眼睛看到您緊緊的拉著我　保護我在人海中穿梭
心裡只偷偷的想著您的好

　
黎睇下同我一齊去書展o既小狗狗o既演變過程吧。

　　琴日下奏依然繼續整整整，整到４點大朋友仔就打黎，之後非常突然地我就同佢加佢ｄ親朋好友一齊去左一年一度o既書展lu∼書展基本上我係隔年先去一次，舊年無去到，於是今年又有得去喇∼^^ 今年入場安排好奇怪呀，分上下２場，又有「夜書市」，我諗係有關當局希望可以控制人流o既措施掛？雖然非典型一役好似已經係上世紀o既事，不過到左而家都仲可以見到好多非典之後留下o既痕跡，例如而家去唱Ｋ仲有私家咪套啦，大型商場又依然仲有ｄ洗手消毒物品提供，連琴晚經過淘大Ｅ座都仲聞到消毒藥水味∼所以今年書展搞成咁都無可厚非o既…不過唔知係唔係因為咁，琴晚真係好多人行書展呀！（其實應該係因為琴日係星期５）層層都非常之迫，迫到我行得都有點意欲大減∼我地一行５人６點半７點先入場，短短３個鐘時間真係唔多夠慢慢咁行晒呢！雖然我唔買書，不過行得都好愉快∼講真丫，我真係唔買書架！我買左而放係屋企o既書真係唔多過十五本（呢個數字係計埋文化科o個５本課外讀物架！），最勁o既一本就係《文化苦旅》by Mr余秋雨先生，不過所有書o既命運都係一樣，就係我十世都唔會拎出黎睇一次！就係因為ｄ書睇左好少會再翻睇，而且唔係好多書會令我有衝動成日翻睇，所以我一向都唔係太鍾意買書！有時諗下都覺得自己呢個習慣好搞笑好奇怪，不過就咁計下丫：一本書港幣５０大元個半鐘之內睇晒，而一個月我又平均睇２５本書，單係買書上面o既洗費就係＄１２５０…呢一筆＄如果真係駛得有價值都算抵，可惜加加埋埋我都只係閱讀左唔夠４０個小時喳喎，而且我睇書不嬲都睇完就算，一合埋書連主角叫咩名都實唔記得，而且短期內又唔會翻睇喎，於是又要搵地方好好咁收起ｄ書……可想而知買書對我黎講係幾浪費+唔抵！因此，我屋企無存書係唔難明白o既，而且咁亦都解釋左點解我屋企有４張圖書証都可以借滿晒書∼因為只有圖書館先可以滿足到我呢種性格o既人！^^不過買唔買書都好啦，我都覺得閱讀係一個好o既習慣，而且唔應該為左睇而睇！每一日都keep住睇一陣書呢個習慣，不出一年半載，你就會feel到佢o既好處架喇∼:D

＊８月２日晚（六）　戀愛的方式無法拿筆來抄　也沒有規則可以取巧　＊　

想念我嗎？
只消按一下２字　我倆的心靈就可以被接通

←心水推介：晴天，她的睫毛，你聽得到，愛情懸崖，東風破

　　訓到１２點先肯落床，起身時已經唔見到細妹lu（→去左書展嘛）！今日係悠閒o既一日，感覺非常舒服∼下奏繼續整野同傾下電話咁啦，到左夜晚就坐定定睇左半場皇馬vs龍之隊。唔，我都好少可咁比心機睇一場足球賽事呢，不過絕對唔係因為睇明星架！:p 因為全日都無做ｄ咩，所以日記無野寫，哈哈∼其實我都我都幾surprise自己竟然可以少可地有恆心日日keep住寫日記∼有時個人太支力太懶，真係好唔想對住個mon打打打，都有諗過「寫少一日都無所謂啦反正都無人睇」咁架；不過通常支力同懶都係因為o個日做左好多野，而我又唔想呢ｄ野因為自己一時無左恆心就此無記載到，所以最後通常都會補打番（而呢樣野閒閒地都要打幾千字，更加需要耐性=.="）！雖然我諗開左學之後應該都唔會日日打日記架喇，不過暑假我就希望自己做到啦！^^

　　連續４晚都夢見同一個人，我諗我真係諗到癲左喇∼

晚上　眼中所見盡是狂風與閃電的蹂躪
耳朵竊聽著雷電相交著滂沱大雨的咆哮
縱使天氣有多壞
我的心卻因有著您而陽光普照　鳥語花香

　　今日返學校scan野，無上次咁忙，不過我覺得因為２位老師之間o既溝通麻麻，所以最後都唔係scan左好多相∼我諗應該仲有大把相未scan，應該仲有下次，可能仲有下下次……=.="" 不過唔緊要啦，王老師叫到，幫得就幫啦。Scan完相之後就去左搵大朋友仔食tea，之後就比佢送左我返屋企（見一見都要送，我覺得您好偉大呀…@_@）。一返到小西灣落車o個一刻時個天仲好光好明亮，不過係唔駛一分鐘之後突然烏雲密佈，日月無光，四周仲刮起一陣大風…簡直就係電視劇ｄ妖精出場時必定有o既背景咁！^^ 雖然好突然，不過我就好鍾意呢ｄ自然界o既變化，尤其係今日ｄ風好涼好舒服，仲有淡淡o既清香味道…o個時都仲覺得呢種氣味好熟悉架，點知轉頭就落起大雨，大雨到我都唔想dup雨寧願企埋一邊避下先返屋企…呢個時候先醒起……呀，係「雨」o既味道呀！每次就落雨之前同落緊雨時我都會聞到呢種味道呢，好喜歡好喜歡∼。^^。

