樣諗喎,唔得,要咁諗至得!之後習慣左,都唔使提自己,直接就用左後面個種方式去諗,之後三年大學,都無晒壓力啦! YEAH!

如果大家有壓力,可以試下我呢個方法.希望呢個方法對你都有用啦!比心機,衝呀! Vo.*~

接受捐贈器官
Topic: 11玩嘢PlayPolitic
請先看<提示>.

香港政府想推行"自動捐贈器官".
捐贈率低,自願改自動,就提升到捐贈率?

點解唔"自願"捐贈器官?因為"唔讚成"捐贈器官呢個做法,呢種諗法.
既然唔讚成,唔捐,自然唔讚成"接受捐".
已所不欲,勿施於人.
所以唔捐既人,自己有病,都唔想人捐比佢.

讚成捐,唔通會唔讚成"接受捐"?

無理由自己唔幫人,但係又要人幫你.
自己唔捐錢,但係自己需要個陣,又想人捐錢比你,係咪?
捐血都一樣,自己唔捐血,但係自己需要個陣,又要人輸血比你?
有無咁著數?梗係無啦!

醫者父母心,係人都想救,不過病人都有權選擇治療方法.

所有人,滿18歲,或來香港,一年內唔登記捐贈器官,又唔年年捐血,咁一世都唔使登記啦,亦都唔使捐血,亦都唔使旨意有得接受器官啦,亦都唔使旨意有得接受輸血啦,係咁.

想發現自己有病需要器官移植,先至黎登記捐贈器官呀?無機會啦!

唔捐比人,咁自己屋企人呢?捐比屋企人,咁親戚呢?咁親戚既親戚呢?咁親戚既親戚既親戚呢?咁親戚既親戚既親戚既親戚呢?咁親戚既親戚既親戚既親戚既親戚.........既親戚呢?

人地捐就唔要,屋企人捐就要?咁就唔使捐比人?咁親戚捐要唔要?咁親戚既親戚捐要唔要?咁親戚既親戚.....既親戚捐要唔要?

人地捐就要,屋企人捐就叫佢唔好?咁親戚既親戚.....既親戚捐好唔好?咁親戚既親戚捐好唔好?咁親戚捐好唔好?咁最親既親戚,即係屋企人捐好唔好?

講黎講去,都係一個字:自相矛盾,自私自利!

細路呢?一樣囉!父母捐,就救你既仔女,唔捐,就唔救.搞掂!
你唔同意捐,你都唔想你D仔女接受捐架啦,唔係又自相矛盾下話?
外國人,遊客呢?政府自己諗囉!乜都我諗晒呀?

結論:
1.閻王要你三更死,不許留人到五更.何必夾硬阻住人上天堂,或者投胎做富豪呢?
2.我唔想要人地既血同器官,何必迫我要人地既野呢?
3.玩政治,就係咁簡單!

多角度夢
Topic: 10奇遇 Trek
請先看<提示>.

Yo Yo!最近發左 D多角度夢喎好搞野好似睇個 D多角度電影咁架!
即係同一件事用幾個主角既角度重複做幾次個 D戲呢!U See?

有一次發夢變左個唔知乜水係到同其他人講吓野做吓野跟住去到一個地方,Ha Ha!
感覺個度有 D熟喎之後又見到幾個人又講吓野做吓野咁啦跟住又繼續走開做其他野啦,
What the Hell!唔怪得咁熟啦上次我咪用果個人既身份發左一次夢同同一班人包括今次既我係同一到做左同一場戲囉!

Woo Woo!最過癮係前文後理係解釋到點解要去個度同個班人包括上次既我講呢 D野做呢 D野個吓痴線吖嗎!
You know what I mean?即係係第一次發夢既時候以經諗好晒每個角色都有自己做主角既劇本,
知道點解要同個主角有呢場對手戲唔係求其亂咁堆砌個夢架死未!Yeah!

其實我成日都會係發夢既時候諗到諗通一D清醒既時候諗唔到諗唔通既野架,Yup!
所以我不扭都覺得發夢既時候最清醒反而清醒既時候先至係發緊夢,Hay!
真係莊周夢蝶定蝶夢莊周清醒既時候清醒定發夢發夢既時候發夢定清醒?Tell Me!

問功課
Topic: 10奇遇 Trek
請先看<提示>.

Hay!早排有個打電話問功課呃人既新聞,我以前都做過喎!

Yo!個陣啱啱入U無耐,難得有日4,5點咁早就放學番到屋企,
Ha 一入到屋鞋都未除衫都未換見到細佬妹講緊電話,見到我番黎就即刻叫我聽,
完來係堂外甥打黎問功課,一年班之嘛使乜問我呀?蝦佢地話唔識教喎搞錯!

喂大舅父呀?Hay whatsup boy!係呀你咩唔識呀?有條數唔識計呀講個題目黎聽吓?
Ah Ha Ah Ha!實際係乜我梗係唔記得啦不過啱啱開學都係一兩位加數咁上下,
我再問佢呢課同埋上兩課叫乜名,跟住就係我教佢計數既方法啦聽實啦喂!

我話嗱咁你前面個兩課教個 D數識唔識計呀佢話識,Yeah!
咁你就用前一課教既方法計完前半跟住再用後一課教既方法計埋後半啦,
佢話哦我話咁你試吓計啦計到幾多呀?佢講個答案我聽我話啱啦 That's Right!
仲有呀通常學校教既野都同前面教既野有關架,要明左前幾課教既野先識做新教既野架,
So 以後有乜唔識就睇番前幾課睇吓點樣用番黎做呢課既功課啦明唔明呀?
佢話明啦咁仲有無其他野唔識呀無就收線啦拜拜!Okay!

收左線之後我細佬妹話嘩你咁教都得呀我話佢話明個喎 Hay Ha!
之後佢都無再打黎問功課啦就算有我都教唔到啦,三年大學日日十一二點先做完功課番屋企 So Bad!
後尾過時過節見到堂家姐問佢咁耐仲有無要打黎問功課呀,佢話唔使啦個次我教完佢之後就好勁乜都識而加成績好好呀,
之後大左仲好多個 A咁考完會考好多個 A咁考完 A Level好多個 A咁大學畢業添 Yeah Yeah!

嘩真係如果我做補習專做一年班肯定個個上完一堂就唔使補啦,
所有補習社都無得做啦 D補習天王全部揸兜都得啦!Yo Yo!
對住一年班既細路試問邊個夠膽好似我咁教,邊個夠膽相信佢地有咁聰明,邊個夠膽相信可以咁教?Oh Yeah~~~~!