登月真假
Topic: 10奇遇 Trek

量入為出?
Topic: 11玩嘢PlayPolitic
請先看<提示>.

葉劉淑儀質疑量入為出,量入為出到底啱唔啱?

基本法107條規定:香港政府的財政預算以量入為出為原則,力求收支平衡,避免赤字,並與本地生產總值的增長率相適應.

咁違反量入為出得唔得?可唔可以量出為入,量出為出,量入為入呢?政府既財政政策,又有無做過違反過呢?唔得?無?

因為舊年既收入少左,所以加稅,呢樣個樣加價,令到今年收入多番!或者收入多左,所以減稅,呢樣個樣減價,減少市民負擔!咁係咪量入為入呀?政府係咪有做個呀?! (減商業登記徵費,破產欠薪基金)

因為預計支出多左,所以加稅加價,或者相反,咁係咪量出為入呀?政府有無做個呀?!唔使我講例子大家都應該記得啦!

因為舊年某D野支出多左,所以今年其他野使少D,或者舊年有D野支出少左,所以今年其他野又可以使多D,咁係咪量出為出呀?

又或者因為預計將來支出多左,所以而加唔肯使錢,咁又係咪量出為出呀?

戰後嬰兒潮,未來人口老化,開支太大,全民退保到時會爆煲,所以而加唔可以使錢實行全民退保!量出為出!哈!

咁量入為出,係咪量舊年既入,為今年既出呀?定係今年既入,為今年既出呀?定係每個月都要量入為出呀,每日使唔使呀?

又可唔可以量出年收入,為今年既出呀?量五年後,十年後,卅年後既入,為今年既出又得唔得呀?應該唔得啦?!要力求收支平衡,同避免赤字喎,量幾年後既入,點力求今年收支平衡,同避免赤字呀?

個D大白象工程,咩高鐵呀,新跑道呀,故宮呀,將來唔知幾多十年後會增加本地收益,所以而加就算超支赤字都要洗錢起,死都要死出黎!哈!哈!留意呢到我係用洗錢唔係用使錢架!

咁既然可以量卅年後既入,為今年既出,咁因為幾十年後收入少,所以而加就要使多D,等到時唔使咁大開支,實無理由唔得啦吓?

因為幾十年後老人多,打工仔要一個養幾個,利得稅同入息稅都少,靠政府養老人更加唔掂,所以而加更加要趁有錢搞大個全民退保,咁就唔怕到時搞唔掂啦!好野!

基本法話,要力求收支平衡,避免赤字,同埋與生產總值增長率相適應喎!睇清楚D?力求啫,無話一定要~平衡吖,避免啫,咁避免唔到赤字,咁點先?叫D官比番錢政府呀?係又好呀!生產總值負增長,咁又點呀?係咪成年唔使錢,唔出糧比D公務員呀?金融風暴金融海嘯個陣,咪一樣,只係使少D D咁DUR DUR!仲有收入大增個幾年,咪又一樣無大使幾倍!完全違反晒基本法喎!

中國政府自己又有無違反量入為出呀?我無興趣知喎,想知自己去研究囉!

其實政府既財政預算,唔係睇咩量入為出,量出為入,量出為出,量入為入,而係應該睇個政府短視定係目光夠長遠既啫!儲儲埋埋D錢,永遠都話未到時候用,唔通等D窮人餓死晒先用咩?政府收稅唔用係窮人到,唔使收稅啦!

結論:
1.財政預算以量入為出為原則,擺明就係有人想玩死香港啦!
2.政府違反左量入為出咁耐咁多次都無人知,你班玩左政治幾十年既高官,特首,司長局長副局長政治助理,仲有所有立法會區議會議員,同埋個D政黨高層,你地仲有面企出黎呀?唔該,全部遲職,無人想再見到你地班廢柴!
3.玩政治,就係咁簡單囉!

左閃右避
Topic: 10奇遇 Trek
請先看<提示>.

上次講耳聽八方既超能力就個個都得吖,咁眼看四面,一眼關七,或者再勁D既超能力又得唔得呢?我呢次就唔知算唔算嘞!十幾廿年前,有一次行行吓街,係邊度真係唔記得啦,之所以唔記得,係因為當時既情況,令到我真係連件事都差D唔記得左.

個日係條街到行行吓,突然間覺得有D唔妥,即刻停底擰個頭向側邊,一望,有好多件野向住我呢個方向飛緊埋黎,係咩真係唔記得,只記得大慨係長長地手掌咁上下長度,唔係好危險不過飛中應該都幾傷吓既野.

