二手煙
Topic: 10奇遇 Trek
請先看<提示>.

以前無論搬到去邊都成日被迫食二手煙,開門又食二手煙,開窗又食二手煙.早幾年決定柵埋窗柵埋門,唔再食二手煙,夏天寧願開冷氣,條氣好似好左DD,跑步無咁喘氣.

但係最重要既原來係廁所既二手煙,自從舊年年頭,成日係廁所食煙既人走左之後,舊年年中開始,沖涼既時侯,就算沖到尾,D水蒸氣充滿晒成個廁所,都唔會再咳.換左以前?一吸氣,D水蒸氣就帶埋D黐住係廁所既二手煙,一入氣管就即刻想咳想咳,等我仲走去睇醫生以為個肺有事!

而加沖涼唔再咳,呢一年黎跑步條氣直頭好順,就算跑得耐過以前,都一D都唔喘氣,以前跑一陣都真係喘哂氣,就算減肥最勁得百三磅個陣都一樣,所以肯定係唔使再食二手煙既關係.

大家都盡量避開D二手煙啦,食煙既都唔好比二手煙屋企人食啦,千祈唔好係廁所食煙啦,最好就唔好食煙啦,你開窗開門食煙,隔離屋同樓上都要食你D二手煙既啫,係咪?

生活大小智慧
Topic: 10奇遇 Trek
請先看<提示>.

生活小智慧:
洗頭的泡塞住耳仔,好唔舒服,可以點做?
可以係耳仔後面向前襟,襟到隻耳仔冚住隻耳,一下唔得就兩下,D泡就會咇番出黎,隻耳即刻通左,舒服晒!

生活大智慧:
有人話唔慣坐係到開大,又話有研究踎係到開大真係暢快好多,咁有無得坐係到都咁暢快呢?
所以我又試下研究下,又比我得左!我發覺只要模擬踎廁個姿勢,就已經可以好過真係踎係到.
雙腳泊埋,跟住趷高對腳,再"烏"前個身貼住對腳,咁樣其實九成同踎係到相似,而且泊埋對腳仲有效過擘開添,直頭就係"頂DUM"一聲,呀~,舒服晒!簡直就係人生一"大"快事,正呀!

壓力
Topic: 10奇遇 Trek
請先看<提示>.

最近好多學生跳樓,其實我當年讀大學都好大壓力!

個陣入U無耐,真係好大壓力,乜都無時間做,真係得閒死唔得閒病,要搵方法處理.咁 HKU周圍都貼好多 COURSE出黎唔使錢比人上,咁我就明明無時間都報左個壓力處理班啦,無時間都要死 D時間出黎架,唔係點啫!

個 COURSE好似係4,5堂每堂一個鐘,話佢無用都有 D用既,教下深呼吸靜坐冥想咁啦,都可以減下壓既.好似到左最後一堂4,5條友得番一兩個,去到課室阿SIR同另外果個未到,咁我一個人就靜靜地諗下野啦,諗諗下比我叮一聲諗通左喎!

我發現其實好多感覺都係自己搵D野去比較先產生既.好似悶,係你諗番D興奮既時候黎比較,你先覺得悶,唔去比較,就唔會覺得悶.節奏慢,你諗D快既時候黎比較,你就覺得慢,但如果你同D更慢既比較,佢又唔慢囉喎!壓力都一樣,你去諗番D輕鬆既時候黎比較,梗係有壓力啦.咁唔去比較,咪唔會有壓力囉!

於是我就叫自己提自己,一發現自己有壓力,去比較,就即刻叫自己唔好比較,唔好諗:死啦死啦,好多野無時間做呀,死梗啦!改為諗:嘩!好多野做呀!好!做完呢樣做果樣,做完果樣再做呢D,之後再做果D,比心機,衝呀!

跟住上堂同個阿SIR講,佢仲話我好野,咁都比我諗到!

初頭幾次都要提自己:嘩,我咁樣諗喎,唔得,要咁諗至得!之後習慣左,都唔使提自己,直接就用左後面個種方式去諗,之後三年大學,都無晒壓力啦! YEAH!

