Farzona

Чтобы правильно отражались таджикские шрифты используйте кодировку "Кириллица (Windows)" и установите шрифт "Tajiki Sophia"

For correct display of tajik fonts you should use the Cyrillic (Windows) coding and then install the "Tajiki Sophia" font to your PC

ХУД БА ХУД

Берун маро фикандай аз хотир,
Сӯзи даруни ман зи ҳамин бошад.
Подоши ишқи ман чи бувад ҷуз ғам,
Аз ишқ тавба кардам, ар ин бошад.

Он духтарак, ки бас шаби тӯлонӣ
Бо содагӣ хаёли ту меварзид.
Бо ҷумла ҷурму айбу гуноҳаш боз,
Бар ишқи ту, бар ишқи ту меарзид.

Он духтарак манам, ки гуноҳонам
Бо покии фаришта бувад яксон.
Он шаҳписар туӣ, ки ҳалолат бод,
Султони қалби ман шудаӣ осон.

Дил они туст, они ту, аммо, ҳайф,
Асли варо ханӯз намедонӣ.
Ман аз ғурури хеш намемонам,
Ту аз виқори хеш намемонӣ.

Гӯям ба худ,ки бас, дигар, акнун бас,
Бар диданат дубора намекӯшам.
Чун лаҳзае равад, бишавад аз нав,
Он қавлҳои кӯҳна фаромӯшам.

Чун мевазад насими таманноят,
Дар сина боз меҳри туям ҷунбад.
Дар кунҷи дил ба хотири бахтӣ дур,
Гаҳвораҳои орзуям ҷунбад.

Хомӯшаму садо бидиҳад ҳарфат,
Дар гӯши ман чу савти равони Сир,
Ин матлаъе зи номаи сабзи туст!
«Берун маро фикандай аз хотир».

Farzona
Azizbek Rasoulov & Jamshed Dodkhoyev