勞動人口
Topic: 11玩嘢PlayPolitic
請先看<提示>.

事情:香港政府經常宣傳:未來人口老化,勞動人口下降,經濟增長下滑,必需輸入勞動人口.

香港70年前50萬人:勞動人口不足.
香港60年前200萬人:勞動人口不足.
香港50年前400萬人:又話勞動人口不足.
香港40年前500萬人:又話勞動人口不足.
香港30年前550萬人:又話勞動人口不足.
香港20年前600萬人:又話勞動人口不足.
香港10年前650萬人:又話勞動人口不足.
香港1年前700萬人:仍然話勞動人口不足.
香港10年後750萬人:依然話勞動人口不足.
香港20年後800萬人:依然話勞動人口不足.
香港30年後850萬人:仲係話勞動人口不足.
香港40年後900萬人:都仲話勞動人口不足.
香港50年後950萬人:死都話勞動人口不足.
香港60年後1000萬人:始終都話勞動人口不足.

問題:
永遠都話勞動人口不足:幾時至夠?
點解勞動人口不足?
勞動人口增加:經濟一定增長?
勞動人口下降:一定影響經濟增長?
經濟必需增長?
人口老化:一定要增加勞動人口?

解題:
-----------
勞動:為搵錢.
搵錢:為搵食.
衣食住行:樣樣要錢.
五六十年前:幾窮都養得起4,5個仔女.
今時今日:所謂中產生多一個都話頂唔順.
經濟越增長:點解反而越窮?

一萬蚊:夠養自己,鬆鬆地.
萬二蚊:養老婆仔女,緊緊地.
萬四蚊:養埋父母,死死地.
萬六蚊:養埋祖父母,實死比你睇.

舊式經濟:勞動密集,資本密集.
新式經濟:知識形經濟,高增值.

綱絡形經濟:全球一體化.
搞地產:幾萬人起樓,華人首富.
搞阿里阿爸:幾百人玩電腦,華人次富,小李小小.

開間工廠:請幾百人,賺百幾萬.
開間淘寶店:自己幾個人,又可以賺百幾萬.
開間公司:請幾十人,賺幾百萬.
寫手機APP:自己幾個人,又可以賺幾千萬.

香港人口老化,一個人要養幾個人.
既然係咁,香港政府應該繼續依靠地產,定還是大力推動,協助,鼓勵網絡創業呀?
傻既都識答啦!

香港出口貿易:非常重要.
政府協助:提供出口信用保險.
好多出口公司:上晒網搞.
政府係咪應該:提供網店網售信用保險?

網上交易:需要網上支付/收費平台.
美中英日法德蘇:個個國家都有咁濟.
香港自稱國際金融中心:今時今日都無!
大勢所趨點解都無:保障大銀行利益?

香港700萬人:永遠都話勞動人口不足.
台灣2000萬人:永遠都話勞動人口不足.
德國英國法國:永遠都話勞動人口不足.
美國加拿大澳洲:永遠都話勞動人口不足.
印尼印度中國:永遠都話勞動人口不足.
唔好話事實,數據唔啱:你明我意思就得啦!

比晒全世界60億人落香港:你都話勞動人口不足架啦!
無樓無屋唔夠住,仲輸入勞動人口?
到底邊個話勞動人口不足?請人做野個D老細.
點解請人:做多D生意,賺多D錢.
老細賺小D錢:會餓死嗎?

全世界都係人,全世界都可以做生意.
香港勞動人口不足:去外國搞生意囉!

老細賺多D錢:會解決人口老化?
老細賺多D錢:令打工仔賺多D?
老細賺多D錢:會養埋老人?

根據上市公司年報:
最大地產公司:廿年前賺幾十億,今年賺多十倍,幾百億.
最大銀行:廿年前賺幾百億,今年又賺多十倍,幾千億.
其他十大地產銀行企業:都係十倍八倍.
其中董事袍金酬金:又係十倍八倍.
袍金:好少架,每人十幾廿萬.
津貼花紅垃垃雜雜:幾百萬變幾千萬,甚至過億!

根據國內行情:
深圳打工仔:廿年前賺二三百,今年賺多十倍,三千起.
深圳大學生:廿年前賺千幾二千,今年賺多五倍,六七千起.

根據政府公布:
香港工資中位數:廿年前,一萬多D.
今年呢:多十倍?唔使旨意!多五倍?發夢啦!多一倍呢?想創你個心!多五成都好呀?咪傻啦!得個兩三成,萬四炸!
政府高官:唔知又加左幾多倍呢?

