Gabayga: Gef iyo Gadood

 

Nabad dhaba Dhulko lagu gam`oo, loona kala goosho

Naxariista Eebboo godlano, doogga lagu guuro

Gasiinkoo  raqiisiyo dharkaad, gadan midkaad doonto

Oo doorashada guud jirtoo, gole la soo doorto

Barre gudaya oo goob kastaba, goosan ku horgooyey

Gar-maqaate waatu qabsaday, goor habeen badhahe

Barlamaanki waatu gembiyey, oo dastuur gabaye

Guddiyada watu nagu xukumay, goostay taladiiye
Watu yidhi god dheeriyo qarbaan, idinka soo gaadhay
Dadweynuhu u guuxee waxbadan, ubax guddoonsiiyey

Shacabku godlanayee darxumo, muu gilgilaneyne

Kelitaliye gooduu ahaa, raadka gadanaayey

Siyaad  wacadki geesbuu ka maray, oo qabiil guraye

Aqoon iyo intii garad lahayd, gees ayuu daraye

Suldaaniyo garaadiyo ergada, waanshey garanwaaye

Gujee talada boqorada garnaqa, garawna siin waaye

Garma-qaate waa lagu yaqaan, talo gar-diidkaase
Garboweynta duulbaa ka ridey, uu tol guud bidaye

Bixisadu ninkay goobaysaa, daawo garanwaaye

Gacan-saydhka taladu ku diley, gebi bal aan sheego.

Garawsaa la dhahay dawladnimo, waw gudboonahaye

Gobollada u daa baa la dhahay, maamulka u gaara

Beelaha gudboon baa la dhahay, garab ha siin taada
Guubaabo daabaa la dhahay, faanka iyo giirka

Geeljiraha ka daabaa la dhahay, jago gef loo siiyo

Nimaan geyin ka daabaa la dhahay, darajo guudkiisa
Gunno maal hasiin baa la dhahay, gelin nimaan xoogsan

Go`e nolosha dhaaf baa la dhahay, yaanay gaagixine

Haw gefin awoodaa la dhahay, godobna yey keenin

Haw adeegsan gaasbaa la dhahay, beeshad garanweydo

Gawraca ka daabaa la dhahay, geesi kula dooda

Geyigaba ka daabaa la dhahay, guri colaadeedka

Qaxootigi geyiga soo galee, Geeska laga qayshey

Gobol gobol kuwii noogu yimi, maalin iyo guure 

Kuwii diiftu ay wada godee, gaajo kala goysey

Ee gorofka caydheed dunidu, galabba koox siisay

Magac guud kuwii loo hamraday, loo gurmaday dhaaxo

Gabbaadsaday dhulkii aan lahayn,  gogolna loo daadshey
Xuquuq gaar kuwaan nagu lahayn, gororna noo sheegan

Galootiga  kuwii nagu  ahaa, ee mudada gaaban

Oo golaha  qaar loogu daray, ee la garanwaayey

Guddoomiye kuwii laga dhigiyo, janano geesh haystey

Danjiriyo wasiir  gaadhayee, guri cad loo qaydey

Qaxootigi wadanigii gembiyey, ee dalkaba goostay

Garaad xume ka daabaa la yidhi, gurasho Daaroodka
Ma gayaa qaxootigu la yidhi, maamul uu galo`e

Ha gadine ka daabaa la yidhi, dawladnimo gaara

Gobanimada dhawrbaa la yidhi,waati loo go`aye. 

            ******************** 

Dawladnimadu waa guunyo iyo, gole wadaageede

Waa loo gudboonyahay dhibtiyo, gacanta dheefeede

Gacal looma siiyo qabiil, way ku gubataaye
Maamul xumo haddii laysku galo, gaawahaa qubane

Aayihii markuu madaw galee, xaalku halis gaadhay

Taladiina midho ay gabtee, waano gamashaysay

Garbay noqotay in markaas halgan, guuda lagu qaado

Oo SNM gaashaandhigiyo, gaasas la alooso

Qori caaradiis wuu gayee, gulufka  uu eedo

Guuraha habeenkii la gudo, gawre iyo geydhe

Gudguduudka waaberi la galo, cadaw gariiraaya

Gaadmada uu geesigu ku liqo, gaasas iyo guuto

Dulmigii ku gaammuray Isaaq, ciilki lagu gaaxshay

Gebogebo dalkii laga geshiyo, maato lagu goobtay
Gadoodku ka dhigay tacadigii, nacabki uu gooyey

Guulbaa Ilaah nagu galladay, oo na sii garabe

Geeshkii markii uu jabee, qaybo laga gooyey

Oo taliski gondihii u dhacay, oo rafaday gawrac
Sanku neeflihi wixii Geeska yiil, nagu gel Daaroode

Galaayuus qaxootigi hubee, uuman kala gaara

Guhaadaw magaaliyo miyiba, dhiillo wada gaadhay

Goodiyada Hargeysiyo Burciyo, Gebiley guudkeeda

Galladweyn Berbera waa naftee, gebi duleedkeeda

Ceerigaabo dhinacaa Gar`adag, gacalladii Shiikha

Arabsiyo gudaha Caynabiyo, goobta Balli-dhiiga

Gubadkaa Waraabeeye iyo, gegida Oodweyne

Dhagax-dheer gedaankeeda iyo, guri sama Ooga

Lug-hayada galbeedkaas jirtiyo, Saylac garabkeeda 

Garbo siman hub qaar loogu xidhay, qaarna lagu goobtay
Ama raxan  gantaalaha riddaa, guudka kaga tuurtay