　　晚上上網睇左銀公主o既日記之後唔知點解突然間對一套叫《藍色大門》o既台灣電影好有興趣…套戲個名好靚好特別，睇完內容簡介之後就有點想睇……睇睇下突然又再發現+留意到有套叫做《假如愛有天意》o既韓國電影，然後睇完內容簡介之後又有點想睇…以前我一向都唔鍾意睇呢ｄ好慢好平淡o既故仔架，不過由《觸不到的戀人》到《向左愛向右愛》之後我就開始對呢ｄ戲有興趣喇…講真人世間又真係有幾多轟轟烈烈，男女主角愛到要生要死o既愛情喎？淡淡o既愛淡淡o既無奈淡淡o既哀愁，有時更加能夠觸動人心。真架~^^.. 今晚又睇左一陣無記o既《律政新人王》，雖然係套戲入面 Samuel 就比林峰型ｄ靚仔ｄ，不過我就始終鍾意乖仔林峰多ｄ喇。今集劇中o既Vincent就講左句「同任何野都無關，只有sex。（←指佢同第２個女人o既關係）我鍾意o個個係你呀。（←指佢現任女友）」，對於我黎講呢句說話真係非常之難明，亦都好唔負責任。唔知係唔係我保守呢，呢ｄ咁o既觀念真係好令人費解。難道靈慾唔係應該一致架咩？男人o既構造真係難明白啊……=.=llll

　　終於同到朋友仔傾左個幾鐘電話，談到佢而家o既感情煩惱……其實經營一段感覺係需要２個人同時付出+互相深層o既溝通，學大朋友話齋，當一個唔識得居安思危，而另一個又只剩番責任同良心去維繫關係，呢段感情就真係危危乎…有時我都不禁會諗唔知有朝一日自己又會唔會好似朋友仔咁呢？我諗我同*您*都應該一樣，「唔會厭，只會支力」。但願我支力o既時候會有*您*係我身邊打打氣，當你支力時又有我幫你加加油，咁就最好。#^^#

向前看　答案尚未公佈
退後望　幸好還有您這個最強後盾

　　今日下午完成左某ｄ野，之後就hair下hair下，到左黃昏就相約左朋友仔去跑步。我地２個已經好耐無跑步+見面lu，今日一見，話題都離唔開放榜同大學…朋友仔話佢ｄ大學朋友都話大學ｄ人好虛偽，而且ｄ男仔接近女仔&對女仔好多數都係因為想同佢地XX，聽到我都覺得有點兒可怕……！世途險惡，希望我遇親o個ｄ都係好人啦……><"" 今日成日都好似無做過ｄ咩咁，全日都係度休養生息，因為聽日就係公佈聯招第一輪遴選o既結果o既大日子喇！到而家都仲唔係太識驚住，我諗聽日上網check o個下會驚好多呢。會考都係聽日放榜喇，希望所有我識得o既中５中７朋友仔都可以安然無羔，順利升學啦！　

　　連續５晚發夢見到某某之後，停左一晚琴晚又再見到…有時我都好怕自己發咁多夢可能代表訓得唔好…不過，呢個幾星期黎真係發好多好多夢，有時一晚２、３個都唔定！唔知有無人知道發夢多同睡眠o既關係係咩呢？

在淚水沾濕您衣領的一刻時
我想　世上只有您　才最明瞭我的心事
只有您　才是我最想奔往的方向

　　有時我會諗，呢個可能係神o既旨意。當我一心準備好一切踏入心儀o既大學心愛o既學系時，一個通知，一組號碼，就將我由夢想拉返現實。

拖著疲憊的身體醒來　想起的第一個念頭
就是您

　　今朝晨咁早就起身去影學生相，之後就同朋友仔去銅鑼灣唱Ｋ，然後就去左行太古城中心+吉之島。原自返到屋企仲想去跑步，不過因為太支力，最後都無去到∼呢２日都訓得好少，真係好疲倦呀！

　　全日都不停咁努力惡補有關中文大學o既知識，聽日就去註冊lu，我到呢一刻連揀咩書院都未決定好……唉準中大人，你快ｄ快ｄ決定啦∼>_<"

