Warbixin
ku saabsan Dalka Denmark
SDWO (Copenhegan) Waxaan dhowaan socdaal
sedexmaalmood ah aan kaga soo laabtay dalka Denmark, waxaanan ka diyaariyey
warbixintan kooban, ugu horeyn
dalka Denmark wuxuu ka tirsanyahay dalalka ku jira midowga yurub hase yeeshee
aan qaadan lacagta midowga yurub ee loo yaqaan Euro.
Denmark waxa weli laga isticmaala lacagtoodii gaarka u ahayd dalkaas ee
loo yaqaano Kroner.
Hadii aan ka hadlano nolasha dalka Denmark
waxay iila muuqatay magaalo maceeshadeedu aad u qaali tahay marka loo eego
dalkan Britian iyo guud ahaanba nolosha oo dhan,
tusaale hadii aan u soo qaadno xabada kookaha ah qiimaheedu wuxuu ku
dhowyahay lacag u dhiganta $1.70
US Dollar.
Dhinaca dadka dalka u dhashay waxa ka
muuqata inaanay dad ajaanib ah oo sidaas u badan aanay la macaamilin ama ay
yahiin dad xidhxidhan, dadka somalida ee ku nool dalkaasina dhamaantood waxay
isku raaceen inay dadkaasi yahiin dad ay cunsiriyad aad u weyni ku talaxtagtay,
waxa kale oo la ii sheegay inay xaga muslinkana cadaadis weyn ku hayaan
oo hada dhawr masaajid la xidhay, masaajid kale oo aan markaas hortaagnaana oo
ku yaala caasimada Denmark – Copenhegan in maxkamadu soo amartay in la xidho
oo bilaha soo socda albaabada loo xidhidoono.
Dalkan markaad u yara fiirsato uma eka
dalalka reer galbeedka ah xaga dhismaha iyo dadka ku noolba waxaad mararka
qaarkood isweeydiinaysaa inaad joogto dal ka mid ah dalalka yurubta bari ama
shuuciga. Xaga kale calaamada iyo magacyada
wadooyinku dhamaantood waxay ku qoran yahiin afkooda oo wax ingiriisi ahi kuma
hoos qorna.
Somali sidaas u badani kuma noola
magaalada Copenhegan aad iyo aad bay u tiro yaryahiin dadka ku nooli
badidoodiina markii ay sharciga wadankaas qaateen waxay u haajireen dalka
Britain, waxa la ii sheegay in dad gaadhaya ilaa 13 kun oo Somali ahi ay ku
noolaan jireen dalka Denmark laakiin hada lagu qiyaaso somalida ku nool
dalkaas 3 – 4 kun oo qof oo intooda badanina ay u sii jeedaan dalka Britain.
Waxyaabaha kale ee qaaliga ahaa ee
igayabaabiyey waxa ka mid ahaa Biriij dheer oo bada dul mara oo isku
xidhiidhay magaalooyin ka tirsan isla dalka Denmark oo aanu sii marnay anagoo
ka baxnay magaalada Copenhegan una sii soconay magaalo u jirta 156km oo la
yidhaah Odense, biriishkaas waxa
lagu maraaa halkii marba 250 Kroner una dhiganta $44.75 US Dollar. Isu geyn
sii socod iyo soo socod waxaanu bixinay $89.50 US Dollar.
Waxyaabaha kale ee iga yaabiyey waxa ka
mid ahaa Somalida ku nool magaalada kale ee aan booqday ee la yidhaah Odense,
hadii aan soo qaato dhinaca xafladaha meherada waxa la ii sheegay in
xafladahoogu socdaan ilaa iyo inta uu waagu ka beryayo, waxa kale oo aan la
kulmay meher halkaas habeenkaan joognay ka jiray oo la ii sheegay in marka
hore dumarku xaflada ku horeynayaan oo ay iyagu iska sii damashaadayaan
keligood raguna ka soo qaybgalaan wixii ka bilaabma 2 habeenimo, ugu danbayn
waxa noo suurto gashay oo ragii loo ogolaaday oo arooskiina ku jiro wakhti ku
dhow 4 tii habeenimo, xafladaasna waxaanu joognay ilaa saacad iyo badh
waxaanuna ka baxnay 5.30 subaxnimo, hase yeeshee waxaan isku deyey inaan
ogaado xiligay xafladii dhamatay maadaama aanuba waaberi ka tagnay waxaana la
ii sheegay inay dhamatay 8 dii subaxnimo, waxaana la ii sheegay in xafaladaha
noocan oo kale ahi intooda badani ay bilaabmaan 1 da
habeenimo iyo wixii ka sii danbeeya.
Guud ahaan magaalada Odense waxa la ii sheegay in Somali badani ku
nooshahay marka loo eego magaalada Copenhegan.
Gebogebadii wuxuu dalka Denmark u egyahay dal nabadgelyo badan marka loo eego dalka Ingriiska,
intii aan joognay dhegahaygu may maqlin gaadhi boolis ah oo qaylinaya ama
ordaya, sidoo kale waxanan arag ama aanan maqlin gaadhi dab demis ama
umbalance ah oo ordaya ama qaylinayaba. Sidoo kale waxaanan arag boolis
lugaynaya oo nabadgelyada ilaalinaya sida dalkan Britain oo kale.
Sidoo kale waxaanan arag Kamaradaha la
iska arko oo aan dariiq qudha ku xidhnayn halka dalkan Ingiriiska aad wada iyo
koone walaba aad ku arkaysid taasina waxay kuu xaqiijinaysaa nabadgelyada ka
jirta dalkaas. Waxa qudha ee aadka loo dareemayo waxa ka mid ah adigoo
dareemaya inaad dal qurbe ah aad joogto ama aad ajaanib isku arkaysid sababtoo
ah waxaanay indhahaagu habayaraatee aanay inta badan qabanayn dad ajaanib ah,
halka dalka Britian magaalooyinka intooda badani ay ajaanibku aadka ugu
badanyahiin oo aanad dareemaynba inaad tahay qurbo joog. Ugu danbayntii dalka
Denmark waa dal xaga nadaafada aad iyo aad uga horeeya dalkan Britain,
Indhahaygu may qaban xashiish iyo wasakho meelahaas iska daadsana sida
dalkan Britain oo kale. Dalkan waxa
la ii sheegay inuu qaadku mabnuuc ka yahay hase yeeshee hadana uu si qarsoodi
ah u yimaado oo qaadka si caadi ah loogu heli karo mijintana la siiyo lacag u
dhaxaysa $17 - $20 US Dollar.
Guled Cabdi Sheekhaash - SDWO NEWS
DESK
