往事已矣　過去就讓它過去吧
從今開始　一切俱往矣　一切都變成歷史

　　今朝去左城大China Business o既interview，呢一科都唔錯架，可以學夠３年普通話呢，而且有好多practice o既經驗，我諗讀完應該真係會幾有用∼不過由於成個系都只係得１５個位，所以in完之後我已經打算放佢係第２５個choice……今日in得好失敗呢，竟然醒唔起邊個係中國軍委主席…呀呀呀∼明明識架我，不過我竟然答左「呢方面我唔係好清楚」喎！哎呀，好白痴呀我∼>_<llll 而且因為太耐無講過英文喇，個老師一用英文問我我就明顯地講野慢左好多，而且grammar錯漏百出，真係自暴其短呢！唉∼我ｄ英文真係退步左好多呀！呀呀呀∼∼T^T 一定要努力惡補番呢！

　　in完之後就去左搵大朋友仔，睇左一套叫【愛你有＄途】o既VCD，睇完就去左☆★茶餐廳食晚飯。今晚又食到☆★茶餐廳美味o既魚香茄子煲 + 蒸烏頭，仲要汽水任裝添∼呵呵，真係好滿足啊∼^^

我的手緊緊的牽著你的手
你的手緊緊的牽著我的手
就這樣　我們朝著未來出發

　　琴晚晚上我又採用左２年前放榜o個招：傾通宵電話！只要你係放榜前２晚搞到自己個人好支力無晒精神，咁放榜之前一晚自然就會有覺好訓啦∼呢一招真係好好用呢！^^ 最後我就同大朋友仔傾到今日凌晨差唔多６點先收線（比起會考都算短喇，o個時傾到８點架！）……哈哈，今晚一定會超支力呢！我有信心今晚我好早就會眼訓，唔會眼光光到天光∼結果今日我傾完我都訓左６個鐘先起身，因為實在太支力喇∼放榜前夕o既呢１日正值亦都係嘉諾撒聖方濟各書院一年一度o既畢業典禮，所以今日起身食完野再同大朋友仔icq左一陣之後就去左朋友仔屋企比野佢+拎野。完事之後就出門口返學，本來仲打算早半個鍾返學添，點知一ｄ都無早到，仲要返學途中一個同學都見唔到，搞到我以為畢業典禮改左地點……返到學校點完名即係去award winner間房點名，今年因為只係會頒獎比中５同中７o既同學，所以整個典禮只係短短o既個幾鐘就收得工∼今年我有份羅subject prize，而禮物一如以往亦係《道在家中》一大本 + 類似《羅馬鐘聲》o既DVD一大隻 + 念珠電話繩一大條！噢，呢３樣野我屋企已經有喇，《道在家中》好似有仲唔止一本添…收到呢份禮物真係令人好『高興』呢……今晚媽咪黎左睇我畢業，畢業典禮完左之後就同佢一齊返屋企。哈哈，今晚返到屋企果真十分疲倦呢，同大朋友仔傾到１點已經可以收線訓覺lu，仲完全無失眠添，哈哈∼呢個方法果然極之有效！

　　估唔到有人竟然會咁感性，icq時竟然會……哈哈，放心啦，我唔會話比人架∼不過…真係好受寵若驚呢！:p

突如來之的不安輕輕的包圍著我
請你不要輕易的再鬆手　好麼？

　　今朝６點就要起身，不過可以一覺訓到天光真好！６點半同朋友仔一齊坐車返學，神奇地，沿途我地２個都唔多緊張，而我就只係不停咁掛住問朋友仔借大學ｄ入學分數黎抄抄抄（因為琴晚懶，無做準備功夫∼^^"）！７點到左Ｍ記，繼續抄抄抄完之後就返左學，都未到８點左右就已經有得派証書lu……呢個時候就真係驚呢，因為實在太太太刺激喇！跟學號去羅証書，羅到手一眼望落去第一科就係睇中文……Yeah，好彩中文真係Ａ到喳！唔係真係無面見王老師！！其他科就麻麻地，其實３科ＡＬ我都預左係咁上下架喇，因為呢３科同U.E. o既成績真係exactly同我會考個grade差２名呢！U.E.直情連sub-grade 都係exactly會考o個個跌２級…哈哈，其他野又唔見咁準呢∼其實呢個成績我都有少少擔心，因為３科ＡＬ都麻麻地，唔知夠唔夠分入HKU BSW！上次聽talk個professor話ＣＤＤ都好「mon」呢！><" 唉∼不過無辦法，呢個分數我都接受得到o既，因為真係我應得嘛……^^" 帶住考得麻麻o既心情，同大朋友仔去左ＱＭ睇朋友仔之後就去左☆★茶餐廳食早餐，之後就周圍去行+睇【貼身情人】VCD。不過因為有ｄ干擾，所以睇o既時候一ｄ都唔留心……>:p 睇完之後就順手睇埋album隻碟，o岩o岩睇到王老師MA上台講speech時電話就響…呀∼好邪呀！竟然係王老師打黎呢∼佢問我改choice改成點，於是我就send左我o個２５個choice比佢過一過目。後黎食完晚餐坐車時王老師再打黎，聽完佢講之後真係即刻輕鬆晒∼希望ｄ大學真係會比我想像中易入啦……返到屋企問左一個而家係HKU BSW讀緊書o既icq friend，佢話我99%可以入到BSW，仲話唔得就請我食100餐飯…哈哈∼另一個都係HKU BSWo既icq friend都話我呢個成績好大機會入到，希望真係可以承佢地貴言啦∼！出乎意料爸爸都好贊成我讀呢一科，所以我第一志願都應該係港大社工架喇，至於之後放中大BBA定科大BBA先就未定……中大就難入ｄ囉，不過我計過自己而家夠分入，王老師都話應該無問題，有咁出名o既系無理由唔揀架！不過我個人（同大朋友仔）就比較喜歡科大多於中大，而且科大BBA易入過中大BBA，做second choice好似好ｄ，因為無咁博…唔，到左呢一刻我都未諗好呢∼不過都係聽日先算啦∼而家個人定左好多，不過８月６日又要再驚過呢，我．唔．想．呀！>_<llll

　　終於都放左榜，今次真係要多謝好多人呢∼譬如互相支持幫助o既一班好朋友好同學仔啦，大家終於都捱過左呢個咁辛苦o既ＡＬ啦，好開心呢！仲要多謝令我放榜前一晚可以有覺好訓o既大朋友仔，多謝你陪左我咁耐∼次次放榜都有你陪，好感動呢！:) 當然仲有幫我羅到唯一一科Ａ同主動搵我同我傾choice o既王老師啦，多謝你咁主動黎關心我呢！終於比我羅到５條Ａ啦，真係非．常．振．興呀！仲要多謝經常為我擔心代我緊張o既父母啦，我真係好希望可以入到港大呢∼！ＡＬ雖然就辛苦左ｄ，不過有你地o既愛，我真係好幸福呢∼（有點兒老土添…:p）

　　前幾晚都好夜先返到屋企，因為個人太懶+個身體太支力，所以連續幾日無打日記∼今晚一次過打番晒咁多日o既日記（足足打左三千幾字），好疲倦呀∼∼！><"

