任劍輝
Topic: 10奇遇 Trek
請先看<提示>.

除左早排講既救護員之外,仲有一次我係令到成條走廊都起哄個播!

唔使驚!唔係又講鬼古!

大家覺得自己既觀察力強唔強勁呢?

過左一排,如常咁返學放學,番到屋企一路食晏一路睇午間新聞,跟住如果套粵語殘片好睇既,呀媽都會比我地一路睇一路做功課既.

果時d電視好貴加嗎,為安全計,家家都擺到鬼咁高,唔比d細路掂到,唔睇仲要柵埋門.我屋企都一樣,擺到上櫃頂,大人都要遞高手開機,又得個十幾吋,仲要黑白,所以睇乜都好細粒!

有次做任劍輝白雪仙喎!咁出名,又未睇過,梗係要睇啦!

套戲雖然係大戲,但係唔係大花面,個個角色都有樣睇.終於都見到任劍輝白雪仙啦!

睇下睇下,而~倚~!唔係好妥播!再睇多陣,比我睇清楚嘞,咁我就問呀媽:呀媽!點解任劍輝要扮男人呀?

呀媽好明顯唔信我,笑住咁話:傻仔,任劍輝男人黎架!

我:任劍輝女人黎架!

二家姐停低支筆,抬高個頭,望住我話:任劍輝男人黎架!

我:一睇就知啦,成個女人樣!男人邊係咁樣架!

二家姐:任劍輝男人名黎啦!

我:藝名黎之嗎!

呀媽:男人黎架!

我唯有使出絕招:任劍輝無喉核架!你地自己睇啦!

成屋女人同我就一齊望住部電視:拿,係咪呀,過個男人幾大粒喉核,任劍輝無喉核架!任劍輝女人黎架!

我呀媽同我3個姊妹,望住部電視,無聲出!

係咪當年任劍輝好靚仔,所有女人,大細老嫩都好鍾意佢,好難相信呢個事實呢?!

我再問:點解任劍輝要扮男人呀?

我呀媽淨係係到笑,無答我!

唔答我,咪繼續一路睇一路做功課囉!

到5,6點做完功課又到出走廊玩既時候,玩玩下記起喎!咁我就問2舅父:2舅父你有無睇大戲呀?"有呀!"你識唔識任劍輝白雪仙呀?"識呀!"任劍輝點解要扮男人呀?"任劍輝男人黎架!"任劍輝女人黎架!"點解你話任劍輝係女人呀?"一睇就知啦,成個女人樣!男人邊係咁樣架!

跟住隔離個私奶咁啱又行出黎,又答爹:任劍輝男人黎架!

我唯有再次使出絕招:任劍輝無喉核架!

2舅父:你係邊到睇到呀?"電視囉!"咩電視呀?"頭先晏晝套粵語殘片囉!"任劍輝無喉核咩!"係呀,其他男人好大粒喉核,任劍輝無喉核架!"

隔離個私奶同其他街坊就開始起哄:哎也,任劍輝係女人呀!任劍輝係女人呀!.....

始終都係無人答到我喎!

可能當年無咩人知戲班個d歷史,一百年前淨係得全男班全女班掛!

未咁快完~!又過左幾日,唔知係歡樂今宵定係乜野表演,呀盧 david就話:最近有傳聞話,話,話呀任劍輝,係,係,係女人喎!不如我地等佢自己講啦!有請任劍輝!

任劍輝好淡定咁行出黎,就話:各位,我任劍輝,確係女人!如此這般如此這般.......

呀盧 david:哦原來任劍輝係女人呀,咁,咁我地以後好似白雪仙咁叫啦,白雪仙叫仙姐,任劍輝,叫你任姐啦,呀任姐!.......

嘩,係戲棚睇大戲,離遠化晒大花面就話唶,我一個5,6歲細路對住部十幾吋黑白電視都睇到啦,你d大人係戲院,仲係以前d戲院咁大個銀幕,咁都睇唔出?以前d人係咪真係咁好呃呀?