Daaraha gawaan lala simee, ee madfacu goostay

Gumaadkii carruurtiyo ku dhacay, hooyo garab joogtey

Gawrac wadara inta goor gudcura , xawda laga gooyey

Xabaalweyn dadkii lagu guree, ee la garanwaayey
Kontankii Gassiriyo la dhigay, Koonfur gudaheeda

Hablihii gayaankooda sugi, guun hawada maagay

Guunyo maal wixii layska dhacay, dahab guduudleyda

Xoolaha garnayl lala dhiciyo, gumuca  baaruudda

Gurgurshaaga miinadu la kici, geeddi-gibilweynta

Berkadaha gingimane garaac, hoobiyuhu goostay

Qaran guuna annagoo ahoo, Geeska abid joogney

Dhulka duulki hawadood gashaday, goostay lihidiisa

Garaadkoodu badh ku gawrac yidhi, badhna gawaan-raaci

Ee gobolba  reer  siiyayee, beenti lagu guurey

Maxastii geyiga barakacdee, gaajo la hulleeshay

Ee derisku guuraha gasiin, nabad geshee siiyey

Giddigood waxmay galabsaniyo, godob la eedaye

Abtirsiimo baa lagu galoo, loo gardaadsadaye 

Taangiyada gurguurtiyo ma dumay, gaasas daba jooga

Madaafiicda goobtana duqayn, cadaw ma sii gaabshey
Guutoweyn gantaalaha riddaa, siigo gamid tuurtay

Geerida dhul waa loo huraa, galaw miyuu qayshey

Miig wixii gorfaha laga dhigee, suugu kala gooyey

Wixii taangi suuqyada la gubay, ama hub gaashaaman

Gaadhiyada  wixii  laga  gediyey, ee gurmad u roori

Meydkoodu wuxuu geylanaa , goob kasta Waqooyi
Nabsigay galeen baa gondaha, gaadhayo dilaye

Duul haduu kibroo oo geyiga, ganafka uu taago
Diintiyo hadday gees-maraan, Guulle sidu sheegay 

Dhab ayaa  dagaal loo galaa, diriri waa guule

Qaranbaa qabiil uga gedmee, gaag ma laga reebay

Jananadu gadaal maw gurteen, goloslehee dhuuntay

Korneeladu gudaha maw galeen, guri sariir taalla
Ma hulleeshay giddi dooxatadii, oo habeen guda`e 

             ********************

Weligeedba Somali godob, iyo colaad guuna 

Gawraca dhegaha lalasimiyo, guluf la kala  qaado

Rag-wareematada gabbal-dhiciyo, waaga hore gaada

Dhiilladu geyiga weyjirtiyo, gam`a la diidaaye

Guhaadawse dhaqanbuu lahaa, tanuse waa gaare

Gawrac-jamaca lama geysanjirin, ama gumaad hoose

Da` gabowdey looma qoosanjirin, xawda  gelin  joogi

Gurboodkiyo gambooley ma jirin, cadaw gabraartaaye

Garyaqaanka lama dooxijirin, kala guraha beesha

Muxsanaadka guudkood ma jirin, gocor sadheeyaaye

Haween dahabka lama goosanjirin, waa gunnimo weyne
Godka iilka iyo aakhira, loo gayoon jiraye

Kufrinimo dadbaa  galabsadiyo, gubasho naareede

Dawladnimo dadaan gaar u helin, eed  ku gale weyne

Geb hadduu ayaxu meel ku dhaho, geeduhu tiriye

Geyigaba fasaadki ka dhacay, khayrki miyuu guuray

Daarood  hoggaankiis la gubay, oo la kala guurye

Islaamnimada ay gudub-mareen, uunku garanwaaye

Reer Ayka miisaan gurracan, yaa gediyay gore

Dulmigu garaad-xumi u galay, magan Galbeed siiye

Sayidkii arlada soo galee, gabanadii dooxay

Waatuu Isaaq gaal ku ladhay, oo gef weyn galaye
Gumaadkiyo burburin kaa galiyo, kii cafiga goostay

Gaalnimada keebaa u dhaw, gari hadday joogto 

            ********************

Hawiyaba dagaal waa galee, waase talo-guuray

Markuu guushi Xamar taabayee, Guulle garabsiiyey

Dawladnimo halkuu garan lahaa, muran gadaashiiye

Magantay guryaha kala baxeen, gawrac ugu jiidye

Taallada dal kale loo gudshee, ganacsi loo dhoofshay

Kambayuutarada gudin afweyn, gawda laga saaray

Tuubada guryaha laga fagtee, geesta laga diirtay

Gidaarada dalooliyo wadada, googo`dee  madhatay

Gumaadkii dhexdoodiyo ka dhacay, garab-dhigii gaadhay 

Mooryaanta guryihii degtee, aad gelgelin moodo

Ee  ganafka ruuxii  lahaa, lagu gujeynaayo

Go`e samaha kama talinayoo, gooye nabadiiye

Bini-aadamku guri madaw, gooni ku afduubay

Xoolaha  sidoodi u gaday, gini intuu siistay

Diinti xad-gudubkuu ka galay, ama gefkuu geystay

Cadho Eebbe yaa laga gurtaa, goor kastaba naare  

Hubka  weli ka guuxaaaya Xamar, ama gariiraaya

Dekaddaa gu`yaal badan xanniban, ama garoonkeeda

Maataday u diideen gargaar, gaajo  lediweyda

Gurmadkay horjoogaan dunidu, garan la` xaalkooda

Wiirsiga kamay gubanayaan, Reer Galbeed xulaye

Xarragada dagaal waw gefeen, waana gudhiyeene

Waa kaa ujeedadi gabee, gudaya hayhaade

Goor muu garaad yeelanoo, garan wuxuu dooni  

                    DHAMMAAD