LA KORDIEGO GEYAL

MONDALA LETRO DI NOVUMI* POR GEYI E LESBIANI. EN IDO, LINGUO INTERNACIONA

Numero 18 / 2-2001. Preco: Euro 0,90. Editerio Tia Libro / Postapart 33301 / 1090 PC AMSTERDAM / Nederlando / e-postal adreso: Ido.Info@chello.nl


Henri Sauguet (1901-1989)

La muziko…mea vivo

Ultre sua verkifado kom kompozisto, Henri Sauguet anke esis kritikisto di muziko e dum plus kam sisadek yari il notis per vivaca e pasionoza experta atenco, lo bon e mala di la mondo muzikala Franca. Ned Rorem deskriptas il kom "la maxim drola viro di Francia, rapid e kruela; ma kom sama-tanta satiristi, il esis l' afableso ipsa." Exter sua naskolando Francia e parti di Belgia, la muziko da Sauguet poke es konocata. Ed anke ibe la plu yuna generaciono precipue konocetas il pro la baleto 'La Feriani', sua laborado kun Diaghilev e Cocteau e pro manuedo de mikra maestraji. Ma dum sua vivo nombroza agenti, poeti, filmo-direkteri, koreografi, programifisti di radiofono e televiziono e filmagisti serchis la kunlaboro di ca mikra maestro. Pro sua intensiva intermixo en la diala praktiko di la muziko-vivo Parisana, sua klara observi di to e sua varioza verko muzikala, ca viro anke povas esar konsiderata kom 'la grand olda viro' di la muziko Franca.

Henri Sauguet naskis ye la 18ma di mayo 1901 kom Henri Pierre Poupard en Bordeaux e mortas ye la 21ma di junio 1989 en Paris, l' oficala 'Dio di la Festo di la Muziko'.

En 1916 la dekekin yari evanta Henri divenas orgenisto di la mikra parokio Floirac, direte sub Bordeaux. En 1917 la deskovro di la muziko da Debussy efektigas shoko emocala qua radikale chanjos sua experienco di muziko. Sauguet komencas kompozar. Joseph Canteloube, la kompozisto di Kansoni di Auvergne, tante impresesas da ilua unesma probaji, ke il ofras ad il serioze preparar il por la profesiono di kompozisto e til 1921 Sauguet lojas e studias che ca kompozisto en Montauban. Retroe en Bordeaux il formacas kun tri amiki 'La grupo de Tri', qua devos pulsar Bordeaux a la mondo di la nova muziko, precipue ta da 'Grupo de Sis'.

En 1922 Sauguet arivas en Paris ed introduktesas en la vivaca mondo kulturala di la Parisana intermiliteso, da Darius Milhaud, la bon-karaktera Budha-kun-la-450-verketi-numeri. Ferma amikesi kun interaltre Francis Poulenc, Georges Auric e Jean Cocteau riflorifas.

La 'Maestro di Arceuil' (o di Accueil - 'acepto' - quale mokante nomizis ilun sua kritikisti).

"Ye la 14ma di junio me havis la honoro introduktar en la Kolegio di Francia, quaropo de yuna muzikisti: Henri Cliquet-Pleyel, Roger Désormière, Maxine Jacob e Henri Sauguet. Li selektis la nomo 'Skolo di Arceuil' pro amikeso por olda habitanto di ca preurbo Parisana." Ca 'olda habitanto' es 'bona maestro' Erik Satie, qua introduktas ca yuna muzikala 'bebei' a la dorlotata publiko Parisana. Kande Satie mortas en 1925, pro grava inflamuro hepatitala, sua maxim yun amiko, Sauguet, heredas ilua povra posedaji. En la chambreto, quan habitis Satie en preurbo industriala di Paris, Arceuil-Cachan, e qua ne netigesis nek aerizesis dum multa yari, Sauguet trovas promenobastono, Angla chapelo, kelka par-uzita pipeti, paro de sordida blanka ganteti e kelka sordideta kolumi, sordida litokovrilo sur rustoza litoframo e du shancelema piani. Nur la parapluvon…"Mea parapluvo esos tre destranquila pro ke ol perdis me", komentas Satie la perdeso di sua parapluvo. Ta parapluvo restis egarata.

Baleto ed opero.

En Paris preske sen-cese fluadas kompozuri ek la plumo di Sauguet. Kom docisto il selektas Charles Koëchlin (1867-1950), granda muzikisto, granda pedagogo, ipsa lerninto di, interaltre, Jules Massenet e Gabriel Fauré e docisto di, interaltre, Darius Milhaud e Francis Poulenc. Il anke komencas skribar baleto-kompozuri. Dum la tempo aparos duadekesis peci, inter qui La Rozi (1924, dekoro da Marie Laurencin, koreografio da Georges Balanchine, debuto di Serge Lifar e l' unesma kompozuro por la Rusa Baleti komisionita da Sua Agental Alteso Serge Diaghilev ipsa), La Feriani (1945, koreografio da Roland Petit), La Renkontro (ta di la granda yuna dansisto Jean Babilée en Usano en Paris da posa Holywood-stelo Gene Kelly e partenero Leslie Caron), La Damo ye Kamelii (kun aplaudege laudata Yvette Chauviré) e La Princo e la mendikanto, qua ganas la Premio di Italia en 1957.

