Stofnfundur

félags áhugamanna um varðveislu Kópness

Fundur var settur í Rósubúð í húsi Björgunarsveitarinnar Dagrenningar á Hólmavík föstudaginn 12 des 2003 og hófst kl: 17:00.

Mættir voru: Sævar Benediktsson, Eysteinn Gunnarsson, Ingimundur Pálsson og Jóhann Björn Arngrímsson.

Eftirfarandi dagskrá liggur fyrir fundinum:

1. Fundur settur

2. Fundarstjóri og fundarritari skipaðir

3. Sagt frá tildrögum stofnunarinnar og fyrirhuguðum verkefnum. Umræður.

4. Kosið um stofnun félagsins.

5. Tillaga að lögum kynnt. Kosið um lög.

6. Kosningar. Stjórn og skoðunarmenn.

7. Önnur mál

1. Eysteinn setti fundinn og bauð fundarmenn velkomna. Hann færði félaginu fundargerðarbók að gjöf ásamt 9.200 krónum fyrir hönd afkomenda Hólmfríðar Jónsdóttur og Trausta Sveinsonar en þetta er afgangur frá ættarmóti þessa leggs sem haldin var á Sævangi og Kópnesi 2001 í tilefni af hundrað ár voru frá fæðingu Hólmfríðar Jónsdóttur.
2. Eysteinn kom með þá tillögu að Sævar Benediktsson yrði fundarstjóri og var það samþykkt. Sævar kom með þá tillögu að Eysteinn Gunnarsson yrði fundarritari og var það samþykkt.
3. Sævar tók þá við fundarstjórn og sagði í stuttu máli frá tildrögum á stofnun félagsins. Fyrir tveimur árum var haldinn óformlegur fundur áhugamanna á Hólmavík um það hvort ekki væri þess vert að reyna að halda við húsunum á Kópnesi á Hólmavík. Fundurinn var haldinn á heimili Brynju Guðlaugsdóttur en hún býr í húsinu sem Þorkell Jónsson  bjó í áratugum saman á Kópnesi og síðar systkyni hans Hólmfríður og Finnur og svo eftir að Finnur fell frá, Guðlaugur Traustason með móður sinni. Höfðu því fundarmenn góða yfirsýn yfir það verk sem framundan var því að Kópnesbærinn var í augsýn hinum megin við veginn. Flestir fundargestana á þessum fundi voru afkomendur Helgu Tómasdóttur og Jóns Árnasonar ásamt nokkrum öðrum áhugasömum um verkefnið. Á þessum fundi var kosin undirbúningsnefnd til að undirbúa stofnun félagsins, og einnig til að reyna að finna fjármagn til að fjármagna verkefnið. Í hana voru kosin Sævar Benediktsson Brynja Guðlaugsdóttir og Jóhann Björn Arngrímsson. Sótt var um styrk til Húsfriðunarsjóðs á síðasta ári en afgreiðslu hans var frestað. Þessi umsókn var endurnýjuð fyrir þetta ár og á eftir að koma í ljós hvernig henni reiðir af. Undirbúningsnefndin fór einnig í það verkefni að útbúa afsalsbréf til þeirra sem þau töldu að ættu húsin til að tryggja það að félagið sem slíkt eignaðist Kópnesið og hefði því  fullan og óskiptan eignarétt yfir þeim. Með þessum afsalspappír var einnig umsóknar eyðublöð fyrir þá sem áhuga hefðu því að gerast  félagar í væntanlegu félagi. Þetta verk gekk vel  og voru því sem næst allir búnir að samþykkja að félagið eignaðist húsin. Sýslumaður Strandamanna var heimsóttur til að afla gagna um eignarhald á húsunum í gegnum þinglýsingarvottorð, kom þá í ljós að engin göng eru að finna um þessi hús hvorki að Helga Tómasdóttir og Jón Árnason  hefðu átt húsin né að nokkur annar hafi nokkurntíma átt þau. Samkvæmt ráðleggingum sýslumanns verður því næsta verkefni nýrrar stjórnar að ráða lögfræðing til að gera kröfu fyrir félagið um að eignast húsin. Verður það gert með að auglýsa í Lögbyrtingarblaðið að félagið geri kröfu í að eignast húsin og þeir sem telji sig eiga húsin gefi sig fram ef þeir eru ósammála eignakröfunni. Þetta verður að fara lögformlega fram og eftir settum reglum þanig að rétt sé að þessu staðið.
4. Kosið var um stofnun félagsins og var samþykkt samhljóða. Stofnfélagar í félaginu eru þeir sem nú þegar hafa skráð sig og einnig þeir sem skrá sig eigi síðar en 12 des 2004. (STOFNFÉLAGASKRÁ)
5. Jóhann Björn Arngrímsson las upp tillögu að lögum fyrir félagið (LÖG FÉLAGSINS) og voru þau samþykkt smhljóða
6. Kosning stjórnar. Jóhann Björn kom með tillögu um að næsta stjórn yrði þannig skipuð Sævar Benediktsson formaður Eysteinn Gunnarsson ritari og Ingimundur Pálsson gjaldkeri og var það samþykkt. Í varastjórn voru kjörin Brynja Guðlaugsdóttir, Jónína Pálsdóttir og Helga L. Arngrímsdóttir. Skoðunarmenn reikninga voru kjörnir Jóhann Björn Arngrímsson og Vignir Örn Pálsson.
7. Önnur mál. Fjallað var um félagsgjöld, var það samdóma álita að félagsgjöld mættu ekki vera það há að þau fældu frá, en þó það há að einhvað væri hægt að gera fyrir þau. Varð því lögð fram sú tillaga að félagsgjöldin yrðu 1000 kr á ári og var það samþykkt samhljóða.  Lagt var til að stjórnin réði lögfræðing til að annast það sem þarf að gera til að félagið eignist húsin á Kópnesi og leitað verði allra möguleika til fjáröflunar til að standa að uppbygginguni á Kópnesinu. Einnig verði gengið frá málum við sveitarfélagið um lóð og lóðaréttindi með það að markmiði að sem minnstu verði breytt í umhverfi húsana og að túnbletturinn sem húsin standa á tilheyri félaginu og að fjaran neðan við húsin verði friðuð og látin ósnert.

 Fleira ekki tekið fyrirog fundi slitið kl: 18:40

 Sævar Benediktsson                 Eysteinn Gunnarsson                 Ingimundur Pálsson                   Jóhann Björn Arngrímsson

                                    Sign                                          Sign                                          Sign                                          Sign