"Operation: Circumcision"
Maogmang bareta para sa mga kalalakihan,
aki o gurang man, na dae pa naboboniagan:
Igwa nin plano an sarong grupo
civico sa Ciudad nin Naga na magtulod liwat nin "Operation: Circumcision
sa maabot na vacacion.
Iyan an informacion na nakabot
sa corner na ini hale sa grupo na an pamayo sarong kagawad kan ciudad na
an pagtubod kan mga amigo dae pa man "boniag".
An proyecto gigibohon bukas
sa gabos na dae pa "tibos": poon makuapo sagkod sa lolo; barangay tanod
sagkod mga kasurog cops; empleado sa gobierno sagkod sa mga taga-radio
asin periodico; sa mga sacristan, maski si mamo, kun gusto, puede man.
Naisipan liwat an proyecto sa
pagtubod na sobra sa cincuenta porciento (50%) kan mga aki ni Adan sa ciudad
na ini dae pa completo an pagka-cristiano.
Sa record kan mga hospital sa
Naga, an numero kan nagpapa-circumcise mabibilang sana sa muro. Saro pa,
idtong ginigibong circumcision sa likod kan harong lipas naman pati sa
panahon.
Para sa mga Judeo asin Moro,
an circumcision igwa nin espiritual na kahulugan. An tawo daa nalilinigan
nin kasalan pagkatapos na "maboniagan". Sa mga Judeo, Enero uno ngani an
declaradong "Circumcision Festival".
Para sa mga Cristiano, an circumcision
kaipuhan tanganing makalikay sa helang. Laen kan irritation, delicadong
magkaigwa pa nin infection kun dae nin circumcision.
An minasunod basado sa medical
advisory na samuyang narecibe:
An maraot na efecto kan dae
pa circumcised iyo an pagka-igwa nin mga aki na mayo man nin tagomata,
pero firmeng igwa nin mota an mata; paminsan-minsan igwa nin culebra, kaya
dae nakakaescuela; mandiit-diit igwa nin calentura, kaya absent sa oficina.
Iba pang negative effects kan
dae circumcised:
Kun igwa nin agom, an babae
nahanap nin iba; kun nalaog sa sauna, dae makahuba nin brief ta nasusupog
sa masajesta; asin kun igwa nin ilusion, an girlfriend inuuli an engagement
ring.
Sa pagparticipar sa nagdadangadang
na occasion, dae matakot na mamidbid ta sineseguro kan sponsor na an affair
dae magkaka-igwa nin radio asin TV coverage.
Asin tanganing magka-igwa nin
marhay na impact, plano kan grupo na gibohon na operation: circumcision
sa Calle Supot, barangay nin Liboton. (Levy S. Aureus)