Pri Serge Diaghilev, amorato di interaltre Vaslav Nijinski e seque di Serge Lifar, Quentin Crisp - kalumniemego - notis, per la boko di Georges Balanchine, la sequanta anekdoto:

"Nulu kredas me, komprenende, ma pri danso Diaghilev vere savis nulo. Sua vera intereso por la baleto esis sexuala. Il ne povis tolerar Danilova e kelkafoye il dicis a me, 'elua titi vomigas me'. Ulafoye, kande me stacis apud il dum exerco di Apolo (Apollon Musagète), il dicis: 'Belege'. Me konkordis kun il, supozante ke il vizis la muziko, ma quik il korektigis me, 'No, no, me vizas la kulo di Lifar, ol similesas a rozo'."

La Plumeto di Kolonelo es l' unesma bufon-opero, qua debutas en 1924 en la Teatro di la Champs Elysées, ye la sama instanto kande Strawinski altraplase en Paris baptigas sua La Historio di la Soldato. Ca Plumeto di Kolonelo es sequata da La Kontrabaso kun libreto fondita ye Chekov. En 1937 la dek yari duranta aventuro La Kartuziano di Parma, kun libreto segun la romano da Stendhal, tandem venas sur ceneyo dil Opero-domo di Paris. La dekoron desegnas Jacques Dupont, piktisto evanta 26 yari, depos preske dek yari l' amorato e partenero di Sauguet. Yen, geyala liberigo pre-literaturala.

En 1943 l' Opero Komika montras sua La Parianto Neprevidita, segun Sedaine, ed en 1954 komencas Aix-en -Provence olua festivalo kun La Kaprici di Marianne, segun Musset. En 1978 Sauguet skriptas la partituro por komedio muzikala ye libreto segun Maupassant, Sebo-bulo ed en 1981 il kompozas, quale decas kom avulo homeosexuala sen filii - ma kun vivaca internajo infantatra, opero por infanti, Tistou la Polexo Verda segun rakonto da Maurice Druon. Ankore ne-editita es La Pano di Altri kun libreto segun Turgenye.

Orkestro ed ensemblo-verko

La verkaro muzikala da Sauguet anke kontenas plena orkestrala kompozuri: quar simfonii (inter qui Simfonio Expiacanta, l' unesma simfonio da Sauguet de 1945, kom konciliajo por l' apatio e senhelpeso dum la Nazi-dominaco), diversa poemi simfoniala, oratorii, koncerti (tri por piano, La Koncerto di Orfeo por violino, La Gardeno-Koncerto por harmoniko, La Melodio Koncertanta por violoncelo, baptita da Mstislav Rostropovich), kantati (La Vizionero, L' Ucelo por Vu Omno Es) e balado por voco ed orkestro (La Korneto, segun R. M. Rilke)

Sauguet anke skriptis muziko por diversa mikra ensembli: piano e fluto (Sonateto), piano e klarineto (Sequo), piano e saxofono (Sonato Bukolika), piano e violoncelo (Balado), du piani (La Ludo dil Amoro e di Hazardo), piano e hoboyo (Sonato en Bosko), piano e violino (Sonato Krepuskulala), kupro-quinteto (Chambro Ora), fluto, klarineto e fagoto (Trio) e plusa tri quarteti e du quinteti.

Melodii

Laste ma ne minime Sauguet kreis en sua longa vivo richa verkaro melodioza.

Sua ekonomiala, extreme melodiala stilo - fluante, precize, komplexe- e sua sincer amo por la poezio donas a multa di sua melodii l' expresiveso di poemo simfoniala. La piano nulafoye es fundajo, ma neremplasebla kontra-punto por la voco, quo es grandioze audebla en interaltre sua Vizioni Infernala, kompozita en 1948 ye la surealistala poemi da un dil intima amiki di Sauguet, Max Jacobs (1876-1944), kelkafoye sovaje humuroza, kelkafoye emocigiva tragikoza poeti (e feble Romantika piktisto), qua - en sua nebridagita homeosexualeso - esis lumoza exemplo por tam Poulenc kam Sauguet, qua lojis dum kelka yari en intima amikeso kun Pablo Piccasso en pikteyo en la famoza strado Ravignan en Montmartre e qua, de-naske juda, konvertis su oficale a la kredo katolika, quo regretinde ne povis impedar ke la naziisti kaptis il en 1944 ed ocidis il en la sama yaro en lia koncentro-kampeyo.

La muzikala e dramatoza expresebleso di la vocala verko da Sauguet es absolute komparebla a ta di un de sua maxim bona amiki, Francis Poulenc. Kun nur kom mikra difero ke Poulenc benedikesis per sua muzo Pierre Bernac, kun qua e precipue per qua il povas audigar da la mondo sua melodii.