咁其實電視台係咪有人住興華邨既呢?次次我講乜你都知既?

各位朋友仔,咁你地又係幾時知道,任劍輝係女人呀?

有無用d強勁既觀察力,睇到d得你最早發現既野呀!

買樓
Topic: 10奇遇 Trek
請先看<提示>.

賭錢唔好,咁買樓保值,好啦掛!

唔好得幾多架炸!

升左值,賣左,賺左錢,賣比邊個呀?

後生仔女囉!大家既下一代下兩代囉!

你以為靠你自己本事呀?你同其他人一齊,壓榨緊你既子子孫孫炸!

買地買樓買屋,啱唔啱?你自己諗啦!

未有公屋之前,梗係買樓好過租樓啦,木屋都要買啦,唔通訓街咩!

發明左公屋,就唔應該再賣地起私樓啦!

所以我從來無諗過買樓,所有人住公屋就最好啦!

咁樣先有機會,同有學識有教養既人做鄰居,學好野,做好人.

咁樣先有機會,同有錢仔由細玩到大,娶個有錢女,d有錢仔先唔會對得d窮人打工仔咁衰加嗎!仲使鬼搞窮富翁大作戰咩!

而家?邊有咁多機會學做好人?邊有咁多唔衰既有錢仔?

買啦買啦,唔使理下一代架啦!而家唔買,遲早比大陸人買晒,公屋都無得你買,訓天橋底架啦!

計我話,原居民天生就有丁屋,市區人都應該天生就有一間公屋,租都唔使交,咁先公平加嗎!係咪?!

而家直頭腫濁奇事啦,一於獅發福瞎啦!

賭錢
Topic: 10奇遇 Trek
請先看<提示>.

六合彩一注9千萬呀,嘩!

大家有無買呀,有無中左呀!?

有無諗過點解成日有新聞,中呢d頭獎,倒頭黎最後都會無晒,行衰運呀咁呢?

你以為係運氣好呀?抽左稅做左善事呀?咪又係賭錢!

你贏d錢係邊到黎呀?咪又係輸左個d人到黎!咁咪即係損人利己囉!

你打工幫人做左野賺錢就話唶,無做過野就攞左人d錢,唔係損人利己係咩呀?

打牌仲衰,贏自己親戚朋友d錢!

損人利己啱唔啱呀?梗係唔啱啦!

點解可以立法,合法咁損人利己呀?痴線!

損人利己都無錯,咁仲使咩講道理,講法律唶,鬥損人利己得啦!自相矛盾!

所以真係贏左都攞番大半出黎做善事啦,唔係 lucky money 黎架!

仲有唔好買3T添呀!346,唔係馬會輸比你架,係你預支左三世祿炸,贏左都窮番三世呀!

普通聖誕,公司抽獎個d,就無所謂!

我就從來未去過澳門,亦都無諗過將來去澳門啦,賺埋呢d錢,做人都做得唔舒服啦!

以前細個唔識諗就話唶,讀完大學都唔去諗下呢d問題,咁就真係,搞錯!

無諗過呢個問題之前,賭錢,買六合彩,試過!

我仲試過十幾年前有次行過投注站附近,突然個腦出現我自己把聲,講"7既倍數"呢句說話.咩7既倍數呀?投注站?六合彩?跟住入去買左條7,14,21,28,35,42,結果開7,14,21,28,中左200蚊添!

不過而家?賭錢?唔使預我!

同我賭?好呀!輸左聽我唱歌啦!笨!贏左比你唱囉!

刷牙
Topic: 10奇遇 Trek
請先看<提示>.

除左消滅暗瘡,我又嘗試消滅飛滋添!

細個個陣就話要刷牙,大個左就話要刷埋牙肉,十年前又話要刷埋脷苔!舉一反三,好明顯遲早都話要刷晒成個口架啦,咁我就諗住唔使等你講,開始成個口都刷晒啦!

