錯誤假設
Topic: 11玩嘢PlayPolitic
請先看<提示>.

係"佔鐘"呢個大是大非既時候,容許我將幾年前講過既野,用另一個角度簡單咁再講一次.

其實係引發爭取真普選既背後,係因為有一個更大既問題,我叫佢做政治大漏洞.而呢個政治大漏洞,係源於一個錯誤假設.

全世界既任何政治制度,都有呢一個錯誤假設.

所有幾千年黎既政治制度,都係由學者諗出黎,佢地都有一個良善既假設:所有做官既人,都係真心想社會好,會講真話,解決社會既問題.

但係幾千年既人類歷史以經証實,九成九做官都係玩政治,玩權力,搵着數,呃市民.

就算係好人,聖人,聖人都有錯,都會諗錯野,講錯野,做錯野.

所以呢個理想假設,必需要改番做現實假設:所有做官既人,都係會玩政治,玩權力,搵着數,呃市民.

而由於呢個錯誤假設,做成一個政治大漏洞,玩左人類幾千年,引發出不斷既政治亂局.

下回再續.

掟我落樓
Topic: 10奇遇 Trek
請先看<提示>.

上次講開我鐘意擒上窗口望落街,咁你地細個驚唔驚跌落街吖?

個次成家人去左九龍城探以前既街坊,原來我出世到搬上公屋之前住過九龍城,不過我完全無印象.

個座樓好似最舊式七層公屋咁,單邊走廊,半身牆,但係有成十幾廿層高.

我叫阿爸抱高我睇吓,嘩,好高呀!我問:係咪跌落去會死架?

阿爸話:係呀,細路仔無大人自己唔好擒咁高呀!

大人跟住同 D舊街坊傾偈,出出入入.後黎,唔知點樣,大家姐捉住我企上個擺係半身牆邊既火水罐上便.

我話:爸爸話唔好企咁高呀!但係佢箍實我唔比我落黎.

我搏命掙扎:做咩喎!你想掟我落街呀?佢話:係呀!

我繼續搏命掙扎:救命呀!唔好掟我落街呀!嗚嘩嗚嘩!救命呀!唔好掟我落街呀!嗚嘩嗚嘩!......

喊左哎左好耐,終於有個舊街坊出黎:做咩呀?做咩咁慘掟你落街呀?

我阿媽先施施然行出黎:唔係呀,我地諗住影相之嗎?做咩話呀家姐想掟你落街呀?

我喊晒咁話:頭先爸爸話唔好企咁高架!跌落去會死架!嗚嗚嗚.......

唉!架相機有排都未準備好,你咁快捉實我企係到做乜唶!大家姐!

但係我記得屋企相簿仲有幅我喊住比大家姐箍實影既相個喎!唔通真係諗住影完相就掟我落樓?

叫巴士
Topic: 10奇遇 Trek
請先看<提示>.

講開發燒會成晚重覆發夢,我同一架雙層巴士不斷變大變細.講開巴士,你地試過追巴士未?試過叫巴士等埋未吖?

我就試過啦,而且仲係由十六樓哎司機等埋,再成家人追落樓添!

個陣仲讀緊幼稚園,新年一早準備去拜年,成家人差唔多換好晒靚衫,我爬上窗口望落街.出面唔知點解好鬼靜,除左巴士站有幾個人.有架巴士上緊斜,我問阿媽搭幾號,佢話8號,我話有車呀,行得未呀,佢話得啦得啦,我話叫個司機等埋先.

計埋樓下個公園仔,窗口距離巴士站有成60米.我就咁大聲哎落街:8號巴士等埋呀!唔好走呀!個司機居然應我:等埋你啦!

架巴士真係上晒客都唔走,我再哎:我地而加落黎啦!唔好走呀!佢又應我:得啦!

咁阿爸阿媽即刻帶我地衝落樓啦,又要走落兩層去lift口又要等lift,落到去都幾分鐘啦,架巴士梗係影都無啦!

周圍人影都無,淨係聽到個細路把聲,等極都唔見有人出現,架巴士 D乘客同個司機,唔知會諗咩呢?新年流流唔係咁猛吓話?!

