tuu kisii aur kii jaagiir hai ai jaan-e-Gazal 
log tuufaan uThaa de.nge mere saath na chal 

pahalehaq thaa terii chaahat ke chaman par meraa 
pahale haq thaa terii Khushbuu-e-badan par meraa 
ab meraa pyaar tere pyaar kaa haq_daar nahii.n 
mai.n tere gesuu-o-ruKhsaar kaa haq_daar nahii.n 
ab kisii aur ke shaano.n pe hai teraa aa.Nchal 

mai.n tere pyaar se ghar apanaa basaa_uu.N kaise 
mai.n terii maa.Ng sitaaro.n se sajaa_uu.N kaise 
merii qismat me.n nahii.n pyaar kii Khushbuu shaayad 
mere haatho.n kii lakiiro.n me.n nahii.n tuu shaayad 
apanii taqdiir banaa meraa muqaddar na badal 

mujh se kahatii hai.n ye Khaamosh nigaahe.n terii 
merii paravaaz se uu.Nchii hai.n panaahe.n terii 
aur Gairat-e-ehasaas pe sharmindaa huu.N 
ab kisii aur kii baaho.n me.n hai.n baahe.n terii 
ab kahaa.N meraa Thikaanaa hai kahaa.N teraa mahal
		 

 
Aisa pehli baar hua hai satrah atharah salo mein
Un-dekha anjanna koi aane laga hai khayalon mein

Aankhon ki khidki per ek sayaa sa lehraata hai
Dil ke derwaze per koi dastak de ke jata hai

Gherri gherri kaali aankhen, mujse mujko puchhatti hai
Hathoan ki rekhaao.n mein ek chehra sa ban jatta hai

Uske hathoan ki khushboo hai ab tak mere ballo mein
Aisa pehli baar hua hai satrah atharah salo mein

		 

 
jaate jaate vo mujhe achchhii nishaanii de gayaa 
umr bhar doharaauu.Ngaa aisii kahanii de gayaa 

us se mai.n kuchh paa sakuu.N aisii kahaa.N ummiid thii 
Gam bhii vo shaayad baraa-e-meharabaanii de gayaa 

sab havaa_e.n le gayaa mere sama.ndar kii ko_ii 
aur mujh ko ek kastii baadabaanii de gayaa 

Khair mai.n pyaasaa rahaa par us ne itanaa to kiyaa 
merii palako.n kii kataaro.n ko vo paanii de gayaa 
		 

 
lagataa nahii.n hai jii meraa uja.De dayaar me.n 
kisakii banii hai aalam-e-naa_paayedaar me.n 

kah do in hasarato.n se kahii.n aur jaa base.n 
itanii jagah kahaa.N hai dil-e-daaGadaar me.n 

umr-e-daraaz maa.Ng kar laaye the chaar din 
do arazuu me.n kaT gae do intazaar me.n 

kitanaa hai badanasiib 'Zafar' dafn ke liye 
do gaz zamiin bhii na milii kuu-e-yaar me.n 


		 

 
na kisii kii aa.Nkh kaa nuur huu.N, na kisii ke dil kaa qaraar huu.N 
jo kisii ke kaam na aa sake mai.n vo ek musht-e-Gubaar huu.N 

na to mai.n kisii kaa habiib huu.N, na to mai.n kisii kaa raqiib huu.N 
jo biga.D gayaa vo nasiib huu.N, jo uja.D gayaa vo dayaar huu.N 

meraa ra.ng-ruup biga.D gayaa, meraa yaar mujhase bichha.D gayaa 
jo chaman fizaa.N me.n uja.D gayaa, mai.n usii kii fasl-e-bahaar huu.N 

pae faatehaa koii aaye kyuu.N, koii chaar phuul cha.Daaye kyuu.N 
koii aake shammaa jalaaye kyuu.N mai.n vo bekasii kaa mazaar huu.N 

mai.n nahii.n huu.N jaa.N-fizaa.N mujhe sunake koii karegaa kyaa 
mai.n ba.De barog kii huu.N sadaa main ba.De dukh kii pukaar huu.N 

		 

 
apane har har lafz kaa Khud aa_iinaa ho jaa_uu.Ngaa 
us ko chhoTaa kah ke mai.n kaise ba.Daa ho jaa_uu.Ngaa 

tum giraane me.n lage the tum ne sochaa hii nahii.n 
mai.n giraa to masalaa ban kar kha.Da ho jaa_uu.Ngaa 

mujh ko chalane do akelaa hai abhii meraa safar 
raastaa rokaa gayaa to qaafilaa ho jaa_uu.Ngaa 

saarii duniyaa kii nazar me.n hai meraa ahad-e-vafaa 
ek tere kahane se kyaa mai.n bevafaa ho jaa_uu.Ngaa 

