Gabay: Qaranimada Somaliland Qooq kumaan helin.

Gabaygan waxa tiriyay gabayaa aad u da' yar oo magaciisa la yidhaahdo Saciid Maxamed Raan. Gabayaagu waxa uu ku noolyahay magaalada Copenhagen ee dalka Denmark. Gabaygan oo curtay wakhtigii shir ku sheegii carta, hase yeeshee waxaa kaloo aan gabaygan ka madhnayn ka hadalka wacyigan bulshada Somaliland ku jirto. Wuxuu hal abuurku uga digayey bulsha weynta reer Somaliland inaanay ku dhex milmin, kana qayb gelin shir ay soo abaabuleen cadowga Somaliland, kuna jiraan kuwii ka qayb qaatay xasuuqii balaadhnaa ee bulshada reer Somaliland loogula kacay sida kaska ah xillliyadii 80aad kii.

Abwaanku wuxuu xasuusinayaa kuna baraarujinayaa dareenka dadka reer Somaliland meelkastay joogaan, gudo iyo debedba inaanay marnaba maankooda ka suulin halgankii qadhaadhaa ee naf iyo maalba lahaa SNM na hormuudka ka ahayd ee loo soo maray xornimada Somaliland. Abwaanku wuxuu tilmaamayaa inaan ummad jiritaankeeda waxba ka jirin haddii aanay lahayn dhaxal taariikheed, taariikhdii halganka SNM na tahay taariikhda ugu weyn ee ummadani ku faani karto, kana dhigato rukun ka mida rukunada sooyaalka taariikheed ee Somaliland. Abwaanku wuxuu ku xusayaa gabaygan qaar ka mida mujaahidiintii dalka u soo halgamay, isagoo u kala qaybinaya kuwii shihiiday iyo kuwa weli nool. Abwaanku wuxuu kaloo canaan toosin ah u jeedinayaa maamulka xukuumadeed iyo goleyaasha qaranka reer Somaliland, kuwaasoo uu ku boorinayo inaanay marnaba dantooda gaarka ah ka hor marin danta guud ee ummadda.

Waxay tidhi maansadu:

Haddii qaniyad gabay leeyihiyo qir iyo maamuusid
Qalanbaawigii Faarax Nuur looma qumahayne
Oo qab iyo kibir buu nebcaa qaban asaagiiye
Intuu qodob naxweleh nooga tegey waa wax noo qorane
Qod la ridana Cali Jaamac baa qaaraq ku ahaaye
Qarnigaynu joognana Hadraa qora higaadiiye
Sadaal qota leh Qaasin baa qub u lahaa doode
Qasnadii janada eebeheen qawlal haw firo e
Qaafiyad Salaan Maxamed baa qaadi jiray koobe
Aniguna qusuuga hidood waan ku qaayibiye
Iga qabo aduu Qaaliboow qaaf ku saanyadaye
Oo qalin ku duug waa maanso aad iigu qaaliyahe

Jiilaal qawaarsaday abaar qacaydu yeedhayso
Dadkoo sagal qabow iyo raxmadi qaayib ka ahaatay
Mar hadduu galbeed uga qubtiyo ilaha qaansoole
Qaarbaa markiiba iska rara geedi qaafil ahe
Qacda horena sahan baw quwiya lana qalqaashaaye
Dabadeed qorshiyo hubantibaad qun ugu guurtaaye
Ileen wixii qumaati u dhacaan lagu qasaarayne
Qaan gaadh haddaad tahay asaad qudhiska deyn weydo
Guur waxa u qaaliban ninkii qaba asaagiiye
Qormo ugub haddaad doonaysiyo midaanad quudhaynin
Qaarbaa haweenka u igmada quruxda faayaaye
Qolqolkayse joogtiyo duntuun baa la qiyaasaaye
Dabadeed mid kuu qalantabaad qun u aroostaaye
Ileen qamar la moodyeey haween qiimigaa ladhae
Afartaa qorshii ararta iyo qaab u hadalkay dheh

