賭錢
Topic: 10奇遇 Trek
請先看<提示>.

六合彩一注9千萬呀,嘩!

大家有無買呀,有無中左呀!?

有無諗過點解成日有新聞,中呢d頭獎,倒頭黎最後都會無晒,行衰運呀咁呢?

你以為係運氣好呀?抽左稅做左善事呀?咪又係賭錢!

你贏d錢係邊到黎呀?咪又係輸左個d人到黎!咁咪即係損人利己囉!

你打工幫人做左野賺錢就話唶,無做過野就攞左人d錢,唔係損人利己係咩呀?

打牌仲衰,贏自己親戚朋友d錢!

損人利己啱唔啱呀?梗係唔啱啦!

點解可以立法,合法咁損人利己呀?痴線!

損人利己都無錯,咁仲使咩講道理,講法律唶,鬥損人利己得啦!自相矛盾!

所以真係贏左都攞番大半出黎做善事啦,唔係 lucky money 黎架!

仲有唔好買3T添呀!346,唔係馬會輸比你架,係你預支左三世祿炸,贏左都窮番三世呀!

普通聖誕,公司抽獎個d,就無所謂!

我就從來未去過澳門,亦都無諗過將來去澳門啦,賺埋呢d錢,做人都做得唔舒服啦!

以前細個唔識諗就話唶,讀完大學都唔去諗下呢d問題,咁就真係,搞錯!

無諗過呢個問題之前,賭錢,買六合彩,試過!

我仲試過十幾年前有次行過投注站附近,突然個腦出現我自己把聲,講"7既倍數"呢句說話.咩7既倍數呀?投注站?六合彩?跟住入去買左條7,14,21,28,35,42,結果開7,14,21,28,中左200蚊添!

不過而家?賭錢?唔使預我!

同我賭?好呀!輸左聽我唱歌啦!笨!贏左比你唱囉!

刷牙
Topic: 10奇遇 Trek
請先看<提示>.

除左消滅暗瘡,我又嘗試消滅飛滋添!

細個個陣就話要刷牙,大個左就話要刷埋牙肉,十年前又話要刷埋脷苔!舉一反三,好明顯遲早都話要刷晒成個口架啦,咁我就諗住唔使等你講,開始成個口都刷晒啦!

牙肉出面,入面,上顎,下顎,脷面,脷底,脷尖,脷則,面珠登,口唇,連喉嚨椗都差d刷埋!不過又唔使刷過龍,唔使太用力搏命刷,刷牙咁細力就得啦,我都係朝早刷一次牙架唶!

頭幾年都無乜效咁,梗係啦,積左幾十年既細菌係個口入邊!

不過幾年後就開始見效囉喎!以前1年都起碼兩三次飛滋,但係近呢5年,咬唔到既位,真係未痛過咁滯,記憶中得1次,可能有兩次飛滋咁多囉!

其他野都可能有關既,譬如年年換牙刷啦,無論睇落幾新淨都照換,所以我用十蚊3支個d架炸!

牙膏都唔會用死一隻,用完就買第二隻,隻隻都用下,隻隻好處都有d,隻隻菌都殺下咁啦!其實我所有化學野都幾隻輪住用,皂液,洗頭水,潤膚膏,潤唇膏,洗潔精,洗衣粉,眼藥水....,費事d有害物質長期積聚啦!而加d野全部大陸做,真係怕怕架!

仲有呢幾年晚餐之後用牙線啦,因為我兩隻智慧齒都生歪左,牙刷牙籤都無符,成日都係個兩隻攝牙罅,有隻仲因為咁蛀左剝埋,所以而加我得29隻牙炸!

點解唔係31隻?因為我從來都無出過下面個兩隻智慧齒囉,證明我得上等智慧架啦!

所以都話唔好太依賴化學野啦,簡單,直接,天然,一樣咁掂啦!

不過點解過左咁多年,d專家仲未叫人刷晒成個口架?起碼都叫人刷埋脷底啦,唔係咁點顯得我醒目過人呀!依牙!

暗瘡
Topic: 10奇遇 Trek
請先看<提示>.

幾十歲人,食少少熱氣野,都仲生暗瘡,有無搞錯!

諗起 F.1 第一次生暗瘡,都幾搞笑.

