玩
Topic: 10奇遇 Trek
請先看<提示>.

自從個兩次見到白衫白褲既救護員之後,印象中好似無乜再打開門對正鐵閘咁訓,就算好熱訓地下,阿媽都好似唔比打開門,最多都係開條隙仔,連d阿伯都好似少左人訓走廊,真係使唔使咁驚呀?!

過左一排,有次阿爸帶我同細妹落街,唔記得買餸定做咩勒,到差唔多5,6點返屋企,太陽落左山,暗暗地,不過未天黑,行過一處好似係學校,有d遊樂設置既地方,不過應該鎖左,感覺上唔應該有人係呢個鐘數入到去既地方,居然有一班細路係入面玩.我望左一望,細妹又望左一望,心諗:蝦!有人係入面玩既?不過都無咩特別唶,咁就繼續跟住我阿爸行返屋企啦.

又過左一排,同樣既情況,阿爸我細妹落街,5,6點返屋企,行過個道,又係一班細路係入面玩.我望左一望,細妹又望左一望,今次我就話:蝦!咁多人係入面玩既?

咁阿爸係我地前面,一路行就一路話:係邊道!?(呢個問題係咪好奇怪呢?)

我望一望入面就話:入面囉!

阿爸就話:幾時!?(呢個問題係咪更奇怪呢?)

我就話:而家囉!

阿爸就即刻停低,擰轉面,look大對眼,個嘴似笑非笑咁,對個頭埋黎我面前,眼定定望住我!

我到衣家都唔知衣個係咩表情,係咪以為我講笑呢?

我就加多句:細妹都見到格!

我細妹既回應係:Humm!(咩意思呢?咁即係同意我講既野?)

我又加多句:上次都見到啦!

咁我呀爸就企番直個身,一路擰轉身,一路話:行啦行啦,快d行返屋企啦!

咁我地咪繼續行囉!

個晚,我地幾姊弟係到玩,阿爸阿媽阿公阿婆就唔之商量d咩.白衫白褲既救護員,加埋一班玩緊既細路,佢地會點做呢?

跟住阿媽就叫我過黎.

我行埋去,見佢揸住條銀鏈,陀住粒玉,我就問:做咩呀?

阿媽:呀健兒,比條鏈比粒玉你帶呀.

我又問:點解呀?

阿媽:銀鏈定驚呀,玉可以擋剎呀!保平安呀!帶住佢,唔準除!

聽講BB仔成日無啦啦喊,呢招都有用個喎!

就係咁,我就帶住條頸鏈同粒玉,帶到十七八歲先無帶,亦都無再見過d古怪既人同奇怪既野啦!UFO唔算啦!係得 JORGE囉! XDDDDD

救護員
Topic: 10奇遇 Trek
請先看<提示>.

跟住呢個故仔,可能大家都會有d印象.

咁大熱天時,以前住公屋個個都打開門訓架啦,有d阿伯仲會行張帆布床係走廊訓添啦.而我屋企就會掃乾淨塊地,鋪張席係地下,我同阿爸就對正鐵閘,頭向走廊咁訓.

個陣我5,6歲到啦,有一晚,訓訓下,聽到出面有腳步聲,其中一個就問係邊呀?另一個就答係個便.行過我頭頂我就望下啦,原來係兩個著白衫白褲既救護員,我就同阿爸話:爸爸,有兩個救護員呀!阿爸就話:唔好理呀,訓啦!

佢地行到去走廊尾,過左一陣就行番轉頭,我再望,就見到尾房個阿伯跟住佢地走.咁我梗係以為佢要去醫院啦,咁我就同佢講:阿伯你要走呀?!阿伯:係呀,我要就啦!!!

跟住頭先問野個個救護員就話:呢個細路見到我地呀,使唔使帶埋佢走呀?!!!!!

咁我就即刻同呀爸話:爸爸,個救護員話要帶埋我走呀!!!!!