呢搾野其中有3件一望個陣已經飛到我面前,唔到一秒就會先後飛中我.就係呢個時候,我開始聽到有把女人聲離遠係我後面尖叫.咁既情況,我仲可以點呢?擋又唔係,隻手都會受傷,走又走唔切,點好呢?

無辦法,我唯有氣定神閒,好似MATRIX 咁,左閃右避,個頭向左側一側,再向右側一側,再黎個FLICK 水髮咁樣既上半身順時針轉一圈,一秒之內,一氣呵成,三個簡單清脆既動作,就避開晒個3件野!

跟住我再若無其事咁,望一望唔小心整到D野差D飛中我既人,見佢木無表情,應該都係驚魂未定,唔識反應.隨住女人既尖叫聲開始停,我就擰番向前,施施然咁慢慢行,離開案發現場,望都無望到個尖叫既女人係咩人同咩表情.其間仲聽到後面離遠有人話:"嘩,你見唔見到呀?佢點做到架?"好自然,我亦都係無望到周圍有咩人同咩表情既.係咪好瀟灑呢!

喟,咁梗係要扮晒無野,令到所有人都覺得唔係咁大件事啦,唔係既話,D人覺得我好勁,搞大左件事,比人知道我有超能力,捉左我去做實驗,仲得了既?

就係因為我咁若無其事,搞到連自己都對件事無咩印象,所有細節都唔記得,唔係諗起耳聽八方,諗起超能力,真係都醒唔起有件咁既小事.

而加講番出黎,無證無據,就算真既都當估仔聽架啦!應該唔怕比人捉去做實驗既!當日見到既人,同埋果個尖叫既女人,如果有寫低擺上網就好嘞,等我都可以知道番當時既詳細情況,同埋飛埋黎既係咩野吖嗎!

不過唔好話我唔警告你呀,想捉我去做實驗?因住我變X-MEN咁反擊呀!到時唔好怪我呀!哮~!

耳聽八方
Topic: 10奇遇 Trek
請先看<提示>.

耳聽八方,真係得咩?話說當年F.2,阿狒坐我隔離,再隔離,係咪叫PC CHIU呢?阿狒後面,係咪叫,WILBERT 定WILFERD 呢?我前面,叫咩咩 YEUNG呢?唔記得晒添!HE~!

有日轉堂,四條友唔知邊個開始同我講野,問我野喎,跟住另外幾條友仔,又貪玩,想嘈到我聽唔到,結果兩個三個四個,同時同我講野,WEWE WAWA,鬼殺咁嘈.

噏遠一輪,佢地諗住我都聽唔到架啦,咁就收聲,擰番正,做,唔係,係玩自己野.靜左兩秒之後,我就逐個對住佢地,講:"係呀!" "唔知呀!" "無呀!" "好難啦!" 係咁上吓啦,每人比左一個好簡單既答案佢.

跟住再靜左五秒,佢地先知:"佢做咩呀?" "嘩,肥仔答我地問題喎!" "四個人一齊同佢講野佢居然全部都聽到喎!" "嘩勁喎死肥仔,你點做到架?"

咁我就話啦:"好易既啫,只要集中精神,你地都得格,唔信試吓吖!" 咁我就開始同阿狒講野,其他人又一齊對住佢,WEWE WAWA,,WEWE WAWA!

跟住靜左十秒,佢就開始對住我地四個人,逐個講野答我地.過左幾秒,我地就話:"嘩真係得喎,答啱晒喎" "我都話得架啦,係咪呀!" "到你試吓,到你試吓!" 如是者一人玩左一次,五個人都做到,可見我地人類既超能力既潛能,係幾咁深不見底既呢!我就用左兩秒,佢地都只係用左十秒八秒咋!

不如搵日出黎再試吓,真係黎一個耳聽八方,八個人一齊講野,睇吓邊個得吖!

演藝名人
Topic: 10奇遇 Trek
請先看<提示>.

大家有無試過成日見到D演藝名人呀?話說當年大學,無宿舍收,讀ENGG 又特別多堂,所以由YR.1 開始,差唔多朝朝搭車,8點左右番到HKU,再搭LIFT上到平台,行過去CANTEEN飲杯水,跟住再去搵課室/LECTURE ROOM/HALL 上堂.

個陣差唔多日日,好準時,都見到柏安妮同幾個同學由CANTEEN行出黎,咁梗係男同學啦,邊有女同學會走埋去吖,日日都化到個妝咁行!