		 

 
usuulo.n pe jahaa.N aa.Nch aaye Thakaraanaa zaruurii hai
jo zindaa ho.n to phir zindaa nazar aanaa zaruurii hai

na_ii umro.n kii Khud_muKhtaariyo.n ko kaun samajhaaye
kahaa.N se bach ke chalanaa hai kahaa.N jaanaa zaruurii hai

saliiqaa hii nahii.n shaayad use mahasuus karane kaa
jo kahataa hai Khudaa hai to nazar aanaa zaruurii hai

mere ho.nTho.n pe apanii pyaas rakh do aur phir socho
ki is ke baad bhii duniyaa me.n kuchh paanaa zaruurii hai
		 

 
zaraa saa qataraa kahii.n aaj agar ubharataa hai
samandaro.n hii ke lahaje me.n baat karataa hai

Khulii chhato.n ke diye kab ke bujh gaye hote
ko_ii to hai jo havaao.n ke par katarataa hai

sharaafato.n kii yahaa.N ko_ii ahamiyat hii nahii.n
kisii kaa kuchh na bigaa.Do to kaun Darataa hai

zamii.n kii kaisii viqaalat ho phir nahii.n chalatii
jab aasmaan se ko_ii faisalaa utarataa hai

tum aa gaye ho to phir kuchh chaa.Ndanii sii baate.n ho.n
zamii.n pe chaa.Nd kahaa.N roz roz utarataa hai
		 

 
dayaar-e-Gair me.n kaise tujhe sadaa dete 
tuu mil bhii jaataa to tujhe ga.Nvaa dete 

[dayaar-e-Gair=alien/unknown place; ga.Nvaa denaa=to lose] 

hame.n ye zom rahaa ab ke vo pukaare.nge 
u.nhe.n ye zid thii ke har baar ham sadaa dete 
[zom=illusion] 

vo teraa Gam thaa ke taasiir mere lahaje kii 
ke jis ko haal sunaate use rulaa dete 
[taasiir=effect; lahajaa=style] 

tumhe.n bhulaanaa hii avval to dastaaras me.n nahii.n 
jo iKhtiyaar bhii hotaa to kyaa bhulaa dete 
[avval=firstly; dastaaras=within reach; iKhtiyaar=control] 

tumhaarii yaad ne ko_ii javaab hii na diyaa 
mere Khayaal ke aa.Nsuu rahe sadaa dete 

sama'to.n ko mai.n taa-umr kosataa "Syed" 
vo kuchh na kahate magar ho.nTh to hilaa dete 
[sama'to.n=hearing power; taa-umr=life long; kosanaa=blame] 
		 

 
is kaa gilaa nahii.n ki duaa be-asar ga_ii
ik aah kii thii vo bhii kahii.n jaa ke mar ga_ii 
[gilaa=complaint] 

ai ham-nafas na puuchh javaanii kaa maajaraa
mauj-e-nasiim thii, idhar aa_ii, udhar ga_ii 
[ham-nafas=friend]
[mauj=wave; nasiim=a gentle breeze] 

daam-e-Gam-e-hayaat me.n ulajhaa ga_ii umiid
ham ye samajh rahe the ki ehasaan kar ga_ii 
[daam=net; hayaat=life] 

bas itanaa hosh thaa mujhe roz-e-vidaa-e-dost
viiraanaa thaa nazar me.n jahaa.N tak nazar ga_ii 

har mauj aab-e-si.ndh hu_ii vaqf-e-pech-o-taab
"Mehroom" jab vatan me.n hamaarii Khabar ga_ii 
[aab-e-si.ndh=waters of the river Sindh (Indus)]
[vaqf-e-pech-o-taab=extremely angry] 

		 

 
ranjish hi sahi dil hi dukhaane ke liye aa 
aa fir se muJhe choD ke jaane ke liye aa 

pehle se maraasim na sahee fir bhi kabhi to 
rasmo rahe duniya hi nibhaane ke liye aa 

kis kis ko bataayenge judaai ka sabab hum 
tu muJh se khafa hai to zamaane ke liye aa 

ab tak dil-e-khush seham ko tujh se hain ummeedeN 
ye aakhri shamme bhi buJhaane ke liye aa 