發高燒
Topic: 10奇遇 Trek
請先看<提示>.

講開發燒會成晚重覆發夢,你地最高燒過幾多度吖?

103?104?我既紀錄係------108度!勁呀呢!

大學 YEAR 1 暑假,要番去做 Workshop Training,除左頭尾兩個禮拜,幾乎無假放.有日無啦啦發燒,好彩呢個禮拜去電子 Workshop,有冷氣嘆,如果去工場,仲要著工衣,真係死得.

番左半日,都係頂唔順,請假走人.搭地鐵,瞓到去杏花邨,醒醒地,聽到有人傾偈,點解咁其怪,有回音既?望吓,兩個印度人,再聽清楚,佢佢地地真真係係咁咁樣樣講講野野架架喎喎喎!!

番到屋企,休息到差唔多診所開,自己探吓熱,嘩!109度?嗱嗱聲去睇醫生.叫姑娘探多次,佢超大聲咁話:108度?成間診所 D病人都望住我,心諗,人可以咁高燒都唔死既咩?姑娘既刻比我打尖睇先,無人有異議.

其實點解姑娘同其他人咁驚異?因為我病左個樣仲精神過平時吖嗎!當日一定係我有生以黎,個樣最精神既一日,所以當我請病假早走時, Tutor同 D大學同學又係一臉狐疑,而當我話比佢地聽我越病個樣越精神,直頭就係"有無咁神奇?"既表情,第一次比我見到係咁多人既面上同時出現既奇景!

大家而加終於都知道點解啦!係呀,我癲架,我燒壞腦架!唔好得罪我呀!唔係我殺!殺呀!

重覆發夢
Topic: 10奇遇 Trek
請先看<提示>.

早排講開細個瞓教,可以十幾個鍾一個姿勢唔郁.唔止咁,同時仲唔會發夢,瞓著到瞓醒真係一眨眼就過.

不過有兩個情況,就會成晚係咁發夢.

一就係發燒.直到廿幾歲,一發燒,就會成晚不斷重覆一個好古怪既夢.我同一架雙層巴士不斷變大變細,我又上車又落車,有時我漲爆架巴士咁濟,有時架巴士縮到夾死我,成晚好似瞓緊又似無瞓,人同夢都咁辛苦,唔瞓就仲辛苦,苦呀!

二就係太肥.中三左右開始,太重太肥,就會耐唔耐發夢,提醒自己太肥要減肥.係夢入面,我比成班人追斬,係北角最鈄既雲景道搏命向上跑,明明跑多幾步就到伊斯蘭個轉角位,可以落鈄去勵德邨,但係我跑極都係原位上唔到斜,班人就越追越近,瞓咁耐就追咁耐,攞命呀!

呢個太肥夢幾年都會變吓,減左肥就自然無發.前年185磅個排都有發,不過就變成係咁行,由一個起點係咁沿路左轉右轉,行到终點唔知擺低 D咩野又行番轉頭去起點.我又唔知點解會識路,個個路口都無轉錯,但係我又好似真係行過去過個到,但係又醒唔起係邊到,第二次再發仲會續番個故仔個喎,不過都係成晚係咁行行行,攰死人呀!

唔食棋
Topic: 10奇遇 Trek
請先看<提示>.

捉棋除左無得將軍之外,仲有一樣野,我係唔鍾意既,就係食棋.

最初學捉棋,梗係鍾意食晒人D棋啦,但係大小小,就開始盡量唔食棋,淨係將軍.

點解?因為捉棋等於一場模擬戰爭,每隻棋同真人士兵一樣,都係一條人命黎.人人平等,點可以為左一個主帥,就要 D卒仔去送死?

正所為不戰而屈人之兵,能夠不費一兵一卒,保住每一個人既情況下,可以令對手投降,咁先至係最高景界!

所以我每步棋,都係將軍抽車式----你食我棋,你其他棋都會比我食番.就係咁樣保護自己 D棋之餘,又唔食對方 D棋,再去慢慢將你軍.