過左大半年,有日上到平台,又向住CANTEEN行過去個陣,今日竟然見到得柏安妮一個人離遠咁行過黎.咁我望一望佢,佢又望一望我,佢竟然對住我笑喎!嘩,嚇到我吖,即刻擰番對眼向前望,扮睇唔到.再行多十步八步,同佢又更加近,差唔多迎面對住行,我再立一立佢,佢原來仲望住我,見我望住佢,佢又對住我笑呀!

嘩!好驚呀!我即刻再次擰番對眼向前望,你睇我唔到,我睇你唔到,一直到佢係我右邊擦肩而過,我都唔敢擰番轉頭睇吓佢仲有無望我,甚至入到CANTEEN飲水,都唔敢望番出去.嘩,嚇到我心仔噗噗跳,足足飲左兩杯凍水定驚呀!

點解咁驚?梗係驚啦,以前D人話D歌星明星D男女關係好亂加嗎!點知佢想對我做D乜架?又或者分分鐘比佢果幾個成日圍住佢既男同學搵人揼我一身,仲得了既?佢就話FINAL YEAR啫,我仲要讀3年U架!

呢次之後,好似無再朝朝見到柏安妮啦,佢梗係知難而退,金盤洗手,改邪歸正啦,我亦都維護正義,保衛世界既和平,雙贏,大家都好,幾好吖!

BTW,我成日將柏安妮同上山安娜個名撈亂左,不過我見到既,真係柏安妮,唔係上山安娜黎架!

競爭力?
Topic: 11玩嘢PlayPolitic
請先看<提示>.

董事賺多10倍,一般打工仔賺多5成,係大地產大銀行賺得多先係咁啫!咁細公司呢?細公司無乜錢賺,唔係咁既!D董事無咁衰既!人工太高,無競爭力架!

細公司無錢賺?董事唔係咁?人工高無競爭力?真係?咁我地而加又一齊睇吓係咪真啦!

先睇吓中型公司啦!

地鐵,2000年賺41億,2015年130億,3.2倍,董事收入由3800萬變6970萬,1.8倍,最高收入董事由800萬,變成1410萬,1.8倍,第二高收入董事由500萬,變830萬,1.7倍,最高收入行政人員由500萬,變成850萬,都係1.7倍!咁職員呢?其他業務,內地同海外都寫到唔清唔楚,咁就淨計香港既鐵路業務,僱員人數由4943變10891人,薪酬支出由17億變49億,員工平均月薪,由28458變成37539,十五年升得3成咋!

領匯,2006年賺21億,2016年120億,5.8倍,嘩!董事收入由255萬變3819萬,接近15倍,嘩嘩!最高收入董事由191萬,變成2208萬,11.6倍,嘩嘩!第二高收入董事由10萬,變859萬,85.9倍,嘩嘩嘩!最高收入行政人員由200萬,變成3500萬,係17.5倍!嘩嘩!咁職員呢?僱員人數由272變883人,薪酬支出由0.46億變5.44億,員工平均月薪,由14093變成51340,嘩!十年升得3.6倍咋!

唔知D公屋小商戶有無賺多咁多十倍呢?定係賺少左十倍,將小商戶同公屋住戶D收入,變晒領匯班董事既收入呢,呵?唔好唔記得,平均每月薪金,2006年係11001,2016年係15129,10年只係多3成8架咋!

睇吓再小型D既公司啦!

電信盈科,收購電話公司之前就無謂計啦,公司收入又少4-5倍,董事收入又少10倍8倍,1400萬變1.3億!收購頭一年都無謂計啦,公司收入蝕70億,董事收入又比多5-6倍,成7.7億,淨係最高收入個兩個董事,都一個2.8億,一個2.6億囉!咁就由下一年計起啦!

2001年賺13.4億,2015年23億,1.7倍,董事收入由1.26億變7011萬,得番5成6喎!最高收入董事由2600萬,變成3223萬,1.2倍,第二高收入董事由2150萬,變1650萬,得番8成2,最高收入行政人員由1350萬,變成5250萬,3.9倍!咁職員呢?僱員人數由1.4萬變2.54萬人,薪酬支出由41億變34億,員工平均月薪,由24220變成11135,十四年跌到得番4成6咋喎!董事收入無乜升跌,人工就係咁減,哈哈!

德永佳,即係BALENO,1999年賺1.8億,2016年10.5億,5.8倍,董事收入由3340萬變7287萬,2.2倍,最高收入董事由1200萬,變成4648萬,3.9倍,第二高收入董事由650萬,變1849萬,2.8倍,最高收入行政人員由600萬,變成350萬,得5成8喎!咁職員呢?僱員人數由5506變15353人,薪酬支出由2.3億變15.2億,員工平均月薪,由3496變成8223,十七年升到2.4倍喎!幾好咁喎!噫!2016年得8千2?1999年得3千5?慘過攞最低工資喎!唔使驚,員工9成半係大陸既!嘩,大陸賣BALENO有8千2蚊,既係7千人仔一個月?咁好揾!係真唔係呀?