＊８月８日晚（五）　不要離我太遠 突然離開我視線　這個心 也會被您牽走一片　＊　

恐懼　是因為害怕失去
地理上的距離到底會令我們愈來愈疏遠
還是會令我們更加牽掛彼此？

　　今日係中大BBA註冊日，好早已經起左身換衫準備出門口，不過因為巴士難預時間，所以都係遲左少少先到紅磡，要朋友仔等我非常唔好意思∼>< 同朋友仔＆佢o既屋企人一齊坐火車去大學，一出閘join埋朋友仔o既朋友就坐穿梭巴士上去大學本部。其實今日無時無刻我都仲係唔係太接受得到我已經係中大學生呢個身份，希望係O Camp之後可以改變到我呢個想法啦。今日一去到已經要決定揀入咩書院，同朋友仔考慮左好耐諗左好耐，最後都決定共同進退放棄搏入崇基學院（因為呢個學院應該會有超多人揀，萬一我地一個入到一個入唔到就唔好啦∼）轉投新亞懷抱！雖然結果未必輪到到我地揀，不過都希望我地可以入到同一個學院啦！揀完學院就註冊，之後就填form申請學生證、報O Camp、入會、交學費……！同朋友仔一樣，大Ｏ細Ｏ我地都報晒名，之後14~17/8同21~24/8都要入營lu，非常忙碌呢！不過中大唔同其他大學咁快就有學會拉客，所以今日全日都只係得３，４個club同soc出黎拉人入會，而我呢…就同朋友仔一齊入左投資學會喇，哈哈∼真係好騎呢啊∼:p不過遲ｄ應該仲有大把學會，到時再慢慢揀啦！入埋恆生交＄，最後仲申請埋信用卡+戶口，方便第２日交學費。之後呢我地就上左穿梭巴士去左個campus tour…之前次次黎中大都係求求期期睇下就算，今日就要好留心咁認地方…中大真係超級大呀，大到我覺得要幾個月先至可以認得晒+行得晒咁多個地方！係新亞我地就落左車睇今日全校唯一開放o既宿舍----紫霞樓。可能係因為呢座宿舍係中大最新起好o既一座掛，睇落去都幾新幾靚，而且有ｄ房仲對正吐露港公路+吐露港，有１８０度無敵大海景，真係靚過示範單位呢！我如無意外都會住hall架喇，如果可以同到朋友仔一齊住埋一間房就好lu∼睇完房睇埋設備之後就離開左宿舍，之後又要行番去搭車再去番火車站。今日全日都o係烈日+拎住好多重野o既情況之下通山行，感覺自己好似去左ｄXX郊野公園路營咁，好支力啊∼如果第時夜晚無車又要返宿舍可能就要由火車站行上山…我諗長此下去身體應該會強壯好多……=.="" 離開左中大之後我就拿拿聲返屋企，因為今日真係派左好多野，所以成個下午我就坐係書檯前睇睇睇…雖然仲有好多野唔明，ｄ課程點報又唔識，亦未決定到揀咩堂，不過有好多野我都想學&有興趣讀（反而對於商科o既野就全部唔想讀…=.=llll），而且仲比我見到有ｄ堂係由李天命教授……嘩，好想讀呀！！

　　夜晚乖乖地坐係度睇皇馬對中港聯隊，上半場真係幾精彩呢∼中港聯隊最後都竟然入到２球，好surprise呀∼其實我覺得碧咸都唔係好型之嘛（Fans們唔好打我呀，純粹個人喜好喳），對我黎講好多外國人都係咁樣架啦……相反卡路士咪仲cute仲友善，施丹球技夠好啦？不過琴晚o個場我最鍾意都係港隊下半場個龍門范俊業，力保下半場一球不失真係好犀利呀，而且飛身撲球o個時仲好有型添，哈哈！∼^^

全因心有靈犀
言語上的阻礙　絕對阻止不了我們之間的溝通

　　今日訓到好晏先起身，填下form睇下VCD又一日。本來黃昏想去跑步，不過唔知點解好支力…全身都無咩力，頭暈暈又好眼訓，所以最後都決定休息一下。唔知點解自從o個日同朋友仔去左唱Ｋ之後第２日就喉嚨勁痛，之後聲都沙埋，想大聲ｄ講野都痛，情況就好似中７o個時有一次聲帶咁炎咁。琴晚我已經訓左１２個鐘，不過今日都好支力∼唔知係唔係就黎會大病一場呢？><"

一口氣為您許下了五項承諾
由今天開始　將會竭盡所能的　為您努力緊守

　　今日起身時依然覺得喉嚨好舒服，不過清況好似比之前好左少少，講野無再咁沙，但係就咳多左∼好耐都無試過病喇，次次都要病左先醒起健康有幾重要，唉∼入左大學之後一定要keep住多ｄ運動唔好成日病先得，唔係病左一個人係宿舍無人理一定好慘呢……下奏睇左周杰倫《以父之命》，《晴天》同《雙刀》o既MV，覺得佢眼細細呆呆地cool cool地，真係好型啊∼^^

　　今晚比爸爸串左２句，事緣係因為夜晚媽咪同細妹預習中４ｄ數學，咁有一條數佢２個都唔知點計，於是就黎問我。不過由於我無咩心機計，又支力支力地，所以就係咁倚寫幾個step比佢地，不過最後都計唔到。爸爸呢個時候o岩o岩係房入面出左黎，聽到我講左句「唔識呀」（←唔係好無禮貌架）＆媽咪之後o個句「你唔識！？」，於是就叫細妹要努力ｄ，唔好靠個家姐教，又話讀左咁多書都唔教下細妹，非常失敗，人地ｄ家姐呀哥又有幾好幾好（←非常質疑佢呢句，都唔知佢口中o既「人地」係指邊個…）云云…呢ｄ說話當然好難入耳啦，不過我都間中都會咁樣比佢話。其實讀書不嬲都係靠自己架喇，由細到大我讀書都好少靠人地o既，我夠無呀哥家姐教啦，ｄ數學物理化學咪又係咁樣自己讀？最多都係真係諗唔到點解同唔識先去補下習問下人o者；而家只係唔教個妹，就用「失敗」「無用」黎形容我，感覺真係好難受呀……><..