咁我呀爸就即刻彈開眼,抬高頭,好緊張咁話:唔好啦,佢咁細個,唔好帶佢走啦!!!!!!

另外個個救護員諗左一陣就話:算啦,佢咁細個!!!????!!!

跟住阿伯就同佢講:我可唔可以講底幾句呀????!!!!

個救護員就話:講啦!

阿伯就好平靜咁同我講:我都無咩野交底架啦,叫呀成唔使掛住我啦,比心機讀書考大學啦!!??!!

我:哦!拜拜!

咁佢地走左,我就繼續訓啦,第朝起身番學,就梗係乜都唔記得晒啦!

到5,6點做完功課出走廊玩,玩玩下記起喎!咁我阿公一家都係住係到,咁我就問舅父:舅父,呀尾房肥肥地矮矮地個個阿伯係咪阿成老豆呀?"係呀!"阿成係咪考大學呀!!!!?"係呀!"

咁我就走去走廊尾叫呀成,阿成就係屋企行出黎,木無表情咁:"做咩呀!"今朝番學差d唔記得左,你阿爸尋晚係咪去左醫院呀?"係呀!"佢話叫你唔使掛住佢呀,叫你比心機讀書考大學呀!"下!佢幾時同你講呀?"尋晚跟兩個救護員去醫院個陣囉!"仲有咩講呀?"無啦,佢話無咩講啦,淨係叫你地唔使掛住佢,叫你比心機考大學囉!"哦!"跟住就擰轉身番入屋,我諗佢同屋企人講掛!

咁我講完就唔理咁多,走去繼續玩啦.玩玩下呀婆呀公舅父阿媽成班人就走黎問我:"你同阿成講咩呀?"佢阿爸叫佢比心機讀書考大學囉!"佢尋晚同你講呀?"係呀"尋晚幾時呀?"訓訓下教有兩個救護員帶佢走個陣囉!"咩救護員呀?"白衫白褲個d救護員囉!"點帶佢走呀?"跟住後面行囉!"你點見到呀?"打開門訓教訓地下個頭對住鐵閘加嗎!爸爸都見到格!

咁啱阿爸又放工返黎喎!咁佢地就即刻問阿爸有無咁既事啦!"邊到有呀,佢發夢唶!"有呀!個救護員話我見到佢地要帶埋我走,你話我咁細個,叫佢地唔好帶埋我走呀!

呀爸望住我,眼定定,無出聲,佢地又問我呀爸係咪有呀,呀爸話:邊到有唶!!!!咁我又唔理啦,我都唔知有咩咁大件事,我有我繼續玩,佢地有佢地繼續起哄!

件事未完喎!過左幾日,居然又見到個兩個救護員,今次仲帶走左兩個訓走廊既呀伯添,個救護員自然話又見到你個細路呀,兩個呀伯自然又交帶左幾句,我自然又第朝唔記得左,自然玩玩下又記得,自然又講番比佢地屋企人聽,自然我屋企人又問長問短,自然成條走廊都係哄啦!

最得意係個個都好似未訓咁,個救護員問:"邊個呀?"另外個個就話:"你呀,要走啦!"下,我要走呀!咁個呀伯就自己起身."仲有個個呢?"佢呀,呢個呀!"下,我都要走呀!"咁個呀伯又自己起身.唔使哎名,唔使掂佢,指下就得!

講到呢到,我當然就梗係唔知呢幾個阿伯唔係去左醫院啦,有乜理由會跟住救護員"行"去醫院先得架?!!!

件事都未完喎!又過左幾日,歡樂今宵就個個禮拜有一個鬼故,今次就做左我呢個故事出黎啦,呀盧 david仲話到明係真人真事改編添!不過個細路就變左考大學既後生仔,亦都唔會訓公屋地下,而係讀書合著訓訓下起身痾尿行出廳見到,而個兩次既老人亦都變左佢阿爺阿嫲啦!唯一無變既就係個兩個白衫白褲既救護員囉!我同屋企人一齊睇完,我仲話點解咁似我早幾日講既野既!抄我架?