La listo de poeti qui richigesis da Sauguet, per ali muzikala es impresiv:

Jean Cocteau, Max Jacob, Marcel Proust, André de Richaud, Jean Follain, Georges Hugnet, Louis de Vilmorin, Henri Michaux, Antoinette d'Harcourt, Marceline Desbordes-Valmore, William Cliff, Paul Valéry, Maurice Carème, Jules Laforgue, Raphaël Cluzel, Louise Labé, René LaPorte, Charles Baudelaire, Daniel Boulanger, Stéphane Mallarmé…

Ne es hazardajo ke Sauguet komencas sua verkaro muzikala en 1921 en finas en 1987 per melodio.

Adriaan Kans en Gaynews


Paul Bugadian: Ankore cent yari

"Esar geyo en Gruzia signifikas esar opresata e diskriminata dum la tota vivo." Pro to ke Paul Bugadian livis sua lando ante kin yari e nun lojas en Germania. Il esperas ke sua prego ye azilo esez aceptata. Ma joyoze lo ne aspektas, nam la situeso en sua naskolando es markizita kom sekura; ne es milito, ne es famino. "Me ne venis a Germania por vivar komode, me venis a Germania por esar kapabla vivar konforme mea inklini."

Quo por geyi en Germania sempre es komprenenda, en Gruzia ne es posibla, naracas la 37 yari evanto. La maxim multa geyi en Gruzia mariajesis e havas filii, praktike es nulu qua publike konfesas ke il es geya. Il ipsa dicas, ke il nulafoye povis disimular lo. "Me eveskis plu kam 30 yari ed ankore ne mariajesis, e la homi questioneskis su: "Quo es kun il? Kad il ne es normala?" Certe esis ilua vicini qui remarkigis il da la polico, Paul dicas. Li desfideskis, nam en ilua lojeyo preske nur esis viziti da viri. Esis l' unesma di la tri foyi ke il arestesis, naracas il. Ilua lojeyo traserchesis, revui e letri konfiskesis. Esis nula judiciala debati. Pos ke il pro la lasta foyo esis en karcero dum triadek dii e maltraktesis da ebria dejuranta policisti, Paul vendis sua lojeyo e livis Gruzia. Provizore por sempre. Por l' unesma tempo en azilerio il translojesis a Wetzlar. En Marburg il ofte es che amiko. Hike es plu lejera vivo por il, la Germani ne havas problemo pro ilua homeosexualeso. Kontrastante a sua naskolando, hike anke es plasi ube il povas renkontrar sam-inklinanti.

Retroirar a Gruzia, il ne povas imaginar to."Me esperas ke la mentaleso ibe ulafoye chanjeskos," dicas Paul. Ed adjuntas: "Ma to ankore duras centi yari." Interv. Verena Cenaj


UBE LA KORDIEGO GEYAL ES LEKTATA? (LISTO KOMPLETA)

Ghana - Ukraina - Surinam - Polonia - Chekia - Brazilia - Kuba - Nederlando - Rusia - Austria - Germania - Francia - USA - Kanada - Turkia - Japonia - Britania - Lituania- Chinia- Norvegia - Ruanda


Religio…

Mesajo e-postala:

Brian e Klaudia skribis: "Aceptez Iesu Kristo kom vua salvero"

Ho, me il aceptas, kari mea. Specale depos la Evangelio segun Markus montras a ni tanta tentanta signi pri ilua prefero sexual.

Pro quo vu supozas ke Iesu pasigis sua lasta nokto di libereso en gardeno kun yunulo nuda? Kontrolez Markus 14:51. Il postenizis la dicipuli extere kom gardisti por certigar ke li du ne esez interruptita.

Me devas dicar ke ca mikra alineo apertis mea okuli. Se vu pensas pri to, sugestiva indiko es omnube. Nia kara Iesu nulafoye mariajesis, ka ne? Fakte, il nulafoye havis relato kun muliero ecepte ye nivelo spiritala. Il cirkondis su per yuna viri, montrante prefero por le kruda-e-pronta, korpale bon-standanta tipo. Il semblas havir specala relato kun sua matro. E nun ca afero gardenala. Segun mea opiniono, Judas trahizis il pro jaluzeso.

Do yes, me 'aceptas' Iesu - same kam me probas aceptar omni - exakte pro quale li es. Inkluzante su-certa anmi quale vu ipsa.

Benedikesez, St. Loop.

GRUPO ISLAMANA KONDAMNIS ATAKI EN L' USA

Al-Fatiha, la grupo islamana GLBT, kondamnis l' ataki ye la Centro di Mondala Komerco e la Pentagono.


La fondinto di la grupo, Faisal Alam, dicis: "ni unionas a nia frati dil USA e di la mondo lamentanta la perdo di vivi e kondamnas ca tragedio":


La grupi di Al-Fatiha di la tota mondo, es realiganta sesioni di pregado specale por la vivi perdita en l' ataki di mardio la 11ma di septembro.


La grupo unionis ad altra organizuri islamana ed Araba qui kondamnas l' ataki teroristala.