維他奶,2003年賺1.4億,2016年5.3億,3.8倍,董事收入由1841萬變2801萬,1.5倍,最高收入董事由700萬,變成1341萬,1.9倍,第二高收入董事由550萬,變1279萬,2.3倍,最高收入行政人員由300萬,變成800萬,都係2.7倍,咁職員呢?僱員人數由2289變7124人,薪酬支出由4.3億變12.8億,員工平均月薪,由15618變成14949,十三年得番9成6!董事自己加到2,3倍,人工就無郁過!哈!

大家樂,2006年賺3.2億,2016年5.2億,1.6倍,董事收入由1495萬變2505萬,1.7倍,最高收入董事由655萬,變成1186萬,1.8倍,第二高收入董事由563萬,變610萬,多1成,最高收入行政人員由100萬,變成600萬,6倍呀,咁職員呢?僱員人數由2007年13000變2016年17575人,薪酬支出由9.7億變22億,員工平均月薪,由6244變成10398,九年升1.7倍!同董事差唔多,都算好啦!不過2007年先得6千幾,今年都緊緊過萬,少唔少D呀?洗碗而加都萬五啦!不過就算做新世界都係差唔多啫!

大快活,2008年賺1億,2016年2億,2倍,董事收入由1183萬變2130萬,1.8倍,最高收入董事由748萬,變成1070萬,1.4倍,第二高收入董事由189萬,變635萬,3.4倍,最高收入行政人員由150萬,變成200萬,1.3倍,咁職員呢?僱員人數由4520變4900人,薪酬支出由3.9億變7.4億,員工平均月薪,由7246變成12517,八年升1.7倍!都係同董事差唔多,呢D公司咪好囉!

打工仔7千幾變萬幾,大老細就7百幾萬變千幾萬,相差1千倍之嗎!七八十年代就幾百變千幾同幾萬變十幾萬!相差100倍變相差1000倍!咁即係廿零三十年後一定係相差10000倍啦,人工幾萬變十幾萬,大老細就幾億變十幾億啦!咁大家繼續勤力D捱囉喎!吓!

你班中產以為自己好好呀?10萬8萬同董事千幾萬比,100倍啫!幾十年前1萬8千同十幾萬比,10倍咋!廿零三十年後,係一百幾十萬同十幾億比呀,1000倍呀!一樣有排你捱呀!中產!

睇埋好細個D公司又點呢?

時富集團,即係實惠,2001年蝕4.5億,2015年賺1520萬,好野吖,蝕變賺,董事收入由1167萬變1996萬,1.7倍,最高收入董事由250萬,變成1664萬,6.66倍,第二高收入董事由250萬,變139萬,得番5成6,最高收入行政人員由250萬,變成950萬,3.8倍!咁職員呢?僱員人數由1139變1167人,薪酬支出由2.4億變4.2億,員工平均月薪,由17559變成29991,十三年升到1.7倍!幾好咁喎!不過做實惠人工真係有3萬?

知唔知果個賺多6.66倍既最高收入董事係邊個呀?關百豪,最低工資委員會既成員呀,哼!自己一個仲賺得多個成間公司,蝕緊4.5億個陣都袋過千萬落班董事自己袋,政府識搵呢D人入最低工資委員會,真係好~好~野呀!唔怪得最低工資永遠都係加得兩三蚊啦!其他最低工資委員既資方代表,D公司無上市,搵唔到年報,算你地好彩!

大公司D錢都落唔到去員工同細公司,細公司D錢都一樣去晒董事到,打工仔同小商戶D錢又去晒領匯同大公司D董事到,呢個良性循環,真係,無得頂呀!

其他國家既人,我無可能睇晒全世界既野,你地自己搵真相,我無責任幫你.

係呀,我講既都係錯架,咁點吖?你班記者又話你地人工真係仲少過廿年前,不如又一齊睇吓吖!

TVB,2002年賺5.9億,2015年13.3億,2.3倍,董事收入由525萬變2004萬,3.8倍,最高收入董事由450萬,變成930萬,2.1倍,第二高收入董事由100萬,變702萬,7倍,最高收入行政人員由600萬,變成1000萬,1.7倍,咁職員呢?僱員人數由5039變4221人,薪酬支出由11.3億變15.1億,員工平均月薪,由18704變成29811,十三年有1.6倍!TVB又話好奀既?