牙肉出面,入面,上顎,下顎,脷面,脷底,脷尖,脷則,面珠登,口唇,連喉嚨椗都差d刷埋!不過又唔使刷過龍,唔使太用力搏命刷,刷牙咁細力就得啦,我都係朝早刷一次牙架唶!

頭幾年都無乜效咁,梗係啦,積左幾十年既細菌係個口入邊!

不過幾年後就開始見效囉喎!以前1年都起碼兩三次飛滋,但係近呢5年,咬唔到既位,真係未痛過咁滯,記憶中得1次,可能有兩次飛滋咁多囉!

其他野都可能有關既,譬如年年換牙刷啦,無論睇落幾新淨都照換,所以我用十蚊3支個d架炸!

牙膏都唔會用死一隻,用完就買第二隻,隻隻都用下,隻隻好處都有d,隻隻菌都殺下咁啦!其實我所有化學野都幾隻輪住用,皂液,洗頭水,潤膚膏,潤唇膏,洗潔精,洗衣粉,眼藥水....,費事d有害物質長期積聚啦!而加d野全部大陸做,真係怕怕架!

仲有呢幾年晚餐之後用牙線啦,因為我兩隻智慧齒都生歪左,牙刷牙籤都無符,成日都係個兩隻攝牙罅,有隻仲因為咁蛀左剝埋,所以而加我得29隻牙炸!

點解唔係31隻?因為我從來都無出過下面個兩隻智慧齒囉,證明我得上等智慧架啦!

所以都話唔好太依賴化學野啦,簡單,直接,天然,一樣咁掂啦!

不過點解過左咁多年,d專家仲未叫人刷晒成個口架?起碼都叫人刷埋脷底啦,唔係咁點顯得我醒目過人呀!依牙!

暗瘡
Topic: 10奇遇 Trek
請先看<提示>.

幾十歲人,食少少熱氣野,都仲生暗瘡,有無搞錯!

諗起 F.1 第一次生暗瘡,都幾搞笑.

個陣比個同學(無謂再話佢啦)傳染左生左粒暗瘡,咁我同 Lionel講,呀邊個的暗瘡會傳染架,佢唔信,我咪用閃電既手法,點一點粒暗瘡,再點一點佢塊面囉!唔信?睇下你生唔生!

第二朝番學,佢話尋晚搏老命洗面,今朝都係生左成大粒暗瘡出黎!

咁我就同佢捉呀邊個同班主任 King Kong投訴啦,叫佢睇醫生啦,會傳染就唔好番學啦,一係就攞醫生紙證明唔會傳染啦,咁呀 King Kong就唔信啦,唔信呀?咁我就梗係黎多次啦,用快過閃電既手法,點一點 Lionel粒暗瘡,再點一點 King Kong塊面,咁你話唔會呀嗎!(我係咪好抵死呢!)

結果第三日,King Kong就梗係同 Lionel同一命運,生左粒大暗瘡啦!唔信唔得啦,結果死死地氣,叫呀邊個去睇醫生囉!

到左第四日,呀邊個話睇左醫生,醫生話唔會傳染喎,但係叫佢攞醫生紙證明,就梗係死都話無啦!

後黎,我就梗係生到成面暗瘡啦,Lionel同 King Kong,唔知係咪傳上傳無咁毒,好似好快就無事.

個隻死人名牌暗瘡膏,都無鬼用既,查左好番係隔離就再生,再查好番再隔離又生,查左4,5年,到左 F.4,5,越查越多,把幾火,唔查啦!

點搞好呢?塊面咁多面油,一於成日去廁所濕下塊面,抹左d面油佢!於是返學,小息,lunch time,放學,返到屋企,黃昏,食完飯,臨訓教,一日抹足7,8次!

仲有咩搞呢?d毛孔塞住晒,咁多細菌,一於搏命洗面!每日沖涼,就對住花灑,用條毛巾係咁卒塊面,卒卒卒,卒佢一百下!

初初d暗瘡好似不受控制咁,仲係越爆越多,但係幾個月之後,開始減少啦,大半年後,終於無晒,仲又白又滑添!Yeah!