雖然只有短短的一句話
但卻足以令我決心對您死心蹋地
一生愛您一個

　　今日電腦short左，成日都上唔到網…本來係細妹開機，不過我地用盡方法都搞唔掂，於是我就叫細妹自己打電話去寬頻公司問下出左咩問題…咁當然佢就死都唔肯，情願唔用都唔打∼！唉，真係激死我啦，都１５歲架啦，打個電話都唔敢仲要靠我，咁第時我去左宿舍住時如果電腦壞mp3壞相機壞Hi-fi壞咁點好呀？我已經依賴性強架啦，細妹仲細膽過我無主見過我，真係有ｄ擔心！我諗住宿舍除左可以令我獨立ｄ之外，仲可以令埋個細妹獨立ｄ∼=.=llll 結果最後都係我打電話去問，不過搞左好耐都仲未知邊度出左問題，最終都仍然係無得上網…>< 於是就唯有整下homepage（←呢個活動倒底已經有幾耐無出現過係我o既日記入面呢？？？）打發下時間…今日o既工作就係將ｄ舊homepage o既野整理好link去新homepage，一路執就一路回憶起一年前o既自己…當時因為某件事，我寫左好多語調傷感o既文字，而家睇番雖然彷彿都仲感覺到自己當時o既無奈，不過我相信我已經再寫唔番o個ｄ感覺出黎lu。用文字記錄感覺就有呢個好處，佢可以幫我保存某一瞬間o既感覺，當我重新細看時，依然可以助我勾起回憶。我諗有時間我真係要好好咁理下我個新網頁先得，唔係我怕有一日會後悔呢。整整下homepage上網間公司ｄ人就再打黎問我而家仲上唔上到網，今次一click…咦，又得喇喎！電腦呢家野真係……＃_＃""

　　今日病情好返小小，正式由喉嚨痛變左傷風咳，所以全日都不停咁咳咳咳同呻鼻涕…呢２日飲左好多水呀，差唔多一日都有２至３公升，飲到我要不停咁去toilet呢…=.=llll 呢幾日都要留係屋企養病，真係有ｄ悶呢∼可惜我又無力無心情出街喎，病左真慘∼T^T

「你食o個隻藥chlorp…amine（←後尾查番包藥個袋，全名為Chlorpheniramine）係o岩架，同黎醫傷風，食左會眼訓架，記住食多ｄ喇！」
「哦！」
「有無飲多ｄ水呀？」
「有呀！飲左好多。」
「有無食維他命Ｃ呀？」
「食左啦！」
「咁就乖喇。」
我覺得您真係好叻叻呢，係您面前，我永遠都好似一個小朋友咁∼聽完您o既電話，唔知點解感覺上自己好似已經好番好多咁lu，哈哈。>_^..

請天上的星宿去見證我的誠意
答應了您的承諾　我一定會竭盡所能地完成的

　　今日精神好番少少，不過就咳得好犀利，而且好多鼻水，呻到鼻都紅晒…唔知趕唔趕得切係１４號前好番呢？我唔想病住入camp呀，因為入左camp一定仲支力過而家，分分鐘仲要無得訓，帶病入去好大機會會無命出番黎∼><"" 主，請保佑我快ｄ病好吧∼

　　成個下奏都落雨，突然發現自己好耐都無出過街lu…好想同朋友仔出街買野呀∼好多入大學o既野都未買呢！><

離別數天
但願您偶爾也會想想我　我便於願足矣

　　聽日就要入camp，不過因為隻錶上次漏左係大朋友仔屋企，結果今日就約左佢出黎羅返，如果唔係無錶入camp好麻煩呢！４點幾就到左灣仔買埋入camp要用o既野，之後５點就去搵大朋友仔。行左一陣之後就同佢一齊入坑口朋友仔間餐廳食飯，因為大朋友仔想我早ｄ有得休息，所以我地好早就食完飯我又好早就到返到屋企lu∼聽日８點就要去到中大集合，仲要一去就去４日３夜，所以夜晚好早就去左訓覺。希望今次個o camp會好玩啦，不過我到左今日仲病緊，而且個camp又唔知會玩埋ｄ咩遊戲喎，有ｄ擔心添∼><

【香港中文大學新亞書院商學院迎新營２００３】

↑　初相識，大家都好拘謹…

↑　熟左之後，大家都變得好癲啊…^^

↑　一流的組爸組媽！
（左起掃過去：傻傻地o既嘉慧[花]，可愛o既唐美，上面係溫柔o既Sylvia，下面係搞笑o既阿豪[影+草]，再上面係盡責小組長阿勇，佢下面就係好人o既Jacky，最右就係靚仔o既種子[草]）