經濟增長:有錢佬賺晒,關打工仔鬼事!
經濟增長:完全無助解決人口老化,一個養幾個既問題!

輸入幾十萬勞動人口:都係賺萬四,有乜用?
勞動人口下降:但係多D人搞淘寶店寫手機APP,搵幾十幾百萬呢?
邊種方法應對人口老化好呀?

如果幾十年後,高科技發展,好多野唔使人做,咁點算?
夾硬搵野做,浪費資源,能源,破壞環保?
一係無野做無糧出,就餓死晒佢算數?
咁又人口大減,勞動人口下降喎!使唔使又輸入勞動人口?再餓死晒佢?

幾日前公布:一人貧窮線3500!返深圳打工都有三千!
在職貧窮大學生:一萬七千六百人!讀咁多書都得咁少人工!
貧窮人口:97萬!政府派左好多錢之後黎計!
政府未作援助前:134萬!近兩成人口!
香港真有錢:五個先有一個窮人!YEAH!

根據窮人心聲:
邊個要洗錢億億聲?燒落去個D陰司紙,咪張張都億億聲囉!
賺多幾個億啦,有錢佬!下面18層,逐層搞,有排你捱啦!
唔使加人工比打工仔啦,留番比你地係下面慢慢洗啦!
-----------

答案:勞動人口,OUT啦!人口老化,使乜驚!

以證:輸入勞動人口,舊式思維,政府高官,完全無跟時代進步.官商勾結,吸盡民脂民膏,源於不公平不公義選舉制度.

結論:以前點諗,照舊點諗,唔理社會有咩改變.又或者聽權貴話,特登唔改,等佢地繼續大晒.玩政治,就係咁簡單!

古語有云:出左半斤力,想話攞番足八兩,家陣惡搵食,邊有半斤八兩咁理想!吹漲!
古語又有云:鬼叫你窮咩,頂呀硬呀上,鬼叫你窮呀,頂呀硬上呀!

得分:窮人無得分/10

傳統分析
Topic: 11玩嘢PlayPolitic
請先看<提示>.

本來想寫更多傳統分析例子,但相信大家看過各大報章兩月來數百編正反論戰,再加上學聯跟政府直播討論,已經足夠.

我的方法,分析思考方法,有完整思考過程,無犯三個思考通病,就無錯.無完整思考過程,犯了思考通病,就是錯,簡單清楚.

傳統方法,分析思考內容,法律根據,到最後都無法證明誰對誰錯,只有不斷的語言偽術,歪理,拖延.法律有幾好拗,律師有幾好搵,不用多講.

用邊種方法,請你決定.

上文分析錯誤假設時提到,每日150人,其實大家好清楚泛民建制投票比例必定下跌,加上今次佔領運動,下跌更快.

幾年後,就算有真普選,特首,立法會區議會必定全由建制勝出,若現在再不解決這政治大漏洞,到時香港真正玩完.

解決這政治大漏洞,就算特首,立法會,區議會全由建制勝出,都不怕可以亂施政.不解決這政治大漏洞,就算有真普選,都只可任由官商勾結,玩政治,玩市民.

大家想子子孫孫都要靠抗爭,定還是靠理直氣壯靠思考靠智慧?想見到子孫要官迫民反,改朝換代,或者不在沈默中爆發,就在沈默中滅亡嗎?

不要再浪費時間佔鐘,同他們鬥衰.他們講歪理,我們就講做人道理,講邏輯推理,講到你服,講到你無可詭辯!

我要再強調多次,我是壞人,我所講的都是錯的,不要信我,信你自己的思考同分析!

請大家當機立斷,解決最大的問題,解決最緊要最必須要解決的政治大漏洞.講完.

我的分析
Topic: 11玩嘢PlayPolitic
請先看<提示>.

先用正確思考方法:
1.先確定問題:如何實行特首普選?
2.逐步推理,搵出問題根源:要一個方式,選出好人,有能力管治好香港,同時體現民主,公平.
3.解決問題根源的方法:報名參選,通過簡單提名方式(例如立法會民選議員),再普選.如由提委會提名,因提委會有廣泛代表性,平均每人代表5000選民,只需10名委員已足夠(等於有五萬人提名).
4.反方向逐步推論,回到原本問題的情況:選民根據選舉過程,電視辯論,選出合適人選做特首.
5.能否解決原本問題:完成特首普選.