如果大家有壓力,可以試下我呢個方法.希望呢個方法對你都有用啦!比心機,衝呀! Vo.*~

接受捐贈器官
Topic: 11玩嘢PlayPolitic
請先看<提示>.

香港政府想推行"自動捐贈器官".
捐贈率低,自願改自動,就提升到捐贈率?

點解唔"自願"捐贈器官?因為"唔讚成"捐贈器官呢個做法,呢種諗法.
既然唔讚成,唔捐,自然唔讚成"接受捐".
已所不欲,勿施於人.
所以唔捐既人,自己有病,都唔想人捐比佢.

讚成捐,唔通會唔讚成"接受捐"?

無理由自己唔幫人,但係又要人幫你.
自己唔捐錢,但係自己需要個陣,又想人捐錢比你,係咪?
捐血都一樣,自己唔捐血,但係自己需要個陣,又要人輸血比你?
有無咁著數?梗係無啦!

醫者父母心,係人都想救,不過病人都有權選擇治療方法.

所有人,滿18歲,或來香港,一年內唔登記捐贈器官,又唔年年捐血,咁一世都唔使登記啦,亦都唔使捐血,亦都唔使旨意有得接受器官啦,亦都唔使旨意有得接受輸血啦,係咁.

想發現自己有病需要器官移植,先至黎登記捐贈器官呀?無機會啦!

唔捐比人,咁自己屋企人呢?捐比屋企人,咁親戚呢?咁親戚既親戚呢?咁親戚既親戚既親戚呢?咁親戚既親戚既親戚既親戚呢?咁親戚既親戚既親戚既親戚既親戚.........既親戚呢?

人地捐就唔要,屋企人捐就要?咁就唔使捐比人?咁親戚捐要唔要?咁親戚既親戚捐要唔要?咁親戚既親戚.....既親戚捐要唔要?

人地捐就要,屋企人捐就叫佢唔好?咁親戚既親戚.....既親戚捐好唔好?咁親戚既親戚捐好唔好?咁親戚捐好唔好?咁最親既親戚,即係屋企人捐好唔好?

講黎講去,都係一個字:自相矛盾,自私自利!

細路呢?一樣囉!父母捐,就救你既仔女,唔捐,就唔救.搞掂!
你唔同意捐,你都唔想你D仔女接受捐架啦,唔係又自相矛盾下話?
外國人,遊客呢?政府自己諗囉!乜都我諗晒呀?

結論:
1.閻王要你三更死,不許留人到五更.何必夾硬阻住人上天堂,或者投胎做富豪呢?
2.我唔想要人地既血同器官,何必迫我要人地既野呢?
3.玩政治,就係咁簡單!

多角度夢
Topic: 10奇遇 Trek
請先看<提示>.

Yo Yo!最近發左 D多角度夢喎好搞野好似睇個 D多角度電影咁架!
即係同一件事用幾個主角既角度重複做幾次個 D戲呢!U See?

有一次發夢變左個唔知乜水係到同其他人講吓野做吓野跟住去到一個地方,Ha Ha!
感覺個度有 D熟喎之後又見到幾個人又講吓野做吓野咁啦跟住又繼續走開做其他野啦,
What the Hell!唔怪得咁熟啦上次我咪用果個人既身份發左一次夢同同一班人包括今次既我係同一到做左同一場戲囉!

Woo Woo!最過癮係前文後理係解釋到點解要去個度同個班人包括上次既我講呢 D野做呢 D野個吓痴線吖嗎!
You know what I mean?即係係第一次發夢既時候以經諗好晒每個角色都有自己做主角既劇本,
知道點解要同個主角有呢場對手戲唔係求其亂咁堆砌個夢架死未!Yeah!

其實我成日都會係發夢既時候諗到諗通一D清醒既時候諗唔到諗唔通既野架,Yup!
所以我不扭都覺得發夢既時候最清醒反而清醒既時候先至係發緊夢,Hay!
真係莊周夢蝶定蝶夢莊周清醒既時候清醒定發夢發夢既時候發夢定清醒?Tell Me!

問功課
Topic: 10奇遇 Trek
請先看<提示>.

Hay!早排有個打電話問功課呃人既新聞,我以前都做過喎!

