Maanso Cusub (ADOON)
Waxa curiyey
abwaan Xuseen Dantihaye
Email: dantakow@hotmail.com
Maansadan ama heestan Adoon waxay soo baxday maanta oo ay taariikhdu tahay 8/10/2007 ama 27/09/1427 waa hees isugu jirta Towxiidka Islaamka iyo rukumada ama tiirarka Islaamka iyo duco aan ugu duceeyey ummada Islaamkana anna aan ku duceeyey.
Markaa Adoomada Illaahayow waxaan idinka tuugayaa inaad aamiinta ii raacisaa.
Allana waxaan ka baryayaa inuu idinka iyo anigaba inagu anfaco. Allaa mahad leh
Marka hore Allaa wayn
Isagaa awooda leh
Waxan ahay Adoonkii.
Idilkeed amaantana
Isagaan u ururshoo
Uurkiyo afkaygaba
Intaa waa ka leeyee
Alxamdu lillaahi
Na ilaali Eebow.
Dunidaa ordaysoo
Ayaantii dhamaataba
Cimrigaa Adoonow
Wuxu iman agtaadee
Intaan iilka lays dhigin
Eray inaan tidhaahdaa
Waa astaamaheenee
Idinkuna ajiiboo
Uur fayow ku qaaboo
Ila eeg ujeedada.
Ma ogtahay adoonow
Ashahaada oon qiro
Oogida Salaadiyo
Soonkoon adkeediyo
Sakadoo la ururshiyo
Xajka ood awoodaa
Waa ayaan naftaadiyo
Beri iyo abaalkaa.
Ka ilaalin waayee
Itaalkeed la siiyow
Bal aan kuu idhaahdee
Maxaad keli ogsoontahay.
Ma ogtahay Adoonow
Alle aaminkiisiyo
Malaa’iigta Eebiyo
Kutubtiyo Anbiyadiyo
Aakhiroo danbaysiyo
Qadar aanad garanayn
Khayr iyo sharkuu yahay
Afka sheegid maahee
Iimaanka uu dego
Inay tahay Islaamnimo.
Ma ogtahay adoonow
Waalidkaad adeecdoo
U ixsaan samaysoo
Usha aad u haysiyo
Eraygii wanaagsani
Inay adiga kuu taal.
Ma ogtahay adoonow
Qunyar inaad u socotoo
Isha aadan dabinoo
Dhowrtaa afkaagoo
Gacantaa Adoonow
Ummadaha Illaahay
Ad-yad aadaan ula tegin
Inay aad u wacan tahay.
Ma ogtahay Adoonow
Ifku maalmo weeyee
Beri lama ogsoonee
Ha ilaawin iilkiyo
Halka lagu arooriyo
Aakhiro hadhowiyo
Amarkii Illaahiyo
Arimaha xisaabtiyo
Abaalkaagu wuxu yahay
Uurkaad ku haysoo
Ooxadaada Naariyo
Abris iyo Abooriyo
Olol aad ka baqataa
Inay tahay amuur culus.
Ma ogtahay Adoonow
Aqal hoos qaboowoo
Udugoo dugsoonoo
Xuural-cayn ayaaniyo
Midab wada ilaysoo
Amakaag ku geliyo
Wiilal aayad kuu oo
Amarkaaga raacoo
Uurkaa wuxuu rabo
Afka intaadan soo marin
Isha aad ku dhufatiyo
Alle aad la kulantiyo
Abaal aan la tiring Karin
Inaad taa abaartaa
Inay tahay ujeedadu.
Sida ayro dhaban geel
Ka aroor ku jiitee
Oon tiray naftiisii
Uurkuun u buuxshee
Hawadii eryadayee
Iyaduun ilaashee
Wax kastaba u iibshow
Ka anbaday ma sheegine
Amarkiina gaadhee
Ayadaha maqlaayee
Eedaanka dhaafee
Dhagahii ka awtee
Aaminay Aduunkee
Beri eegi waayow
Naxariis ma awdine
Maxaa aafo kuu taal.