姐組員篇：
NABA（新亞工管）一共有１０組，而我就係第４組，全組雖然有１４個freshmen咁多，不過就有超級多人照顧我地∼我o個組有４個組爸：阿勇組爸係小組長，識得「咬」（屈曲咁解）手指跳勁舞不在話下，份人又非常有責任感，極之照顧我地一切需要，夠晒細心又體貼，真係一流o既組爸呢！Jacky組爸亦係４日３夜入面另一個好照顧我地o既爸爸，非常隨和又任勞任怨，表演自con一幕就最為人津津樂道（可惜我竟然睇唔到，哈∼），夜晚教我地reg科揀老師，又同我地玩game，真係好開心呀！阿豪組爸雖然相對少ｄ落組，不過身為影，相信佢都好辛苦+忙碌呢∼之前見到佢染到個頭成個橙咁，仲以為佢會係ｄ好串好難相處o既人（←註：以貌取人係唔o岩架！）睇得出佢都好照顧我地，到左夜晚佢都會落組同我地玩，平時一得閒又會同我地吹下水搞下笑，一個咁有才華+幽默感o既組爸去得邊度搵呢？最後就係種子組爸，靚仔就唔駛講啦，份人又夠晒溫柔友善，而且口才好，玩MC Killer仲成日比我地當做Killer呢∼除左組爸之外，我地仲有Sylvia同唐美組媽，成日幫我地打點一切又好照顧我地組女o既起居飲食；而嘉慧組媽就非常搞笑，雖然佢身為組媽，不過真係好得意，講野又可愛，而且一到夜晚就會恰眼訓，傻下傻下又成日嘗試偷走，令到我地ｄ組仔組女都非常開心呢∼我地組仲有２個組"女麻"，一個係盈組媽一個係Zoe組媽，佢地都係義務相助返黎睇實我地，幫我地拎野潑扇安頓一切，無時無刻都照顧週到，搞到我地個個都變晒做少爺小姐咁，真係好．幸．福．呀！入到NABA第４組簡直係我o既福氣，有咁多人無條件咁照顧我地無微不至，感覺真係好似入左個大家庭，有好多個爸爸媽媽錫咁！^^ 至於組員都好好，我o個組除左有院草，仲有定力王∼其他人都好好架，我地會自發性咁dem slogan改slogan作４乘７，大家玩得埋又多野講，又夠晒團結，所以４日黎都過得好融洽愉快∼總之，NABA第４組就係最好啦∼

↑　NABA大組長+５個影，係唔係好英呢？>:)
（左起：阿豪，阿基，Wilson，大組長阿健，阿Nick，劉偉）

組長篇：
入O Camp點少得組長呀∼本來第一日入camp，見到逸夫女人腳o個度企左幾個染晒髮，樣子非常cool，貌似不良少年o既男仔企係度嗌緊slogan，心入面都有ｄ驚……「嘩，咩人黎架？？」後來先知道原來係大組長同影！NABA大組長係阿健，一頭低調o既啡色頭髮，個樣唔笑時真係幾cool架，不過笑時就有２個酒lup，都幾cute架∼^^ 除左「聲威振世上」之外，的而且確又真係「好樣高大英偉不凡　家家傳頌」∼:p 玩game時有佢係度就一定特別開心好笑，而且有佢lead住我地，NABA片人時就更加勢如破竹，而且夠晒團結∼我成日覺得細Ｏ之所以咁好玩，有個好o既大組長真係功不可沒架！除左大組長，我地仲有５個好出「色」o既影（影都係組長，不過唔係最大o個個，但又唔跟細組囉∼「影者，大組長之影也」……camp book係咁講架∼），首先要講當然係豪組爸啦∼豪組爸有一頭橙髮，佢話本來係染橙灰架，不過出左黎竟然變左橙色！身兼２職夠晒忙，不過做影佢絕對做得非常之稱職，簡直係勞苦功高呢！同呀豪都有ｄ似樣（唔講唔覺，ｄ人一講又幾覺）o既就係影Wilson，螢光粉紅o既頭髮就最顯眼，行到邊都好易認到∼^^" 佢同豪組爸跳「技安技安技安技安…」o個度真係跳得好好架，ｄ手腳都勁靈活好似甩晒骹咁，個個freshmen見到都會驚嘆不已呢！另外仲有染左黃色（金色？）頭o既影阿Nick，可能係因為佢高掛，我覺得５個影之中阿Nick個樣最惡…不過當然啦，都係樣似o者，NABA個個影其實都好好人∼影阿基就染左啡色，顏色就好似一個奇異果咁∼我地ｄ女仔等沖涼時就曾經聚埋投票邊個影最靚仔，而阿基就憑住有單眼皮同靚仔樣得到最多票數！（其實都係３、４票咁大把，我地呢ｄ絕對係小圈子選舉…）最後就到啡啡地黃黃地色頭髮o既影劉偉，朋友仔選院花時就話佢似富有柿，因為個樣似有＄仔；不過我就反而覺得佢好有書卷味（哈∼），如果染番黑個頭就仲似書生！可能因為佢戴眼鏡，個樣又斯文掛？不過佢有一晚就曾經入過黎我地房講鬼故我地聽，個故仔就一ｄ都唔恐怖，不過就足以嚇我地呢ｄ女仔∼結果o個晚佢就要走N場周圍去講鬼故，真係辛苦呢∼總括而言，大組長+影o既領導才能真係非常之高，識帶起氣氛又識帶領我地NABA所有人，入到NABA簡直就係我o既驕傲∼>:D