Ultre la kondamno, Al-Fatiha pregis a la komuneso di GLBT ne stereotipar l' Arabi od islamani, ed alteresar pro la reperkuti qui povas eventar kontre la mondo Araba ed islamana.

Segun Reuters, ne es raporti nemediata pri l' ataki kontre l' Arabi en l' USA konektante l' atenti en Washington e Nova York.


Filmo…

TURKA GEYI EN KREUZBERG

"La vivo por geyi ne es vivo". Bili amoras sua amiko, qua kom Lola trapromenetas la geyala noktala vivo di Berlin. Ibe Lola tumultas kom dekadanta geyo sur la ceneyo. TotaMuliero. Tala la Turka machisto Bili deziras esar sua amorato dum la restanta dii. Se povus irar segun deziro sua, Lola lasus operacar su e li retroirus a Turkia, kom tote normala paro.

Lola e Bili nur es exemplo de to, quo la severa imajo di vireso, ma anke precipue l' evidenta e rigida-konserviva relato kun homeosexualeso, igas la vivo di Turka geyi omno ultre simpla. La yuna direktero Kutlug Ataman faskigis en sua filmo "Lola e Bilidikid" nombro di geyala fati. Prostitucatuli, travestieri, transexuali - to quo eventis hike en ca tre specala subkulturo di Berlin, povas apertar l' okuli di multa spektanti per astonigo. La filmo di Ataman havas charmo, kelka ecelanta aktori (interaltre teatro-stelo Inge Keller) e de tempo a tempo sufras tro-kargo pro la historieti ed agi. Enpakigita en ek-armoro-naraco e sangoza kriminago il livras remarkinda filmo, qua ne nur pro la fundo di olua temo prizentas specaleso.


Literaturo…

Kontre la borgezo

Yuna skriptisti Franca e lia repugno di la terorismo socialistala

Tanki*en la stradi di Paris. Provizita de la trikoloro Franca oli grundante iras trans la bulvardo Beaumarchais vers la centro. Supere, kontre plombea cielo, helikopteri. Quante mikra semblas la ceno che Kafeerio Bastille, ube akordeonisto perseveras malgre la bruiso e koldeso, dum ke garsono servas taso de kafeo al unesma klienti. Paris aspektas absurde, melankolioze e chagrenante ye ca Dekequaresma di Julio, la matino pos la festo.

(Notez: quale la vespero anteriora la yuni esis pleanta diski e dansanta sur la balkoni di lia apartamenti, quale pumpisterii esis sorcita en balo-saloni.)

Forsan Mehdi Belhaj Kacem sufras pos-ebriala doloro, e forsan il es tro tarda pro to. O forsan il ja livis. Ni ne konsentis pri rikonoco-signo. Quale skriptisto kun nomo Araba aspektos, qua deskriptis per inferno de vorti sur deketri pagini, quale sentas tre drogizite experiencar haus-festo en abandonita fabrikerio di stalo, qua sablo-spricas per muziko e kemiaji la korpo, kapo e membri, til nur restas la nervi kom vunduri aperta?

Nord-Afrikano qua sidas sole an tableto kapo-signifas: no, il ne nomesas Mehdi.

Quarimo ante dekedu kloki tenua yunulo enmarchas la kafeerio. Il geras* nigra deskoloreskinta kamizo qua nonchalante pendas sur la nigra jinzo*. Cirkum sua karpo il havas dina ora braceleto. Stopli trahizas ke il razis su hastoze. Il presas mea manuo. "Mehdi. Pardonez me, me obliviis adjustigar la vekigilo".

Dum du hori il esos parolanta, murmuranta, flexante adavane, drinketante de sua expreso, tremante. En sua diskurso Kierkegaard renkontras La Velvet Underground, Artaud es konektata al anarkio Berlinana di Einstürzende Neubauten. Kin librin la 27 yari evanta Mehdi skriptis por mikra editerio. Quankam nur es vendata kelka mili - pri sur-merkatigo il ne okupas - il es kulto-heroo por yuna Parisani. 'Me skribas pri subkulturi. Ma me ne uzas lia en-moda linguo. Me skribas quale se koncernas la korto di Louis XIV, per termini aristokratala. Me deziras krear vere alternativa literaturo, nova sub-tero.'

Ulatempe meceno okupis pri Mehdi, nun il vivas de 'karitateso'. Kelkafoye il manjas nulo. Ilua romanon 'L'Antéforme' il skribis izolite en rurala vilajeto, vivante per hashisho-sigareti, nigra kafeo e la triphopo da Tricky.

(Notez: quale Mehdi ajile saltas trans la fenceto di la metropolitano. Il havas anciena identesokarto en kazo di kontrolo.)