個陣比個同學(無謂再話佢啦)傳染左生左粒暗瘡,咁我同 Lionel講,呀邊個的暗瘡會傳染架,佢唔信,我咪用閃電既手法,點一點粒暗瘡,再點一點佢塊面囉!唔信?睇下你生唔生!

第二朝番學,佢話尋晚搏老命洗面,今朝都係生左成大粒暗瘡出黎!

咁我就同佢捉呀邊個同班主任 King Kong投訴啦,叫佢睇醫生啦,會傳染就唔好番學啦,一係就攞醫生紙證明唔會傳染啦,咁呀 King Kong就唔信啦,唔信呀?咁我就梗係黎多次啦,用快過閃電既手法,點一點 Lionel粒暗瘡,再點一點 King Kong塊面,咁你話唔會呀嗎!(我係咪好抵死呢!)

結果第三日,King Kong就梗係同 Lionel同一命運,生左粒大暗瘡啦!唔信唔得啦,結果死死地氣,叫呀邊個去睇醫生囉!

到左第四日,呀邊個話睇左醫生,醫生話唔會傳染喎,但係叫佢攞醫生紙證明,就梗係死都話無啦!

後黎,我就梗係生到成面暗瘡啦,Lionel同 King Kong,唔知係咪傳上傳無咁毒,好似好快就無事.

個隻死人名牌暗瘡膏,都無鬼用既,查左好番係隔離就再生,再查好番再隔離又生,查左4,5年,到左 F.4,5,越查越多,把幾火,唔查啦!

點搞好呢?塊面咁多面油,一於成日去廁所濕下塊面,抹左d面油佢!於是返學,小息,lunch time,放學,返到屋企,黃昏,食完飯,臨訓教,一日抹足7,8次!

仲有咩搞呢?d毛孔塞住晒,咁多細菌,一於搏命洗面!每日沖涼,就對住花灑,用條毛巾係咁卒塊面,卒卒卒,卒佢一百下!

初初d暗瘡好似不受控制咁,仲係越爆越多,但係幾個月之後,開始減少啦,大半年後,終於無晒,仲又白又滑添!Yeah!

早知一早就學 Lionel咁,搏老命洗面啦!

大慨10年前,我堂家姐個女又係16,7,又係成面暗瘡,又係暗瘡膏查極都唔好,我就教佢抹面油同搏命洗面呢兩招,結果又係靚番晒,掂呀!

所以有時真係唔使靠化學野,簡單,直接,天然,仲掂啦!

扭親腳眼
Topic: 10奇遇 Trek
請先看<提示>.

講開腦榫罅,其實腳眼都一樣有骨罅個播!

腳眼,手腕同頭蓋骨一樣,細個時都係由一塊塊骨拍埋一齊,到大左發育完,先至生埋晒,變成一舊骨,所以有所謂測骨齡,就係照下手腕骨既埋合程度,就知大若幾多歲,睇下有無呃秤,大蝦細,大陸足球d青年賽就最多啦.

我由二年班開始肥,就由二年班開始,每年都扭親一次,今年左腳,出年就右腳,直到讀大學.每次都鬼死咁痛,感覺就係當扭親個下,腳眼有條骨罅一開一合,夾住左外側一條腳筋,一行就全身既重量夾落去條筋到,真係痛到癲架!

好既跌打師傅就知道,因為想平衡唔好跌,初初條筋就會扯到好行,所以只可以卒下跌打酒,敷下藥,等過幾日,卒落無咁緊,先至chok得,一chok,骨罅一開一合,條腳筋出番黎,嘩,舒服哂!

同腦榫一樣,卅歲前,扭親都有呢種感覺,卅歲後,都成日差錯腳,不過最多都係痛下幾日,無再咁易扭親,就算幾年前有一次真係兩隻腳一齊扭親,差d仆落樓梯,兩隻腳眼勁腫,痛左幾個禮拜,都再無夾腳筋個種痛.嗱,證明我真係發育到卅歲,唔係呃你架!

所以我都唔明,點解西醫可以扭親淨係夾木板打石膏固定,唔使整番條筋出黎既呢?