那是專屬於我們的密碼
來讓我牽著你的手　告訴你 我有多喜歡你

　　今朝都算好早就起左身，不過真係好嬲呢！>:o 朝早媽咪打左電話比加拿大o既呀姨…其實我細個都好鍾意呢個呀姨架，因為佢好錫我同妹妹。媽咪同佢傾我揀choice ｄ野，之後仲比左佢同我講。點知佢竟然好似想persuade我唔好入社工…你個人意願唔想我入都算喇，唔該唔好對住我講呢ｄ說話丫…咩叫「讀呢科好辛苦，你以為好似好易其實唔係」呀？你想我悠悠閒閒咁hair３年呃個degree走人咩？係呀，如果想唔辛苦都得架，反正畢唔到業o既chance又咁細，真係可以好輕鬆架…如果你想的話！況且我從來都無諗過呢科會好易讀，不過我有興趣，所以我相信我自己會讀得好開心，辛苦ｄ都唔怕！咩叫做「第時成日都要見ｄ有問題o既人，佢地有ｄ又有精神病，又ｄ係有問題少年，又有囚犯，好辛苦」呀？哼，你就有精神病！而家咁o既時勢我真係諗唔到做咩工會唔辛苦喎！你呢ｄ咁o既人梗係唔會肯去做呢ｄ工啦，因為你唔願意去接觸呢ｄ人丫嘛！而家我有ｄ咁o既志願，又係我自己鍾意，點願你要用呢ｄ說話呢阻止我呢？仲要間接踩埋呢一行添！我話我聽完ｄ talk去完workshop仲interview埋之後覺得自己想係呢方面發展，估唔到你竟然會話「咁又係o既，有ｄ人諗野係會理想ｄo既」，聽到呢度我火都黎埋，即係比番電話媽咪……超，你離開左香港都十年啦，香港ｄ野你知幾多呀？你問我點解唔讀中文系之後去教書…大佬，你知唔知中大中文系我唔夠資格讀架？而且香港大學係要成個文學院咁報，佢唔會double count我language科架！憑我呢個成績點入呀？而且呢，呢科對我呢ｄ讀左４年理科o既人黎講會好辛苦囉…好辛苦呀，你唔係好怕我讀得辛苦架咩？？之後你竟然仲同媽咪講點解我當初唔讀文科…哈，呢ｄ野有得早知架咩？而且我當時文科根本就唔係特別好，比我讀文科都唔見得會好幾多啦！又或者如果當初你唔鼓勵我入St. Francis'讀書仲好呢？…哼，呢ｄ野有得講「早知」架咩？你知道社工做咩架？你以為香港今時今日仲有大把老師空缺任你去教呀？你以為讀左BBA就一定有工咩？你以為我仲細，比人講兩講就會呃左去咩？條路係我自己o既，我想讀呢科唔係我諗野太過理想化，起碼我肯為自己理想踏出一步丫，我覺得自己值得驕傲喎！麻煩你地唔好再用ｄ不屑/疑惑/憂慮/自以為是o既語氣態度同我講野啦，我決定左，就係決定左！香港大學社會工作學系，我已經決定左揀你架喇！！點都唔改！>:(

　　下奏拿拿聲改choice，打完個「yes」字submit o個下真係好緊張…我諗緊o既就係我自己係唔係真係已經決定好呢？不過諗多兩諗反而更加無猶豫，終於，我o既第一志願已經出左啦：登登登鄧，係香港大學社會工作學系！之後就係中大BBA，科大BBA同港大BBA，然後就係中大社工同英文系。搞完一倫之後就大功告成喇，而家唯一可以做o既就係等消息！一諗起８月６我就好緊張啦！！><" 有朋友仔已經入硬大學；有ｄ就比想像中考得仲要好，唔知點揀；有ｄ就諗緊搏定唔搏好，有ｄ什至打算去其他地方讀書…而我而家就唔算太擔心，不過都有ｄ隱憂呢∼今年我o個班入面有一個同學羅到超級好成績，仲打埋佢個名係報紙添！噢，真係好犀利呀！希望我識得o既呢一屆o既ＡＬ朋友仔個個都入到first choice啦！不過一諗起讀大學就要各散東西時，個心就有ｄ唔舒服lu…

當你用盡全力去接近我時
我已經決定了用我的幸福下注
賭的　是你一輩子的愛

　　今日好犀利呀，８點幾就起左身，之後就同大朋友同朋友仔去左會展睇一個海外升學o既展覽。我地２個雖然都無去外國升學o既打算，不過都陪左朋友仔行左一個朝早，幫佢手拎下野咁呢∼其實我個人唔多想朋友仔去外國讀書架，一來佢好似無咩計劃咁；二來去外國讀書真係下下都幾十萬咁呢，計番計數未必制得過；三來就係我始終唔捨得佢離開香港呢！突然間要走一個朋友，好唔慣呀！>_< 不過點都好啦，前途呢ｄ野始終都係自己決定好ｄ，如果佢去到外國有更好發展又或者佢真係立志想去其他地方繼續學習，咁我就當然會支持佢啦∼但係呢ｄ野真係要諗清諗楚先好呢∼^^ 去完會展之後我地就去左Ｍ記食野，終於有機會比我用到【乜都得】喇……迫左朋友仔食左２包薯條，真係有ｄ於心不忍呢∼哈哈∼（雖然最後都依然無比佢停要佢食晒…）食完野之後我地就去朋友仔２屋企探佢，真係好耐都無一齊上過佢屋企呢∼不過我地一係唔上，一上就玩得好癲，大朋友仔佢地仲整爛左我送比佢本相簿添，真係唔好意思呢…><"" 不過就真係玩得好開心，o係一場大混戰+互搶相簿+扮嬲+整親+除衫（除衫o個個當然唔係我啦）o既活動之後我地就離開左朋友仔２屋企，分道揚鑣lu。我同大朋友仔去左還碟後就買左「食送」返上去，煲埋飯之後就一路睇《男女字典》一路食（不過我覺得自己並唔係太留意劇情，以致做完左一隻碟之後我都唔知講左ｄ咩），之後就返屋企lu。今日全日都好快樂，而且好難忘。一切就好似發左一場夢咁，之後諗番起都有ｄ半信半疑+面紅紅咁，哈哈∼:p

　　有*人*聽日就要開始實習呢！祝佢一切順利！唔好比人back list左呀∼>:)

　　〔有時我會諗…佢地係唔係快左ｄ呢？只係幾日已經變到咁，好似有ｄ唔恰當。不過一諗起佢地有今日呢個結果都經歷過唔少野，emm…都叫做好唔容易先可以一齊，咁感覺呢ｄ野又好難唔順住去做o既……我睇得出個女仔就無後悔喇∼希望o係「Indulge your appetites」之後，佢地２個都可以永遠永遠咁幸福喇…呢個就係我o既祝福！〕

　　十點幾起身，今日終於比我用左一個上午黎完成左本李天命喇！哈哈∼可能因為佢講ｄ野都幾複雜啦，我又唔捨得粗粗咁睇左佢就算，所以就好比心機咁慢慢睇喇！睇左幾個星期，睇到連細妹都話「未見過我睇一本書會睇咁耐」，可想而知我睇得幾慢∼^^" 全日都留係屋企，比我諗到一ｄ野…諗到就要落實去做呢，哈哈∼:)

　　今日全日都有幫媽咪洗碗，我諗我上一次做呢ｄ野應該都係一年前lu∼突然之間今日好想學做多ｄ家務呢…我諗係因為*佢*掛∼有人話如果愛上左一個唔好o既男人，你眼中睇o既世界就只得佢一個；如果愛上左一個好男人，你會係佢眼中睇到全世界。呢一句說話我極之認同架∼我希望我可以不斷咁upgrade自己，唔係佢咁獨立咁叻我會襯佢唔起呢！^^

想念您的時候
幸福的感覺便跟隨心臟的起伏洶湧而出
隨著血液　漫流全身

　　本來半個月前已經約好左今日會同朋友仔去打毛毛球，點知今朝去到時先知道張入場飛原來打錯左……我地book場時竟然無為意到佢係打住「西灣河室內運動場」而唔係「柴灣室內運動場」，搞到今日打唔成波呢！唉，上次幫我地book場o個個人兄態度已經勁差架啦，估唔到仲幫我地book錯埋場，累到我地side＄之餘仲要無波打！激死∼！雖然我地即時無check清楚都有ｄ責任，不過都唔可以怪晒我地架，我地明明book柴灣丫嘛，咁次次book完都係睇清楚日期時間就得架啦，點知佢竟然打錯地址喎！！哼！下次打要睇清楚呢！唔可以再比人呃∼><"

