Dupatta white chunari kaa,
Lipat kar tujh se rehataa hai,
Meri pyaasi nigaaho.n par,
hameshaa hansataa rehataa hai.
Kabhi udataa hawaao.n mai.n,
Simatataa teri baaho.n mai.n
Kabhi kaandhe pe bekaaboo,
Sirakataa firataa rehataa hai.
Tere kaano.n mai.n kehataa kuchh,
Ya seene se lagaa rehataa,
Teri dhakan ko gin gin kar,
Yeh uthataa girataa rehataa hai.
Kabhi teri kamar isski,
Girafto.n mai.n bandhi rehati,
Kabhi yeh peeth par kaafir,
Khisakataa khinchataa rehataa hai.
Kabhi paunchhe paseene ko,
Kabhi dhakataa hai soorat ko,
Kabho gaalo.n ko choota hai,
Kabhi munh lag ke rehataa hai
Kabhi kaaleen ban jaataa,
Kabhi godi mai.n sota hai,
Tere haatho.n ko sehlaataa,
Satataa mujhko rehataa hai
Isse sar na chadhao tum,
Dupatta hai meraa dushman,
Hamaare darmiyaan har dam,
Kyon yeh besharm rehataa hai.