不過西醫好在夠科學,好似我話比阿容聽,每次扭親,好番之後,就覺得扭親個隻腳長左,腳板底既壓力大d,另一隻腳就好似有少少吊腳咁,腳板底緊緊掂到地,無乜壓力,叫佢研究下,佢d同事研究左廿年,早幾年睇新聞,終於都比佢地研究到點解喎,原來又係因為想平衡唔好跌,自己chok到個盤骨斜左,搞到好似長短腳,唔係真係隻腳長左!

中西醫學,各善勝長,好野好野!如果肯中西合壁,就仲好野啦!

頂頭鎚
Topic: 10奇遇 Trek
請先看<提示>.

講開踢波頂頭鎚,真係唔好比細路頂咁多頭鎚.

你地細個頂頭鎚,會唔會頭痛既呢?腦榫未生埋,真係好傷個腦架!

我試過小學同中學都頂過一次頭鎚,個腦"轟"一聲,成個腦好似震散左咁,嘩,痛到呢!

後黎十幾到尾,就黎二十個陣開始,d腦榫開始越黎越埋,越黎越窄,朝朝訓醒就要去擦牙.有乜關係?因為好頭痛囉!個感覺就好似訓教既時候,d腦漿攝左入d腦榫罅到,到起左身,地心吸力,就夾硬打棟咁扯番d腦漿出黎,真係痛到癲架!

擦牙既話,個頭輕微咁震下震下,d腦漿就可以慢慢咁震下震下,震番出黎,唔使一野咁扯出黎,咁先至唔會咁痛!直到差唔多卅歲,發育完成,腦榫終於都生埋晒,先至唔再痛炸!

你地細細個頂頭鎚就唔痛啦?咁即係一早個腦就停止發育,無再聰明過啦!我個腦發育到成卅歲,可想而知我而加係幾咁聰明呢!哈哈哈哈哈哈哈哈......!

搭lift
Topic: 10奇遇 Trek
請先看<提示>.

講起跳樓,咁就唔可以唔講呢單啦!

因為我細佬出左世,申請左大單位,2年班就由興華邨第一期,搬左上第二期.唔知係政府特登編晒 d黐線佬入黎住,定係起樓個陣無拜神,淨係我見到既都十個八個,無見到都唔知幾多個.成日唔係朝頭早返學呢個路口一 pat野,就係放學個個樓梯口一 pat野搞到要兜路.

第二期依山而建,最大既特色,就係呢到得兩個主要入口,同埋一條車路.兩邊入口各有兩架大貨 lift,比人搭上十幾樓既平台層,同埋天台,再行番自己住個座.

因為人多,條車路又要沿山邊兜個大圈,所以9成人都係搭lift出入.因此,架lift既設計就會係落既時候,停一樓比人出,落地下比人入,再直上唔停一樓.

即係地下等lift,就有個40x20呎既上蓋,一樓出lift,就只得lift門口上面一條5呎闊既簷篷,出左lift就無遮無掩咁,行到20呎前面條樓梯先落得番地下.

而且條邨係正工廠區對面馬路,個陣又多人番工廠,所以每日番工食晏食完晏同放工,都係超多人迫lift,迫到死死下!

大慨5,6年級,家姐升左中學,得番我同細妹番學,我學校好特別,今年上晝班,出年就變下晝班,再出年又變番上晝班.個日食完晏就同細妹返學啦,本來就應該搭近學校過邊既lift,不過好似整lift,個幾日都係搭另外個邊既lift.

迫呀迫呀,啱啱迫到入lift,兩個企正係lift門,落到一樓,唔記得為乜事,一開lift門,我就哎:"衝呀!"咁細妹就同我一齊,兩馬當先,衝呀!

跑跑跑跑跑,係我身後面,好近咁拍一聲,後面傳黎一陣嘩嘩嘩,我地繼續跑跑跑跑跑,去到前面樓梯口,落左幾級,我就諗:椅?仲乜後面無腳步聲既?成架lift幾十人個喎!

咁我就擰轉面睇下,見到架lift柵緊門,d人望住我兩個,企晒係lift入面,唔出lift喎!而係我再擰番轉頭既時候,暼下眼見到,係我同架lift中間,地下有 pat野!