早知一早就學 Lionel咁,搏老命洗面啦!

大慨10年前,我堂家姐個女又係16,7,又係成面暗瘡,又係暗瘡膏查極都唔好,我就教佢抹面油同搏命洗面呢兩招,結果又係靚番晒,掂呀!

所以有時真係唔使靠化學野,簡單,直接,天然,仲掂啦!

扭親腳眼
Topic: 10奇遇 Trek
請先看<提示>.

講開腦榫罅,其實腳眼都一樣有骨罅個播!

腳眼,手腕同頭蓋骨一樣,細個時都係由一塊塊骨拍埋一齊,到大左發育完,先至生埋晒,變成一舊骨,所以有所謂測骨齡,就係照下手腕骨既埋合程度,就知大若幾多歲,睇下有無呃秤,大蝦細,大陸足球d青年賽就最多啦.

我由二年班開始肥,就由二年班開始,每年都扭親一次,今年左腳,出年就右腳,直到讀大學.每次都鬼死咁痛,感覺就係當扭親個下,腳眼有條骨罅一開一合,夾住左外側一條腳筋,一行就全身既重量夾落去條筋到,真係痛到癲架!

好既跌打師傅就知道,因為想平衡唔好跌,初初條筋就會扯到好行,所以只可以卒下跌打酒,敷下藥,等過幾日,卒落無咁緊,先至chok得,一chok,骨罅一開一合,條腳筋出番黎,嘩,舒服哂!

同腦榫一樣,卅歲前,扭親都有呢種感覺,卅歲後,都成日差錯腳,不過最多都係痛下幾日,無再咁易扭親,就算幾年前有一次真係兩隻腳一齊扭親,差d仆落樓梯,兩隻腳眼勁腫,痛左幾個禮拜,都再無夾腳筋個種痛.嗱,證明我真係發育到卅歲,唔係呃你架!

所以我都唔明,點解西醫可以扭親淨係夾木板打石膏固定,唔使整番條筋出黎既呢?

不過西醫好在夠科學,好似我話比阿容聽,每次扭親,好番之後,就覺得扭親個隻腳長左,腳板底既壓力大d,另一隻腳就好似有少少吊腳咁,腳板底緊緊掂到地,無乜壓力,叫佢研究下,佢d同事研究左廿年,早幾年睇新聞,終於都比佢地研究到點解喎,原來又係因為想平衡唔好跌,自己chok到個盤骨斜左,搞到好似長短腳,唔係真係隻腳長左!

中西醫學,各善勝長,好野好野!如果肯中西合壁,就仲好野啦!

頂頭鎚
Topic: 10奇遇 Trek
請先看<提示>.

講開踢波頂頭鎚,真係唔好比細路頂咁多頭鎚.

你地細個頂頭鎚,會唔會頭痛既呢?腦榫未生埋,真係好傷個腦架!

我試過小學同中學都頂過一次頭鎚,個腦"轟"一聲,成個腦好似震散左咁,嘩,痛到呢!

後黎十幾到尾,就黎二十個陣開始,d腦榫開始越黎越埋,越黎越窄,朝朝訓醒就要去擦牙.有乜關係?因為好頭痛囉!個感覺就好似訓教既時候,d腦漿攝左入d腦榫罅到,到起左身,地心吸力,就夾硬打棟咁扯番d腦漿出黎,真係痛到癲架!

擦牙既話,個頭輕微咁震下震下,d腦漿就可以慢慢咁震下震下,震番出黎,唔使一野咁扯出黎,咁先至唔會咁痛!直到差唔多卅歲,發育完成,腦榫終於都生埋晒,先至唔再痛炸!

你地細細個頂頭鎚就唔痛啦?咁即係一早個腦就停止發育,無再聰明過啦!我個腦發育到成卅歲,可想而知我而加係幾咁聰明呢!哈哈哈哈哈哈哈哈......!

搭lift
Topic: 10奇遇 Trek
請先看<提示>.

講起跳樓,咁就唔可以唔講呢單啦!

