Seino Thelna (Bulletin) Zaangsi Seino Sizaang min taw kipawlna tatuam zongh om ngei tha tu hi kale, tu hun khangthak te ii heak bat zongh hi nawn ngawlin, zongh lam khat pan hun kikheal taw kizui in a kinungta sak zo ngawl zongh hi thei tha tu hi. Hi bang kawmkaal pan kipawlna nei tu a thangai, Yangon om Sizang khangnote in 15 February 2003, Saturday ni 4:30 PM-7:00 PM hun sung, MCC Hall, Room 207 ah kimu khopna khat nei a, tua sung pan a tawzaw pek ii lungkimna taw "Zaangsi Seino" (Siyin Youth Association) ci in Sizang Khangno Kipawlna khat kiphuan hi. Kipawlna khat papo, hon nasepna khat papo ah Thubullet le Thumeilet (Constitution & Byelaw) a om ngawl ciang ahizong, Thubulet le Thumeilet te nei napi tuate bangin ngamtat ngawl ciang ahizong kitelkhialna om thei tawntung hi. Tua hi a, thubullet le thumeilet in Kipawlna nuntak natu le cidam natu a thupi bel khat hi ci muna taw Formation Committee te in Thubullet le Thumeilet tu te zongh hong pualaak paih hi. Tua sungah a laingil pi sia tupna le sawmna hi a, a nuai a bang ahi hi. (1) Pilna le thuheakna bulpi kitel kim sak thei natu (To share Education and Information resource) (2) Sizang khangno sungah a taangzai zonna vaina khanto thei natu (To improve Business among Siyin Youth) (3) Ih ngeina le hawmthiam luheakna te a bul dong heak thei natu (To promote Culture and Social integrate) (4) Sizang lai kansaang sak thei natu (To uplift of Siyin Literature) A tung a tupna sawmna teng bulphu in maa pang in kipat ciang panmunlen lampui tu a kisee te sia ngual sangin thunei zaw tu, pali zaw tu, nuamsa zaw tu, kilian sak zaw tu ci te hi ngawlin, ih minam atu dei sakna tak taw, a hun hizong, neisa hi zong pia zo tu, supna tu om le zong suplaw masa zo tu, thuak zo tu, vei zo tu, ngimna toi natu ah ngual sangin masa zaw tu cite thupi tu ci zongh pulaakna kinei hi. Tua hi a, lampui te in a haksa khat ih phulthak ciang, eima mama in phul masa tu, ngim masa tu, thuak masa tu, seam masa tu ci nopna hi. Awnging thathong bek hi ngawlin a takpi ahi tu thupi kisa hi. A vui bek thun in a kikaap thua bang hi ngawlin a tang zongh a kithun tuunna mun a kha vaset thau bang hi tu kidei hi. Tua hi a, Zaangsi Seino te ii kalsuan zia tu sia, "Kipawl, Kikum, Ngaisun, Vaihawm, Khensat, Seam, Tangtung" ci thu ahi hi. "Simbeng zongh kim tetek tangzang kinguan" ci bang keak ma in, Zaangsi Seino te in zongh a kikim tek a kibang tek vive ma ih hi ta zong ih kalsuan nop zia taw tupna sawmna om bang in ih mualsua zawk natu, a tangzang zaw hiat tu ma ih kinguan kul ahikom Thubullet le Thumeilet tungtawn ma in a nuai a bangin a masa term khat (Kum nii) sung panmunlen tu ki om sak hi. Advisors - Rev. Raymond Pome Za Lyan - Rev. Vum Khat Pau - Sya Thang Cin Nang - U Mang Hen Dal - Tg. Lian Khan Thawng Chairman - Tg. Thawng Khan Cin Vice-Chairman 1 - Tg. Cin Pau Vice-Chairman 2 - Tg. Suan Khat Pau Executive Secrertary - Tg. Thang Za Hang Treasurer - Lia Dim Twel Finance Secretary - Tg. Thang Za Hang Communication Secretary - Lia Mang Suan Neam Educaution Secretary - Lia Neam Thian Huai Literature Secretary - Lia Hau Huai Business Secretary - Tg. Thawng Khen Pau Women Secretary - Lia Dim Khai Culture Secretary - Tg. Tuang Pum Dal Health Secretary - Lia Vai Do Niang Social Secretary - U Pau Mang Arts and Music Secretary - Tg. Ngo Za Khai Games and Sports Secretary - Tg. Mang Khan Pau Tua hi a, Zaangsi Seino sungah Thubullet thumeilet te taw kizui in pawltumna ki om sak a, ih minam atu dei sakna a nei tatak khangno te kitum thei hi. Tu ciang sia pawl tumna K. 500/ki ciangtan phot hi. Mai lamsang ah kum sum zongh om lai tu a, tuate sia a hun le a mun zui in koi bangin om sak tu ci sia ngaisut saan laitak ahi hi. Sizangte ii khanto natu a dei sak, a thangai takpi te in, kampau taw ahizong, lai taw ahizong, thu le la sonna taw ahizong, nei le lamh sum le paai taw ahizong ih kipanpui tek tu hi. Kipawlna ih nei thei bua le, mai lamsang ah, a ki nungkin va-ial khawng kisuak tha thei tu hi. Tu in zongh khat le khat ngaisutna pha te, thupiang manpha te le tu hun lai tak a sep tuak thupha te nopna dana thu tatuam te kiheak sak thei, kizaak sak thei papaih natu le Zaangsi Seino ii omzia heak thei natu in Seino Thelna ci in laihawm kisuak sak hi. Tua hi a Zaangsi Seino taw a kizom nuam te ahizong, Seino Thelna sungah thu tatuam a suak sak nuamte a nuai a bangin hong kizom tavun. Kipawlna Ih Ci Ciang!! Thawngno (Bangkok) 1991 kum, Malaysia ngam Kualalumpur khua ah naseam in ka