我落多兩級樓梯,個腦轉多兩轉,我就知咩事勒,咁我就同細妹講:"嘩!有人跳樓呀!"佢擰轉頭望一望,就話:"椅呀~~~!"

我地就繼續好快咁落樓梯,急急腳咁返學,都仲未識驚!

放學番到屋企同呀媽講,先至諗到:好彩我地跑得快炸,如果唔係,分分鐘跌係我地面前,甚至兜頭責扁左?

嘩!唔係啦,以後都唔好係一樓出啦,落地下先出啦!

第二日番學,原來已經成條邨都知,無人再係一樓出lift啦!就連另外個便都係!

之後咁多年,都無人用一樓,除左一d新搬黎既人會問點解.個4架lift亦都繼續好傻咁,係一樓開門柵門,再落地下.

直到今日,搭車經過,都仲見到d人係地下迫出迫入,而房屋署亦都好官僚咁,寧願好似地鐵咁,劃幾條線叫人排隊,都唔肯加番個上蓋比一樓.你話呀,政府對窮人,真係好到無野好講啦!

撞野
Topic: 10奇遇 Trek
請先看<提示>.

最後呢單野,我從未講過出黎,連我屋企人都唔知!

我之前係灣仔番工,都番左有成八年,有幾架巴士番柴灣,但係分開幾條路幾個站,放工有時會行去灣仔街市前面搭車番屋企.十年八年前,個陣成日都7點先收工,天都黑晒.有次行到去碼頭轉出軒尼斯道,街市隔離個燈位過馬路,見到係燈位側邊,有塊大帆布好似金字塔咁笠住地下,又有警車又有救傷車,好明顯係有人跳樓啦!咁我唔理啦,照係側邊行過去搭車啦,人人都係咁行架啦!

過左幾日放工,又去街市搭車,過馬路,一行過個日大帆布笠住個位個陣,突然,後尾枕炸炸炸炸炸炸炸炸炸,好似有野想衝入我個腦咁,我打左個冷震,由後腦震到落尾龍骨!個陣衝力真係好猛,唔係我夠硬頸,真係頭都比佢衝甩呀!

跟住我就懶鎮定,一路行一路擰轉頭,扮晒睇下有車黎未,其實係想睇下有咩野!

無野吖!梗係無野啦,有野仲唔嚇死我咩!

我心諗:我咁堂堂正正,光明正大,你梗係入唔到黎啦,就算入到黎你都控制唔到我啦!好簡唔簡,你簡我!?

咁你地覺唔覺得我衣幾年性格有無唔同左呀?我就唔覺勒!

但係如果佢真係入左黎,一路等機會,等到我時運低個陣,拉我上天台,咁咪大劑?

好彩過左咁多年都無咩事!不過佢到底入唔入到黎呢?會唔會真係入左黎,等機會呢?

我係咪應該搵番條銀鏈同粒玉出黎帶呢?

最衰20,25週年個兩次番玫記食飯,都淨係掛住傾偈影相,唔記得搵個 Father幫我睇下啦!

有無邊個識人驅魔呀?介紹黎 check下啦喂!

玩
Topic: 10奇遇 Trek
請先看<提示>.

自從個兩次見到白衫白褲既救護員之後,印象中好似無乜再打開門對正鐵閘咁訓,就算好熱訓地下,阿媽都好似唔比打開門,最多都係開條隙仔,連d阿伯都好似少左人訓走廊,真係使唔使咁驚呀?!

過左一排,有次阿爸帶我同細妹落街,唔記得買餸定做咩勒,到差唔多5,6點返屋企,太陽落左山,暗暗地,不過未天黑,行過一處好似係學校,有d遊樂設置既地方,不過應該鎖左,感覺上唔應該有人係呢個鐘數入到去既地方,居然有一班細路係入面玩.我望左一望,細妹又望左一望,心諗:蝦!有人係入面玩既?不過都無咩特別唶,咁就繼續跟住我阿爸行返屋企啦.

又過左一排,同樣既情況,阿爸我細妹落街,5,6點返屋企,行過個道,又係一班細路係入面玩.我望左一望,細妹又望左一望,今次我就話:蝦!咁多人係入面玩既?

咁阿爸係我地前面,一路行就一路話:係邊道!?(呢個問題係咪好奇怪呢?)

我望一望入面就話:入面囉!