　　打唔成波就同朋友仔去左杏花新城o既KFC同Starbucks食野飲野，之後就上左朋友仔屋企睇 VCD 同睇相∼今日同佢傾左好多選科，JUPAS，AL，日本旅行，童年…o既野，仲睇左好多佢細個時候o既相，真係非常Kawaii呢！不過朋友仔由細到大個樣都無乜點變到，真係keep得好，哈哈∼:p

大部份人花了一生都在找尋另一面的貝殼
踏破鐵鞋無覓處的意思
由答應你的一瞬間我便知曉了

　　呢排成日都好早就醒，醒左又訓唔返咁就唯有起身∼開始變成番早起早睡，我諗都係因為配合某人o既作息呢∼一得閒時就繼續努力咁整野，希望半個月之內可以完成到啦。完工之後就出左灣仔周圍兜下，因為之後約左大朋友去太空館睇一套叫《大峽谷》o既電影。行下行下就到５點，佢就準時５點打黎…估唔到佢咁準時收工呢∼^^ 我地先去左銅鑼灣現代羅補習ｄ野，不過由於我搞錯左（潛意識唔想佢去？），最後竟然帶左佢去左銅鑼灣舊o個間現代∼哈哈∼不過唔緊要啦，間間現代教育都係一樣o者，無所謂啦∼>:D 行完銅鑼灣之後我地就過左尖沙咀，本來見未夠鐘睇《大峽谷》就打算去科學館睇下野先，點知原來科學館都幾遠，所以最後我地就行太空館算。我仲記得上一次黎係中６呢，o個時因為中文科有學中國科學，所以我就同同學仔就黎左太空館吸收多ｄ課外知識喇∼:) 同大朋友仔行下行下就夠鐘，之後就入場去左睇《大峽谷》。睇全天幕電影感覺真係好特別呢，睇到某ｄ場面時真係覺得自己好似置身係美國阿里桑那州大峽谷咁，非常震撼∼睇完戲之後我地就去左隔離間商場食野，o個度地方都幾大，不過人流一ｄ都唔多，我地都覺得係o個度做食肆可能會蝕＄（幫人地擔心…真無聊^^"）……>:p 食完飯就返屋企lu，今日都非常健康+充實呢∼

　　夜晚時同大朋友仔係小熊國出面見到有個籠入面有２隻大咀鳥，我地都覺得呢２隻野真係非常極之似係假o既多ｄ呢！佢地無論神情外表毛髮以至到咀都好似ｄ雀仔玩具/模型咁，如果唔係有陣味真係好難分真假！

請好好保重健康　注意安全
因為由某今天開始　有一個人已在背後為你而暗自擔心

　　今朝起身無耐就聽媽咪講屯門出左交通意外，聽到之後第一時間就諗到大朋友仔同佢ｄ家人…唔知佢返屋企係唔係都係坐呢架巴士、經過呢條橋架呢？成架巴士咁飛落５０米o既橋底，聽到心都寒埋……生命係何其脆弱呢？但願我身邊o既所有人都安安全全，咁就好喇。

　　１０點幾出左銅鑼灣陪媽咪同細妹買野，然後就趕返灣仔Neway同朋友仔唱Ｋ去也∼遲到左少少，不過今日唱完lunch再直落唱happy hour，所以都唱得非常夠喉，好開心喔∼！:D 非常多謝ＢＢ朋友仔呢，今日全場都係佢出＄，下次要輪到我請客先得！唱完Ｋ大朋友仔就收工打比我，所以之後就去左搵佢。係Ｍ記tea完之後就同佢行３聯行集成，仲買左一隻靚靚水杯呢∼Yeah，以後上佢屋企都有靚靚私家杯用lu！開心∼o^_^o 行下行下就落起雨黎，不過由於我要過銅鑼灣幫媽咪做ｄ野，所以同大朋友仔就唯有冒雨都要行過去。幫媽咪搞掂埋ｄ野之後就同大朋友仔周圍行下，點知行到UA時代時竟然比佢見到對面二千年廣場７樓有現代教育！係唔太情願o既情況之下就比佢迫左我上去重遊舊地……好彩，有我個大頭相o個個塊宣傳板已經拆左o者∼emm…我覺得影得非常之唔好呢，所以唔多想比佢見到，呵呵∼之後就同佢去左地面間麵店食野，係二千年廣場補左咁耐習都未試過係o個間野食野，估唔到裡面ｄ野又幾好味架，幾特別！遲ｄ一定要再同ｄ朋友仔黎食下先！^^ 今日又十點先返到屋企，雖然有ｄ夜，不過好開心∼^^ 聽日要去傾debate呢∼真係久違了呀！

送上一份禮物
在沒有我的晚上　就由它代替我
為你送上一點溫柔與溫暖

　　朝早６點９就醒，之後又訓唔番…唉∼（但我仲好支力喎…）拖住有ｄ疲倦o既身體就出左灣仔搵朋友仔，會合左佢地之後就齊齊坐５Ａ入跑馬地黃涌圖書館傾debate，因為ＢＢ朋友仔係o個度返工呢∼呢間圖書館都幾大，唔算太多人，所以都係一個傾debate唔錯o既地方（不過就凍左ｄ）。可能大家都太耐無傾debate喇，竟然有ｄ唔知點入手o既感覺！:p 係閒談同分資料睇o既情況之下我地就結束左今次o既傾debate聚會，星期日再續。之後我就同朋友仔返番灣仔周圍行+買野比人，今日都同朋友仔傾左好多野呢，知道多左佢同礦泉水先生ｄ野，又比佢知道多左我ｄ野（個成語遲ｄ先開估啦∼），仲傾左入大學同debate ｄ野…好耐都無試過傾咁多計呢！但願你同礦泉水先生有一個美好o既將來啦！^^

　　５點幾，收到大朋友仔o既短訊，之後就去左搵佢。今日我地唔４圍遊蕩lu，決定返屋企玩煮飯仔∼（不過好明顯唔係我煮）大朋友仔今晚親自下煮整左２「食送」１湯，雖然佢話好簡單，不過我係真心覺得味道非常好呢∼有人煮飯比我食，今日仲有新杯杯用，真係非常幸福呀~！唔知呢個想法係唔係有ｄ傻呢，我覺得只要同大朋友仔一齊，就算２個人靜靜地坐係度聽住歌咩都唔做都已經可以覺得好幸福。所以，我覺得今晚真係好難忘+幸福啊∼^^.. １０點幾先返到屋企，收到電話知道打完１７號場八國賽debate（對男拔萃）２２號又要再打聯中（對ＱＣ）……想唔到身為中７仲要打咁多場呢…不過算啦，反正之後可能都已經無咩機會打lu∼希望我唔會已經生疏晒，同埋希望２２號打完之後下奏有得走人啦……^^" 突然之間有咁多比賽咁多野做，搞到好多野都失去左預算添！我諗…時間應該唔夠喇∼嗚∼T^T