Duadekequar hori plu tarde: Vincent Ravalec en Chao-Ba an la Placo Pigalle, ube prostitucatini per remarkinda perseveremeso probas pulsar tu aden sexuoklubi. Chao-Ba es la sorto di taverno ube la moblaro e la klientaro semblas esar kovrata per extreme dina strato de cindro. Ravalec (38) arivas exakte ye korekta tempo, parolas la Franca tre klara e havas nula problemi pri sur-merkatigo. 'Me dicas 'yes' ye preske omno.' Ma same kam Mehdi il es stranjeta. En skolo il nur perseveris til la triesma klaso, pose il divenis karpentisto. Il vagis tra Paris, registragis perversaji, la solitareso, la per cindro kovrita taverni. Ed il notadis. Ante non yari il skriptis sua unesma libro. Intertempe il ja skriptis dekesis, kun tota vendo de triacent-mil exempleri. Ultre to, il skribis du vendosucesi por Johnny Halliday e produktis filmo.

La rakonti da Ravalec havas koloro, karakteri ed intrigo. La protagonisti es moderna friponi qui probas transvivar en la kaoso di la granda urbo. On povas komprar la maxim multa libri da Ravalec ye cirkum 2,50 euri po titulo. Sur la dopajo es skribita, kom ula rekomendo: "Nova Generaciono".

(Notez: quale amikino Parisana, 36, dicas absolute ne esar interesata pri omna ta trubli di ta moderna skriptisti, el mankas la komplexeso.)

Tam Mehdi kam Ravalec es konsiderata kom apartenant a la Nova Generaciono, la maxim nova generaciono de skriptisti Franca, qua abandonis la klisho di la skriptisto kom intelektuelo sinistra qua literaturale-politikale diskutas, la Libération sub la brakio, kun sam-opinionanti, en kafeerio De Flore. Ca generaciono edukesis en socio rapide deskoloreskinta kun punko, tekno e hiphopo, kun drogi kemiala, interreto e SIDA. Li odias la borgezo di la yari sisadekala qua ankore es dominacanta. Ne la Franca skriptisto-filozofo Bernard-Henri Lévi es lia heroo, ma l' Usana skriptisto-nihilisto Bret Easton Ellis. Lia maxim forta milit-ago: Les Participules élémentaires da Michel Houellebecq, pro la falsa aquiraji di la revoluciono sexuala, e l' filmigo di la romano da Virginie Despentes Baise-Moi (Futuez* Me) intertempe ekcirkuligita pro pornografieso e violenteso. (Notez: quale en megabutiko Virgin an la Champs Elysées Usana Psikopato da Ellis ankore trovesas sur la tabli di vendosucesi. Quale nun omni absolute volas vidar Baise-Moi.)

"Ni skribas kontre la terorismo socialistala, kontre la generacionani di la bebe-augmento qui chipe vendis lia ideali", dicas Guillaume Dustan, 35 yari evanta. Ultre skriptisto di quar romani, il anke es gey-aktivisto, seropozitiva, editero. Il geras* kamuflajo-pantalono, similesas a Michael Stipe di REM. "Li volas nur audar pri Auschwitz. Li es kontre la legaligo di drogi, li es homeosexualo-foba e rasista. Ni es implikita en enorma konflikto generacionala.

Dustan mencionas la tri importanta literaturala influi por la Nova Generaciono: l' Usana eskombro-kulturo, Bret Easton Ellis e Marguerite Duras. "Yes, Duras. Nam el ruptis kun ta psiko-analizanta, deskriptanta rakonto-modo qua es populara. Ni 'espelis' Duras. Ni kompris elua libri direte pos imprimo. El apertis la pordi por skriptisti qui ne povis skribar segun l' anciena definuri."

Il manjas karno. Lore: "Nun es tri nomi qui importas. Skribez li: Despentes, Ravalec e Houellebecq, qua kom unesma skribis pri nia mondo di experienco. La resto es tepida urino. Por me nur literaturo extremistala es interesanta. Me skribas libri repugnanta pri mea propra vivo, qui anke ne aceptesas da geyachi. Koncernas sexuo, drogi e la korpo."

Ho, laudokanto ye l' eskapismo. "Certe yes! Depos la yari sepedekala eskapismo es l' unika maniero por praktikar politiko. Noktoklubi es la lasta plasi por publikigar sociala kritiko. Me kredas en nova paradigmo por la socio. Un: sexuo, drogi e muziko, pro ke ti forprenas omna inhibiti. Du: l' explozigo di la familio tradicionala. Tri: nova docomodelo."

(Notez: Quale la garsono traktas ni desprizante.)

Komprenende, anke la litanio supre-mencionita es plena de generalaji. Pos semano en Paris, paroladi dum multa hori kun skriptisti ed editerii, lektado, l' exploro di omna decanta kafeerii e suspektinda quarteri, remarkinda es la manko di kohero. On ne povas parolar pri 'ceno'. L' editerii ya ankore koncentras en St. Germain e jaluzigas l' un l' altra per nova deskovraji, ma la skriptisti lojas lontane l' un del altra, kelkafoye, kelke, ofte tote ne konocas l' un l' altra o la verko dil un l' altra. Kafeerii literaturala es pasinta, rajuntita da la televiziono.