各位朋友,記唔記得歡樂今宵呢個鬼故呀?!!嗚~~~~~!!!!!

轉堂
Topic: 10奇遇 Trek
請先看<提示>.

咁香港好多中小學都話以前係亂葬崗架啦,不過傳既唶,無人知真定假.但係我間小學就唔同啦,每一個學生都知係真架!因為係學校入邊條路面同埋山邊,仲有幾塊墓碑係到架~~~~~!有一年擴闊出面條山路,仲係路下面挖左幾副野出黎添呀~~~~~~~~~!

不過話晒係天主教學校,又無人撞過野喎!只係有一次怪怪地咁唶!

個日上左幾堂,轉堂,成班同學係到等阿sir黎,都無乜野呀.咁阿sir黎到,Good 完你個 morning之後,阿sir就叫攞本書出黎,打開本書第幾頁啦.

點知,無人理喎,個個係到唔知做乜喎!再叫多次,都係無人理喎!你估阿sir點做?

結果阿sir攞住本書,由第一行第一張枱開始,逐張台用本書大力拍,一路拍一路叫攞本書出黎,攞本書出黎,攞本書出黎......,拍到最後一行,最後一張枱,我見個行居然有同學都未攞本書出黎!我自己都係阿sir拍到黎先知,先識攞本書出黎!

個日真係好似成班一齊魂魄唔齊咁!當時我就即刻細細聲同隔離個同學講:阿sir好似有經驗,以前都試過,唔係第一次咁既!唔係最多拍幾張唶,無理由拍足40張枱架?

又估下跟住會點?阿sir居然......無鬧人,若無其事咁,繼續上堂呀!嘩!!!!!

咁你話勒,到底點解~~~~?呵!呵!呵!

行樓梯
Topic: 10奇遇 Trek
請先看<提示>.

大家知啦,d舊公屋,搭左lift都仲要行幾層,不過勝在四通八達,好多條樓梯都番到屋企,不過硬係有幾條就算日光日白,光光猛猛都唔多想行既.

咁有次小學同細妹放學,行左其中一條.咁每層樓梯口都有寫幾樓架啦,不過行慣行熟,dup低頭唔使數都知到未啦!

細妹跟住我上呀上呀,一睇,過左龍?上多左層?

你知啦,我細個好肥架嗎,行幾層樓梯都喘哂氣架嗎,行多層點會唔知呀?

咁落番去啦,一睇,又過左龍?又落多左層?

唔係馬!再上,一睇,又過左龍?

我同我細妹講:我地有行兩層咩?點解又過左龍架?

我細妹都唔知點答我.咁咪再落囉!

第四次,終於啱啦,即刻跑返屋企!

一個人都話掛住諗野行過龍呀,兩個一齊行,無得講啦!

自此之後,我都盡量只係用行得最自在個條樓梯,唔行其他樓梯啦!

起樓
Topic: 10奇遇 Trek
請先看<提示>.

鬼佬鬼節講鬼故~~~~~~~!等我講幾個故仔比大家聽下啦~~~~~~~~!

話說細個屋企對面起樓,中間隔左個遊樂場仔,大慨3,40碼到,起到差唔多十幾廿層,有我屋企咁高,未起完,有一晚訓訓下,突然間鬼死咁嘈,d燈又好掁眼,搞到成家人醒晒!

你知啦,舊式公屋一個大窗口,有光就成屋人都掁眼架啦.我呀媽仲話:"哎也,做乜對面咁嘈呀,夜嗎嗎先黎開工,掁住哂!"

我亦都一路睜開眼,一路講:"唔~~~,係啦,好嘈好掁眼呀!"

跟住呀媽就起身行出窗門想睇下做乜啦,成屋人亦都坐晒起身啦.