相見是最快樂的事
就算不間斷地看到你的臉　牽著你的手
我想也不會生厭

　　琴晚發夢見到*你*，不過估唔到我地竟然身處係ｄ咁o既地方呢…emm…我諗我唔係日有所思掛！？>:( 今日十點幾起身，之後就即刻去左圖書館拎預約成功左o既《哈利波特４火盃的考驗》∼睇左百幾頁，不過因為哈利仔佢地仲未入學，只係不斷咁講世界盃ｄ野，人名又多，所以睇起黎有點兒悶，比想像中無咁好睇。我諗之後應該會精彩ｄ掛？本來今日打算花晒整日去睇書，挑戰下自己可唔可以一日之內睇晒成本７百幾頁o既《哈利波特４》（我覺得得架，２個鐘都睇左百幾頁啦∼問題就係我有無咁o既恆心睇足一日…），不過點幾大朋友仔打黎，所以下奏就決定陪佢去Poly喇。要佢特登由灣仔入黎小西灣再陪我出紅磡，真係有ｄ唔好意思∼>_<" 見佢o係冷氣咁唔夠環境又咁嘈吵o既巴士上都訓得著，我諗佢今日真係好支力呢。係Poly陪佢幫人聽左一個admission talk之類o既野，或者係因為個講者講o個ｄ野已經印晒係張單張度啦，而且我興趣亦唔大，所以我就聽得唔多專心兼感到有ｄ眼訓喇…不過見個冷氣幾涼，又係陪大朋友仔，所以就無所謂啦∼^^ 聽完之後我地就過左尖沙咀o個邊，本來打算用左上次去太空館睇電影時送o既２張免費入場券去歷史博物館睇野，不過原來佢收６點（當時已經就黎５點半），所以就去左歷史博物館對面o既科學館喇。雖然上一次黎只係一年前o既事（上次係同同學仔去完太空館再去科學館呢），不過今次去都仲覺得幾好玩，尤其係最底o個一層，都幾多野睇幾多野玩架，仲比大朋友仔研究到追女仔新招呢∼哈哈∼=^_^= 行左個幾鐘之後就去左食拉麵，今日同大朋友仔講左ｄ以前屋企o既野，希望唔會悶親佢啦∼呢ｄ野我平時都好少講，唔知點解自己突然之間又會講出黎呢…^^" 回想起都仲有ｄ感觸，幸好仲有你o既一對手:`-) 食完野之後我地就行返車站坐巴士返屋企，雖然上左一架勁兜路o既106巴士，不過有你陪…坐耐ｄ就仲好∼:)

　　今日係報紙上面見到屯門車禍有個小朋友只係受左輕傷，全因佢媽媽不顧一切咁保護佢呢。睇到呢度之後真係覺得有ｄ感動！大朋友仔聽日返屋企都要經過肇事現場，真係有ｄ擔心呢……突然決定對佢再好ｄ再好ｄ，因為我唔想失去左先黎後悔∼幸福無左先黎後悔，呢件事諗起都好遺憾呢！

　　（P.S. 無論你前路打算點行點揀我都會支持你到底架！我地都要努力呀！^^）

　　今朝７點半就鬧鐘響，可惜因為我太支力，所以拖到８點先肯起身。一起身就一邊聽住RTHK轉播o既大專辯論賽城大vs浸大，一邊就睇自己１７號要打o個場o既debate資料（因為琴日太夜先返到屋企，無精神睇）。呢場大專賽o既辯題係「合法遊行示威有助香港社會發展」，而我地o個條就係「港府應加快推行全民普選特首」，大家都係打ｄ政制題呢。可能因為ｄ大專辯論員個個都身經百戰掛，佢地打自由辯論時反應都好快，而且情緒都幾高漲，如果唔知佢地打緊debate可以仲以為有班人係度嗌緊交∼（咁係好定唔好呢？）不過o係一路聽人地比賽o既氣氛之下睇自己比賽o既資料感覺真係幾好，唔知我o既道行仲有幾耐先到佢地呢個level呢？^^ 下星期日８點仲有另一場科大對樹仁，雖然我已經知道左科大會贏樹仁再係總決賽以3:2贏埋浸大，不過都好想聽下佢地比賽呢∼不過最大問題就係下星期日唔知８點我起唔起到身……嘿∼>:p debate ｄ資料睇到８點半先睇晒，之後就拿拿聲換衫出門口。坐車出到灣仔就好快喇，不過等車入跑馬地就足足等左我２５分鐘∼> <" 今日因為我地非常專心地傾，所以只係用左個半鐘就傾完可以分point返屋企寫speech lu∼散場之後我就同朋友仔返番灣仔食麵，本來仲想同朋友仔一齊周圍行下，不過可能因為唔夠訓，我對眼+身體真係好支力，所以最終都選擇返屋企休息。返到屋企睇左一陣《哈利波特》就頂唔順去左訓覺，由點幾訓到６點半，醒左之後都仲係支力支力地呢……晚上就繼續睇哈利仔，睇到一半就努力咁繼續趕工打晒呢幾日o既日記，之後就開始打debate speech lu∼今日全日都不停咁睇野+打野+睇野+打野+……

請相信我　我是捨不得對你不瞅不睬的
裝作生氣的表情　其實只是想驗證一下你的耐性
以及看看你忙著逗我快樂的模樣

　　今日８點就起身，因為琴晚又偷懶無打speech，所以要早起趕工呢∼打完之後時間o岩o岩好要出門口，之後就坐車出灣仔再轉入跑馬地。今日只係傾左短短o既個幾鐘就收工，不過因為要等大朋友仔放工，所以我就要自己一個食lunch，自己一個等到５點∼> < 幸好今日有帶非常精彩o既《哈利波特４》出街o者，結果我就坐係圖書館睇左３個幾鐘書，由３００幾頁睇到６００幾頁，真係有ｄ支力呢…本書真係幾好睇，不過一次過睇咁多頁原來真係有ｄ辛苦，最起碼我對眼就非常疲倦喇∼終於比我等到５點會合左大朋友仔，我地係Ｍ記tea完之後就入左坑口搵久違左o既朋友仔。今晚o係佢間茶餐廳我又可以再一次食到美味o既『西蘭……』（此菜式全名請參考以往日記）同『清蒸烏頭』，前者依然係百吃不厭放左入口都唔捨得吞，後者同上次o既整法唔同，上次係用檸檬整今次係清蒸，美味程度就有過之而無不及呢∼哈哈∼朋友仔間茶餐廳真係好掂呀，希望佢遲ｄ可以開分店開到港島九龍４圍都有啦，咁就係邊度都可以食到ｄ咁好o既野食喇嘛∼^^ 食完野之後就再次由大朋友仔專程由坑口送我返屋企。我都係比較喜歡坐巴士多ｄ，因為有得坐又比較靜，仲要唔駛轉車添∼不過今晚我地實在唔太專心，架車兜完小西灣差ｄ返廠我地都唔發現，好彩落得切車喳！下次一定要多加留意先得！:p

