FUSHE-KOSOVE, 17 janar - Pas katër vitesh, familjes Gashi nga Gjakova iu kthye vogëlushi i tyre Lulzimi 11-vjeçar, të cilin forcat serbe e kishin marrë në Gjakovë dhe mandej nëpërmjet Mitrovicës e kanë dërguar në Vranjë të Serbisë. Nëna e Lulzimit, Merita thotë për RTV21 se që prej katër vjetësh nuk ka ditur asgjë për djalin e tij, ndërsa kohë më parë Kryqi i Kuq Ndërkombëtar njoftoi këtë familje se Lulzimi gjendet në një kamp të fëmijëve në Vranjë.
Lulzim Gashi në moshën 8-vjeçare është rrëmbyer nga forcat serbe në Gjakovë e më pastaj është transferuar në Mitrovicë, prej nga forcat serbe së bashku me shumë shqiptarë të tjerë me autobus i kanë dërguar në Vranjë. Bashkë me Lulzimin është rrëmbyer edhe Edon Gjini nga Gjakova, i cili sipas fjalëve të Lulit, ende gjendet në kampin e fëmijëve në Vranjë.

                                       Lulzim Gashi me nënën e tij, Meritën 

                                             Sot në ditën e parë të shkollës 

Lulzimi tashmë thuajse e ka harruar gjuhën shqipe dhe tregon urrejtjen dhe kushtet e vështira të jetesës në Vranjë. “Në kamp ishim vetëm dy fëmijë shqiptarë unë dhe Edoni. Nuk kishim veshmbathje dhe shpesh nuk na jepnin as bukë. Na urrenin të gjithë, edhe mësuesit. Familja ime nuk dinte asgjë për mua. Unë shpesh qaja për nënën time, e cila që prej katër vjetësh nuk ka ditur se ku gjendem. Jam shumë i kënaqur që sot jam me familjen time që e dua shumë”, thotë Lulzimi dhe fjalët i përzihen sakaq me lotët.
Nëna e tij Merita, edhe ajo me lot në sy, përcjell fjalët në gjuhën serbe të djalit të saj Lulzimit. Por është krenare që sot ai gjendet afër saj. Ajo nuk ka fuqi të flasë ngaqë malli për të birin ia ka ngulfatur kraharorin, nga i cili tashmë i dalin vetëm lotë gëzimi.
Familja e Merita Gashit tashmë jeton në Fushë Kosovë. Ky është trajtuar si një rast social dhe komuna ka një përkujdesje ndaj saj. Lulzimi sot për herë të pare filloi edhe mësimin në gjuhën shqipe. Në Vranjë notat i kishte të dobëta në gjuhën serbishte dhe histori. Por në shkollën fillore “Selman Riza”, Luli u prit shumë mirë dhe ka një përkrahje nga të gjithë.
Drejtori i kësaj shkolle Sahit Dragusha, por edhe zyrtarët e Komunës së Fushë Kosovës thonë se do ta kenë në konsideratë familjen Gashi, e cila përkohësisht është e vendosur në këtë lokalitet. Lulzimi, prej sot është vendosur në shkollën ku flitet shqip dhe mundohet që të adaptohet sa më shpejt me shokët dhe shoqet të cilët e pritën shumë mirë.
Lulzimi pas katër vitesh u kthye në Kosovë e bashkë me të edhe jeta fëminore me moshatarët e tij shqiptarë. Por ai shprehet se e brengos fakti që Edon Gjini, tani 17-vjeçar, nga Gjakova, ende gjendet në kampin e fëmijëve në Vranjë. Nga ana tjetër, nëna e Lulzimit thotë se ka informacione që familja e Edon Gjinit është zhdukur gjatë luftës në Kosovë.
I kthyer pas 4 vitesh, Lulzimi 11-vjeçar vazhdon rrëfimin e tij: Më nxorën të këndoj para Koshtunicës
PRISHTINE, 18 janar 2003 - Materiali i transmetuar mbrëmë në Radio-Televizionin 21 për kthimin në Kosovë të 11-vjeçarit Lulzim Gashi nga Gjakova, i cili për katër vjet qëndroi në një kamp fëmijësh në Vranjë të Serbisë, shtoi shpresat e familjarëve që kanë të humbur më të dashurit e tyre se ata mund të jenë të gjallë. Familjen e Lulzimit sot e vizituan shumë ekipe televizive ndërmkombëtare, por edhe persona të familjeve të zhdukura dhe shoqata që me merren me hulumtimin e personave të humbur. Ekipi i RTV21 sërish u gjend në këtë familje.
Sot Lulzimi ishte më në qejf. Megjithatë ai vazhdon të tregojë kalvarin e vuajtjeve të tij. “Policia, nga Gjakova me autobus, në vitin 1999, na orientoi në drejtim të Mitrovicës e më pastaj, vazhduam rrugën për Vranjë. Para nesh, për Vranjë, shkuan edhe disa autobus të tjerë me shqiptarë”, rrëfen Lulzimi. Ai bën të njohur edhe disa emra të rinj që gjenden diku në Serbi. Lulzimi brengoset për Edonin apo si thotë ai atje e quanin Edonis, i cili ka mbetur atje dhe pas moshës 18-vjeçare mund ta dërgojnë në shërbim ushtarak siç ka ndodhur me disa shqiptarë tjerë.
Lulzimi tregon edhe një fakt tjetër mjaft intrigues, por që dëshmon më së miri punën e autoriteteve serbe për ta serbëzuar, apo “integruar” djaloshin jetën serbe. “Drejtuesit e kampit të fëmijëve në Vranjë më kanë dërguar edhe në Kishë dhe në një rast edhe te kryetari i Jugosllavisë Vojisllav Koshtunica meqë thoshin se unë këndoja mire. Por atje nuk më prezenatuan me emrin tim të vërtetë”, thotë Lulzimi.
Nëna e Lulzimit, Merita është krenare që djali i saj është kthyer në Kosovë, por brengoset për të tjerët që kanë mbetur atje. Sipas informacioneve nga Komisioni për Hetimin e Krimeve të Luftës në Kosovë, autoritetet serbe nga spitalet e Kosovës kanë marrë 1200 foshnje si dhe 467 fëmijë prej moshës 4-17 vjeçare, të cilët i kanë dërguar në Serbi. Tashmë këta fëmijë trajtohen si të zhdukur.