		 

 
hamaare un ke maraasam kii baat mat puuchho 
ye silasilaa to kahii.n duur jaa.N se milataa hai 

hai apane muqaddar kii baat kyaa kahiye 
hamaare zaKhm ko maraham kahaa.N se milataa hai 

hamaare pyaar ke qisse galii galii bikhare 
ye maratabaa ba.De suud-o-ziyaa.N se milataa hai 

sitaro.n jaisii ye aa.nkhe.n ye chaa.Nd sa cheharaa 
tumhaaraa silasilaa kuchh aasamaa.N se milataa hai 

hamaaraa zikr kitabo.n me.n Dhuu.NDhane vaalo 
hamaaraa zikr to sare jahaa.N se milataa hai 
		 

 
maiN tujhe bhool gayee, ye bhi nahiN hai, lekin 
maiin tujhe yaad bhi har waqt nahiN kar sakti 

zindagi kitni humaH-geer hai, kitni purshor [ humaH-geer= extensive] 
sirf ashkoN hi se daaman to nahiN bhar sakti 
kaise fitrat ke takaazoN se kinara kar looN [ fitrat= nature] 
kis tarah talkHi-e-zehraab gawaara kar looN [ talkHi-e-zehraab= bitter poison] 
zindagi kitni humaH-geer hai, kitni purshoor 

maiN mohabbat ke takaze bhi samajhtiN hooN magar [ takaaze= demands] 
maiN haqiqat ke ishaare bhi to pehchaantiN hooN 
maiN teri yaad meiN kHud apne se gHaafil ho jaaoN 
masiwa apne kisi aur ko bhi janti hoon [ masiwa= except] 
zindagi sirf tarana hi tarana to nahiN 
kuchh haqiqat bhi hai ye mahaz fasana to nahiN 
maiN haqiqat ke ishaare bhi to pahchaanti hooN 

sher-o-nagHma meiN guzarti hui rangiN raateN 
kaun hoga jinheN nagHmaat ka ehsas nahiN 
talkHi-e-gHum bhi to ik Thos haqiqat hai magar 
kaun hai jisko haqiqat ka zara paas nahin 
yeH dhaRhkte hue dil aur yeH khanakte hue saaz 
yeH mahakte hue nagHmaat, yeH bajti aawaz 
kaun hoga jise nagHmaat ka ehsaas nahiN 
zindagi kitni humaH-geer hai, kitni purshor 
aur iss shor meiN nagHmoN ki haqiqat kitni 
maiN tujhe yaad kiye jaaooN yeH mumkin hai magar 
iss humaH-geeri mein ik yaad ki fursat kitni 
kitne dil-chasp haiN, ulfat ke taraane lekin 
kitne rangiN hai ye saada-se fasaane lekin 
iss humaH-geeri meiN in sab ki haqiqat kitni? 

		 

 
tere bheege badan ki khooshboo se lehre bhi huyee mastaani si
 teri zulf ko chookar aaj huyee khaamosh hawa diwaani si 

ye roop ka kundan dehka hua ye zism ka chandan mehka hua 
ilzaam na dena fir muJhko ho jaaye agar naadani si 

bikhra hua kaajal aankhoN meiN toofaan ki halchal saansoN meiN 
ye narM laboN ki khamoshi palko meiN chupi hairaani si 

		 

 
Apni aankho kay samundar mein utar jaanay dey,
Tera mujrim hoon mujhay doob kay mar jaanay dey !

Ay nayey dost main samjunga tujhay bhi apna,
Pehlay maazi ka koi zakhm to bhar jaanay dey !

Aag duniya ki lagayee hui bhuj jayeygee,
Koi aansoo meray daaman pay bhikhar jaanay dey !

Zakhm kitnay teri chahat say miley hain mujko,
Saunchta hoon ki kahoon tujhsay magar jaanay dey !

Apni aankho kay samundar mein utar jaanay dey,
Tera mujrim hoon mujhay doob kay mar jaanay dey !

		 

 
dhuan banake fiza mein uda diya mujhko
main jal raha tha kisi ne bujha diya mujhko

khada hoon aaj bhi roti ke chaar hurf liye
sawal yeh hai kitabon ne kya diya mujhko

safaid sung ki chadar lapait kar mujh par
faseel-e-shaher pe kis ne saja diya mujhko

main ek zurra bulundi ko chhoone nikla tha
hawa ne thum ke zameen par gira diya mujhko

		 

 

Mere khat ko chum lena lipataana pyar karnaa
Mai kabhi dagha na dunga mera aitabaar karnaa

Yeh khatt nahi sadaa ye diley dardmand hai
Ek bevatan ki yaad lifaafey me band hai

wo kya karegaa lekey do aalam ki rahamatey 
Jisko tumhari yaad me ronaa pasand hai 

Lekin Mere khat ko chum lena lipataana pyar karnaa
Ek roj hum milengey mera intzaar karnaa.

 

koi aarjoo nahi hai, koi mudda'a nahi hai
tera gham rahe salamat, mere dil mein kya nahi hhai

ye udaas udaas chehre, ye hansi hansi tabassum
tere anjuman mein sayad koi aaina nahi hahi

tu bachaye laakh daman, mera phir bhi ye hai dawa
tere dil mein main hi main huN, koi doosra nahi hai