L'alzicro de los magarabis
(N'alchamía)
L'alzicro de los magarabis, seyerá sempre una cosa bisto pol punto de la bista estóricamente dito, uno bisto polos oyos dun crestiyano de l'alcurnía espanyola quin fió ensenato l'estória pol crestiyano espanyolo! E l'altra, polos oyos dun muçulmano mudéxar o moresco de l'alcurnía d'Al Andalus, enterato de seu estória, estória islâmica pol mudéxar o moresco muçulmano. Por multos anos la connotaçión "magarabis," fió halacato e despós ensenato a l'espanyolo e latino-americano de quin él endotrinó en seu relixión, lingua, e sob de tót estória! Como multos muçulmanos conozen naturalmente, la connotaçión "magarabis," moryego o n'árabi, "Al baladiyyun, baidun," semnificó los albalítos. E moryego semnificó moreno ed atiçato. Aquesta connotaçión xamás fió empregato polos magarabis pa riés. En reyalitá elos xamaron-se elos mesmos non polos nommes de sólamente árabis, berberis, ma embéga elos xamaron-se, "muslemin o al mu'menin al mutwattah!" (muçulmanos o creyentes del camíno reito!) Por l'estória de la crestiyanitá espanyola, los magarabis fieron bisto como xente atraçata sen l'educaçión ed analfabeta. Que irónico, que anos despós l'inquisiçión espanyola concluyería aqueste terríbel aguëro! Alos rexinos espanyolos d'Espanya en particular Casteya ed Aragón, los magarabis fieron bisto como embasores ed una amenaça pa seu poder e monarquías cadaguno.
Que estranyo fió que en çertas instançias en l'estória espanyola fieron los magarabis quasi maçaguítos, quines beneron a l'ayuta de los espanyolos dembéga pa acafar la brutalitá de los romanos e despós los bezígotos! Áquesto ye una cosa de lo que non fió dito multo pa riés, polos rexinos crestiyanos d'Espanya, ne seiga ançá aqueste díya ammitito, pola presunçión del moderano crestiyano ne estóriador espanyolo. Lo que ha sesto dito nelos libros de l'estória espanyola, fió que los magarabis los feréticos ed infideles elos fieron xamatos polos espanyolos crestiyanos, quines halibaron seus populaçiones col preteito d'ahazilar una ferética e falsa relixión e raçúl de quin pa nosaltros él fió Muh'ammad! Áquelos quines atabaron aquesta relixión fieron xamatos "mahometanos!" Pa elos el bestuario magarabí fió xufato como un siengál de los paganos e feréticos, ma ayánda en tempo multos de los crestiyanos espanyolos los "mozarábis," ed altros, imitaron ed aztimilaron el bestuario od alhuríto magarabi. Los magarabis traxeron ad Espanya en l'anos que atabaron o segueron por medio de los turcos el h'ammam od el banyo turco ed l’alhuétu, la purificaçión muçulmana po l’ácqua, que fió bisto como despós polas instalaçiones de multas marabelosas fontes d'ácqua e nuobos impostos canares, como una forma de prazer e relaxaçión, polos crestiyanos. Elos rescabiyeron-se de l'espadença magarabíya, ma ayánda en l'inquisiçión espanyola nelas Américas, fió l'espadença ed el cabalo árabi, que los derixió ayemde el musquete nel mondo nuobo. A l'espanyolo crestiyano los magarabis, fieron udiato e xufato como xente duna sozietá atraçata ma en tempo, elos últimamente açeitaron la bita d'ahamar, çiençia, e sob de tót nabegaçión tamién tanto como multos altros aspeitos de los magarabis. Elos beyeron a los alimas magarabis, como inferiores a los suyos. Escretores tal como ‘Ibn Rushd, ‘Ibn Sina, Al Ghazal, Al Quttiyah ed altros, a l'equibalente del Lope dela Bega, Cerbantes, El Greco, e Belazquez! Al Casteyano xegó las parabras matamoros "Mata los magarabis!" Tamién una albalía fió xamata despós Áqueste dito n'Espanya ed ançá nel México, o l'altra connotaçión fió matón. Parabras insultantes entraron el bocaburario casteyano, moriego-moryego, negro. Morisqueta-moresqueta. Hay moros en la costa-Há magarabis nela costa. Moroso-moroso. Majadero-almenato dende árabi-majnun. Moruno-nela calíma un porrego! Ançá las parabras moresco e mudéxar, amanirá o semnificará en calíma un animal sen espingas e col mudéxar un sirbente!
