[TABLET II]
ÉN dnusku šur-bu-ú ma-lik ilîmeš rabû-timeš
pa-qid nindabêmeš šá ka-la digigê
mu-kin ma-ha-zi mu-ud-di-šu parakkêmeš
u4-mu nam-ru šá qi-bit-su si-rat
5. sukkal da-nim še-mu-ú pi-ris-ti den-lil
še-mu-ú den-lil ma-li-ku ša-du-ú digigê
gaš-ru ta-ha-zu šá ti-bu-šú dan-nu
dnusku a-ri-ru mu-šab-riq za-ai-ri
ina ba-li-ka ul iš-šak-kan nap-ta-na ina é-kur
10. ina ba-li-ka ilîmeš rabûtimeš ul is-si-nu qut-rin-nu
ina ba-li-ka dšamaš daiânu ul i-da-a-ni di-i-nu
ha-sis šu-me-ka te-it-tir ina i-dir-ti ta-ga-mil ina pušqi
ana-ku ardu-ka annanna apil annanna šá ilu-šú annanna dištar-šú annannitumtum
as-hur-ka eš-e-ka na-šá-a qâtâ-ai šá-pal-ka ak-mis
15. qu-mi kaš-šá-pi ù kaš-šap-ti
šá lúkaššapi-ia5 u fkaššapti-ia5 ár-hiš ha-an-tiš napišta-šú-nu lib-li-ma
ia-a-ši bul-lit-an-ni-ma nar-bi-ka lu-šá-pi dà-li-li-ka lud-lul
INIM-INIM-MA ÚH-BÚR-RU-DA sa-lam lipî-KÉ
ÉN dgira bêlu git-ma-lu gaš-ra-a-ta na-bi šum-ka
20. dnanna-ra-ta na-bi šùm-ka
tuš-nam-mar bitatimeš ka-la-ma
tuš-nam-mar gi-im-ra ka-liš ma-ta-a-ti
áš-šu at-ta ta-az-za-zu-ma
ki-ma dsin ù dšamaš ta-din-nu di-i-nu
25. di-e-ni di-ni purussâ-a-a purusus
a-na nûri-ka nam-ri az-ziz
a-na elle-ti ti-pa-ri-ka az-ziz
bêlu sissiktu-ka as-bat
sissikat ilu-ti-ka rabi-ti as-bat
30. .......... -si il-ta-si eli-ia
is-bat lìb-bi qaqqadi kišâdi-ia5 u muh-hi
is-bat ênê-ia5 na-ti-la-a-ti
is-bat sêpê-ia5 al-la-ka-a-ti
is-bat bir-ki-ia5 ib-bi-ri-e-ti
35. is-bat idê-ia5 mut-tab-bil-a-ti
e-nin-na ina ma-har ilu-ti-ka rabîtiti
salmânimeš siparri it-gu-ru-ti
lúkaššapi-ia5 u fkaššapti-ia5
e-piš-ia5 u muš-te-piš-ti-ia5
40. sa-hir-ia5 u sa-hir-ti-ia5
ra-hi-ia5 u ra-hi-ti-ia5
bêl ik-ki-ia5 u bêlit ik-ki-ia5
bêl sir-ri-ia5 u bêlit sir-ri-ia5
bêl ri-di-ia5 u bêlit ri-di-ia5
45. bêl di-ni-ia5 u bêlit di-ni-ia5
bêl amâti-ia5 u bêlit amâti-ia5
bêl dabâbi-ia5 u bêlit dabâbi-ia5
bêl egirri-ia5 u bêlit egirri-ia5
bêl limuttimtim-ia5 u bêlit limuttimtim-ia5
50. ana lúmiti pu-qu-du-in-ni
nam-ra-su kul-lu-mu-in-ni
utukku lim-nu lu-u alû lim-nu lu-u etim-mu lim-nu
gallû lim-nu lu-u ilu lim-nu lu-u râbisu lim-nu
dlamaštu lu-u dlabasu lu-u dahhazu
55. lúlilu lu-u flilitu lu-u ardat lili
lu-u li-'-bu si-bit šadi
lu-u be-en-nu ri-hu-ut dšul-pa-è-a
lu-u AN-TA-ŠUB-BA lu-u DINGIR-HUL
lu-u ŠU-DINGIR-RA lu-u ŠU-dIN-NIN-NA