再分析政改框架及李飛解釋:
A.講得出整個完整思考過程:好明顯,無.有就不會完全無提過有能力管治好香港最重要,更不會有以下之思考通病.

B.三個思考通病:
1. 思考他人說話當作思考問題本身.
特首普選本質不是[要不要普選,要不要民主],而是特區管治權之爭:請講出由問題"如何實行特首普選"到得出以上結論的完整思考過程.講不出就是錯誤思考.
定立特首普選方式,與管治權無關,亦不影響管治權.

2. 跟隨他人錯誤方向去思考.
必須堅持行政長官由愛國愛港人士擔任的原則:有能力管治好香港才是最重要,而愛國愛港亦難以確定.
魏徵直諫唐太宗,嚴厲批評政府同高官,都係愛國的表現!孫中山,辛亥革命烈士,毛澤東鄧小平,搞革命,推翻腐敗無能政府,絕對係愛國的表現!
反而盲目支持政府,有錯不指正,陷政府於不義,才是不愛國愛港的表現!

3. 根據無先行肯定對錯之論點,作為思考基礎.
六大錯誤假設:
1)假定無提委會,沈默大多數會選錯壞人:沈默大多數絕對愛國愛港,支持政府,人所共知,絕不會選出不愛國愛港之人.如此假設,實在嚴重傷害香港人的人民感情,應該真誠向港人道歉,並且作出深切反省.
2)假定無提委會,壞人必然勝出真普選:靠20年每日150人,泛民建制投票比例,已由6:4變為5:5,到2017,必然過5,並繼續增加.固勝出必是建制,無需有提委會.
3)假定好多人有錢選特首:特首選舉經費過千萬,好多人有錢參選?民主派根本無財力,只會集中資源出一人參選,建制派為確保對泛民優勢,亦只會出一人參選,所以根本不用限制,亦只有2-3人參選.
就如立法會超級區議員,有多達5個位,幾百個區議員,無限制參選人數,結果都只有6張名單參選,同一道理.
4)假定提委會眼光好過一般市民:健華,蔭權,振英,事實證明,選委會選人,並不比普通市民好,直頭有差之而無得及,所以絕不應源用選委會方式再組成提委會.
5)假定反對派做特首會危害國家安全及主權:香港是法治城市,並非如大陸人治地方,特首施政,需跟法律,及政府既定程序,更有ICAC等機構監察.況且,坐擁幾百萬解放軍,驚一個無兵師令香港特首?請問最嚴重,特首可做出什麼危害國家行為?答案是完全沒有!
6)假定香港有能力變成一個獨立政治實體:香港人手無縛雞之力,肥仔又多,打機就叻,當兵打仗?香港更無財政能力成立軍隊,靠高登起底隊,AV野戰隊乎?

無完整思考過程,犯齊三個思考通病,所以政改框架及李飛解釋,完全錯!

是否清清楚楚,毫無辯駁之餘地?

傳統分析又如何?下回再續.

政改框架
Topic: 11玩嘢PlayPolitic
請先看<提示>.

就用政改框架作例子,試用我的思考方法,看誰對誰錯.

人大特首普選政改框架四大原則:
1.須組成一個廣泛代表性提名委員會,按照選舉委員會的人數,構成和委員產生辦法而規定.
2.提委會提名2-3名候選人,每名候選人均須獲提委會過半數支持.
3.全港合資格選民依法選出一名特首.
4.由中央人民政府任命.

人大副秘書長李飛解釋:
1.本質不是[要不要普選,要不要民主],而是特區管治權之爭.
2.香港社會有少數人仍然不願意接受中央對港恢復行使主權和管治權的事實,不斷挑起政治紛爭,把矛頭指向中央,企圖將香港變成一個獨立的政治實體.要允許他們的代表人物擔任特首,這當然是不能允許的.
3.指選舉本來就是篩選,是舉薦後再選出,人大決定並沒有不合理限制;至於候選人數目定為2-3人,是避免太多候選人浪費公帑,令人眼花繚亂.
4.香港特別行政區行政長官既要對香港特別行政區負責,也要對中央人民政府負責,必須堅持行政長官由愛國愛港人士擔任的原則.

以下分析並非原整分析,我亦無睇過當日李飛講過所有廢話,只是試用簡單例子,讓大家知道我的方法之使用形式,再研究.

如果覺得幾好,值得提出一起研究,再改良,或者從這方向去思考,都得.