東方,2002年賺3億,2016年5460萬,得番1成8,董事收入由1029萬變3792萬,3.7倍,公司賺少咁多,都仲加3,4倍,最高收入董事由600萬,變成1952萬,3.3倍,第二高收入董事由350萬,變1562萬,4.5倍,最高收入行政人員由2000萬,變成550萬,得番2成8,咁職員呢?僱員人數由2645變1667人,薪酬支出由8億變7.3億,員工平均月薪,由25110變成36443,十四年升4成5!都好多喎!

蘋果,2000年蝕7800萬,2016年蝕3.2億,蝕多4.2倍,董事收入由195萬變2032萬,10.4倍,公司蝕多4倍,班董事仲賺多10倍,好吖!最高收入董事由150萬,變成661萬,4.4倍,第二高收入董事由100萬,變631萬,6.3倍,最高收入行政人員由100萬,變成550萬,5.5倍,咁職員呢?僱員人數由600變3527人,薪酬支出由5400萬,變13億,員工平均月薪,由7500變成31046,十六年升4.1倍,加好多喎!又話少左?呃讀者呀?

星島,1999年蝕5920萬,2015年賺6228萬,董事收入由661萬變3159萬,4.8倍,董事收入等於公司收入一半,哈!最高收入董事由200萬,變成976萬,4.9倍,第二高收入董事由200萬,變892萬,4.5倍,最高收入行政人員由60萬,變成700萬,11.7倍,咁職員呢?僱員人數由2001年2796變2015年2108人,薪酬支出由4億,變6.5億,員工平均月薪,由12011變成25656,十四年升左1倍有多.

世界華文,即係明報,合併前七年黎公司收入少左7成,不過董事收入同人工都無乜加減.合併後,以美元計,2007年賺1149萬,2016年賺2665萬,2.3倍,董事收入由44萬變147萬,3.3倍,最高收入董事由29萬,變成42萬,1.5倍,第二高收入董事由4萬,變36萬,9倍,最高收入行政人員由32萬,變成39萬,1.2倍,咁職員呢?僱員人數由3429變4368人,薪酬支出由7203萬,變9935萬,員工平均月薪,由1751變成1895,九年升左1成都無,乜明報咁渣架?!

南早,2006年賺3.4億,2015年3.2億,得9成3,董事收入由143萬變1097萬,7.7倍,最高收入董事由33萬,變成978萬,29.6倍,嘩嘩嘩嘩!第二高收入董事由30萬,變都係30萬,最高收入行政人員由350萬,變成600萬,1.7倍,咁職員呢?僱員人數由1016變1033人,薪酬支出由3.8億變5.1億,員工平均月薪,由30922變成41465,九年升3成4!好高人工喎!不過都唔夠你地個最高收入董事勁啦,29.6倍!

間間報紙電視班董事都加左咁多倍,仲成日幫D權貴學者作假新聞,話人工係加得咁少?呢D叫做咩呀?官商學報4勾結呀!官商鄉黑好出奇呀?幾千年黎都係咁架啦,官商學3勾結都一樣啦,D學者幫權貴講歪理呃無讀書既平民幾千年啦,今時今日仲講官商勾結官商鄉黑勾結!官商學報4勾結呀!報導真相?挑!

都係個句啦,我講既野都係錯既,唔好信我.事實係點呀?道理係點呀?你自己搵,你自己諗囉,再唔係直接擋我講既野相反就係啱囉,你死你事,關我鬼事!

結論:
1.公司競爭力同人工高一D都唔關事,完全係董事同高層既高收入影響公司競爭力!
2.繼續唔好思考,唔好搵真相,繼續比人呃啦,抵你死,唔抵可憐!你班勤力做盡玩盡浪費盡每一秒既思考死懶鬼!
3.玩政治,就係咁簡單!

加人工?
Topic: 11玩嘢PlayPolitic

請先看<提示>.

最低工資實施左六年,今年加第三次,廿八,三十,卅二個半,預計今次卅四個半,每兩年加唔到一成!真係加盡都係得咁多?

咁我地而加就一齊睇吓係咪真啦!

以前既工資中位數,我淨係搵到去2009年,咁根據工資及薪金總額按季統計報告,平均每月薪金,1996年係10130,2016年係15129,啱啱好多5成!好好啦呵!

一般打工仔就廿年加5成,跟住就睇吓D董事嘞!睇吓上市公司D年報先!