60. lu-u ŠU-GIDIM-MA lu-u ŠU-UDUG
lu-u ŠU-NAM-LÚ-LÍL-LU lu-u la-maš-tu sihirtutú marat da-nim
lu-u SAG-HUL-HA-ZA mu-kil rêš li-muttim
lu-u di-kis šêrêmeš šim-ma-tú ri-mu-tú
lu mimma lim-nu šá šu-ma la na-bu-u
65. lu mimma e-piš li-mut-ti šá a-me-lu-ti
šá sab-ta-ni-ma mu-ša u ur-ra iredú-nimeš-ni
ú-hat-tu-ú šêrêmeš-ia kal u4-mi sab-ta-ni-ma
kal mu-si la ú-maš-šar-an-ni
e-nin-na ina ma-har ilu-ti-ka rabîtiti
70. ina kibri-dit ellititi a-qal-li-šú-nu-ti a-šar-rap-šú-nu-ti
nap-li-sa-an-ni-ma be-lum ú-suh-šú-nu-ti ina zumri-ia5
pu-šur kiš-pi-šú-nu lim-nu-ti
at-ta dgira be-lum a-li-ki i-di-ia
bul-lit-an-ni-ma nar-bi-ka lu-šá-pi dà-li-li-ka lud-lul
75. INIM-INIM-MA ÚH-BÚR-RU-DA sa-lam siparri kibri-dit-KÉ
ÉN dgira a-ri-ru bu-kur da-nim
da-'-in di-ni-ia at-me-e pi-ris-ti at-ta-ma
ik-li-e-ti tu-uš-nam-mar
e-šá-a-ti dal-ha-a-ti tu-uš-te-eš-šir
80. a-na ilimeš rabûtimeš purussâa ta-nam-din
šá la ka-a-ta ilu ma-am-man purussâa ul i-par-ra-as
at-ta-ma na-din ur-ti ù te-e-me
e-piš lum-ni at-ta-ma ar-hiš ta-kam-mu
lim-nu ai-bu ta-kaš-šad ar-hiš
85. a-na-ku annanna mar ili-šu šá ilu-šú an-nanna dištar-šu annannitum
ina kiš-pi lu-up-pu-ta-ku-ma ma-har-ka az-ziz
ina pân ili u šarri na- ..zu-ra-ku-ma du .. ana mah-ri-ka
elî a-me-ri-ia mar-sa-ku-ma šá-pal-ka ak-mis
dgira šur-bu-ú ilu el-lu
90. e-nin-na ina ma-har ilu-ti-ka rabîtiti
2 salmanimeš lúkaššapi u fkaššapti šá siparri e-pu-uš qa-tuk-ka
ma-har-ka ú-gir-šú-nu-ti-ma ka-a-šá ap-kid-ka
šu-nu li-mu-tu-ma ana-ku lu-ub-lut
šu-nu li-ti-ib-bi-ru-ma ana-ku lu-ši-ir
95. šu-nu liq-tu-ú-ma ana-ku lu-um-id
šu-nu li-ni-šu-ma ana-ku lu-ud-nin
dgira šar-hu si-ru šá ilimeš
ka-šid lim-ni u ai-bi kušus-su-nu-ti-ma a-na-ku la ah-hab-bil
ana-ku ardu-ka lul-ub-lut lu-uš-lim-ma ma-har-ka lu-uz-ziz
100. at-ta-ma ili-ia5 at-ta-ma be-li
at-ta-ma da-ai-ni at-ta-ma ri-su-ú-a
at-ta-ma mu-tir-ru šá gi-mil-li-ia TU6.ÉN
INIM-INIM-MA ÚH-BÚR-RU-DA sa-lam siparri-KÉ
ÉN dgira a-ri-ru mar da-nim qar-du
105. iz-zu ahemeš-šú at-ta
šá ki-ma dsin u dšamaš ta-da-an-nu di-i-nu
di-i-ni di-ni purussâ-ai purusus
qu-mi kaš-šá-pi ù kaš-šap-ti
dgira qu-mu lúkaššapi u fkaššapti
110. dgira qu-li lúkaššapi u fkaššapti
dgira qu-mi-šú-nu-ti
dgira qu-li-šú-nu-ti
dgira ku-šu-us-su-nu-ti
dgira a-ru-uh-šú-nu-ti
115. dgira su-ta-bil-šú-nu-ti