（未完…待續）

＊８月１８日晚（一）　請貼我的心傾聽　聽我說　愛您　＊　

想念您是真的
深愛您是真的
很快便可以相見　那份喜悅更是真的

　　今日７點半就起左身，起身o既時候唔好話帶con，我對眼連睜都睜唔大，真係非常非常疲倦！起完身換完衫之後朋友仔打黎，話佢爹地可以車埋我去中大，所以我突然仲有一個鐘空閒時間…當然我呢ｄ人跟住又走番去訓番啦∼^^" 朋友仔真係好好人呢，特登走過黎車埋我，真係非常唔好意思！原來去中大可以好快架，由小西灣如果唔兜路直接去其實半個鐘就可以到達，同去銅鑼灣其實係一樣架∼！！不過因為我無車又唔識楂車，所以坐巴士再轉火車就要成個幾鐘先可以到！唉，差好遠呢∼如果半個鐘頭就可以返到學我應該未必會住hall喇∼去完camp返到屋企都係覺得始終係屋企最好！９點就去到中大，同朋友等下傾下咁就輪到佢reg科…好彩有黎睇佢reg喳，原來好多野我都唔識填呢！差ｄ聽日又要入黎reg多次，而家識左聽日就可以係屋企自己reg lu∼^^ 睇佢reg完之後就去新亞交住宿舍o既申請表，第一次係MMW搭lift上新亞，原來真係好方便架！！入到新亞真好^^ 上到去之後就去左誠明館交表，然後就坐車落返火車站再返屋企。沿途依然好眼訓，上到巴士仲更加神智不清……返到屋企上左一陣網同大朋友仔傾左一陣電話之後就去左訓覺，由３點訓到７點，然後又繼續上網同編時間表……因為我係第２人揀科o既人，我估應該好多block都比人揀晒，唯有由頭排過晒１至１３個選擇，仲要１３個選擇都排過適合+唔撞時間o既ＰＥ同通識……真係超級麻煩呀，我足足用３個鐘，由１２點半編到３點半呢！３點半終於有得訓，不過又竟然訓唔著…（愈想自己快ｄ訓著通常愈難訓著！）最後４點幾先訓到！呀，聽日要９點幾起身架，又訓得咁少點算好？？=.="""

每天一句甜言蜜語已成習慣
但願您聽得再多也依舊不生厭

　　今日９點幾就要起身準備reg科，１０點零２２秒就login左，之後add add add咁加晒ｄ科入去…本來好想揀block 132同朋友仔一齊上堂架，不過block 132已經full左lu，second choice第 ２個sem我又揀唔到PE，所以最後唯有揀block 122，希望呢個block ｄ老師唔會太廢啦…reg完科之後hair左一陣就去左９龍灣陪大朋友仔睇《大逃殺２》，今次係我１８歲之後第一套睇o既３級片，套戲都幾血腥暴力架，而且可能係因為我未睇過《大逃殺１》，所以有ｄ野都唔清楚∼睇睇下戲戲院入面仲有個傻佬添，真係大大咁影響左睇戲o既氣氛呀！>< 結果係唔係好明o既情況之下睇完套戲，之後４圍行下後就去左大朋友仔屋企食飯，然後就返屋企lu∼返到屋企on左一陣line唔知點解好眼訓，不過最後又傾電話傾到１２點幾…自從去完camp之後訓極都補唔番喇，個人仲會不時feel到支力支力地咁…通一晚宵後果真係好嚴重呢∼∼><"

感謝您把如斯重要的東西交予我
請　讓我答應您　由今天開始
我要令您成為世界上最幸福　最快樂的人

　　今日賴床，一起身已經係十一點，刷完牙食左個蛋撻換完衫就出門口去大朋友仔屋企。本來今日我地打算去歷史博物館架，不過大朋友仔臨時話怕悶，所以最後都無去。係大朋友仔屋企留到５點就落左去食tea，之後佢就送我返屋企lu。因為聽日又要入camp，所以之後就去左買鞋…唉，好似先o岩o岩去完camp返屋企住無耐之嘛，聽日開始又要離開屋企４日３夜，又要捱夜又要通山跑喇，諗起都好好好…好支力呀！！希望今次大Ｏｄ人會好似細Ｏｄ人咁易相處，ｄ節目遊戲又會咁好玩啦∼中大，我又重投您懷抱喇∼

　　睇到朋友仔info，好鍾意朋友仔呢句說話：「國度距離不足以將兩顆相愛的心分離」。無錯，就算我同*您*之後都忙，少左見面少左通話，不過我o既心依然都會向住*您*，永遠唔變。

【香港中文大學新亞書院迎新營２００３】

↑　睇唔到我？哈，正常喎∼^^

我深信這次給您的不再是利刃　而是膠布
答應我
好好的替我撫平傷口　不要讓它再漟血　可以嗎？

　　根據「１日不見如隔３秋」&「渡日如年」o既講法，原來我已經３、４年無見過大朋友仔lu，所以今日全日就用左９個鐘黎陪佢∼^^ 雖然我有ｄ支力，全日又係hair下傾下計上下網咁，不過都好開心呢∼以後大家可能好大機會花唔起咁多時間陪對方lu，所以我真係非常珍惜呢一刻。; ]

　　O Camp終於都去晒，好快就要返學喇，唔知，我要用幾多時間先可以適應到新o既生活呢？（P.S. 仲有好多日記未寫，點算？）

想起您隔著棉被對著我大喊「我愛您」
憶起您緊握著我手告訴您有多喜歡我
此刻　依然還是會感動得熱淚盈眶

　　今朝起身hair左無耐就去左圖書館羅之前預約左o既李天命《從思考到思考之上》。其實都就返學，可能都無咩時間睇；不過難得借到，最後都去左拎。拎完書就返左St Francis幫手講talk，好耐都無返過去啦，見到朋友仔同Ms Lam真係好開心∼今日純粹係個人真實分享，雖然係臨時拉扶，之前又無夾過稿，不過都run得幾smooth，真係好！^^ 中６中７真係唔易捱，不過好快就過，所以大家要珍惜呀∼今日終於比左份禮物Ms Lam，差ｄ佢就唔肯收呢，好彩最後佢都肯要！其實Ms Lam幫左我咁多又比左咁多機會我，份禮物佢受之無慚呢∼