　　今日對眼成日都好紅，呢排對眼亦都成日覺得好支力，我諗我都係應該停止戴con一排lu∼

雖不強烈　但我不能否認它的存在
終於都水落石出了嗎？

　　今朝又差ｄ起唔到身，繼續趕呀趕呀咁出跑馬地傾debate。因為對眼仲紅紅地，而且好支力，所以今日就要戴番眼鏡做番４眼妹…好似已經好耐無試過戴眼鏡出街喇，有ｄ唔慣添∼今日全日又係好似無乜點傾過野，基本上成朝我就係度睇《哈利》，而朋友仔們就為佢地夜晚o既grad din裝飾趕工……哈哈∼都唔知自己做左ｄ咩添∼:p 今日終於睇晒成本《哈利４》喇，始終都係後面好睇ｄ，夠晒精彩夠晒峰迴路轉！不過聽人講第５集之前又係要講好耐先講到佢地入學，我諗都應該會幾悶呢∼整體上呢一集同之前２冊一樣都咁精彩（我第一冊係睇英文版呀，所以…覺得好似無睇過咁，完全無印象…=.=llll），不過我印象中睇第２，３冊時好似舒服ｄ…可能係因為第４集係最長而我呢排又最忙掛？睇完一冊又一冊之後覺得真相已經逐ｄ逐ｄ咁揭開，好似就黎就可以知道晒過去發生過咩事咁。其實我好怕ｄ忠角到最後會被揭穿原來係奸角架，即係如果第７冊先揭穿Prof. Dumbledore原來係大奸人一名，我諗我會接受唔到呢……希望唔係咁啦∼>_<" 睇完《哈利》傾左一陣debate之後就同朋友仔去左食飯，今日我地係跑馬地間【表哥】食lunch，間餐廳都幾旺幾多人呢，仲比我地見到老闆張堅庭啊∼ 食完之後我就返灣仔，o個時我已經極度疲倦，所以即刻坐巴士返屋企去也∼係巴士上我已經恰下恰下，返到屋企當然即刻開冷氣訓覺啦∼午睡左整整一個下午之後起身就睇左一本亦舒，之後就沖涼食飯打日記icq∼:) 星期４就打debate喇，無左王老師，我地個個都好似鬆散晒咁，可能因為無咩壓力掛？王老師下個星期就外遊喇，８月先會返，突然之間好擔心聯中會輸…無左王老師點醒我地鬧我地迫我地寫稿同我地對戰拋窒我地，對住皇仁呢ｄ都幾強o既隊我地勝算都底係幾多呢？？

如果溫馨是一種顏色　那會是你整天穿著的衣服顏色
如果溫馨是一種味道　那會是牽著你手時嗅到你的味道
如果溫馨是一種感覺　那會是幻想我們的將來時的感覺

　　今日終於可以盡情咁訓喇，因為要就ＢＢ朋友仔，所以下奏５點先開始傾debate。我地o係集成McCafe對稿+rebuttals，因為唔想大朋友仔等我太耐，所以６點半我就去左搵佢。約左佢係哈迪Ｃ等，之後我地就過左尖沙咀行。去到文化中心時無意中比我地發現到有個海報設計比賽o既優異作品展覽，所以我地就係o個度逗留左一陣，好細心逐幅畫逐幅畫咁睇喇。睇完之後就去返上次尖沙咀間好空洞o既餐廳食飯，食完就沿住海邊行去坐船返灣仔，沿途仲有人叫我地買花呢。^^其實我覺得香港尖東夜境好靚架，不過就我所見夜晚實在有太多人係度擺檔幫人影相喇，ｄ強力射燈搞到周圍「光殘殘」咁，極度破壞氣氛呢！>:o 行左一轉之後因為想直接搭巴士返屋企，所以冒住有小小暈船浪o既危險都要坐船∼等船就等左２０分鐘，不過唔駛５分鐘就已經到左對岸lu！我都係唔太喜歡海水o既味道，次次聞到都有ｄ想嘔+頭暈，唉∼

　　返到屋企已經開始眼訓，不過都要寫speech……今日發生左大件事呢，除左好多唱片公司高層+歌手比ICAC拘捕左之外，２大高官又呈辭啊！我諗起o既第一件事就係----死喇，聽日ｄ對手會唔會加埋呢件事入聽日場debate度呢？萬一佢地話「…琴晚梁ＸＸ同葉劉ＸＸ都呈辭啦，政局咁亂又點可以加快推行全民普選特首呀？…」，咁應該點答好呢？唉∼今場debate條辯題真係好邪，成日都打打下政府又有新野宣佈／有野改動，真係玩死我地∼><"

如果你當初不肯禮讓一點
結局　會被怎樣的改寫？

　　一早就起左身，不過今朝好唔小心，完全睇唔到個櫃門係開住就一頭頂左上去，右邊頭頂直接撞擊櫃角，撞到「砰」一聲∼呀∼真係好痛呢！第一件事就係驚自己會失憶…咁今日場debate點好呢？好彩最後記憶力都無出現問題，只係頭頂起左個瘤o者……唉∼> <.. 之後１０點半就同隊友仔係合和集合，再一齊去大家樂對speech。對對下已經差唔多夠鐘，所以我地就一齊坐巴士去喇沙。一去到就發覺唔妥…對手著左校服呢！之前唔係話唔駛著架咩！？噢，搞到我地４個仲特登襯晒成set 同一style o既便服去打添……噢噢噢∼∼>_<lllll 今次打得都幾輕鬆，因為今場全場都無王老師監督，王老師亦無黎睇，所以打起黎無咩心理壓力∼不過可能太耐無用o個ｄ奇怪tone講野+太耐無打debate喇，我覺得自己有ｄ力不從心同唔上手o既感覺！幸而，隊友仔都打得好好，而且（我覺得）對方派出場o個ｄ都係ｄ細o既，所以我地最後都可以贏9XX比7XX∼ anyway點都好啦，呢場都係熱身賽o者，聽日就出聯中辯題喇，５日辯題３日正反，呢次就真係黎真呢，所以要比心機先得！不過今場我應該係台上最老o既speaker，硬係覺得自己咁老仲打埋一份唔係太好…唉∼=.=llll

　　打完debate之後同隊友仔去左食飯，之後行下睇下書諗住返屋企時大朋友就放工，所以就去搵佢。我地去左太古睇今日o岩o岩上畫o既《海底奇兵》，估唔到真係咁好睇呢，搞笑得黎又有ｄ感動又有意義，而且ｄ公仔又得意生動喎！特別要讚下ｄ粵語配音，配得最好就係劉青雲毛舜筠同杜汶澤，佢地真係配得非常極之生鬼+搞笑呢！我諗英文版一定無咁好睇，哈哈∼我o個場有好多小朋友同爹地媽咪一齊黎睇呀，全場滿座非常犀利！^^ 睇完戲之後行下陪大朋友仔買完碟就去左食飯，食完就返屋企lu∼今日好充實好開心呢∼

　　而家正諗緊…好唔好買條白晶手鍊提升下ｄ口才同令頭腦清醒ｄ呢？反正呢排咁多debate要打，最近講野又好似有ｄ語不達意，成日講錯咁……:p

心情不好的日子
幸而還有你那來自遠處　教人窩心的安慰

　　今晨七點就醒左，可能係因為有ｄ野成日形住自己會唔記得做掛∼？十點去左朋友仔屋企比野佢兼幫大朋友仔fax野去大學，fax完就返屋企。近來天氣勁熱，又曬到不得了，朝早出一出去之後全日都留係屋企hair下hair下，唔係就係搵２２號場debate ｄ資料。２２場比賽辯題已經出左，同今年大專盃總決賽o個條只係爭個主語「香港」２隻字咁大把！出題目o個個人真係好求其呢！=.=" 不過又係ｄ政制題，真係好悶∼為左print資料搞左成晚，部printer又唔聽話，真係極之憫死人！激氣！（好彩仲有人tum下∼>:p）

　　近來左眼成日戴con都痛，今日終於去左check眼睇下係唔係副con出左事。其實之前我自己研究副con時好似見到有條裂痕，o個時真係有ｄ擔心呢！一來咁貴買副con，咁易就花左真係好唔抵；２來就係好驚會整親埋我對眼，咁就真係大件事喇！去左驗眼，好彩副con同角膜都無事喳∼Thankz God！視光師話應該係個眼簾用副con磨擦得多敏感，可能生左粒油脂粒，所以每次眨眼都會扯到個con，咁就會痛喇∼噢，好彩係敏感喳，呢排左眼真係要戴少ｄcon呢！（言下之意即係右眼照戴，哈哈∼:p）