Yo!個陣啱啱入U無耐,難得有日4,5點咁早就放學番到屋企,
Ha 一入到屋鞋都未除衫都未換見到細佬妹講緊電話,見到我番黎就即刻叫我聽,
完來係堂外甥打黎問功課,一年班之嘛使乜問我呀?蝦佢地話唔識教喎搞錯!

喂大舅父呀?Hay whatsup boy!係呀你咩唔識呀?有條數唔識計呀講個題目黎聽吓?
Ah Ha Ah Ha!實際係乜我梗係唔記得啦不過啱啱開學都係一兩位加數咁上下,
我再問佢呢課同埋上兩課叫乜名,跟住就係我教佢計數既方法啦聽實啦喂!

我話嗱咁你前面個兩課教個 D數識唔識計呀佢話識,Yeah!
咁你就用前一課教既方法計完前半跟住再用後一課教既方法計埋後半啦,
佢話哦我話咁你試吓計啦計到幾多呀?佢講個答案我聽我話啱啦 That's Right!
仲有呀通常學校教既野都同前面教既野有關架,要明左前幾課教既野先識做新教既野架,
So 以後有乜唔識就睇番前幾課睇吓點樣用番黎做呢課既功課啦明唔明呀?
佢話明啦咁仲有無其他野唔識呀無就收線啦拜拜!Okay!

收左線之後我細佬妹話嘩你咁教都得呀我話佢話明個喎 Hay Ha!
之後佢都無再打黎問功課啦就算有我都教唔到啦,三年大學日日十一二點先做完功課番屋企 So Bad!
後尾過時過節見到堂家姐問佢咁耐仲有無要打黎問功課呀,佢話唔使啦個次我教完佢之後就好勁乜都識而加成績好好呀,
之後大左仲好多個 A咁考完會考好多個 A咁考完 A Level好多個 A咁大學畢業添 Yeah Yeah!

嘩真係如果我做補習專做一年班肯定個個上完一堂就唔使補啦,
所有補習社都無得做啦 D補習天王全部揸兜都得啦!Yo Yo!
對住一年班既細路試問邊個夠膽好似我咁教,邊個夠膽相信佢地有咁聰明,邊個夠膽相信可以咁教?Oh Yeah~~~~!

省波餅
Topic: 10奇遇 Trek
請先看<提示>.

以前成日行過D球場,貪快,順便睇吓人打波,間中會被人省波餅.

有次行過籃球場,望左兩眼就繼續行,跟住感覺到有個波係後面飛緊埋黎,就遞高隻手擺係後腦,個波"彭"一聲打中我隻手,嘩幾痛呀!

又有次行過足球場,有人係到踢波,行行吓又有感覺,望都無望,遞高手一撥,咁就撥走個波,不過隻手都係幾痛架!

仲有次又係行過足球場,有人係到猜波,今次我精啦,望都唔望,縮低,企直,繼續行.個波就"彭"一聲中左看台,隻手唔痛啦!YEAH!

我仲聽到猜波條友話:嘩!點解佢可以避到個波架?

你地有無試過呀?係咪好羨慕我有超能力呢?哈哈!

宗教自由
Topic: 11玩嘢PlayPolitic
請先看<提示>.

香港,宗教自由,多元文化?
結婚要入教,仔女要跟老豆信同一宗教,即係無宗教自由!

有宗教自由既宗教,係香港就有宗教自由.無宗教自由既宗教,係香港就無宗教自由.
如果要係香港繼續有宗教自由,就要取消所有無宗教自由既教規.

夫婦結婚唔需要同一宗教,仔女成年後可以自由選擇宗教信仰,或者乜都唔信.
唔取消無宗教自由既教規,任何宗教係香港一律禁止.
其他無宗教自由既教規,我唔知咁多,你地自己搞掂佢.

一個月之內,唔肯改,天主教,基督教,東正教,回教,伊斯蘭教,猶太教,印度教,全部請你離開香港.
只有道教,佛教,古希臘多神教等,有真宗教自由既宗教,可以繼續留低.

