Gabay: Deris Bari
Waxaa curiyey: Ibrahim Hassan Gagale
Gabayga soo socda waxaa lagu magacaabaa: Deris Bari, waxa uu ka koobanyahay 96 beyd oo ku urursan 32 seddexley, waxaana sannadkii 2000 curiyey Ibrahim Hassan Gagale oo u dhashay Degmada Burco. Gabaygu waxa uu ku socdaa Beesha Reer Laascaanood, waxaanu ku saabsanyahay arrimo muddo dheer laga tababanayey Beeshaas. In kasta oo Beeshu Ummadda Somaliland la wadaagto: Taariikh, dal, dad, dan, dawladnimo, iyo dhaqan sokeeyaba, si gaar ahna Beelaha Burco iyo Ceerigaabo dega ula wadaagto degaan, derisnimo, iyo ehelnimo, ayaa haddana waxaa beeshaas laga tabanayaa gardarrooyin, dibindaabyo, iyo daawo-furyo ku siman 100 sano (1900-2000) salkana ku haysa qabyaalad. Gabaygan oo qeexaya arrimahaas oo dhan, waxa uu Beeshaas xusuusinayaa inaan marnaba Beelaha Somaliland nolosha ifka ku kala maarmayn, dantuna ku jirto in la is-fahmo, si wadajir ahna wax loo wada qabsado. Gabaygu waxa uu ugu dambaynta uga digayaa Beesha Reer Laascaanood nabsi-xumo ka imankarta ku xad-gudub joogto ah ee samo iyo wanaag loo hayo.
Gabayga: Deris Bari
Beelo derisa dad sokeeye, oo dano wadaagaaya
Oo tuhun ku kala deyranyo, dibin-salaamaya
Dar Ilaahay baa loo galaa, xaajadood darane
Taariikh haddii aan dersoo, eego dulucdeeda
Boqol sano dulmiga soo taxnaa, daaha uga qaado
Bari deriska naga xiga, muxuu damacsanye dooni
*******
Dal nimaad wadaagtaan taniyo, maalinta la duubi
Sooliyo nimaad wada degtaan, daafta iyo hawdka
Darka ceelka nimaydaan is-hurin, daaqna wada goosta
Xididnimo ninkaad dadab u xidhi, dhaqanku waa doore
Abtinimo ninkaad uga dambayn, diidi xumihiisa
Ee haddana dareen qaba, muxuu damacsanye dooni
*******
Wadaadki ninki daba dikriyey, dhaaxana u duulay
Boqor doonka Iimey ka yimid, daacad u adeegay
Ee durbaanka dhiillada ku tumay, deris ninkuu haystey
Damaacigu ninku aakhirkiis, darab u leenaayey
Hambadiisa aan daafacee, duunyana u loogay
Xusuustiisu daranaa, muxuu damacsanye dooni
*******
Siyaad maalintii laga didee, ee dadba hub qaatay
Dulmigu ku maamulay geyiga, dabargo`uu doonay
Islaamnimo ninkaan ila damqane, derisna aan xeerin
Ee qaybo igu soo dumee, daw kasta igaaday
Doc ka weerarkii igu dilee, dakharna ii geystey
Ugu deeqay nabad weyn, muxuu damacsanye dooni
*******
Xamar maalinti laysku dilay, magan la dooxaayey
Ninki Hodan Hawiye uu dawaray, duxayey dhiigiisu
Oo magaca deriskii ku baxay, ee dalka u dhoofay
Ee haddana dadkaa doortayee, daba gableynaaya
Xin Dhulbahante ila doonayaa, diirsataa Xamare
Anigaa dantiise, muxuu damacsanye dooni
*******
Israacii ninkaa ila degee, daadku ila qaaday
Gobonimo la duudsiyey ninkaan, wada dabayl raacnay
Oo dadiyo duunyiyo degaan, waayo nala deyrshay
Ee haddana markale dawladnimo, dooni inuu loogo
Oo halista aan uga digee, weli dantii moogan
Dawlad gaara ila lihi, muxuu damacsanye dooni
*******
Ina Yuusufkaa Bari degee, duufshay gobolkiisa
