Site hosted by Angelfire.com: Build your free website today!

a likhtikayt, a shayn

Poetry of H. Leyvik

in yedns harts

ikh veys: in yedns harts iz do
a likhtikayt, a shayn;
oyf velkher shvel du zolst nit shteyn
klap-on un gey-arayn.

un geyst-arayn, men kukt dikh on
gedoyert es nit fil:
men hot nokh dir gebenkt shoyn lang,
getroyert in der shtil.

men hot gemeynt: bist in der fremd
farvorfn ergets vayt,
un nit gevust, az du bist do
geven di gantse tsayt.

un nit gevust: bist yedn tog
gegangen farbay zey,
zikh ayngehert tsu yedns vort,
tsu yedns oysgeshrey.

host nor gedarft der ershter zayn
in hoyz tsu zey arayn,
un oyfvekn in harts bay zey
a likhtikayt, a shayn . . .

arbet zukhn

arbet zukhn zaynen mir gegangen
haltndik zikh beyde far di hent.
fintster nokh. di shtot iz zikh geshlofn,
gasn-lompn hobn zikh gebrent.

hobn mir gekukt mit beyde oygn
un in gor fil tirn zikh geklapt,
hobn zikh shoyn andere gefedert
un far zikh di arbet oysgekhapt.

zaynen mir aheym tsurik gegangen
un in hoyz tsu kumen zikh geshemt,
hobn mir gevandert iber gasn
haltndik zikh beyde far di hent.

a dorf, a dorf

a bisl geshtanen. genug,
ferd mayns, getrayer
mir muzn dokh kumen in dorf
tsu mentshn, tsu fayer.

men zet shoyn, men zet shoyn dem dorf
mit laykhtnde shoybn
du zay nor nit mid, nem zikh mut
dayn kop oyftsuheybn.

es zitsn nokh ale in dorf,
di toyern ofn.
men greyt undz getranken un shpayz,
geleger tsu shlofn.

men brengt far dir hober un hey,
di beste fun shayer . . .
hey, ferd mayns, a trot un a fli
tsu mentshn, tsu fayer.

zayt gezunt!

zayt gezunt, zayt gezunt,
morgn for ikh op;
kh'hob shoyn oyfgeneyt a zekl,
opgeshert dem kop.

. . . . . . . . . . . . . . . . . . . . . . . . . .

hob aheym avekgeshribn
shoyn dem letstn briv;
morgn vel ikh zayn shoyn vayt-vayt
ergets oyf a shif . . .

a kush

tretndik in tifn shney
iz a shlof bafaln mikh,
vi a kishn hot der shney
mikh a tsi geton tsu zikh.

zikh a neyg hob ikh geton
un geshtelt zikh oyf der kni,
nokh a mol hot mikh der shney
far di hent geton a tsi.

zikh avekgeleygt hob ikh
mit an opgedekt gezikht,
hot a laykht geton oyf mir
aza shtralndike likht.

zikh a heyb hob ikh geton
un gezogt: a gute nakht . . .
hot a kush geton mikh ver
un di oygn mir farmakht . . .

kum tsu geyn!

hob oysgeputst mayn tsimer reyn,
un likht hob ikh gekoyft,
geflokhtene in tsveyen.
der tog fargeyt, der tog antloyft,
farblaybn mir in tsveyen.

es brenen royt di vayse likht,
der tish iz klor batsoygn;
vet royt un vays zayn dayn gezikht
un fayerdik di oygn;
vest zitsn kegn mayn gezikht
mit fayerdike oygn . . .

es vet in gas farbay ver geyn
un kukn mit a vunder:
mir zaynen nont un dokh aleyn,
vi veltn tsvey bazunder
er vet avek. mit undz aleyn
geshen vet a vunder . . .

farleshn zikh dervayl di likht
un vern vert undz gringer;
vel drikn dikh tsu mayn gezikht
mit tsiterdike finger;
vel drikn zikh tsu dayn gezikht
un kushn dayne finger . . .

leyg dayn kop

leyg dayn kop oyf mayne kni,
gut azoy tsu lign,
kinder shlofn-ayn aleyn
groyse darf men vign.

kinder hobn shpilekhlekh,
shpiln ven zey viln;
groyse shpiln nor mit zikh,
muzn eybik shpiln.

hob nit moyre, ikh bin do,
vel dikh nit farshtoysn
host genug geveynt shoyn haynt,
vi es past a groysn.

ongeveynt un ongeklogt,
ikh vel dikh farvign;
leyg dayn kop oyf mayne kni
gut azoy tsu lign . . .

fremde

kum-arunter in keler
tsum flamikn vayn
un lomir vi fremde
farfremdete zayn.

bay tishlekh zikh zetsn
aleyn fun der vayt,
un varfn a kuk ven
azoy fun der zayt.

fun vayn a derfreyte
du gist mikh a ruf,
fun vayn a derfreyter
fun ort shpring ikh oyf.

ikh gey-tsu, farneyg zikh,
du shtrekst-oys dayn hant,
ikh zog dir mayn nomen
far dir nit bakant.

es loyft-durkh dayn ponem,
dos zayd fun dayn kleyd,
tseshotene funken
a freyd nokh a freyd.
. . . . . . . . . . . . . . . . . . . . . . .

mir hobn zikh keyn mol
biz itst nit gekent,
un fremde mir drikn
dernenterte hent.

es shoymt in der luftn
dos zayd fun dayn kleyd;
es dreyt zikh, es dreyt zikh
di farbike freyd . . .

Related Web Page

To return to the homepage, click here.

Email: royt@mailcity.com