信奉無宗教自由既宗教既國家,以宗教自由為由,批准其他無宗教自由既宗教立足,自相矛盾,結果發生宗教服仇式恐怖襲擊,真諷刺!
問題唔係向唔向恐怖份子屈服,而係敢唔敢向假宗教自由說不!

結論:
1.老豆信天主,阿媽信佛,阿仔信印度教,阿女信基督,阿爺信道教,阿公信伊斯蘭.恐怖份子,你自己屋企人,殺比我睇呀,笨!
2.好似香港人咁,由細到大就全家信齊天基佛道,點會唔接受其他宗教,點會大左去做極端宗教狂熱恐怖份子呀,各大宗教領袖?各大政治領袖?
3.玩政治,就係咁簡單!

單程証完成歷史使命
Topic: 11玩嘢PlayPolitic
請先看<提示>.

發明單程証:廿幾卅年前,香港未回歸,比人家庭團聚,每日最多百五個.
廿年前:返鄉下,交通不便,山長水遠,幾日幾夜,大爛路.
今時今日:坐高鐵,半日去到北京,一日去到全中國,舒服,方便,又快捷.

農民工:單拖去全國各大城市打工.
老婆仔女:咪又係留係四川湖南雲南甘肅,呼和浩特,齊齊哈爾,哈爾濱,烏老木齊......既鄉下,無話一定要家庭團聚.
想見家人父母:新年春運十幾億人鬥迫囉!又唔見全部要家人團聚帶晒出大城市?

去北京上海廣州深圳打工:中央政府係咪比晒全家城市戶藉?
點解過個關搭多半個鐘車:就一定要家庭團聚,一定要攞晒香港身份証?

中央政策自相矛盾:統一政策,一係比晒農民工北京上海廣州深圳戶藉,一係取消單程証,改正錯誤.
大陸人落香港讀書工作:以後同外傭一樣,住幾耐都唔會有永久居民資格,無得攞福利,永遠唔可以做選民投票.

取消單程証:改發讀書簽証工作簽証.
老婆仔女跟落香港住:無問題,不過同全國一樣,戶籍永久保留係呼和浩特,齊齊哈爾,哈爾濱,烏老木齊......既鄉下.
讀完書,工作合同完結:請你全家返歸.

前兩日話要搞單程証返回機制:咁咪即係唔係單程証囉!
邊個諗出黎:共產黨員又多D津貼,過水濕腳,好野!

結論:
1.中央政府既錯,唔好要香港幫你受.
2.玩政治,就係咁簡單!

普選方案
Topic: 11玩嘢PlayPolitic
請先看<提示>.

如果有人想用政改框架限制特首人選,就要反過來用普選方案迫使提委讓香港人有真選擇.

普選方案:
1.特首候選人必須過半票數,才可當選,以顯認受性.
2.選民投票:最佳人選,蓋1字印,次佳蓋2字印,如此類推.完全不想做特首的,蓋X字印,兩個不想,蓋兩個X,三個不想,蓋三個X,如此類推.全部不想,全部蓋X.
3.政府點票:
a.首輪點票:只需點1字印給予那個候選人,與及全X票,連同全X票計算總票數.最高票過半票數當選.無人過半票數,兩強進行次輪點票.
b.次輪點票:將第三名以下選票,按選票中的人選優先次序撥入兩強.如兩強皆打X,側撥入全X票.最高票過半票數當選,否則無人當選,需重選.

方案好處:
1.選民:簡單,清楚,方便.只需投一次票.
2.為何蓋X字印:防止用白票做手腳.政治有幾奸,不用多講.
3.政府:點票簡單,不用勞民傷財.即使要次輪點票,亦不用多一輪投票,點票數量更大幅減少.
4.由於政改框架已限制2-3人參選,故只有,1,2,3,X,四個印,次輪點票數量更少過3分1.

更多好處:
1.如候選人均是建制派,保證選一百次,一千次,一萬次,都無人當選.
2.如此可迫使提委讓受港人認同的人參選,讓選民有真普選,否則香港變成無政府狀態,責任在提委.
3.基本法規定,政務司只可短期暫代特首,不可長期代特首.即最多一兩個月,不可超過三個月.
4.政改框架並無規定如何重選,所以香港可自行立法.
5.不可增加在無人當選時,上一屆特首可自動連任,或中央政府有權決定新特首等新加框架,因無法理基礎.
6.基本法及人政改框架均規定,只有香港人有權普選特首,中央,提委或其他機構均無任何權利選特首.