匯豐控股,以美元計,1993年賺27億,2013年162億,6倍,董事收入由713萬變成2715萬,3.8倍,最高收入董事由157萬,變成1255萬,8倍,哈!咁職員呢?僱員人數由9.8萬變25.4萬人,薪酬支出由37億變192億,員工平均月薪,由3132變成6296,都有兩倍喎!開唔開心呀?

如果計1995年至2015年呢?賺39億變135億,3倍半,董事收入由719萬變成3318萬,4.6倍,最高收入董事由158萬,變成1120萬,7倍,公司賺多3倍半,佢就Double賺多7倍,哈!第二高收入董事由108萬,變650萬,6倍,哈哈!最高收入行政人員由229萬,變成1222萬,5.3倍!咁職員呢?僱員人數由10.1萬變25.5萬人,薪酬支出由45億變199億,員工平均月薪,由3687蚊變成6498蚊,廿年多唔夠8成!1倍都無!哈哈哈!

渣打控股,又係以美元計,2001年賺6.7億,2015年蝕22億,係-3.3倍,如果計番2014年賺27億,都多左4倍!董事收入由1021萬變成2923萬,2.9倍,最高收入董事由200萬,變成1283萬,6.4倍,第二高收入董事由162萬,變450萬,2.8倍,最高收入行政人員由2002年269萬,變成2128萬,7.9倍!嘩!咁職員呢?僱員人數由2002年2.9萬變2015年8.4萬人,薪酬支出由13億變71億,員工平均月薪,由3623變成7056,十三年升到1倍喎!開心啦?

中銀香港,2001年賺28億,2015年240億,8.7倍,董事收入由700萬變成2050萬,2.9倍,最高收入董事由550萬,變成835萬1.5倍,第二高收入董事由100萬,變551萬,5.5倍,哈!最高收入行政人員由300萬,變成650萬,2.2倍!咁職員呢?僱員人數由1.37萬變1.5萬人,薪酬支出由38億變66億,員工平均月薪,由23051變成36489,十四年升1.6倍!公司賺多8,9倍,班董事加兩倍,人工就加得6成,哈!

不過底層個班銀行職員,你地係咪真係有加咁多人工呀?年報寫個喎!

長實,1997年賺176億,2014年546億,多過3倍,董事收入由1.25億變成2.45億,接近2倍,最高收入董事由2900萬,變成6966萬,2.4倍,第二高收入董事由1800萬,變3140萬,1.7倍,最高收入行政人員由1350萬,變成3012萬,2.2倍!咁職員呢?僱員人數由3080變8100人,薪酬支出由9億變23億,員工平均月薪,由24567變成23251,十七年得番9成5咋!正呀!

和黃,1995年賺96億,2014年672億,足足7倍,董事收入由9580萬變成4.438億,4.6倍,最高收入董事由2650萬,變成1.963億,7.4倍,第二高收入董事由1850萬,變7907萬,4.3倍,最高收入行政人員由950萬,變成4900萬,5.2倍!咁職員呢?僱員人數由2.9萬變28萬人,薪酬支出由51億變346億,員工平均月薪,由14643變成10299,十九年後得番7成咋!超正呀!

新世界,1995年賺34億,2015年191億,5.6倍,董事收入由1320萬變成1.436億,接近11倍,嘩!最高收入董事由400萬,變成6560萬,16.4倍,嘩嘩!第二高收入董事由300萬,變2170萬,7.2倍,最高收入行政人員由400萬,變成1650萬,4.1倍!咁職員呢?搵唔到喎!2005年就搵到.

咁由2005年計起啦,,賺30億,2015年191億,6.4倍,董事收入由3420萬變成1.436億,4.2倍,最高收入董事由1730萬,變成6560萬,3.8倍,第二高收入董事由520萬,變2170萬,4.2倍,最高收入行政人員由800萬,變成1650萬,2倍!咁職員呢?僱員人數由4.7萬變4.8萬人,薪酬支出由30億變64億,員工平均月薪,由5380變成11053,十年有2倍!勁呀!噫?乜2005年得5380蚊咋?

而加大家知點解工資中位數廿年先加得5-6成啦!係呀,經濟前景真係好~唔明朗架,每年只可以加2-3%架咋,唔係邊有錢加10倍8倍比班董事自己啫!

係呀,我講既野都係錯架,唔好信我呀!事實大家都記得啦,倒數番轉頭廿年,1990年代去1970年代,董事收入都係相差10倍啦,幾百萬變幾十萬,人工一樣少3分1,1萬變6千7啦,肯定唔係1萬變1千啦,係咪?再倒數廿年,1970年代去1950年代,董事收入又係少10倍,幾十萬變幾萬,人工又係少3分1,6千7變4千5,唔係1千變1百啦!阿吳楚帆同張活游,財多身子弱,賺錢多~到嘔,唔係捱到嘔~血呀嗎,大家都記得啦,事實既野,無得呃格!