因為我細佬出左世,申請左大單位,2年班就由興華邨第一期,搬左上第二期.唔知係政府特登編晒 d黐線佬入黎住,定係起樓個陣無拜神,淨係我見到既都十個八個,無見到都唔知幾多個.成日唔係朝頭早返學呢個路口一 pat野,就係放學個個樓梯口一 pat野搞到要兜路.

第二期依山而建,最大既特色,就係呢到得兩個主要入口,同埋一條車路.兩邊入口各有兩架大貨 lift,比人搭上十幾樓既平台層,同埋天台,再行番自己住個座.

因為人多,條車路又要沿山邊兜個大圈,所以9成人都係搭lift出入.因此,架lift既設計就會係落既時候,停一樓比人出,落地下比人入,再直上唔停一樓.

即係地下等lift,就有個40x20呎既上蓋,一樓出lift,就只得lift門口上面一條5呎闊既簷篷,出左lift就無遮無掩咁,行到20呎前面條樓梯先落得番地下.

而且條邨係正工廠區對面馬路,個陣又多人番工廠,所以每日番工食晏食完晏同放工,都係超多人迫lift,迫到死死下!

大慨5,6年級,家姐升左中學,得番我同細妹番學,我學校好特別,今年上晝班,出年就變下晝班,再出年又變番上晝班.個日食完晏就同細妹返學啦,本來就應該搭近學校過邊既lift,不過好似整lift,個幾日都係搭另外個邊既lift.

迫呀迫呀,啱啱迫到入lift,兩個企正係lift門,落到一樓,唔記得為乜事,一開lift門,我就哎:"衝呀!"咁細妹就同我一齊,兩馬當先,衝呀!

跑跑跑跑跑,係我身後面,好近咁拍一聲,後面傳黎一陣嘩嘩嘩,我地繼續跑跑跑跑跑,去到前面樓梯口,落左幾級,我就諗:椅?仲乜後面無腳步聲既?成架lift幾十人個喎!

咁我就擰轉面睇下,見到架lift柵緊門,d人望住我兩個,企晒係lift入面,唔出lift喎!而係我再擰番轉頭既時候,暼下眼見到,係我同架lift中間,地下有 pat野!

我落多兩級樓梯,個腦轉多兩轉,我就知咩事勒,咁我就同細妹講:"嘩!有人跳樓呀!"佢擰轉頭望一望,就話:"椅呀~~~!"

我地就繼續好快咁落樓梯,急急腳咁返學,都仲未識驚!

放學番到屋企同呀媽講,先至諗到:好彩我地跑得快炸,如果唔係,分分鐘跌係我地面前,甚至兜頭責扁左?

嘩!唔係啦,以後都唔好係一樓出啦,落地下先出啦!

第二日番學,原來已經成條邨都知,無人再係一樓出lift啦!就連另外個便都係!

之後咁多年,都無人用一樓,除左一d新搬黎既人會問點解.個4架lift亦都繼續好傻咁,係一樓開門柵門,再落地下.

直到今日,搭車經過,都仲見到d人係地下迫出迫入,而房屋署亦都好官僚咁,寧願好似地鐵咁,劃幾條線叫人排隊,都唔肯加番個上蓋比一樓.你話呀,政府對窮人,真係好到無野好講啦!

撞野
Topic: 10奇遇 Trek
請先看<提示>.

最後呢單野,我從未講過出黎,連我屋企人都唔知!

我之前係灣仔番工,都番左有成八年,有幾架巴士番柴灣,但係分開幾條路幾個站,放工有時會行去灣仔街市前面搭車番屋企.十年八年前,個陣成日都7點先收工,天都黑晒.有次行到去碼頭轉出軒尼斯道,街市隔離個燈位過馬路,見到係燈位側邊,有塊大帆布好似金字塔咁笠住地下,又有警車又有救傷車,好明顯係有人跳樓啦!咁我唔理啦,照係側邊行過去搭車啦,人人都係咁行架啦!