點知,個個一起身,對面靜英英,黑咪抆,鬼影都無隻!

無野喎,咁為有再訓過啦,到左第二日問格離左右,問噚晚有無比對面起樓個到嘈醒晒掁醒晒,居然全部都話無野喎!

咁奇?唔通淨係嘈到掁到我一家人?定係我屋企人一齊集體發同一個夢呢?

UFO
Topic: 10奇遇 Trek
請先看<提示>.

早幾日有人話影到 UFO喎,乜咁易比人見到架,我以前見到個隻勁好多播!

當日大概係中2,3放左學6,7點開始天黑,我坐係到做緊功課,突然間,一種平靜正常得過份既感覺,我即刻抬起頭,大叫:嘩,有飛碟呀!

好奇怪呀呢?點解乜野我都唔講,偏偏要講有飛碟呢?但係我屋企人個個好似比人點左穴咁,完全無反應!

我跟住即刻衝出窗口,顎高個頭向上望.

我屋企離天台4層,而我見到一架雙引擎三角翼個種戰機既機底,大慨兩隻手掌咁大,我估係距離我天台4,5層樓既高度,好慢好靜咁飛左去後邊.

呢架仲唔係 UFO?有咩飛機可以好慢又好靜咁低飛呀?每秒鐘5米喎?靜到一d聲到無喎?

呢d咪傻強定理囉:如果一個人,做緊一樣野既時候,好唔專心咁望住你,咁佢就係差人啦!
同樣道理:如果一架飛機,好似好普通,但係用好唔正常既方式飛,咁佢就係UFO啦!

跟住我再同屋企人講,個個都唔信我喎,我咪攞鎖匙開門出去公屋走廊個大窗口,望到架野繼續飛向山後面,我咪哎:飛碟呀,快d出黎睇啦!

蝦!居然連d隔離左右都慢動作,架野唔見左先至有反應理我個喎!

呢隻 UFO咪勁囉,唔單只令到所有人都平靜到無反應,仲要就算見到都會以為自己只係見到普通飛機,勁呀!

但係我唔受佢影響喎,仲要feel到係 UFO,唔係有鬼,唔係其他野喎,超強勁呀!

反相
Topic: 10奇遇 Trek
請先看<提示>.

早排咪講開細個爆鏡,月球反轉轉既,其實仲有一樣野反轉得更加離奇.

話說F.6有一日放學,係巴士站等車,等等下 Samuel Sze一行埋黎見到我就話:"嘩肥仔,你今日個樣咁精神呀,尋晚好好訓呀?"

"下!你講真架?我病到好辛苦喎!我平時個樣好無精神既咩?"

"你病到死死下?你個樣比平時真係精神好多喎!"

跟住我問其他等緊車既人,個個都話我真係好精神!

"啊!唔怪得由細到大,屋企人都睇唔出我病啦,原來我病左個樣仲精神過平時!"

跟住我番到屋企同屋企人講呢個發現,佢地都唔信,到6點診所開,我著衫落街,呀媽問我做咩,我話睇醫生,呀媽仲話:"作死呀,好地地睇醫生!"我要比個額頭佢摸先肯信!

幾年後舊同學約食飯,老妖見到我問我點呀,我就話好攰,好攰?係呀,今日公司大執位,搬左成日野,攰到死死下,做咩呀,我個樣唔似咩?你個樣好精神!

最好笑幾年前有日返左工又好唔舒服,跟住老細見到又話:"嘩adam,你今日個樣咁精神呀,尋晚好好訓呀?"

我話比佢聽我唔舒服,想請假睇醫生,同埋我病左個樣仲精神過平時呢樣野既時候,佢個呆左既表情,好明顯個心講緊:"下,咁奇既野你都講得出!",個下真係好正!

我明明照鏡自己個樣好正常,你地就話我無精神,明明照鏡見到自己死死下,你地就話我好精神,我仲唔係入左反轉既世界?!