1950年代到1990年代,冷戰韓戰越戰,中東危機石油危機股災,回歸信心危機8964....,經濟前景一樣都係好唔明朗啦,所以都係董事收入廿年升10倍,打工仔收入升5成囉,呵!

再倒數廿年,1950年代去1930年代,董事收入又係幾萬變幾千啦,人工又係4千5變3千,唔係1百變10蚊啦!再倒數到百年前,1930年代去1910年代 ,董事收入又係幾千變幾百,人工又係3千變2千啦,肯定唔係10蚊變1蚊啦,人人都知既事實,有根有據,有報紙有電影記錄,個個都記得,係咪先~?

所以經濟增長對窮人一D好處都無,經濟衰退先至最着數!支持經濟衰退!打倒經濟增長!經濟衰退100年,窮人收入多過董事十倍!耶~~!

係呀係呀,我講既野都係錯架,唔好信我呀!廿年前D年報,我多數都搵唔到,你地想知真相就自己搵!其實唔使搵都知,我係呃你架啦,唔通你公司D董事會呃你咩!呵!

就算一齊加十倍,一千變一萬,同十萬變百萬,我多9千你多9十萬,都爭成百倍啦!又點會使做到你百萬變千萬時,我先得一萬變萬五咁絕吖?9百萬同5千,係1800倍呀!搞到自己變貪心賤格人渣有錢佬咩!梗係唔會啦!呵!

咁,你地繼續乖乖地勤力賺多5成既同時,幫班董事賺多10倍囉喎!吓~!

結論:
1.最低工資,大條道理,一次過加十倍,加到350蚊,再連加十倍三次,追番呃左個D人工番黎,之後再睇住董事收入黎加.你加9百萬,我地要加9十萬,最多少一個0,絕對唔可以再爭百倍千倍!
2.人地白紙黑字公佈晒比你睇,你都仲係比人呃,抵你死,唔抵可憐!你班勤力既死懶鬼!
3.玩政治,就係咁簡單!

公屋新數學
Topic: 11玩嘢PlayPolitic
請先看<提示>.

咁而加已經係2016年,比人口普查又過左5年,不如我地又睇吓呢五年又起多~左幾多公屋,又住多~左幾多人吖!

問你地都唔識答架啦,識答都唔敢答架啦,咁我就直接講答案架啦!

根據今年三月房委會報告公佈既資料,第2頁,公屋單位既數目係...七十五萬幾!比2011年,足足增加左二萬八千!

今屈政府又話大力增建公屋既?之前十年十萬,平均都一年一萬,而加反而五年先得二萬八,平均一年得五千六,足足相差左....-43%,幾乎少成一半咁濟,咁叫大力增建公屋呀?五千六原來多過一萬呀,學野啦大家!香港政府發明既新數學第一定理呀!哈哈哈哈哈!

至於公屋人口呢,就係...205萬7千!比2011年,又多左...-3萬5千!YEAH!

之前十年少4萬3,平均一年少4千3,而加五年就少3萬5,平均一年就住少7千人,減少既速度足足係之前既163%, 勁呀!

換個方式計,之前每起一萬間公屋,就住少四千三百人,而加每起一萬間公屋,就住少......一萬二千五百人,足足係之前既290%,差唔多三倍,真係超勁呀!起多D屋=住少D人,公屋新數學第二定理呀!勁呀!

我都話拆番幾十萬間公屋,就住多幾十萬人,就可以自然解決窮人既住屋問題架啦!

不過唔係喎,再起多D公屋,公屋人口跌到0,咁直頭無晒窮人添啦,咁仲使乜幫窮人啫!直接消滅窮人,香港政府呢招堅勁呀!政府果然係大力解決窮人.......問題喎!嘻!-嘻!-嘻!

係呀係呀,我講既野都係錯架,唔好信我呀!唔使上人口統計處同房屋署個網搵黎睇啦,唔使睇都知,我呃你架啦!政府先唔會出蠱惑呃你啦!唔通政府會話比你聽佢出蠱惑咩!呵?!

個個官員,議員,政黨,專家,學者,都話房屋問題,係土地供應問題喎!哈哈哈哈哈哈哈哈哈哈哈哈!