　　今日同左大朋友仔去左青衣城，好耐無黎過喇，感覺上都無乜點變過。大朋友仔又壞左提款card呢，今次終於比我發現左個兇手----原來係因為銀包上個扣有磁石呀！唉，仲要有咁多粒，ｄ磁帶想都唔壞都難咯！唉∼買左個設計咁差o既銀包比佢，我都有ｄ責任呢……>_<.. 係羅唔到＄o既情況之下我地就去左朋友仔間茶餐廳食晚飯（非常之奸，呵呵），咩都未落單時已經有壺湯，仲有荔枝食添，朋友仔真係唔話得！今晚點左京都肉排，食落有ｄ似茄汁豬扒呢，非常好味，我比１００分佢∼^^（←扮晒食家）

　　另外，今日仲去大哈傾debate（雖然只係睇左ｄ資料）……我有強烈預感今次會趕唔切傾…話就話係５日辯題３日正反，不過講真２２號o個日都打啦，邊有５日咁多喎！唉∼唔想輸（得咁慘）呢！><"

遊戲的答案雖在掌握之中
可是　我卻已一早抽身離場

　　今日本來打算８點起身聽港台轉播o既大專辯論賽，不過８點對我黎講實在太早，結果醒左又訓番……８點半先再醒，之後就留係張床度聽比賽…好彩無起身喳，原來呢一場根本唔係我地想聽o個場！我地想聽o個場科大對浸大原來係下一個星期先有得播呀∼唉∼搞錯左添！

　　聽完比賽之後下午就出左去傾debate，本來打算上王老師屋企，不過王老師把聲有點兒支力，又有ｄ cool，仲話「我就唔會出黎架喇，你地想就入黎傾囉」，搞到我地都怕怕，結果都係自己黎……我地全日先後去左大家樂，吉野家同隊友仔屋企傾，不過搞到夜晚８點幾都仲係連主線都出唔到！我從來都未試過打debate打到時間咁趕，得番１日但係line都仲未有，稿就更加係一隻字都無啦∼希望聽日有王老師幫手可以力挽狂瀾啦……

曾經　我也在這裡流連已久　花過了不少光陰
重返舊地　百般感覺頃刻湧上心頭

　　今日返左學校傾debate，大家迫晒係careers room度聽王老師解釋成個香港政治體制，聽完之後我覺得自己今次就算輸，起碼都已經學左好多好多野lu∼非常艱難地，終於比我地出左一條好出奇不意o既主線，希望呢條線無咁正路可以出奇制勝啦∼係學校傾完之後我地就去左oasis傾，之後就去左----book酒店！因為我地預左今晚會寫稿寫到好夜什至通宵，所以就特登book左間酒店房寫稿∼真係非常史無前例呢！^^ 上左酒店放底晒ｄ野之後我地就去食飯，之後再一齊返酒店傾，不過因為我住得遠，所以十點幾就返屋企繼續趕工，聽日再一早出去會合佢地∼

雖然你沒有一個雄厚有力的肩膀
疲憊的時候　卻是我最想依靠的地方

　　琴晚４點先有得訓，不過朝早６點半就起左身上網抄埋ｄ野，之後就出左同大朋友仔食早餐，然後就去酒店搵隊友仔。去到酒店先落將ｄ稿card，之後就留到１１點先走。Check out 時嚇左我地一跳呢，原來係酒店房用電話要＄架！不過我地真係一直都唔知喎！！結果張單就無情情要比多百幾，真係好唔抵（仲要第一個撥出o既電話就係1878200……=.=""）！離開左酒店之後我地就去左王老師屋企對speech+繼續寫野，然後２點幾就出發去喇沙比賽。今場打o既時候我精神真係麻麻地，份稿又講得差，我地同ＱＣ又好似無咩直接交鋒咁，搞到我都以為自己輸梗；不過一到台下時形勢就唔同左，對方開始露出弱點，到左自由辯論時我覺得我地同ＱＣ已經不相伯仲，無比佢地牽住走，仲可以迫問到佢地！我係第一次希望自己辯論可以長時間ｄ呢，因為佢地實在有太多o既野比我地質問喇！最後結辯ＢＢ當然結得好好啦，非常有大將之風∼打到呢度其實我覺得我地同ＱＣ贏o既機會應該差唔多，不過始終都覺得ＱＣ會贏多我地少少，因為雖然我地後來居上，不過台下+自由+結辯佔全場o既比重應該唔過５成，所以未必可以扭轉乾坤！最後結果都係輸幾分，２比１，始終都入唔到第３round……anyway點都好啦，雖然輸，不過都輸得光彩o既！打完之後聽左一個評核o既評語之後我就趕左去會合大朋友仔。係車上面突然之間有ｄ悲從中來，突然之間有ｄ感慨∼咁就打完我中學生涯最後一次o既debate，諗番起真係有ｄ唔捨得。呢５年o既辯論生涯除左令我講野叻左、自信多左、知識豐富左、思路敏銳左，仲帶左比我一生都唔會忘記o既好朋友同經驗。我諗我得到o既絕對絕對比我失去o既更加多！咁就告別左我o既辯論生涯，真係有ｄ唔慣……希望隊友仔下年可以繼續努力，打埋我o個份啦！去左地鐵站等大朋友仔時已經開始支力到唔係太有表情，再加上唔捨得o既感覺，我諗大朋友仔一定以為我好唔開心呢（咁少少當然有啦）……會合左佢之後就去左間餐廳等朋友仔，之後齊齊去街市買「食送」返去大朋友仔屋企煮∼不過今日好多野都唔順利呢，又買唔到蜆又買唔到魚，返到屋企煲飯又唔記得禁掣，ｄ排骨又煮極都唔熟（朋友仔話）搞到要蒸完再炒炒完再炒，仲要搞到成隻鑊黑晒……雖然等左成個幾鐘先有飯食，不過都開心o既∼全晚得我一個女仔，其實我都想幫手煮飯架（雖然我都唔知自己可以幫到ｄ咩），不過因為我實在太支力喇，所以咩都無幫過，真係有ｄ唔好意思呢……食完飯大朋友仔就送我返屋企，生日流流要佢咁勞碌真係有ｄ過意唔去∼雖然禮物我就準備唔切，不過遲到都好過無到啦∼一定要補番∼返到屋企沖完涼on左一陣line就即訓，真係好支力好支力好支力……