但係可惜,其他人捉捉下,就會不顧一切開始食食食.唉,太過不擇手段,太殘忍啦!

所以計我話,唔想打仗,全世界應該去聯合國簽訂協議,任何人打仗,最高層既人就要親身上戰場,係最前線衝鋒陷陣,或者好似玩三國咁---主將單挑!

國王主席首相元帥教主全部都要去打,睇吓仲有邊個夠膽發動戰爭吖嗱!呢個世界無話無左邊個唔得既,你死左咪手下上位囉!你 D好戰份子,死晒仲好啦!

叫人上戰場送死,自己坐係後面 UN UN腳嘆冷氣,正人渣!邊個夠膽咁做,即係同全世界為敵,手下就應該捉佢上司,聯合國就應該統領全世界一齊消滅佢!殺呀!將軍!羸左!YEAH!

捉象棋
Topic: 10奇遇 Trek
請先看<提示>.

講開玩,以前細個都幾鍾意捉象棋.

不過後來同 D勁人捉就慢慢開始無癮,除左因為成日輸,我最唔鍾意就係成日行到一半就話我無棋玩完.但係我又唔知點解輸左喎,好似比人搵笨咁,超無癮.

捉棋最興奮既,就係將軍個一下,唔將軍,最過癮個下都無左,仲捉黎做咩?

再者,捉棋同打仗,更加同做人一樣,無鬥志,無毅力,唔鬥到最後一兵一卒就投降,未到最後就放棄,咁唔好打仗啦,唔使做人啦!

正所謂一子錯,滿盤皆落索,你點知對方唔會犯錯,無反敗為勝既機會?驕兵必敗,唔將軍都未知鹿死誰手,係咪先?

所以我到依家都好少再捉棋啦,我都唔背棋既,行一步就話之後個十步都一定要咁行,次次一樣,咁仲叫做玩咩?同電腦捉棋就仲傻,你行第一步電腦已經話你輸左啦!

同理,打牌同玩啤牌又係一樣,我都唔記牌架.玩得咁嘥腦汁,不如讀書啦,但係讀書又唔見你咁好記性喎!唔知人地手牌,唔知叫咩,唔知出咩,估估吓,咁至刺激架嗎!

所以唔好諗住同我賭錢呀,實輸既,我先無咁笨!

娛樂
Topic: 10奇遇 Trek
請先看<提示>.

玩到唔番工唔番學痴線破產殺呀媽跳樓自殺,咁多問題,以經成為一個社會大問題啦,係咪應該研究吓,要學校教吓細路點玩先啱?

淨係教番工番學唔教玩,好明顯唔得啦!

乜野係玩?乜野係娛樂?你自己諗完先再睇落去.

玩,就係得閒休息既時候,其中一種可以做既野.係唔使讀書工作食飯瞓教做正經野既時候先至玩,唔係掛住玩,玩到正經野都唔做.

休息既時候,除左可以玩,打機,仲可以睇書睇小說聽歌睇戲捉棋行街游水踢波放飛機去旅行.......仲有可以珍惜同屋企人相處既時候傾多D偈添!

所以學校同家長一早細細個就要強調:"得閒先至玩",係"得閒"先至玩.玩,係比個人"休息",放鬆,唔係玩到無得"休息".玩係永遠都玩唔完,有時間就玩吓,無時間玩就算數,唔使一定要玩完玩到尾玩到爆機架.

咁先係架嗎!啦啦聲所有學校教吓D細路同家長啦!政府賣廣告教埋D後生仔啦!D教育專家死晒去邊呀!

我都試過一得閒就掛住打機啦,但係要番工都識得停啦,後尾咩類型既 GAME都玩過,玩到無新野就無再玩啦!就算再玩 FACEBOOK果 D GAME都係求其玩吓算數啦,仲細咩!

所以無論任何娛樂,無論打機打牌賭馬食煙飲酒睇韓劇睇波煲電話粥玩 FACEBOOK WHATSAPP 乜都好,都唔好沉迷唔好上癮.打牌賭馬食煙飲酒直頭唔啱添啦!