阿爸就話:幾時!?(呢個問題係咪更奇怪呢?)

我就話:而家囉!

阿爸就即刻停低,擰轉面,look大對眼,個嘴似笑非笑咁,對個頭埋黎我面前,眼定定望住我!

我到衣家都唔知衣個係咩表情,係咪以為我講笑呢?

我就加多句:細妹都見到格!

我細妹既回應係:Humm!(咩意思呢?咁即係同意我講既野?)

我又加多句:上次都見到啦!

咁我呀爸就企番直個身,一路擰轉身,一路話:行啦行啦,快d行返屋企啦!

咁我地咪繼續行囉!

個晚,我地幾姊弟係到玩,阿爸阿媽阿公阿婆就唔之商量d咩.白衫白褲既救護員,加埋一班玩緊既細路,佢地會點做呢?

跟住阿媽就叫我過黎.

我行埋去,見佢揸住條銀鏈,陀住粒玉,我就問:做咩呀?

阿媽:呀健兒,比條鏈比粒玉你帶呀.

我又問:點解呀?

阿媽:銀鏈定驚呀,玉可以擋剎呀!保平安呀!帶住佢,唔準除!

聽講BB仔成日無啦啦喊,呢招都有用個喎!

就係咁,我就帶住條頸鏈同粒玉,帶到十七八歲先無帶,亦都無再見過d古怪既人同奇怪既野啦!UFO唔算啦!係得 JORGE囉! XDDDDD

救護員
Topic: 10奇遇 Trek
請先看<提示>.

跟住呢個故仔,可能大家都會有d印象.

咁大熱天時,以前住公屋個個都打開門訓架啦,有d阿伯仲會行張帆布床係走廊訓添啦.而我屋企就會掃乾淨塊地,鋪張席係地下,我同阿爸就對正鐵閘,頭向走廊咁訓.

個陣我5,6歲到啦,有一晚,訓訓下,聽到出面有腳步聲,其中一個就問係邊呀?另一個就答係個便.行過我頭頂我就望下啦,原來係兩個著白衫白褲既救護員,我就同阿爸話:爸爸,有兩個救護員呀!阿爸就話:唔好理呀,訓啦!

佢地行到去走廊尾,過左一陣就行番轉頭,我再望,就見到尾房個阿伯跟住佢地走.咁我梗係以為佢要去醫院啦,咁我就同佢講:阿伯你要走呀?!阿伯:係呀,我要就啦!!!

跟住頭先問野個個救護員就話:呢個細路見到我地呀,使唔使帶埋佢走呀?!!!!!

咁我就即刻同呀爸話:爸爸,個救護員話要帶埋我走呀!!!!!

咁我呀爸就即刻彈開眼,抬高頭,好緊張咁話:唔好啦,佢咁細個,唔好帶佢走啦!!!!!!

另外個個救護員諗左一陣就話:算啦,佢咁細個!!!????!!!

跟住阿伯就同佢講:我可唔可以講底幾句呀????!!!!

個救護員就話:講啦!

阿伯就好平靜咁同我講:我都無咩野交底架啦,叫呀成唔使掛住我啦,比心機讀書考大學啦!!??!!

我:哦!拜拜!

咁佢地走左,我就繼續訓啦,第朝起身番學,就梗係乜都唔記得晒啦!

到5,6點做完功課出走廊玩,玩玩下記起喎!咁我阿公一家都係住係到,咁我就問舅父:舅父,呀尾房肥肥地矮矮地個個阿伯係咪阿成老豆呀?"係呀!"阿成係咪考大學呀!!!!?"係呀!"

咁我就走去走廊尾叫呀成,阿成就係屋企行出黎,木無表情咁:"做咩呀!"今朝番學差d唔記得左,你阿爸尋晚係咪去左醫院呀?"係呀!"佢話叫你唔使掛住佢呀,叫你比心機讀書考大學呀!"下!佢幾時同你講呀?"尋晚跟兩個救護員去醫院個陣囉!"仲有咩講呀?"無啦,佢話無咩講啦,淨係叫你地唔使掛住佢,叫你比心機考大學囉!"哦!"跟住就擰轉身番入屋,我諗佢同屋企人講掛!