Dawladnimada sheegtee, dadkuba yaabay damiciisa
Ee dalkuu degaankiisu yahay, diidan taladiisa
Qaarba difaacoo u raran, doonyana u meera
Jundi baaska weligoodba diran, waad ku durugteene
Doolaal waa damac, muxuu damacsanye dooni
*******
Daarood markii uu qaxee, dirirtu ay duubtay
Ee Kismayo hal dariiq maree, daal la wada luuday
Dhoobley xeryaha loo dumee, duumo ku haleeshay
Adigoo darxumadii qabo, dakharku uu muuqdo
Gaarisa Ogaadeenka dega, kaa daldalay baade
Damqashada anaa roon, muxuu damacsanye dooni
*******
Haddaad tabeyso Daarood dal kale, wehelna aad dooni
Warsangeliba wey nala degaa, waana deriskaaye
Kala sooca daa oo midnimo, geli damiirkaaga
Qabyaaladi horay noo dishoo, diiftu nagu taalle
Magane dib yaan loogu noqon, dumiso weyaane
Danta guud haddaan rabo, muxuu damacsanye
*******
Dulmi uun nin taageerayoo, seegan danihiisa
Oo deris dhibkiisuun dawara, doona xumihiisa
Oo magaca Isaaq dacar ku yahay, oo dakano raadsha
Wacadkana daryeelkiisa gaba, Daa`imna u jeedo
Gardarrada in duul uu ku jabo, wada dareemaaya
Ee haddana dagaal hurin, muxuu damacsanye dooni
********
Shiikha gobolkii lagu duugayee, ducada loo aado
Sanaag bari nin dacalkeeda dega, doodda wada sheegta
Daandaansi door moodayo, damacu uu qaaday
Hawo baaska daran uu memelo, waan ka digayaaye
Dunidan intay uuman tahay, yuu durbaan tumane
Wada dega haddaan rabo, muxuu damacsanye dooni
*******
Dal barwaaqo khayraad badeed, dalagyo beereedka
Dekadaha u furan ganacsigiyo, duunyo laga dhoofsho
Macdan dihin shidaal noocyo badan, daafta wada jooga
Ninka dayrinaayee dal kale, doona lihidiisa
Dal nacaybka uu qabo qalbigu, waa ka didayaaye
Qawad daran hadduu qabo, muxuu damacsanye dooni
*******
Dunidan la soo koobayee, Maars lagu duulay
Dayaxyada samada loo diree, wararka duubaaya
Ee wadajir lagu doogsadee, lagu dakaynaayo
Daa`iro ninkaa ila rabee, dabinka ii qooli
Dibindaabi Somaliland, dawlad kale sheegtay
Midnimaa na doojine, muxuu damacsanye dooni
*******
Annagaba darbaa naga lumoo, doortay taanada`e
Dhuuni-raaca waa laga durkaa, daalim kuu colahe
Xaq ninki la dirira darxumo, waa dugsanayaaye
Duulkaa dalkoodi gubee, dawladnimo seegay
Ee shalay midnimadii dunshee, deyr ku kala gooyey
Ninka dabo ordaaya, muxuu damacsanye dooni
*******
Samihiis nimaan doonayaa, tayda duminaaya
Nabsi daahay waa soo socdaa, oo duleed imane
Goortu derbiga soo jabsado, waa dubbe Ilaahe
Dabaqabadku waa dane, haddii looga digo beesha
Derisnimo wanaagiyo, hadday dacadnimo keento
Ninka aan ku diirsani, muxuu damacsanye dooni
*******
Inkastoo dulmigu naaxo saman, sarar dulweyn yeesho
Nabsi dararay goortuu hirdiyo, dabarka uu goosto
Inuu degello naafaynayaan, daacad ugu sheegay
Mar haddaan ka digay oo nabsiga, daahir ugu sheegay
Oo duqiyo culimiyo waxgarad, wada dareensiiyey
Doorashada xumaan iyo samaan, Eebbow deriskaa leh
*******