人口普查 2011 P.72-73
年份    單位    人口
2001    624,349     2,135,624
2011    722,161    2,092,638
相差    +10萬    -4萬3    -4300人/1萬間    
    1萬/年    4300/年
房委會報告 201603 P.2
2016    750,300    2,057,100
相差    +2萬8    -3萬5    -12500人/1萬間
    5600/年    7000/年
    -43%    -163%    -290%

結論:
1.而加知道點解公屋輪侯冊,有廿九幾萬咁多人啦!咁你地乖乖地慢慢等囉喎!唔好暴動呀!有乜事都唔好搵我呀!唔關我事架!
2.政府不斷咁講比你知佢出蠱惑,你都仲係唔知唔諗唔睇唔理,咁就抵你死,唔抵可憐啦!勤力比人呃,勤力嘥晒D時間,又唔睇唔諗唔搵真相既死懶鬼!勤力既死懶鬼!
3.玩政治,就係咁簡單!

增建公屋?
Topic: 11玩嘢PlayPolitic
請先看<提示>.

個個既政綱都話增建公屋,話要幫窮人解決住屋問題喎!有無人唔係架?無啦!

乜增建公屋真係可以解決窮人既住屋問題咩?有無人話唔贊成增建公屋架?無啦嗎?咁我講囉喎,唔好後悔呀!

有無睇人口普查既資料呀?做咁多年官員議員,實有睇啦!?個D關心社會既後生,無理由無睇啦?

咁根據2011年人口普查公佈既資料,第72-73頁,2001至2011年,十年間多左幾多公屋單位呀?唔記得個實數,大慨都應該記得啦?無人答呀?無人答我自己答囉!

十年黎,公屋數目由六十二萬四千幾,去到七十二萬二千幾,增加左差D十萬.乜唔係每年起兩三萬間公屋既咩?行三步退兩步呀?乜拆左十幾廿萬公屋咁多呀?每年得個一萬,就唔好講到好搏命做野咁,好似年年有幾萬間公屋比人申請咁啦,大話呃人精香港政府!

咁公屋既人口,知唔知又相差左幾多呀?無人答呀?咁一齊估吓吖!

多左十萬間公屋,平均一家三口,住多三十萬人.個個結婚唔生仔,都住多廿萬人啦!個個唔結婚,都住多十萬人啦!但係政府話每年單身配額得千零二千個炸喎!起多十萬間公屋,段估起碼都打個和啦,無理由仲少.....左掛!?

估啦!卅萬,廿萬,十萬,打和,幾多?幾多呀?平時個個咁多野講,而加無人敢答呀?你地唔敢講,咁我就更加要講囉!

2001年,公屋人口係213萬5千幾,去到2011年,公屋既人口係........燈燈燈凳!209萬2千幾!足足增加左........ -4萬3千!YEAH!

正唔正呀!?起多十萬間公屋,仲住少左4萬3千人,咁點解決窮人既住屋問題呀?

唔使問政府啦,問佢都係求祈答左等於無答既啫,唔通政府真係會話比你聽佢出左咩蠱惑咩!

個D議員,點解無人講,提出黎質問政府呀?比着我都唔講啦,原來越起得多公屋,越住得少人,講左出黎仲點呃人繼續選我呀?

後生仔,有心關心社會就得呀?唔用眼唔用腦搵出真相,淨係有心,有乜用呀?

係呀,我講既野都係錯架,唔好信我呀!咁你地對住個廿九幾萬輪緊公屋既人講啦,點解越起得多公屋,越住得少人係正常?講到佢地肯信,肯繼續慢慢等,唔暴動,咪得囉!唔使對住我講呀,講乜我都唔會信架!

結論:
1.拆番幾十萬間公屋,住多幾十萬人,自然解決窮人既住屋問題!
2.政府講比你知佢出蠱惑,你都唔知唔諗唔睇唔理,咁就抵你死,唔抵可憐!
3.玩政治,就係咁簡單!

晾衫,抹窗
Topic: 11玩嘢PlayPolitic
請先看<提示>.

晾衫跌死幾多人?
抹窗跌死幾多人?
點解死咁多人,都仲唔立法,規定要用安全帶?
安全帶好貴呀?
外傭條命就唔係命?
老人橫掂個頭近?
孝順仔女未試過出意外?
意外數字少過地盤棚工?
高官議員,你地有無人性架?

立法,規定,晾衫抹窗要用安全帶.
僱主無提供比外傭,就犯法坐監.
自己唔用,死左保險無得賠.
係乜野人壽投資乜春保險都無得賠.
唔死得,唔只保險無得賠,癱左都要犯法坐監.
就算法官話唔使坐監,政府一豪子援助都唔會比你.

結論:
1.高官議員,有錢無人性.
2.窮人做家務,無錢抵你死.
3.玩政治,就係咁簡單!