好啦,既然係咁,我而加就話比大家聽,我其實唔係地球人,一般地球人既相學對我係唔啱架!

不過如果有邊個知道我呢種反相,係地球人既相學黎講係代表咩既話,講我知啦!

減肥
Topic: 10奇遇 Trek
請先看<提示>.

又到秋天啦,舊年因為太肥,加上成日未到中午就肚餓,所以九,十月開始改左飲食習慣,決定早餐食飽d,去粥鋪買白粥+炒粉麵,飽到下晝3,4點再食d燒賣粉果或菜肉包,晚餐正常照舊,半年後過左新年去磅,嘩,得番百六,足足減左廿幾磅!

我估計係因為避開左晏晝出街食個d油鹽糖,同埋白粥清腸胃既關係.個碟飯又多油又多鹽,再加埋個杯凍奶茶既糖,嘩,真係想唔肥都唔得啦!

早知就唔掉晒d著唔落既褲落回收筒啦,有條唔係太緊既無掉到,今年變番啱啱好呀!

雖然跟住呢半年無食白粥炒麵(食左半年啦大佬),食多左少少,不過都keep住無重番,好彩.

我決定今年再黎過,睇下今年可唔可以再減少d多餘既肥膏先!

白粥炒麵,我又黎啦!

不過體質因人而異,所以唔好盲目學我,多謝大家.

學踩單車2
Topic: 10奇遇 Trek
請先看<提示>.

大家好想知我既10分鐘教踩單車法呢?等我講比你地知啦!

一.睇人踩
1.你睇,踩得太慢就好難定啦,快番少少,正常速度就定好多啦.
2.啦,個人要坐直d,身體既重量,要落個位到,唔好撳落手呔到,唔係就會撳到個呔擺黎擺去架啦.
3.轉彎係靠側側地個身,識踩就自然識轉彎架啦,唔使教架.
4.轉彎唔使扭呔,扭呔係要避開前面d阻礙,過少少位再去.

二.睇佢踩
1.坐上單車,第一樣要學識跌,跌左邊左腳落地,跌右邊右腳落地.
2.所以要前後腳,唔好高低腳,唔係跌去高腳個面,隻腳落唔切就會跌親架啦.
3.雙手放鬆,唔好揸到個呔咁實,兩隻手唔好硬晒.揸住個呔,唔好揸太實.
4.踩幾下就等架車直線向前去,練習平衡.
5.因為腰兩邊既肌肉,一唔平衡就會扯個龍,跟住個邊就會太大力扯番過黎,搞到個人擺黎擺去,所以一定要比時間腰肌適應,去平衡,唔會扯黎扯去,無得快.
6.繼續踩直線啦,慢慢練平衡啦.
7.平衡到就可以試下踩快d踩慢d,扭下呔轉下彎,初初學唔好踩咁快呀,唔係有事你反應唔切架.
8.踩慢d其實仲難控制過踩得快呀,所以練多d慢重好呀.

就係咁啦,講完.係咪好易呢?不過唔好信我喎!XDDD

學踩單車
Topic: 10奇遇 Trek
請先看<提示>.

早幾日見到好耐無見既 PAUL LAU,係FACEBOOK出現!仲 ADD左我添!

我記得F.2去旅行,教佢踩單車,用左10分鐘,一路睇人踩,一路講解,同埋睇佢踩幾野,執下姿勢,跟住叫佢自己踩,我就同其他同學踩左去,成個鐘之後返黎,佢以經踩得好順,再踩多個鐘返黎,佢居然片彎片到發發聲!嘩,PAUL LAU真係天才呀!

唔好唔記得雖然只係F.2,但係佢已經成6呎高200磅啦!

但係個重點係,其實我只係亂咁UP,但係佢真係兩個鐘就學識踩喎!哈哈哈哈哈哈.....!PAUL LAU真係勁呀!