e-piš kiš-pi lim-nu-ti u ru-hi-e la tabûtimeš
šá a-na li-mut-ti ik-pu-du-ni ia-a-ši
dan-nu ma-ak-kur-šu-nu šu-ul-qi
šu-bil bu-šá-šu-nu ik-ki-e-ma
120. elî ma-na-ha-te-šu-nu hab-ba-ta šur-bi-is
dgira iz-zu git-ma-lu ra-šub-bu
ina é-kur a-šar tal-lak-ti-ka tu-šap-šah-šu-nu-ti a-di sur-riš
ina a-mat dé-a ba-ni-ka ù dšamaš an-nam-ru
7 apqallê šuut eri-du10 lik-pi-du-šú-nu-ti ana limnuttimtim TU6.ÉN
125. INIM-INIM-MA ÚH-BÚR-RU-DA sa-lam liši-KÉ
ÉN dgira gaš-ru u4-mu na-an-du-ru
tuš-te-eš-šir ilimeš u ma-al-ki
ta-da-a-ni di-ÉN hab-li u ha-bil-ti
ina di-ni-ia i-ziz-za-am-ma ki-ma dšamaš qu-ra-du
130. di-i-ni di-ni purussâ-ai purusus
qu-mi kaš-ša-pi u kaš-šap-ti
a-kul ai-bi-ia a-ru-uh lim-nu-ti-ia
ûm-ka iz-zu lik-šu-us-su-nu-ti TU6.ÉN
INIM-INIM-MA ÚH-BÚR-RU-DA sa-lam titi-KÉ
135. ÉN dgira šar-hu bu-kur da-nim
i-lit-ti ellitimtim šá-qu-tum dša-la-aš
šar-hu id-di-šu-u zik-ri ilimeš ka-ai-nu
na-din nin-da-bi-e ana ilimeš digigê
šá-kin na-mir-ti a-na da-nun-na-ki ilimeš rabûtimeš
140. iz-zu dgira muš-har-mit a-pi
dgira al-la-lu-ú mu-ab-bit isemeš u ab-nemeš
qa-mu-ú lim-nu-ti zêr lúkaššapi u fkaš-šapti
mu-hal-liq rag-gi zêr lúkaššapi u fkaš-šapti
ina u4-mi an-ni-i ina di-ni-ia i-ziz-za-am-ma
145. e-piš bar-ti te-na-na-a ku-šu-ud lim-nu
kima salmânimeš an-nu-ti i-hu-lu i-zu-bu u it-ta-at-tu-ku
lúkaššapu u fkaššaptu li-hu-lu li-zu-bu u lit-ta-at-tu-ku
INIM-INIM-MA ÚH-BÚR-RU-DA sa-lam itti-KÉ
ÉN ki-e-eš li-bi-iš ki-di-eš
150. a-ra-ab-bi-eš na-ad-ri-eš
nâš ti-pa-a-ri ra-kib šá-a-ri
li-ru-un hu-un-ti-i
ka-sá-a-šu i-za-an-nun
ki-ma šá-ma-me el-ku-un
155. ki-ma siri li-te-ru-ba-ma i-sá-a
lik-tum-ku-nu-si siptu iz-zi-tú rabîtutú šá dé-a mašmaši
ù tu6-kug-ga-e šá dnin-a-ha-qud-du
li-la-ap-pit bu-un-na-an-ni-ku-nu TU6.ÉN
INIM-INIM-MA ÚH-BÚR-RU-DA sa-lam kuspi-KÉ
160. ÉN e-pu-šu-ni e-te-ni-ip-pu-šu-ni
ki-ma ki-i-ti ana ka-pa-li-ia
ki-ma hu-ha-ri ana sa-ha-pi-ia
ki-ma ka-a-pi ana a-ba-ti-ia
ki-ma še-e-ti ana ka-ta-me-ia
165. ki-ma pi-til-ti ana pa-ta-li-ia
ki-ma pi-ti-iq-ti ana na-bal-ku-ti-ia
ki-ma mêmeš mu-sa-a-ti a-sur-ra-a ana mal-li-ia
ki-ma šu-šu-rat bîti ana bâbi ana na-sa-ki-ia
ana-ku ina qi-bit dmarduk bêl nu-bat-ti
170. u dasari-lú-du10 bêl a-ši-pu-ti
e-pi-šu u e-piš-ti
ki-ma ki-i-ti a-kap-pil-šu-nu-ti
ki-ma hu-ha-ri a-sa-hap-šu-nu-ti
ki-ma ka-a-pi ab-ba-šu-nu-ti