Qotonbay murtidu leedihiyo qaar sariyo baare

Qarnibaa dhamaadaye haddii qarankii aan doortay

Aanay qaayihi loo igmaday qun ugu guulaysan

Oo qaylo soo yeedha iyo qoonsi damiwaayey

Oon qubanihii shacabka guud qayb dhan cidi haynin

Qooysna lagama maarmee Sanaag waa qor kaa maqane

Markay qaran kasbada weyday iyo cid u qareemaysa

Qawedkiyo saluugii ku tage qubanihii Soole

Qoondaysay nacabkeenna oo qaarba meel mariye

Iyana qaayaheen waa ku ceeb qarankan Maandeeqe

Qaraar laga sinaystaa arlada qiima iima lehe

Qaloonbigan durbaanada watiyo qayb yar taladeedu

Qalwadiyo sursuurtaan arkaa qaran jabweeyaane

Qoomaha xigaalkiyo naxliga qodidood mooyane

Wax kaleeto qoomkaan dirsaday qun uma liilayne

Qabyana lama dugsado maalin adag qaafil libin mooge

Inta qooys sabooliyo Caloow gacal is qiimeeya

Ama sabo quruun wada degtiyo ehelo qaadhaan leh

Uu qaar garsoorkiyo sharcigu quudsho noloshooda

Darna ay darxumo qaawantahay qolofta saantoodu

Oonay qabowga dayreed gabood qun aayoodsan

Misna qaran qudhii wada xukumo waa qiso iyo yaabe

Qabarna wuxuu u muuqdaa nin raga qoonta oon dhicne

Qalbigii raxiimina ma oga qaayin iyo tuuge

Haddii aan qareen moodaynoo quxub u hooseeyo

Adaa qubaradii reer Fircoon maalin qaaraqaye

Naga qabo Allahayoow Ilaah qaadiraad tahaye

Qatartana horteed waw digaa hanadba qoomkiiye

Lixdankii qasaaruu ibaday quxub sokeeyaade

Qoobkaan ka jabay waanigaa qaba xanuunkiiye

Ee aan qaxoontiga ku jiro qaaradaa Yurube

Ee uu qubanahaygii martiyey gaalka qaanacaye

Maantana ma qaynaanin karo qaanso iyo leebe

Oo qaxarba taag uma hayiyo saanad qaaliyahe

Lama arag dad qaran uu dhistiyo quba masiirkoode

Ee waa qabyee yaan fudayd loo qulquladeyne

Inuu qaayaheen sii kordhoo qaranku guulaysto

Iyo qodobadaydani canaan quruxle weeyaane

Qaladkaan sax leeyahayna yuu qaadan waa noqone

Balse qayla dhaantiyo bulshooy qun u saluugaygu

Iyo qodobkan maansadu halkuu qun u abaaraayo

Qolqolada xigaalkiyo ka culus qaradkaay meel dhowe

Waase qabatin hawraari iyo quduro xeel dheere

Qaafkaaga waw hiil ninkii qalin yaqaanaaye

Adna iga qor Rooblow murtidu qowmi waw magane

Qusur awdan qool iyo mareeg dabin la qoondeeyey
Haddii qawl dhalaaliyo anfaco qarisa loo yeelo
Qadoodiga biciid kama hakado qadow u laacaaye
Qoobkiyo lugtuu kula dhacaa halis qarsoonayde
Anna qiiro aan jirin dibnaha qaawintiyo foolka
Booraan qafilan baan markale lay qatalahayne
Shirkan Geelle qaban qaabiyiyo Qawdhan iyo Moorgan
Ee qaatiliintii dalkiyo qumanyadii joogto
Iyo qaati sooreed Bulshadan maba quseeyaane
Ma qadariyo waanada ninkuu qoomay waa halace
Halkaadse qoon la dhayo eegaysiyo qalad lagaa dhaahsho
Qasab iyo dumaal baa la yidhi waa qab iyo maane
Oo wixii qalooc lagugu falay qirasho loo diidye

Qusum kii ka dhowraayayow laguma qiimayne
Haku quusto weeyaan sacuba qalista weyshiiye
Waxba qalad aan leeyahay ayaan gocadkii qiiroone
Damalkuu qarqooriyo jirdii qaashku kala gooyey
Wuxuu yidhi qorkaybay gabaye ima qurbaabteene
Anna qaar dadkaygiyo haddaan qaafil la adeegsan
Oo aanay qawlaysatada daba qamaamaynin
Ama nacabkaan shalay quusta baday qaraw la soo toosin
Qayimkiyo libtaydiyo waxaan qurux ku naaloodo
Qarankayga muu beeniyeen doobad quus ihiye

Mulacse qabashadii wiil yar waw qab iyo dheeldheele
Isagana qasaaray ku tahay qoomamiyo hooge

Waa qaabadaan Maxamed nahay aniyo qayb diide

Qaranimada Soomaaliland qooq kumaan heline
Nin kastoo qab ila gaadayaa hayska qowdhama e

Qaash iyo amley baan dagaal kaga sed qaadaaye

Hubkase qabarsanaaciga markay qaraxdo baaruudu

Ay qaata gaadhuu fuluu qala la dhuuntaaye

Waxsaan qaaye leeyahay difaac maalin qarameede

Qoortaydu iibay ahayd tan iyo Qaabiile

Posted by:  sooldhuub@hotmail.com