Saturdio-dimeze, kafeerio Select an la bulvardo di Montparnasse, olima renkontreyo por skriptisti e filozofi. La yuna pala muliero en l' angulo agitas la manuo. Anke Lorette Nobécourt (31) apartenas a la Nova Generaciono. Se Dustan es la megafono di ta movemento, lore el es l' okulo qua timide celas dop loklo. Kande el esis infanto, el deziris esar regulierino. "Es la granda maskado", el dicas pri la multa certeso per qua la nova skriptisto es lansata. "Me opinionas ta cirkumajo absolute ne-interesanta. Me facis por la reklamado di mea tri libri to quon me devis facar, nun suficas. Nur es poka nova skriptisti qui reale facas ulo pri la linguo."

Ya Nobécourt. En elua maxim konocata libro, L' Equarrissage (La Senpeligo), publisita en elua tomo Dix, el traktas la vivo kom bucherio, kom mashino qua pulpigas la karno homa. El deskriptas ulu ye la bordo di su-ocido. Parte es autobiografiala. Ecepte la 'me', ne es altra personaji en la libro, ne es intrigo. Es dialogo interna pri la korpo, qua semblas esar skribita de la centrala nervaro. La stilo es elipsala, klaustrofobiala.. La rakonto, qua dicas tam multe pri la 'me' kam pri la socio en qua ta 'me' mustas funcionar, lasas la lekinto krampifanta.

Por Nobécourt la linguo es transvivar, maniero por luktar nedefinebla sufrado. El ne interesas pri haus-muziko, drogi o Bret Easton Ellis. Elua genitorala domo ne havis radiofono nek televiziono. Elua mondo di experienco koncernas la vorto. "Omna texti di la granda skriptisti es uzebla. Dostoyevski, Lobo Antunes, Artaud, Bataille, Céline, Proust", el mencionas li. El es ignorema koncernante la nihilismo qua exultigas elua kolegi. "Houellebecq es interesanta skriptisto pro ke il montras a ni quo misstandas sexuale kun nia socio. Ma por me il es l' absoluta enemiko. Se on lektis ilua verko, on maxim multe deziras eksaltar la fenestro. Me havas enorma kredo ye la vivo. Ni travivis duamil yari de mentiuri. Ma ni timas paruzar nia povo por vivo."

En elua unesma libro, La Démangeaison (La Prurito) el skribas pri ekzemo qua igas eterna extero di la protagonisto. Anke autobiografiala. El aspektas remarkinde bone. "Me laboras pri me ipsa", el ridetas. "Nun me aspektas tranquile, to es plu bona. Koncernas to ke on trovas la justa …, quale on dicas lo, ping, tono che su ipsa. Lore on anke trovas la justa tono che altri." Kelke plu tarde: "Es same kam che termo-krucho. De extere ol aspektas integre, de interne ol es frakasita."

(Notez: quale el, kande la kaseto-registragilo es ekswichita, el naracas ke L' Equarrissage erste finis tre obskure, ma ke el vekis la nokto ante la redakto-limito e decidis finar lo esperoze.)

Che omni qui es apartenanta a la Nova Generaciono la 'me' es centrala. Ka to kontas kom faktoro ligiva? Apene. Quale remarkas editisto: Franci ya luktas dum multa yarcenti pri lia ego. Precipue la diferi es remarkinda, segun stilo e temo-selekto. Kelki, quala Virginie (Baise-Moi) Despentes, cherpas inspiro de la quarterachi cirkum Barbés e Pigalle. Altri, inter qui Marie Desplechin, deskriptas la problemi di la moderna muliero. Dustan skribas pri sexuo (od impotenteso) pro influo di drogi en e cirkum la noktoklubi, du ke Mehdi e Nobécourt exploras la korpo. Kurte, la Nova Generaciono es exakte to, aparo demografiala.

Anke ne es justa. La litanio di Dustan kontre l' anciena generaciono ya certe es valida, dicas Olivier Cohen. La 50 yari evanta direktisto di editerio D' Olivier komparas la literaturala establisuro de ante dek yari kun peco de glacio qua semblas esar tre fixa. L' anciena trupo, ti qui havis lia somito dum la yari sisadekala e sepadekala, dominacis. Literaturo Franca havis ulo elevita, militago intelektuela, quan on nur entamis se on esis tre erudita. "Nulu expektis ulo nova. Ma meze la yari nonadekala subite nova nomi apareskis. Esis grandioza kaoso. La glacio krakis", ridas Cohen.

Dop il es libri qui aparos en septembro che D' Olivier, preske omna da la manuo di yuna skriptisti. "Kelka nova skriptisti es bona, altri dramatoze mala e ti nur vendesas bone pro ke oli es enmoda. Ma por omni la skriptado es liberigo. Lia inspiro es la vivo, ne la literaturo. Li lektis tre altra libri kam lia plu olda frati. Multe plu exterlandana, moderna idei. Dankez deo! Me timis ke la Franca divenus linguo mortinta, quala la Latina o la Greka."