過左幾日放工,又去街市搭車,過馬路,一行過個日大帆布笠住個位個陣,突然,後尾枕炸炸炸炸炸炸炸炸炸,好似有野想衝入我個腦咁,我打左個冷震,由後腦震到落尾龍骨!個陣衝力真係好猛,唔係我夠硬頸,真係頭都比佢衝甩呀!

跟住我就懶鎮定,一路行一路擰轉頭,扮晒睇下有車黎未,其實係想睇下有咩野!

無野吖!梗係無野啦,有野仲唔嚇死我咩!

我心諗:我咁堂堂正正,光明正大,你梗係入唔到黎啦,就算入到黎你都控制唔到我啦!好簡唔簡,你簡我!?

咁你地覺唔覺得我衣幾年性格有無唔同左呀?我就唔覺勒!

但係如果佢真係入左黎,一路等機會,等到我時運低個陣,拉我上天台,咁咪大劑?

好彩過左咁多年都無咩事!不過佢到底入唔入到黎呢?會唔會真係入左黎,等機會呢?

我係咪應該搵番條銀鏈同粒玉出黎帶呢?

最衰20,25週年個兩次番玫記食飯,都淨係掛住傾偈影相,唔記得搵個 Father幫我睇下啦!

有無邊個識人驅魔呀?介紹黎 check下啦喂!

玩
Topic: 10奇遇 Trek
請先看<提示>.

自從個兩次見到白衫白褲既救護員之後,印象中好似無乜再打開門對正鐵閘咁訓,就算好熱訓地下,阿媽都好似唔比打開門,最多都係開條隙仔,連d阿伯都好似少左人訓走廊,真係使唔使咁驚呀?!

過左一排,有次阿爸帶我同細妹落街,唔記得買餸定做咩勒,到差唔多5,6點返屋企,太陽落左山,暗暗地,不過未天黑,行過一處好似係學校,有d遊樂設置既地方,不過應該鎖左,感覺上唔應該有人係呢個鐘數入到去既地方,居然有一班細路係入面玩.我望左一望,細妹又望左一望,心諗:蝦!有人係入面玩既?不過都無咩特別唶,咁就繼續跟住我阿爸行返屋企啦.

又過左一排,同樣既情況,阿爸我細妹落街,5,6點返屋企,行過個道,又係一班細路係入面玩.我望左一望,細妹又望左一望,今次我就話:蝦!咁多人係入面玩既?

咁阿爸係我地前面,一路行就一路話:係邊道!?(呢個問題係咪好奇怪呢?)

我望一望入面就話:入面囉!

阿爸就話:幾時!?(呢個問題係咪更奇怪呢?)

我就話:而家囉!

阿爸就即刻停低,擰轉面,look大對眼,個嘴似笑非笑咁,對個頭埋黎我面前,眼定定望住我!

我到衣家都唔知衣個係咩表情,係咪以為我講笑呢?

我就加多句:細妹都見到格!

我細妹既回應係:Humm!(咩意思呢?咁即係同意我講既野?)

我又加多句:上次都見到啦!

咁我呀爸就企番直個身,一路擰轉身,一路話:行啦行啦,快d行返屋企啦!

咁我地咪繼續行囉!

個晚,我地幾姊弟係到玩,阿爸阿媽阿公阿婆就唔之商量d咩.白衫白褲既救護員,加埋一班玩緊既細路,佢地會點做呢?

跟住阿媽就叫我過黎.

我行埋去,見佢揸住條銀鏈,陀住粒玉,我就問:做咩呀?

阿媽:呀健兒,比條鏈比粒玉你帶呀.

我又問:點解呀?

阿媽:銀鏈定驚呀,玉可以擋剎呀!保平安呀!帶住佢,唔準除!

聽講BB仔成日無啦啦喊,呢招都有用個喎!

就係咁,我就帶住條頸鏈同粒玉,帶到十七八歲先無帶,亦都無再見過d古怪既人同奇怪既野啦!UFO唔算啦!係得 JORGE囉! XDDDDD