　　聽左朋友仔１講左有關佢o既感情問題，估唔到世界上竟然有ｄ咁騎呢+無賴o既男仔！有點兒登佢煩惱，比我係朋友仔真係話之佢死啦（←好冷血？無辦法啦…）…邊有人咁無賴架？枉佢讀左３年大學都仲咁幼稚！>:o 再聽埋朋友仔２講佢o既O Camp感情問題…突然覺得自己真係好幸福，起碼我就完全無呢ｄ煩惱∼我唔係太想像到點解相處幾日就會鍾意左一個人…或者呢ｄ叫做一見鍾情掛？我就未試過呀，不過我諗我應該都無機會試lu，哈∼聽到朋友仔個個去完o camp都帶左咁多感情煩惱返屋企，幸好我已經免疫左，唔駛煩o者∼呵呵∼（←其實係自己無條件有艷遇而已…=.="）

　　今日比老師同朋友仔話我「靚左」+「女人左」…感覺好奇怪…比人話靚左當然開心啦（其實都應該係客套說話o者…），不過「女人左」就…emm…咩叫女人左呢？唔通入左２個O camp之後我個樣真係當堂成熟/老左？？=.=lllll

　　今日抽宿結果公佈，我入左第２志願志文樓∼雖然無『５星級的家』紫霞咁新咁靚，又無180度無敵大海景，不過都ok啦∼最開心就係好多朋友仔都抽到志文，大家遲ｄ就可以做鄰居啦，好開心呢∼^^

緊握您手　依偎在您懷中流淚
流淚　原來也可以很幸福

　　今日起身之後就開始打番ｄ日記，由於２次O camp發生o既難忘野實在太多，所以打左好耐都只係打左３千字，佔全部未打o既日記o既４成左右∼>< 唉，時間一耐就開始唔記得ｄ野喇，真係好希望可以係開學之前打好晒呢∼ 打完一個上奏就出左去搵大朋友仔睇戲，我地先去左食晏，之後就特登走左去油麻地電影中心睇《假如愛有天意》。好彩仲未落畫喳，如果唔係都睇唔到套咁好o既戲！依然係好典型o既韓國片，唔賣動作唔賣搞笑，簡簡單單o既一個故仔，已經足以賺到我o既眼淚lu。個女主角做得好好呢，喊o既時候喊得好真，有時原本我都無野架喇，比佢喊一喊又真係覺得o個個位好 touching，之後自己又忍唔住流眼水…^^"" 總之好鍾意劇情，好鍾意同大朋友仔睇o既呢套戲啦∼

漫家燈火雖然燦爛
天上星象縱然吸引
卻遠遠及不上您一顰一笑耀眼

　　睇完戲我地就去搭纜車上山頂，不過因為唔識去，所以我就打比朋友仔…結果差ｄ就累大朋友仔比人鬧…真係勁無奈+心痛囉∼我決定左架喇，下次唔要靠人，我自己慢慢摸索！！去到金鐘我地就買飛上山頂，去到山頂都已經５點幾６點lu，於是我地就去左Delifrance食野…＄３０幾食得又飽風景又好４周圍又靜仲要同鍾意o既人一齊，真係物超所值呢！^^ 食完野我地就去左行商場，之後就留係最頂o個層睇火星。全晚我都唔係太睇到火星，係有一粒特別光囉，不過我又覺得佢唔多似係火星……點都好啦，可以同大朋友仔一齊，睇火星已經係次要lu∼^^ 到左１１點幾我地就坐番纜車返落去金鐘，最衰都係我啦，堅持要坐巴士，結果返到小西灣時尾班６９４已經開出左喇，仲要原來係無Ｎ６９４架，累到大朋友仔要坐小巴再轉地鐵…點知原來地鐵又已經無晒，最後大朋友仔就要坐巴士去旺角，再轉車去油塘……當我沖完涼打比佢時先知佢要咁樣轉車法，而且仲未到旺角添呀！><" 極度內疚+唔好意思+擔心，dart左落床都唔放心，最後又爬番起身打電話比佢……結果大朋友仔３點幾４點先有得訓，聽到都心痛∼