175. ki-ma še-e-ti a-kat-tam-šu-nu-ti
ki-ma pi-til-ti a-pat-til-šu-nu-ti
ki-ma pi-ti-iq-ti ab-ba-lak-kit-šu-nu-ti
ki-ma mêmeš mu-sa-a-ti a-sur-ra-a ú-ma-al-la-šú-nu-ti
ki-ma šu-šu-rat bîti ana bâbi a-na-as-sik-šú-nu-ti
180. titalliš lil-li-ka salam lúkaššapi u fkaššapti ÉN
INIM-INIM-MA ÚH-BÚR-RU-DA sa-lam ittî šá gassa bullulu-KÉ
ÉN at-ti man-nu fkaššaptu šá ina nâri im-lu-' tita-ai
ina bîti e-ti-i ú-tam-me-ru salmanimeš-ia
ina qab-rì it-mi-ru mu-ú-a
185. ina tub-qi-na-ti ú-laq-qí-tu hu-sa-bi-e-a
ina bit lúašlaki ib-tu-qu sissikti-ia
ina askuppati iš-bu-šu epirhi.a šêpê-ia
áš-pur ana bâb ka-a-ri i-šá-mu-ú-ni li-pa-a-ki
áš-pur ana hi-rit ali iq-ri-su-ú-ni ti-i-ta-ki
190. áš-ta-pa-rak-kim-ma a-li-ku ti-nu-ru
dgira mu-un-na-ah-zu
dgira id-di-šu-u nur ilimeš ka-ai-nu
dsin ina uruki dšamaš ina larsaki
dnergal a-di um-ma-na-ti-šú
195. dištar a-ga-deki a-di ku-um-mi-šá
a-na la-qa-at zêri lúkaššapi u fkaššapti
ma-la ba-šu-ú
fkaššapta li-du-ku-ma ana-ku lu-ub-lut
áš-šu la e-pu-šá-áš-šim-ma i-pu-šá
200. áš-šu la as-hu-ra-áš-šim-ma is-hu-ra
ši-i tak-lat ana kiš-pi šá kit-pu-du-ú-ti
ù a-na-ku a-na ez-zu dgibil da-a-a-nu
dgira qu-mi-ši dgira qu-li-ši
dgira šu-ta-bil-ši TU6.ÉN
205. INIM-INIM-MA ÚH-BÚR-RU-DA sa-lam titi šá lipâ bullulu-ké
ÉN at-ti man-nu kaššaptu šá tub-ta-na-in-ni
a-na li-mut-ti taš-te-ni-'-in-ni
a-na la ta-ab-ti ta-as-sa-na-ah-hur-in-ni
al-ki ul i-di bit-ki ul i-di šum-ki ul i-di šu-bat-ki ul i-di
210. dšêdêmeš li-ba-'-ki
utukkêmeš liš-te-'-u-ki
etimmêmeš lis-sah-ru-ú-ki
be-en-nu la ta-a-bu eli-ki lim-qut
rabisêmeš li-mut-ti li-kil-lu rêš-ki
215. d.............u dšul-pa-è-a li-na-ru-ki
d............. en ši ......... -ki li-ip-šit
dgibil iz-zu la pa-du-u lìb-bi-ki lí-is-su-uh
dgu-la a-zu-gal-la-tu rabitutu li-it-ki li-im-has
dgibil iz-zu zu-mur-ki li-ih-mut
220. ..... ellitumtum mârat da-nim šá šamê
šá ina kar-pat na-an-hu-za-at [isatu]
... libbi .... dgibil qar-du sa-ma-a ...
....... ..... šá-ma-mi ik-šu-du
................. qu-li i kat-ta.........
225. qu-mi ha-an-tiš šá lúkaššapi-ia5 u fkaššapti-ia5
na-piš-ta-šú-nu lib-li-ma
ia-a-ši bul-lit-an-ni-ma nar-bi-ka lu-šá-pi
dà-li-li-ka lud-lul TU6.ÉN
INIM-INIM-MA ÚH-BÚR-RU-DA sa-lam isbini salam iserini-KÉ
230. ÉN kaššaptu mut-tal-lik-tum šá sûqâ-timeš
tuppu IIkam ma-aq-lu-ú