各位朋友,快d同你地d仔女學識點樣玩啦!

開槍
Topic: 10奇遇 Trek
請先看<提示>.

前幾日美國有單女仔玩槍揸唔穩射死教練,我都試過差D射死人喎!

果陣十七八歲,斜對面阿陳生-即係我叫佢同陳太做周生周太果個陳生-佢有玩開長槍,有日叫我過去試吓玩.

掛起左個靶,我企去另一面牆,相距頂龍十尺,接過長槍,集中精神,慢慢瞄準,準備開槍.

此時,陳太突然話想行過去攞野,叫我等陣,就行過去.

陳生亦都叫左我一聲唔好射住,但係大家應該仲記得,Fanny Man哎我哎到成條街都聽到,我都聽唔到!

陳太行到槍前,距離槍口兩吋,陳生見我無反應,大聲喝我:唔好開槍呀!

我比佢嚇一嚇,手指一縮,長槍響起啪一聲,跟住陳太尖叫:呀~~~~~~~!

好采陳生企係我側邊,大聲喝我同時,一手執住把槍抬高,結果只係射中天花.

但係陳太已經嚇到花容失色,陳生亦都好惡咁望住我,我亦都嚇到呆左,好慢咁由望住陳太變成望住陳生.

佢拎開把槍,我對手都唔識放低.但係一秒之後,我開口講既居然唔係對唔住,而係:嘩,原來緊張真係成個人會縮埋晒架,唔怪得電視劇次次都係叫揸槍既人放鬆,而唔係喝佢唔好開槍啦........

雖然唔係真槍係氣槍,但係早排有人幾十樓玩氣槍射落街,都射到個阿伯重傷,所以如果對正槍口兩吋射中個頭,真係同真槍無分別囉!

呢次無人受傷,真係好囉,謝天謝地,好人有好報,阿門陀佛.

雙重人格
Topic: 10奇遇 Trek
請先看<提示>.

新聞話個殺阿媽青年自己制製造有多重人格,其實我都覺我有雙重人格架!

中四 Ronald教英文,有日一上堂就好嬲,鬧點解 D作文咁差.我心諗:有作文咩?我有無交呢?

佢攞最差個編出黎,張D錯處寫係黑板.我睇完即刻大笑,心諗:邊會錯到咁架!

Ronald扯火鬧我:你笑咩呀Adam Lam!(當然佢用英文講野啦) 我嚇到即刻收聲!

佢攞起張作文:我地睇吓邊個作既!.....然後扮搵個名,用好大聲話:Adam Lam!

我當堂O咀!我寫既?真係我寫既?點解我會錯D咁既野架?我有寫個D咁既野咩?我仲要當住全班笑我自己寫既野?

根住佢鬧乜我都聽唔入耳,到派番編文番黎一睇......真係我D字黎喎,真係我寫喎,但係點解由頭睇到尾都完全無印象既?我作既?咁奇?

當時我就第一次懷疑可能有兩個我.

到中六彭仔教物理,又有日上堂,又係有少少嬲,省我地測驗咁差.我心諗:上個禮拜,好似係有話測驗喎,但係我有測咩?我有請假咩?

佢話:大半班唔合格,咁簡單都唔識答,點考大學呀?得一個答得啱,真係點得架!

我心諗:邊個咁好野,唔通係阿策?

彭仔攞起疊卷,睇吓個名:Adam Lam!

我當堂呆左!我最高分?得我識答?

根住佢鬧乜我又聽唔入耳,到派番份卷番黎一睇......真係我D字黎喎,但係條題目到底問咩呀?點解我會識答架?無人識答無得抄喎!

呢次就第二次,令我更加懷疑唔通真係有兩個我?係一個 Physics比較好,英文比較差既我?

有記錄既野就可以睇得番,但係無記錄既野就睇唔番.我間唔中都覺得自己好似有 D時候既記憶無左,有 D人又會問我: Adam你尋日....,但係又唔講落去,咁即係咩呢?我到底尋日做左 D咩呢?

咁你地有無覺得我有時 D性格行為會無啦啦唔同左架?