Segón a Luiz del Marmól Carbahál, él procramó la parabra mudéxar, pa semnificar l'Ánti-Cresto de l'árabi El Dadjdjal! Ayanda que los rexinos crestiyanos d'Espanya xegaron ad espulsar los magarabis, e recramar la terra que perderon ayánda máis ayánda nelas áreyas de Sebiya, Cádiz, Güelba, Cordúba, Chayén, Garnata, Málaga ed Almeríya, elos dexaron seu presençia nela forma de las casas e calguetas arquiteturales! A l'estória crestiyana espanyola, los magarabis ayanda fió quasi 781 anos dexato en l'estória espanyola e contribuyeron a l'asenzo del prestíxio espanyolo, fió reduzito ad una época bárbara ed oblidato e dexato meyor pa oblidar e nesconder pa sempre. Totto que fió magarabí ximplemente, non fió una parte d'Espanya Ispánica! Xó dexaré el resto pa altros a comentar. Pa riés Al Andalus fió baxo los magarabis un “jannat” o “paraídiso.” Ma pa multos délos fió como se fosse, un jannat o paraídiso sob la terra! Multos daquelos magarabis xá oblidato beyeron e fieron-se, denastias adentro ed afora d'Espanya. L'Ummayad, Abbabid, Hammudid, Zayrid, Jahwarid, Al Dhul, Al Murabitun, Al Muwahhidun, ed ançá el Banu Birçali
Los magarabís o como xó prefero a xamar-los, El mum'enin el mutwattah! (Los creyentes del camíno reito!) Elos lutaron e morreron defendendo Al Andalus, l'África del Norte ed el moresco e mudéxar fezo el mesmo ançá seu derrunga en 1571! Lo que encomençó como una respostença ad una súplica por l'ayuta n'Andalusía por una coya d'ommes árabis e maçaguítos, seyerá en fin un orgoyoso e grande império conozito, como Al Andalus! Ed ayánda dexato como seus restos ed alhuríto, ye los poquintos monumentos n'Espanya, tal como el Medina Azahara en Córduba, ed l’Alcáçar en Sebiya e la meschita en Córduba e l'Alhámbra en Garnata. Las poquintas meschitas ed alcaçares dexato pa seyer aprobeitato en seu nomme! Non ostante ayánda una cosa dexata e bista en multos de los moderanos andalusis, galegos, portuguesis, bezígotos, bascos, catalanos, ed ayánda casteyanos! Ansí como los magarabis fieron espulsato dende d'Espanya, lo que fió dexato e ye alora bisto sob multos de los espanyolos, portuguesis ed ispanos d'ódi, ye la sangüe magarabía que leban en seus bengas! La bisión de los magarabis ye ayánda bisto ódi en multas de las democraçias d'Europa, tolerançia relixiosa e tolerançia de los costummes tamién. Ayanda que ha sesto 781 anos dende que los magarabís rexinaron Espanya o Al Andalus, seu estória non seiga oblidata pa riés al mudéxar e moresco, moryego, moruno e morobo d'ódi! Inxa'allâh como fió nelos díyas de los magarabis multo tempo ante, seyerá escutato la xamata de l’oraçión o çalât, por atergo las alhárfas o beirras de la terra que fió Al Andalus, por un mudéxar o moresco.