我很累了
請讓我休息一下

　　今日訓到１０點先肯起身，起身上o下網hair下就出銅鑼灣同朋友仔去唱Ｋ。朋友仔暑假返左黎香港成半個月我都無同過佢出街，今日先係第一次呢！好似有點兒衰咁∼:p 由２點９唱到８點，唱左個人都有ｄ支力∼唱唱下我地收到風話已經掛左８號風球，等我仲以為咁快就掛添，原來係流料∼返到屋企，唔知點解個人仲好支力，咩都唔想做咁。同朋友仔傾左一陣，先知道原來王老師同陸老師覺得我地琴日場比賽打得好有問題，我地４個好似好有自信成日唔理人講咩係度辯論，今場成隊打o既style唔同晒，搞到朋友仔佢地好灰……原來我地今次o既表現竟然比老師佢地覺得好有問題，真係有ｄ唔知點好o既感覺。陸老師話我打o既時候心不在焉，其實我都覺。我自己覺得支力係一個好大o既原因，另外就係因為我對條line無咩信心…係咁趕o既情況之下度出黎o既一條主線我真係覺得唔多實淨，再另外我諗係因為「人」o既問題…我指o既唔係因為我之後要去見大朋友仔，所以唔專心；而係我睇到debate下一屆ｄ所謂接班人係咁o既質素時，我真係無咩心情打debate。其實打debate真係好睇心，如果根本無心戀戰，咁我會提議不如早ｄ退出辯論隊。我都做過細，我都知道做lower form人地打時你只可以做台下問下問題係幾悶，我都知道全程坐係度聽ｄ higher form傾野又唔明／唔敢出聲o既感覺係點，呢ｄ野我都經歷過，不過當我地傾咁多日你都只係肯出黎「傾」幾個鐘就收工咁「忙碌」，我就真係好質疑你到底對條line有幾明。好喇，假設你真係唔得閒黎傾都算喇，有ｄ人話黎傾，不過到最後其實我都唔多肯定你黎同唔黎o既分別到底係邊。傾debate悶時傾下閒計其實唔通份，不過如果你傾debate時全程個心唔係度，又或者根本就係黎訓／玩／傾計，咁我真係情願你唔好黎。有時見到而家debate teamｄ新人個個都好似無咩心入隊咁，真係都幾擔心學校遲ｄ辯論隊唔知會變成點。或者其實我自己都係五十步笑百步，之前o個幾屆ｄ師姐可能都係咁睇我呢屆o既學生，不過我眼見o既問題真係愈黎愈大。而且除左無心戀戰之外，我地team 隊員o既流失率真係好大，好似唔知點解到左中６就唔見晒ｄ人咁！我都知道中６ｄ書深好多，要花多ｄ時間讀書；中６時又可能要身兼數職好多野做，所以唔得閒打debate……不過其實講到底都係因為唔夠「愛debate」，亦都唔夠「飲水思源」。如果你真心鍾意debate，有比賽時你當然可以暫時將佢放係學業同其他課外活動之上啦；正如你好鍾意一個人，如果你真係有心o既話就算你幾忙點都可以抽到ｄｄ時間出黎同佢傾電話掛？而且，當你係打debate o既過程中學左咁多野，當王老師比左咁多機會咁多鍛鍊（假如你都認同o個ｄ叫做「鍛鍊」）你時，到左中６你都竟然可以一句都唔多謝就抽身調頭走置一切於不顧，我真係覺得好似有點兒那個囉……至少，我做唔出。曾經，我都係非常渴望可以quit到team，不過我都講唔出口，尤其係我發現同我同一屆o既人已經「quit剩無幾」時，我更加同自己講：「我要留低！」。雖然我一直都唔覺得自己打debate好叻，唔覺得自己講野好流暢，唔覺得自己反應好快，不過起碼我都有ｄ「心」，起碼你問鍾唔鍾意同隊友仔打debate時，我都會話比你知我鍾意。而我最開心o既就係呢２年黎係我身邊都仲有２個好有心o既好隊友+好朋友，我可以講o既就係呢５年黎我打得最開心o既比賽就係有你地２個係我身邊o既每一場賽事。我諗係無左你地，無左「嘉諾撒聖方濟各書院辯論隊」o既名義o既大學生涯裡面，我可能已經再的唔起心肝繼續比賽lu。你地２個由中４開始已經打得好好，而家已經打得比我更好，相信你地將來一定會有更大成就。下年就輪到你地當家作主喇，或者你地要面對一浪接一浪o既比賽，面對一個又一個無心裝載o既隊員，面對一隊又一隊o既強隊，仲有面對王老師o既考驗同面色……不過希望你地都可以咬緊牙關捱落去唔好灰心，因為有一日當你地正正式式離開左辯論隊之後，你會發現，原來你係不知不覺間已經得到左好多好多野，而呢ｄ野係其他野所唔能夠比到你。但願你會繼續愛辯論，用辯論隊o既成長去見證你o既成長！

　　自從琴日場比賽之後，我突然覺得自己殘左好多。成個人都好支力----唔止身體，連精神上都係，好似咩都的唔起心肝做，咩都唔想做，甚至連玩都無咩興趣。我諗我真係支力喇……

家中的衣架通通都不見了
原來　全部都已經被我用了
用來掛著你

　　今日一覺訓到十點幾，上下網睇下書整下野咁就一日∼雖然平淡左少少，不過呢ｄ日子都幾好。唔知點解yahoo而家成日都彈個廣告出黎，唔靚之餘仲整唔走，結果今日唯有將成個diary搬左去angelfire度。我諗之前o個幾個月ｄ日記真係有排我搬呢！

　　琴晚發夢我班有好多個同學未婚懷孕，雖o既時候淨係記得有同學仔Ａ份（連佢細妹都大左肚呢…）……好彩我無喳，醒番真係覺得咁後生就未婚懷孕好恐怖呢，簡直好似前途盡毀咁…我真係唔要咁啊∼> <"" 發完個夢搞到我醒左都唔敢再訓番∼不過有人今日就做左懶訓豬呢，訓完又醒醒完又訓…好犀利喔… >:p

　　夜晚大朋友仔打電話黎時聽聽下電話覺得隻耳仔濕濕地，之後當然伸隻手摸下啦，點知一摸就成手血啦，真係嚇親我呢！原來個第４個o個個耳lon又流血呢！我呢個星期已經帶左耳針等佢唔會咁易敏感架喇，點解都會無端端流血架！？> <" 呢個耳lon穿左都有１個幾月，不過依然都好唔聽話，成日發炎成日流血，真係激死∼大朋友仔話呢個星期內都唔準我戴耳環，要戴都要佢批准…不過，我已經諗到方法點樣唔比個傷口埋lu，哈哈∼>:)

　　今日又唔理三七廿一戴左con，差ｄ比人話呢∼不過今日戴con無再出現痛o既感覺，我諗ｄ敏感應該都好番lu…（一廂情願地覺得）

當天蠍遇上巨蟹
我們用天上的星宿來見證真心
鐵定合襯

　　前幾日無咁熱，出街真係非常之舒服呢∼不過個颱風一走天氣又開始熱番，唉∼下個颱風唔知幾時先到呢？今日全日係屋企休養生息，下奏就執起屋黎。睇番以前同朋友仔影落o既貼紙相同card，突然發現自己都變左唔少呢∼相中人有ｄ而家已經好少見面lu，有ｄ直情無再聯絡，突然之間好想打一打電話問一問好！不過諗深一層又覺得非常唐突…問完好之後又有咩講好呢？唉，都係算吧啦∼=.=""

讓您作主不是因為沒有理據在手
亦不是懶於爭辯
只是因為太愛您了　所以捨不得不聽您的話

　　琴晚為左耳lon o既問題同大朋友仔爭持左半個鐘，佢堅決地認為我唔應該繼續再戴任何耳環耳針諸好此類o既野，應該由得個lon埋左去算；不過我就唔肯，就算之後再流血點都要keep住個lon……本來我下定決心決定左o既野係唔會因為人地講而改變架，不過因為大朋友仔極度反對，所以我只有讓步。唔知點解呢，我仲好記得o個日點解自己會去左穿耳，好記得之後流血有幾痛，發炎時我又除唔到隻耳環有幾徬徨…其實想keep住個耳lon唔一定代表「貪靚」，亦都未必係因為唔忿氣啊……

　　今日情緒有點波動，成個晏奏心情都麻麻，結果咩都唔想做hair左一日。有時人就係咁架喇，忙o既時候就想休息下，一得閒時又無野做悶到死喎∼唉∼不過近來都唔係好想諗野，最好就有ｄ唔駛點用腦但又有得勞動下o既野我做，咁就最好。