重選方案:
1.兩個月內舉行重選,按照普選方案選舉.
2.落選候選人不可參加重選.
3.如連續兩次無人當選,1200提委必須遲職,1個月內重選提委,提委同樣不可再參加重選.
4.如連續四次無人當選,代表提委制度失效,提委並不能舉薦出受港人認同的候選人,需改用簡單提名方法.
5.只需五區各取得與直選立法會議員相同數量選民提名,便可參選,或所有再重選提委便必須提名.
6.無論候選人數多少,按照普選方案選舉.

重選方案好處:
1.因終有受港人認同的人可參選,故必有人過半票數當選,不會再流選.
2.十月開始普選,每兩月重選一次,六月重選第四次,7月1日換屆前,剛好有特首當選.

普選例子1:(所有數字以萬為單位.)
三名候選人甲乙丙均是建制派.
票數:甲90,乙70,丙40,三X票200,總票數400,半數200.
甲最高票但不過半,即使丙全數撥入甲,仍不過半.
不用再次輪點票,無人當選,需重選.

普選例子2:
三名候選人甲乙丙均是建制派.
即使有半數三X票人害怕無政府狀態,改投所謂候選人.
票數:甲150,乙90,丙60,三X票100,總票數400,半數200.
甲最高票但不過半,進行次輪點票.
丙60票中50票撥入甲,才過半,仍然好大機會無人當選,需重選.
固只需4分1選民投三X票,已可阻假普選.

普選例子3:
除非只有甲可選,乙丙根本只是做樣.
票數:甲190,乙60,丙50,三X票100,總票數400,半數200.
這樣就有可能有人當選,但如此假普選,仍會轉軚投票給假候選人?三X票仍會只得100?
最有可能變回:
票數:甲150,乙30,丙20,三X票200,總票數400,半數200.
再次無人當選,需重選.

實現方法:
1.一於呼籲第二輪政改諮詢,全港一人一信,向政府提出以上方案.
2.只要最多人贊成,政府必須採用,否則就是假諮詢.
3.再叫立法會議員通過,中央批准,就可以有真普選.

責任問題:
1.只要是真普選,選一次搞掂.如是假普選,引至多次重選,勞民傷財,責任在提委.
2.如果反過來由建制派否決,令香港無普選,責任在建制派議員.
3.如政府拒絕用最多人贊成之方案立法,至令泛民否決,責任在香港政府.
4.如中央拒絕通過方案,責任在中央政府.
5.所有問題,責任均不在想要真普選香港市民及泛民議員.

提名方式:
1.最好當然先由候選人電視電台公開辯論,提委再根據民意調查提名前三名.
2.不過其實講都無謂,因必然有篩選,任何公平方式必不被採用.
3.除非政府不想多次重選,及害怕提委制度失效出現,因而採用此方案.
4.固更要大力支持整個普選及重選方案,從而迫使政府推行此公平提名方案.

結論:
1.你玩手段要有篩選,我就用智慧迫你無篩選.
2.玩政治,就係咁簡單!

再進一步:
1.如中央拒絕任命香港人普選之特首,基本法及政改框架並無規定如何處理,所以香港可自行立法.
2.兩個月內重新舉行普選,按照普選方案選舉.
3.被拒絕任命之特首可重新參加普選.
4.此次並非無人當選之重選,固提委遲職等問題,當重未開始普選般,重新開始計算.
5.如中央連續兩次拒絕任命當選者,中央官員,國家主席,總理,人大等,必須遲職,
1個月內重選各中央官員,各中央官員同樣不可再參加重選.
6.如連續四次拒絕任命,代表中央政府背離人民,固必須除消一黨專政.
7.被拒絕任命之特首,不需任命,仍可正式成為特首.
8.一年之內,以香港特首及立法會等相同方式,由全國人民,普選國家主席,總理,人大等.
9.驚呀?驚就唔好玩香港人囉,共產黨!