咁我講完就唔理咁多,走去繼續玩啦.玩玩下呀婆呀公舅父阿媽成班人就走黎問我:"你同阿成講咩呀?"佢阿爸叫佢比心機讀書考大學囉!"佢尋晚同你講呀?"係呀"尋晚幾時呀?"訓訓下教有兩個救護員帶佢走個陣囉!"咩救護員呀?"白衫白褲個d救護員囉!"點帶佢走呀?"跟住後面行囉!"你點見到呀?"打開門訓教訓地下個頭對住鐵閘加嗎!爸爸都見到格!

咁啱阿爸又放工返黎喎!咁佢地就即刻問阿爸有無咁既事啦!"邊到有呀,佢發夢唶!"有呀!個救護員話我見到佢地要帶埋我走,你話我咁細個,叫佢地唔好帶埋我走呀!

呀爸望住我,眼定定,無出聲,佢地又問我呀爸係咪有呀,呀爸話:邊到有唶!!!!咁我又唔理啦,我都唔知有咩咁大件事,我有我繼續玩,佢地有佢地繼續起哄!

件事未完喎!過左幾日,居然又見到個兩個救護員,今次仲帶走左兩個訓走廊既呀伯添,個救護員自然話又見到你個細路呀,兩個呀伯自然又交帶左幾句,我自然又第朝唔記得左,自然玩玩下又記得,自然又講番比佢地屋企人聽,自然我屋企人又問長問短,自然成條走廊都係哄啦!

最得意係個個都好似未訓咁,個救護員問:"邊個呀?"另外個個就話:"你呀,要走啦!"下,我要走呀!咁個呀伯就自己起身."仲有個個呢?"佢呀,呢個呀!"下,我都要走呀!"咁個呀伯又自己起身.唔使哎名,唔使掂佢,指下就得!

講到呢到,我當然就梗係唔知呢幾個阿伯唔係去左醫院啦,有乜理由會跟住救護員"行"去醫院先得架?!!!

件事都未完喎!又過左幾日,歡樂今宵就個個禮拜有一個鬼故,今次就做左我呢個故事出黎啦,呀盧 david仲話到明係真人真事改編添!不過個細路就變左考大學既後生仔,亦都唔會訓公屋地下,而係讀書合著訓訓下起身痾尿行出廳見到,而個兩次既老人亦都變左佢阿爺阿嫲啦!唯一無變既就係個兩個白衫白褲既救護員囉!我同屋企人一齊睇完,我仲話點解咁似我早幾日講既野既!抄我架?

各位朋友,記唔記得歡樂今宵呢個鬼故呀?!!嗚~~~~~!!!!!

轉堂
Topic: 10奇遇 Trek
請先看<提示>.

咁香港好多中小學都話以前係亂葬崗架啦,不過傳既唶,無人知真定假.但係我間小學就唔同啦,每一個學生都知係真架!因為係學校入邊條路面同埋山邊,仲有幾塊墓碑係到架~~~~~!有一年擴闊出面條山路,仲係路下面挖左幾副野出黎添呀~~~~~~~~~!

不過話晒係天主教學校,又無人撞過野喎!只係有一次怪怪地咁唶!

個日上左幾堂,轉堂,成班同學係到等阿sir黎,都無乜野呀.咁阿sir黎到,Good 完你個 morning之後,阿sir就叫攞本書出黎,打開本書第幾頁啦.

點知,無人理喎,個個係到唔知做乜喎!再叫多次,都係無人理喎!你估阿sir點做?

結果阿sir攞住本書,由第一行第一張枱開始,逐張台用本書大力拍,一路拍一路叫攞本書出黎,攞本書出黎,攞本書出黎......,拍到最後一行,最後一張枱,我見個行居然有同學都未攞本書出黎!我自己都係阿sir拍到黎先知,先識攞本書出黎!

個日真係好似成班一齊魂魄唔齊咁!當時我就即刻細細聲同隔離個同學講:阿sir好似有經驗,以前都試過,唔係第一次咁既!唔係最多拍幾張唶,無理由拍足40張枱架?

又估下跟住會點?阿sir居然......無鬧人,若無其事咁,繼續上堂呀!嘩!!!!!

咁你話勒,到底點解~~~~?呵!呵!呵!