　　（P.S. 原來我地聯中輸ＱＣ１分咁大把喳！激死人喇∼>︿<""）

一個人四周漫步原是沉悶至極的事
可是　只要想起您勞碌了一整天也要送我回家的堅持
一切都變得毫不重要

　　前２日心情異常壞，咩都唔想做咩都提唔起勁做睇咩都唔順眼，而呢一種沮喪低落o既感覺到左琴晚直情係達至高峰，連我自己都頂唔順自己∼>< 我終於明咩叫抑鬱症喇，原來一個人down起上黎真係好頹架，而且情緒低落可以係毫無原因，所以都唔知點入手令自己開心番。幸好今朝一起身就覺得一切都好美好，唔再覺得情緒低落！真係一天都光晒lu∼可能我真係一個唔悶得o既人掛，一無所事事個人就會開始頹喪…都係有野做下好ｄ∼（不過今日又要早起…><"）好耐都無試過早起身啦，真係非常Zzz呢∼去ＢＢ間圖書館傾debate，雖然我已經非常醒目地帶左褸去，不過因為圖書館ｄ冷氣實在太太太凍喇，結果我地都被迫過檔去銅鑼灣繼續傾……其實點解ｄ冷氣要開到咁大呢？如果開細ｄ慳得＄黎又可以唔駛凍親ｄ客仔（？），咁咪仲好？今日朋友仔因為就黎蜜運成功而比我地不停追問+問長問短，突然覺得今年debate team好旺桃花添…哈哈∼=^_^= 傾完debate之後就自己一個人周圍行下，之後等到大朋友仔收工就同佢去左行中央圖書館齊齊睇社會科學ｄ書。可以同大朋友仔一齊睇一本書真係好開心呢，原來有ｄ書一齊睇會好睇咁多，哈哈∼^^ 睇完書食完飯返左屋企之後臨訓前收到大朋友仔o既好消息…大朋友仔好叻仔呢，果真interview成功，新學年可以係紅磡返學lu！聽到呢個消息真係好「登」佢高興呀∼上場debate輸得終於有ｄ價值lu！（點解？呃…唔好問我…）

主修H. Studies的男孩上了一課
卻害得迷了路的女孩哭了一遍又一遍

　　今日非常乖，好不容易先幫到王老師搵齊人一齊晨咁早（十點半，哈哈∼）返學校scan野。我地足足由朝早scan到落晏奏，真係非常疲倦∼基本上呢項工作只係手板眼見工夫，不過就枯燥左ｄ，當你scan到第２百張時就真係會有ｄ頂唔順……最後到左５點我地４個先完成今日要scan o既相，不過因為王老師走時漏底左ｄ野，所以離開左學校之後我就去左搵王老師比番佢。比完野王老師之後可怕o既事又發生喇，我係地鐵站附近比人捉住做問卷調查，咁見佢咁誠懇我就同佢做喇，點知做完訪問之後我就比佢呃左上架van仔…原來又係sales呀！佢想sale個儲蓄+保險o既plan比我，其實聽落都OK好o既，因為儲＄係好事，應該都無壞；不過諗深一層又無理由我自己簽晒文件決定晒架，呢ｄ野梗係要同屋企人商量下啦！可惜我當時已經身處係人地架van仔當中，已經唔可以一支箭咁逃離現場，所以唯有保持冷靜+扮晒鎮定，見步行步啦！聽左佢sale左成個鐘，又係o個ｄ技倆o個ｄ口吻…唉，其實呢ｄ說話我都識講啦，直情可以一路聽你講一路分析你講o個段野有咩目的大綱係點添呀！可惜我始終都係唔識拒絕（由細到大都唔多識呢樣野，點死？），一日唔幫佢簽份申請書又好似走唔甩咁，所以最後我都簽左……幸好我都運用左我o既演技耍左一點小聰明，結果都可以一毫子都無放底就走到，總算謝天謝地！不過到左呢一刻我都仲有ｄ擔心，因為我始終都簽左（幸好唔係contract），都唔知最後會發生咩事…唉，天主一定要保佑我唔好有咩損失啊，唔係我會內疚死！不過講真呀，其實我真係好憎人地咁樣對住我sale野架！我本身已經唔鍾意sales架喇，今日一役簡直令我對sales o既討厭程度提昇多一倍！唔該唔好再係我面前死纏難打咁講ｄ乜乜乜產品物物物服務好嗎？你sale得愈「恆」我就愈唔信你，而且我真係決定左唔做唔買o既野o係一ｄ我唔多信得過o既人多番遊說之下，決心反而會更堅定！所以我真係好憎人地對我sale野！奉勸各位朋友第時如果做左sales都唔好向我sales你ｄ service / product，否則真係朋友都無得做呀！>:-o 驚魂未定之後比人訓話左一餐，o個一刻真係覺得自己好蠢好低Ｂ，真情覺得自己極度無用，一路上都好唔開心（順帶一提，繼我琴日係銅鑼灣撞到樂壇新男子組合Sky o既Gilbert之後今日係路上又比我撞到Yumiko小姐！望左半眼之後覺得佢真人同上鏡都差唔多∼）。食飯前接到電話就更加忍唔住……其實我真係無嬲你呀，只係我自己實在太蠢太無用…當然受驚之後聽唔到慰問而只係聽到教誨o既說話我都覺得有ｄ難受，不過我真係覺得係我自己做錯……後來一聽到你問o既問題，眼淚已經控制唔到咁湧出黎…對唔住，我下次唔會架喇，今次就當教訓啦！今日小朋友喊左２次，眼睛真係十分疼痛呢∼><..

　　附錄：宣傳技倆大分析（不日上載）

當身後站著個聰明的愛人　一直在保護自己 支持著自己
其實當個蠢蠢的小女人也不錯

　　今日又要早起呀，支力支力呢∼去左ＢＢ間圖書館傾debate，效率都算幾高，終於都叫搞好主線，都算係咁啦！^^ 傾到下奏我就返屋企，成個下奏都係度整整整，整生日禮物∼唔，我諗我要努力整先得啦，一日整一部份（已經根本唔可能）都要半個月先做得晒呢！諗起都支力∼^^.. 到左黃昏時屋企有親戚因黎香港旅遊順度來訪我屋企，夜晚仲會係度過夜，所以今晚我就出唔到去傾下場debate+夜晚要做廳長lu∼我仲記得我呢世人做過２次廳長咁大把喳，２次都係因為房有嚴蛇……哈哈，真白痴哦∼>:D

　　唔知點解今日諗諗下愈諗愈覺得琴日遇上o既係騙子，因為比我諗到好多疑點：
１）琴晚打番電話比留電話比我o既２個Sales哥哥，２個電話都打唔通呀！點解會咁架呢？
２）我由始至終都無拎到Sales哥哥o既card片…佢本來話比我，不過唔知點解又搵唔到，搵完一輪之後就話可能派晒，所以只係o係張紙上面留左電話比我！……嘿，有可疑呀！唔通佢根本就無card片比我，所以做場戲就算？
３）Sales哥哥比過職員証我睇，當時我仲笑笑咁指住証件上面張相話「都唔似你o既？」，而家諗起先覺得問題大！而且張証上面張相唔知點解好曚好似化晒咁，真係好奇怪呀！
４）Sales１說服緊我o既時候有人打比佢，佢當時話佢做緊野，遲ｄ先覆…而家諗起隱約醒起Sales１聽緊電話時Sales２好似都打緊電話…唔通佢地係度扯貓尾，暗中呃我等我以為佢留比我o既電話number係真o既？（←發揮無窮想像力中）
５）今日經過灣仔地鐵站Ａ３出口時已經見唔到架van仔喇！到底佢地潛逃左去邊？（←直情已經認定左佢地係騙徒咁~）
哎，好彩琴日無比到credit card或者cash佢地喳！不過當我一心諗住佢地唔會再打比我o個時到左今晚夜晚Sales哥哥２竟然打比我！當時我都有ｄ猶豫，想唔聽架，不過最後都好勇敢咁接聽，仲好有禮貌咁叫佢幫我cancel左個申請…好彩佢都好有禮貌咁話無問題o者，收完線之後真係覺得一天都光晒（希望係啦…）！哼，下次我唔會咁蠢上人地車架喇，問卷調查都未必做添呀，嘿！（N.B. 不過Sales２打電話黎時把聲真係好似大朋友仔，唔係有來電我１定會以為係佢打黎玩電話！哈∼^^"）