無論我的方法好,有些不足,有漏洞,要再研究其他方法,都可以.

甚至對全球提出此問題,一起想方法,或要求全球數學博士用數學邏輯協助証明,解決語言邏輯之問題,亦得.

如何分析?下回再續.

我係壞人
Topic: 11玩嘢PlayPolitic
請先看<提示>.

唔啱!我要強調一樣野,提醒大家.

我係壞人,我講既野都係錯既,唔好信我,信你自己既思考同分析!

我唔會扮好人,話我講既野一定啱,叫你唔使諗,信晒我.

無論邊個,都唔好盲目信佢,就算個樣幾似好人,就算聖人都有錯.

所以一定要學識正確既思考方法,唔單只要分清邊個啱,邊個錯,最緊要講得出"點解啱,點解錯",而唔係覺得啱,覺得錯!

另外而家有時間就可以搵D例子出黎練習吓試吓,睇吓我呢個方法可唔可以証明到政府講既係歪理定係道理.

你地咁多大學生,一定有聰明過我既,諗到比我更易學,更清楚既方法,去分辨無邏輯既歪理.

要點樣做,由你地年青人自己決定.無論點,我地大人一定保護你地,支持你地.

希望你地,希望我地,可以成功堵塞政治大漏洞,同埋爭取真普選.

就算呢次掂左,都唔等於以後無問題.記住個現實假設:所有做官既人,都係會玩政治,玩權力,搵着數,呃市民.佢地每搵一個漏洞,玩政治,我地就再諗辦法,堵塞每個漏洞.呢個係無咁易玩完既人類進步過程,唔好放鬆,唔好妥協,唔好放棄!

再講多次,我係壞人,我講既野都係錯既,唔好信我,信你自己既思考同分析!講完.

三管齊下
Topic: 11玩嘢PlayPolitic
請先看<提示>.

咁而家要點做呢?有三樣野可以做.

第一,成立民間既評定組織,評定政府同議員有無講歪理,証明呢個評定制度同評定方法係可行既.

第二,要求政府同立法會法庭警方等實行呢個評定制度.

第三,話比全世界既華人聽,等佢地知道呢個政治大漏洞同埋解決方法,叫佢地翻譯成各國語言文字,再話比全世界既人知,等全世界既人要求各國政府同埋聯合國實施呢個制度.

只要任何一個地方試過呢個方法之後,真係可以減少到政治爭拗,同示威抗議,咁其他地方自然就會跟住實行.

政治問題,就係無邏輯,講歪理既問題.解決政治問題,就要用邏輯,講道理黎解決.

我地一定要有一個使人信服既制度,主動咁阻止玩政治既人每一次講歪理呃市民,而唔係被動咁等夠鐘選過第二個,或者示威抗議人多蝦人少咁迫佢改迫佢辭職.

小數服從多數,服從服從,要服,仲要從!唔係願賭服輸,或者屈服個服,而係以理服人,以德服人個服!贏既要堂堂正正,有根有據,輸既要心服口服,願意聽從羸既諗法去執行.咁樣先至係真正既民主!啱唔啱?

下回再續.

思考方法
Topic: 11玩嘢PlayPolitic
請先看<提示>.

邏輯其實並無專家講得咁複雜,我雖然只係普遍大學舊生,僅僅畢到業,但係勝在諗野夠簡單,直接,慢慢諗.所以經我多年思考,有一套就算普通人都一定聽得明,學得識,用得到既思考方法.

思考何謂對,何謂錯?好簡單,只有兩樣野,就係:一個正確思考方法,同三個思考通病.

正確既思考方法就係:
先確定問題,直接思考問題本身,然後逐步推理,搵出問題既根源,找出解決問題根源既方法,再根據解決方法反方向逐步推論,回到原本問題既情況,睇吓解唔解決到原本既問題.

記住係要搵解決"問題根源"的方法,而唔係解決問題既方法.

要講得出整個完整既思考過程,先算係有邏輯,有道理既正確思考.無頭無尾唔完整,就係歪理.

三個思考通病就係:
1. 思考人地既說話當作思考問題本身.
人地既說話係人地對問題既結論,應該先思考問題,得出自己既結論,再同人比較,睇吓邊個啱邊個錯,點解錯,定係兩個都錯,錯係邊.

2. 跟隨人地既錯誤方向去思考.
講歪理既人最鍾意就係用呢招,引你去諗錯野架啦.