您是我生命中不可或缺的精神支柱
請您牽著我　或讓我伴著您
同一種步伐一起去走我們的人生路
走至白髮蒼蒼　走往地久天長

　　有時真係不禁會諗，有個咁愛自己o既人係身邊，人生至此，夫復何求呢？

＊８月２８日晚（四）　我看著路　夢的入口有點窄　我遇見您是最美的意外　＊　

毫不吝嗇任何機會
想念您的時候　就讓我真切的告訴您「我很想念您」吧
沒有甜言蜜語　只有真心真意

　　好疲倦，訓左５個幾鐘之後又要起身入中大∼今日係開學典禮，不過我抽唔到入邵逸夫堂睇，結果要係Lady Shaw度睇現場直播……感覺上係free ｄ，不過房入面ｄ人就好嘈，好彩我都無打算好留心咁聽ｄ人講speech o者∼睇完之後就去左茶會，撞番唐美組媽同NABA第４組o既組友仔∼其實我今日入黎中大除左係要參加開學典禮之外，仲要打白喉+破傷風加強疫苗呀！組友仔Ａ見到佢時已經打左，仲要不地咁話比我地聽唔痛架無事架咁，好似收左＄要幫手sell野……聽完組媽話其實可以走佬唔打針都無人知之後，其實我一直都諗住偷走唔打架，不過o係組友Ｎ同組友Ｅ半推半就+極度hard sell打完o既好處之下結果我都係去左排隊打針……係保健處睇（其實我無睇）左個video之後就去左打針，唔知點解我一交完卡之後轉入去打針間房時突然無晒ｄ學生…係咁o既情況之下我當然無走到入去啦（一行入去唔駛等就即刻有得打…嗯，我仲未有心理準備喎！=.=""）等等等組友Ｎ終於出現番，又有學生排係我面前，我先有番ｄ勇氣繼續排隊喳…ｄ護士好cool呢，其實如果佢地可以安撫下我，講句「唔駛驚∼」，我諗我會定好多囉…（←你當自己係小朋友呀？？）…雖然我已經成１８歲，不過都仲驚打針，打o既時候要擰個頭去另一邊唔敢睇∼><" 護士一拮支針落去，我o既感覺就係……邊個話一ｄ都唔痛架！？呃--我？>:o 之後feel到護士支針再拮入ｄ然後注射左ｄ野入去，感覺就係……好痛！真係好痛！嗚嗚∼>_<.. 唔知點解今次唔想扮堅強，以前打針呀穿耳呀打debate呀之前明明驚到死都鍾意死頂扮晒無野，而家反而喜歡做番自己…痛就嗌痛，不過就突然好似懦弱左好多咁……打針前同打針後都有打比大朋友仔，不地咁對住佢話「好驚呀！」「好痛呀∼」咁，希望佢唔覺得我好細路女啦…（←其實佢不嬲都當你係細路女……）打完針，痺住咁由本部行去火車站，之後就坐車返屋企，沿途依然睇緊最愛o既李天命著作∼返到屋企食完飯就同媽咪去左買住宿舍要用o既床單、枕頭、枕頭套、被同其他日用品。３０號就入宿啦，成日形住自己要好耐先可以帶齊晒ｄ野入去+settle好一切∼唉∼下星期１就開學喇∼點好？

　　近來發現自己聽歌o既口味轉左，新歌聽少左好多亦都唔多識唱，見到細妹個folder入面ｄ歌好多都唔識…相反，自己就聽多左好多舊歌，而且仲覺得舊歌好聽好多……哈，唔通比大朋友影響左？大朋友仔今日同左成班friend入長州過夜睇火星呀，好羨慕呢……

（P.S. 打緊呢篇野時，左手依然覺得麻痺，針窿下面禁落去仲覺得痛添…嗚∼T^T）

目送您遠去
心痛的感覺突然偷襲心頭
身與心都無可救藥地思念著您

　　今日本來約左組友仔返中大去聽講座，不過由於聽到好多人話個talk好廢，而我又唔想山長水遠入去聽o個一個鐘，所以就無去到……結果最後就上左大朋友仔屋企睇VCD，非常寫意∼晚餐我地就食公仔麵，之後去食雪糕然後就返屋企lu∼開左學之後大家應該少左時間相聚，有時真係好唔想咁快開學……不過無論點學都係要返，唯有一切都向好處諗啦……

　　我真係唔知點解自己會突然間咁唔捨得喎！或者係因為我太重視掛，愈重視一樣野愛一個人，恐懼就會愈大，亦都愈怕失去…唔知我o既表現係唔係太懦弱呢？不過，我真係唔捨得放手呀……

（P.S. 打緊呢篇野時，左手仲未痛完…嗚嗚∼T^T）

心中有您
就不再懼怕茫茫前路
戀愛路長　就讓我倆心連心一起走下去

　　今日係新生入宿日，一朝早就起身返中大抽房。我同朋友仔＆佢o既屋企人一齊入中大，之後去左志文樓放底ｄ野+羅籌後就去左NA Gym度抽房。我同朋友仔抽到514，之後返番志文就羅鎖匙入屋……一上到去，發現原來514係o係正廁所隔離……之前聽唐美組媽話過佢住過係廁所隔離，住住下就出現牆身滲水同發毛o既現象…希望唔會發生係我身上啦…><"係咁倚抹下ｄ野我地就落左NA Can食lunch，第一次係NA Can獨立地叫一個飯，味道價錢都OK，不過碟飯就真係太大喇，大到足足有３碗飯咁多呢！^^ 今朝係NA Gym見到種子組爸，係canteen又撞到Zoe組"女麻"、呀勇組爸同Jacky組爸，我仲一個唔覺意比呀勇組爸請左我飲汽水添呀，組爸真係好好人∼！（其實我都一早知啦∼:p）食完野之後返左宿舍執下野就返左屋企，而家諗番其實都唔應該咁早走，因為朋友仔同屋企人留係宿舍抹野，好大機會會幫我o個邊都抹埋，麻煩到人地真係唔好意思呢∼！黎緊呢年我有朋友仔呢個roommate真係好好彩架，因為朋友仔同佢屋企人都好客氣好順和，又好照顧人喎，可以同佢同房真係好呢∼^^ 睇黎我呢個無聊roommate一定會帶唔少麻煩比佢咯……嘿∼>:p 返到小西灣就同媽咪去左買電話同住宿舍ｄ野，之後就返屋企pack野。求求期期咁就已經執左好多野聽日要帶入宿…感覺好似搬屋……呀，聽晚就留係中大過夜喇，後日就要開學，開始新生活lu∼感覺上一切都仲好似好陌生咁，其實都仲有ｄ擔心。不過一諗起有一班老朋友仔+新朋友仔傍住，而且仲有大朋友仔遙距支持，我相信我１定搞得掂o既！

　　搬左入中大之後一兩個禮拜內應該都無電腦上網+寫日記lu，日記暫時就要告一段落，一裝左新電腦我就會寫番日記架喇∼到時再見啦∼^^

　　大學生活，我黎喇！>:D