Cohen ne deziras parolar pri nova generaciono. "Multe plu es nova spirito, nam l' evi tre interdiferas. La quaradek-evanti unionis kun la duadek-evanti. Es komparebla kun to quon on vidis dum la yari okadekala en Anglia, kun l' acenso di Martin Amis ed Irvin Welsh, qui interdiferas non yari di evo, ma ambe es la produkto di Thatcher e la Sex Pistols."

La voyajo per l' Eurostelo a London duras quar hori. En Waterloo-staciono abundas la Franca acesoraji. Segun testi kom revui importanta quala The Face, yuna Londonani opinionas Paris kom la somito di stilo; la vestomodo da Gaultier, la muziko da Air e Daftpunk, futbalisti quala Cantona e Desailly. E segun Georgia de Chamberet, anke oportas adjuntar la literaturo. De Chamberet - artistala matro Britaniana, extravaganta patro Franca - kompozis la tomo XCiTés, antologio de recenta literaturo fiktiva e ne-fiktiva por la merkato Angla-linguala. La koncepto es enmoda, la titulo referas a drogi, extercentrala quarteri ed eciteso. Omni qui es importanta, es aceptita en la tomo: Desplechin, Despentes, Houellebecq, Mehdi, Nobécourt, Ravalec, Mounsi.

Ma por montrar ke literaturo ne plu es l' amuzo di la borgezo olimala, anke insertesis raportajo pri extreme-dextra, peco ek la cenaro di la depresivigiva quarteracho-filmo La Haine (L' Odio), rakonto pri l' etnala e homeosexuala radiki di la Franca subterala muziko ed interviuvo kun la negra futbalisto Desailly. "Es libro kun strati", dicas De Chamberet. "Ol devis esar reprezentiva por la prezenta kulturo Franca. Ta es multikulturala. Do apud skriptisti anke sporto, muziko e politiko. Me volis donar altra imajo de Francia".

L' Eurostelo vehas tra la nordala pre-urbaro di Paris, alonge la lojo-turmi betona en qui, depos la yari sepadekala, la migrinti es hemizita. Ye apene duima horo de la Quartero Latina, on trovesas en komplete altra mondo. En kelka quarteri la polico refuzas plu surveyar. Infama es Argenteuil, St.-Denis e Nanterre. Hike naskis la Franca hiphopo, intertempe kreskinta a miliono-industrio. E pos cirkum dek yari hike komencos nova Franca literaturo, auguras Mounsi, skriptisto/muzikisto de Aljeriana origino, qua es laudata en XciTés kom 'La Kozo Reala'.

La 49 yari evanta Mounsi venis a Paris en 1955. Il edukesis en Nanterre. Ilua iliterata patro laboris che Renault e komencis drinkar alkoholaji. Mounsi cesis sua skol-edukado ed iris 'survoye'; Barbés, Marseille, uzurpita domi. Ye sua deketriesma evo il 'konoceskis' la judicio, ed il lektis sua unesma libro, la detektivo La Reine des pommes, dal Usana negra Chester Himes. "Me vidis la similesi inter Nanterre e Harlem. E me vidis ke on povas esar enkarcerigita e tamen divenar skriptisto."

Intertempe Mounsi editis kin romani ed ensayo che la famoza editerio Stock. "Literaturo es fuorto, sakra por la Franci. On devas furtive enirar. Mea unesma libro esis editita en 1990. Lore l' editerii esis interesita unesma-foye por audar la naraci da dekedu yari evanta ocidinti de la pre-urbaro." Dankez la harda realeso e la tempo dil edito, anke Mounsi recevis l' etiketo Nova Generaciono.

Il inflas sua vangi. "Pfff. Por me ta tota Nova Generaciono es ulo tipala Franca. Me sentas multe plu ligita a la marginali Usana quala James Baldwin e Hubert Selby jr. kam a Despontes o Houellebecq. La Franca skriptisti probas imitar quale li pensas ke ni vivas. Li es, or, li restas dandii Parisana. Se me kunportas li a la pre-urbaro, li ja timeskas en la treno. Ta nihilismo es morbo di la borgezo Franca. Li sidas avan lia televiziono e dicas: "Ho, quante male me sentas." Quo es tante revolucionala pri ta nova skriptisti? Céline ja rakontis lo sama en la yari triadekala. Se me lektas Houellebecq, me audas Sartre e Camus. Se me lektas Despontes, me devas pensar pri De Sade, centople plu shokiva. Omni partoprenas la cirko literaturala, li aceptas la sistemo. Literaturo nur es sencoza se on skribas kontre la fixeskinta valori."

(Pos-skriburo: Mounsi nur es parte justa. Omna interviuvita skriptisti es marginali. Li luktas socio qua koncernas konsumado e konformigado. To quon li havas komuna es ke li probas registragar la kaoso dop la reguli e la vakueso dop la reklamo-tabeli. Notez: Quale la Nova Generaciono es fingajo, ma ya existas).


KONTAKTO!

Ghanano solicitas geya amiki. Me deziras havar geya amiki en vua lando ed mondo-vasta por korespondar, interkambiar letri e nudeso-fotografuri. Me prizas muziko, posto, sporto, e nudeso-fotografuri. Voluntez sendar fotografuri. Skribez balde. Nr. 18-1.