3. 根據無先行肯定對錯既論點,作為思考既基礎.
有好多野因為幾千年黎個個都話啱,你就當左啱,但係其實係無肯定過既,就要諗清楚到底啱唔啱.另外講歪理既人亦都好鍾意用D錯既假設,去推論出錯既結論.

[思考既方法]錯左,根本就唔使理[思考既內容],咩自相矛盾呀,倒果為因呀,幾十百樣所謂既邏輯謬誤.

對你地d大學生黎講,呢套方法,難唔難呀?係咪就算普通人都應該聽得明,學得識,用得到?

只要用呢個方法,就可以好清楚每個人講既野有無道理,有無邏輯.

下回再續.

堵塞漏洞
Topic: 11玩嘢PlayPolitic
請先看<提示>.

要堵塞漏洞,就要設立一個評定制度,確定佢地講既野有無邏輯,有無道理.

官員講野無邏輯,唔該收番,唔可以咁施政.議員講野無道理,唔可以亂投票,連棄權票都唔準投.法官講野無邏輯,唔可以咁判案.警察講野無邏輯,無道理,唔可以亂執法!

最好由理科既大學教授,輪流義務負責評定.因為講邏輯,佢地夠權威,可服眾.

數理工醫科既大學教授對社會都有責任,唔可以只醉心自己研究既學科.

文科人既政治制度,加上理科人既評定制度,互補不足.

隻68狗係理科人,佢好識講邏輯,可惜佢用邏輯講歪理,實在可恥.

所以一定要先堵塞呢個政治大漏洞,先有機會有真普選,唔解決呢個問題,就無可能爭取到真普選.政府同你地開會,都係諗住繼續講歪理拖延,呃你地,玩語言偽術架啦,係咪先?

仲有,除左評定既制度,仲要有一套評定既方法,可以肯定到每個人講既野有無道理,有無邏輯.而唔係好似而家咁樣,你話你啱佢錯,佢又話佢啱你錯,但係永遠都唔知邊個啱邊個錯.

下回再續.

政治大漏洞
Topic: 11玩嘢PlayPolitic
請先看<提示>.

無論係民主,帝制,封建,獨裁,專政,共產黨,乜都好,所有幾千年黎既政治制度都有呢個政治大漏洞,尤其係呢兩年更加明顯.

點解?因為隻68狗做左特首,佢最鍾意既係咩?無錯,就係成日講歪理,你都無佢符.

政府官員講歪理,亂施政,你吹佢唔漲.立法會議員講歪理,亂投票,你吹佢唔漲.法官講歪理,偏幫權貴有錢佬,欺壓窮人,間唔中幫吓窮人,扮晒公正,你又吹佢唔漲.警察講歪理,執法不公,你都吹佢唔漲!

而加可以點?一係等選舉,選第二個,未等到都玩死你啦!無得選個d職位要等到佢退休,仲死!

頂唔順,就好似今次咁,幾十萬人示威抗議,迫佢改,迫佢落台.但係佢唔改,唔落台,你吹佢唔漲!

就算今次肯改,下次再講歪理玩市民,你又再出黎示威抗議呀?咁即係永遠都無解決問題架啫!

所以唔可再咁被動,一定要主動咁堵塞呢個政治大漏洞.由被動等待(Passive Waiting)變為主動阻止(Active Deny).

下回再續.

錯誤假設
Topic: 11玩嘢PlayPolitic
請先看<提示>.

係"佔鐘"呢個大是大非既時候,容許我將幾年前講過既野,用另一個角度簡單咁再講一次.

其實係引發爭取真普選既背後,係因為有一個更大既問題,我叫佢做政治大漏洞.而呢個政治大漏洞,係源於一個錯誤假設.

全世界既任何政治制度,都有呢一個錯誤假設.

所有幾千年黎既政治制度,都係由學者諗出黎,佢地都有一個良善既假設:所有做官既人,都係真心想社會好,會講真話,解決社會既問題.

但係幾千年既人類歷史以經証實,九成九做官都係玩政治,玩權力,搵着數,呃市民.

就算係好人,聖人,聖人都有錯,都會諗錯野,講錯野,做錯野.

所以呢個理想假設,必需要改番做現實假設:所有做官既人,都係會玩政治,玩權力,搵着數,呃市民.

而由於呢個錯誤假設,做成一個政治大漏洞,玩左人類幾千年,引發出不斷既政治亂局.

下回再續.