Ummad yahay Islaamkee
Ashahaada qiraysaa
Ururkiinu hee dhee
Waa aayihiinee
Lama kal irdhoobee
Isu soo hilooboo
Ardaa qudha samaystoo
Noqda ul iyo diirkeed
Hadaad ooda jebisaan
Aqal aqal tidhaahdaan
Oday oday u socotaan
Balhalkii inkaar qabe
Iblays baydin helayoo
Utintiina jariyoo
Sida amintan lagu jiro
Ee aaran dubatadu
Ololaha Islaamkiyo
Sidii loo abtiri laa
Isir goynta lagu wado
Yaa aayihiin noqon
Inaguna itaal keen
Iyagaynu siinaa
Ma ba ogin ujeedada
Sida oosha loo wado
Iinsha Alle heedhee
Waxa iman ayaan dhow
Naxariista Eeboo
Arladana Islaambaa
Amarkeeda haynoo
Dhulkan ceeb la ooyaa
Samo lagu aradinoo
Ummadani mid bay noqon
Aan Ey u soo dhicin.
Rabiyow aduunyada
Adigaa asteeyoo
Ogaalkaa sameeyoo
Aadan iyo Xaawiyo
Ambiyada dhamaantood
Umaddaha ku beeree
Allow magacyadaadaan
Idilkood ku leeyoo
Urur ku baryaayaa
Ducaday ajiiboo
Rabiyoow Islaamnimo
Nagu hay awoodaa
Aabe iyo hooyiyo
Awoowiyo Ayeeyaba
Denbi dhaaf Allahayow
Infka intay kor joogaan
Aayo wacan Rabigayow
Aakhirana Janadi iyo
Aqal roon Allow sii
Intaad naga abuurtee
Ubad aad nasiisayna
Dar islaaxa Eebow
Na adeeca Eebow
Na ilaasha Eeboy
Aan u ayno Eebow
Oo Islaama Eebo
Allow ooridaydana
Labadii is eegtee
Abid wada dhaqnaadee
Arin wada wadaagee
Isu uur fayoobee
Asaraar ku noolayn
Is illaawin naga yeel
Ilmihiyo dhasheedana
Akhlaaqdooda korisee
Islaamkooda dhowrtee
U adkaysa Diintee
Ababinta tacliintiyo
Aliftii ku dhalisee
Adimada u taagtee
Isku haysa ugu yeel
Allahoyow Raxmaanow
Allahayow Raxiimow
Islaamnimo Allahayow
Adeecaa Allahayow
Aqbalkaa Allahayow
Usha ku waad u haysee
Diintood ilaashee
Aan Iblayska raacine
Aad ka oodo naga yeel
Aqoontaa Allahayow
Irsiqaa Allahayow
Hiilkaa Allahayow
Hoygaa Allahayow
Hayntaa Allahayow
Hogaankaa Allahayow
Horumarkaa Allahayow
Naxariis Allahayow
Naruuradaa Allahayow
Nidaamkaa Allahayow
Nimcadaa Allahayow
Nabadaa Allahayow
Naxli li’ Allahayow
Ummadaa Allahayow
Adhaxdaa la tuujoo
Way ku eegaysaayee
Gargaarkaa Allahayow
Gurmadkaa Allahayow
Gacantaa Allahayow
Guushaa Allahayow
Galadaa Allahayow
Intaa Gaal u xilatana
Baqo geli Allahayow
Gilgilkaa Allahayow
Godoonkaa Allahayow
Allow Gaalo ka tuur
Islaamkaaga guulee.
Naftu waa amaanoo
Waad oofsanaysaa
Kuwa lagu adkeeyee
Ooda lagaga jiidee
Urugada ku dhaaftana
Allahayow hanaga dhigin
Rabow aayar kaga siib
Halka laga arooriyo
Godka laysku awdiyo
Allow iilka ii fidi
Iridaha Fardowsana
Ilin iiga ssaroo
Inta eegta Janadee
Il qabowsi siisiyo
Inta faraxda iga yeel
Ayaantaa danbaysiyo
Aakhiro xisaabteed
Aflax iiga yeeloo
Olol naara iga hayn
Sida Eebe uu yidhi
Udgoonow Rashhulkii ( CSWS )
Ku saliya Adoomow
Aamiina iidhaha
Aamiin Aamiin Aaamiin
Waxa tiryey
Xuseen Dantihaye
Allaa mahad leh