KONTAKTO

Me es extreme beleta atraktiva Ghanana yunulo evanta 20 yari, deziras renkontrar kun viro por longa-duranta ferma relato. Me es tenua, romantikoza, sorgema, liberale pensanta, larja intereso, honesta, sincera, fidela, respektoza, komprenema e havas bona sento di humuro. Interesato mustas skribar letro kun fotografuri. Me esperas ke mea modesta solicito favoroze konsideresos. Skribez a: Nr. 18-2

KONTAKTO

Me es yuna Ghanana yunulo evanta 23 yari, serchanta virala amikeso en vua lando e mondo-vasta. Se vu es interesata, nula tempo disipesez. Skribez a: Nr. 18-3

KONTAKTO

Me es Ghanano. Me es utiligas vua servo por serchar gey e lesbian amiki. Yen mea personal informi. Profesiono: buchisto. Alteso: 1, 70 metri. Hobii: lektar, filmi, spektar televiziono, korespondar, edc. Pezo: 160 pundi. Nr. 18-4

KONTAKTO

Me es 100% geya yunulo de Ghana evanta 21 yari, haroza korpo, granda picho, mea anuso plene harizita, perfekte en sexuo e havas multa amor-experienci. Me deziras renkontrar afabla ardoroza viro por longa-duranta relato. Okupo: studento e geyesar. Hobii: natar, dansar, muziko, voyajar, sporti, geyeso, amuzanta fotografuri. Voluntez skribar a: Nr. 18-5.

KONTAKTO

Me es extreme afabla Ghanana yuna geya viro evanta 22 yari qua deziras renkontrar irga geya viro de irga evo por longa-duranta relato. Me es tenua, fidela, atraktiva, liberale pensanta, fiera e perfekte buganta. Me deziras interkambiar belega nudeso-fotografuri. Omna letri aceptesos quik pos livreso. Nr. 18-6.


REKLAMO

Dictionnaire Française-Ido, L. de Beaufront & L. Couturat DM 58,65 / 29,95 Euri

Afrankuro es inkluzita

demandez condition du acquisition a:

Germana Ido-Societo, Thüringer Strasse 3,

37284 Waldkappel, tel. 05656 - 634, fax. 05656 - 1812


LKG-arkivo per l' Elektronala Revueyo di Frank Kasper.

http://www.elektrona-idorevueyo.purespace.de
O per l' adresolisto de Ido-revui:

https://www.angelfire.com/id/Avance/REVUI.html

Elektronala Forumo por gey- e lesbian Idisti:

geylesidist-subscribe@eGroups.com . Por desabonar:

geylesidist-unsubscribe@eGroups.com .


REKLAMO

L E T R O I N T E R N A C I O N A

revuo pri filozofio, nutrivi salubra, Budhismo, esoterismo, edc. Sendez 20 franki Franca o 5 Int. Kup.-i di Resp. a:

Jean Martignon, 12 Rue Maurice Utrillo, F-91600 Savigny sur Orge, Francia

REKLAMO

PROGRESO

L' ofical organo dil Uniono por la Linguo Internaciona (Ido)

Groen van Prinstererstraat 51-2

1051 EJ Amsterdam, Nederlando


REKLAMO

LA SUNO DI TIAHUANAKO

Noveleto da G. T. Romanin

Cienco-fiktivajo pri l' origino e destino di nia planeto. Preco: 5 Internac. Kuponi di Respondo.

Komendez che:

Sro. J. Martignon

12, Rue Maurice Utrillo

F-91600 Savigny-sur-Orge

Francia


REKLAMO

nova libro:

"LA SPEGULO GRANDA"

novelo da

MOHAMMED MRABET

frenezieso, hororo e fantazio

Euri 4,55 / US$ 5 (o sendez pekunio-bilieto di vua nacionala etalono, se nur es l' equivalanta sumo)
Editerio Tia Libro, postapart 33301, 1090 PC Amsterdam

 


K o l o f o n o


Editero responsebla:

H. Stuifbergen

Kooperanti

Alexandro la Granda

Henny Brandhorst

Agnes

Arnoldo di Ocitania

Albert Smith

La Mediko Turka

Abono

Yarale, 4 numeri ƒ. 10,-- / Euri 4,55 / $ 5.-

Od: 7 Internaciona Kuponi di Respondo

Jiro-konto 5772654 ye nomo di H. Stuifbergen

Amsterdam

Gratuita por ti qui ne povas pagar ol.

Reklamo-tarifi

1/1 pagino ƒ 100,--

½ pagino ƒ 50,--

¼ pagino ƒ 25,--

1/8 pagino ƒ 12,50

kovropagino = duopla tarifi, plu granda kam 1/2 pagino ne es posibla

Anunci = gratuita

Por plusa informo pri Ido, omna lingui

http://members.tripod.com./~avancigado

Retal arkivo di La Kordiego Geyal:

https://www.angelfire.com/id/Avance/LKGarkivo.html