掟我落樓
Topic: 10奇遇 Trek
請先看<提示>.

上次講開我鐘意擒上窗口望落街,咁你地細個驚唔驚跌落街吖?

個次成家人去左九龍城探以前既街坊,原來我出世到搬上公屋之前住過九龍城,不過我完全無印象.

個座樓好似最舊式七層公屋咁,單邊走廊,半身牆,但係有成十幾廿層高.

我叫阿爸抱高我睇吓,嘩,好高呀!我問:係咪跌落去會死架?

阿爸話:係呀,細路仔無大人自己唔好擒咁高呀!

大人跟住同 D舊街坊傾偈,出出入入.後黎,唔知點樣,大家姐捉住我企上個擺係半身牆邊既火水罐上便.

我話:爸爸話唔好企咁高呀!但係佢箍實我唔比我落黎.

我搏命掙扎:做咩喎!你想掟我落街呀?佢話:係呀!

我繼續搏命掙扎:救命呀!唔好掟我落街呀!嗚嘩嗚嘩!救命呀!唔好掟我落街呀!嗚嘩嗚嘩!......

喊左哎左好耐,終於有個舊街坊出黎:做咩呀?做咩咁慘掟你落街呀?

我阿媽先施施然行出黎:唔係呀,我地諗住影相之嗎?做咩話呀家姐想掟你落街呀?

我喊晒咁話:頭先爸爸話唔好企咁高架!跌落去會死架!嗚嗚嗚.......

唉!架相機有排都未準備好,你咁快捉實我企係到做乜唶!大家姐!

但係我記得屋企相簿仲有幅我喊住比大家姐箍實影既相個喎!唔通真係諗住影完相就掟我落樓?