om ngei hi. Ni khat ni ciang Biakinn no khat ka mu a, a bang denomination te po ahizong kikhawm sin mai tawng, ci in ka kikhop uh le, kikhop hun sungah hong din sak taw, min hong son sak taw, hong welcome peuma in nuam ngawl liang hi. Tokyo ka theng leleau a, tua bangma hong ki welcome kei a, ei bangma ih ki hen ngawl hang amate hong phat vawt peuma ci in ka thin sungah a om ngeo ngau hi. Amate in bang hangin amate ki pawlna sungah mihing thak khat sia nop a sak thathei tu in muak nuam uh ahi ka tawm? Mihingte tangthu a patna sang (primitive age) a tomin ngaisun kik tawng. Hi bang hi lian tu ci in kuama in son thiang thei ngawl tu ahihang, hi bang hi tu ci in ka um hi. Khat le khat kimuang ngawl, mu ngei ngawl te taw kimu ciang a suam masa tu hanciam, neak thei vanh te kituu in ki thatlum, neisa kituu ci bangin nungta tu a, kuama kimuang ngawl tu hi. Ahihang hunte hong kilaih a, ngaisutna kibang teng, uuk dan kibang teng hong kilom khat thei a, human societies nano te hong piang hi. Tua zawkciang minam, ngam ci te kumpi ci te hun zui in hong piang tato hi. Kipawlna (anykind of society) cisia hong om ciang, tua kipawlna taw mihing te ii ngaisutna le pilna sia hong khangto thei hi. Kipawl theina hangin pilna le khua muna thiamna ci te tha khat thu in khangto ngawp ci leang kikhial ngawl tu hi. Sonteena in ngaisun tawng. Kipawlna te om ngawl ci tawng. Zingsang na thaw peuma ciang a masa phit in na maiphiat na tu satpya huan tawm tu hi le te, na kam khua natu ha nawtna za vawt tawm tu hi le te, na an neak tu ci, sa, sathau, a kipan zong tawm vai tawm tu hi leang suak thei ngawl hi. Tu hun leitung ah living standard a saan theina thu sia mun theampo ah kipawlna tatuam te hangin a piang thei hi bek hi. Khat nguak nuntak tu sia a pian thei ngawl bangma khat nguak ii hanciam ngawp tu ci sia zongh sia a piang thei na hi ngawl hi. Zatui zahaa vawt te in na nat ciang na neak thei pai tu in zatui zahaa te vawt khol sa in na koi a, sa zuak te in na ngil kial ciang na neak thei pai tu sa te ngaw sa semh sa in zuak hi. Ih nat ciangin bang zatui ne leang pha tu ci sia research vawt tawm thong leang a zatui zong mu man ngawlin ih natna in hong thatlum man zo tu hi. Tua thute ih et ciang in mihing te ii kipawlna kilom khatna ci te in mihingte ii living standard bangza in hong lam sang to ziam ci sia ih tel thei, ih mu thei tu hi. Kum zalom 21 sung ih tum seseam ciang, khat le khat ki pawlna, ngam khat minam khat ii pilna te ki hawpna ci te hong tam va-ial a, hong thupi va-ial hi. A ngam in en kaak leang zong leitung ngam tatuam taw a kipawl thei teng sia a mun theampo, sum zonna, pilna, sport ah khangto a, kuamma taw kipawl ngawlin kongkha khak cipin a om ngamte sia ngual baan ngawl zaw hamtang hi. Sen ngam in WTO (World Trade Organization) sungah a banghangin tum nuam hamtang hi tu ziam? Sente a mimal in zongh leitung bup ii 1/5 bang pha hi ngawl ziam? Pilna lamsang ci leang zong vawt laak nei ngawl hi. Ahihang WTO ci in leitung bup kipawlna sungah a tum ngawlin phamaw a sak vadelna thu a hanciam valangna thute ih et ciang kipawlna ii thupi zia sia ih mu thei hi. Lam khat sang pan en leang kipawlna tatuam te sungah kihel in khanto natu ih hanciam theina sia, hun taw kizui in khantona (advance) hi a, kuama taw kipawl thei ngawlna sia primitive hun ah a heak kik, nung tol te ahi hi. Ka ci nopna in eima Sizang sung bek hi ngawl in ih u, ih nau te ahi ih Zomi pui theampo te taw zong kipawl thei, kikum thei diimdiam in ki pawlna tatuam te taw in bangbang khangto tu ci in ih ngaisut tu hun hi zo ta hi. Zia sia pa akua mite, akua khuate mamaw peuma ci in khat le khat kimu phet a, ui kimu ngei ngawl 2 a ki mu uh ciang a kihau nop bangin ih papau tu hun hi nawn ngawl hi. Sizang mite le Zomi te primitive hun sang manaw kikin a nung tatol kik ih om bana ziam? Ih ngaisutna, ih thin te pilvaang sak tawng. Khat le khat ih thiamna ih ngai sutna, ih telna te kitheak in leitung ah a khangto mama ci in a ki ngaisun minam pi te taw a kibangin, a tonkhawm tu in khangto thei tek tawng. ----------------------- Naseam tu in Ngamdang pai tu na sawm Tha Le? Simlei tungah ih nuntak natu mihing sim in eima pansan tek panin ngaisun in ih ngamta tek hi. Hun hong haksa va-ial a, tu hun ciang ih ngam ih lei ah nasep pha ih nga tu ol nawn ngawl hi. Tua ahikom Khamtung ngam pua sia bek hi ngawlin Kawlngam pua sia ah pai in nasep tu sia tu hun khangno a tam zaw ii tup le sawm hong suak hi. Hi bangin ngamdang ah na ih sep nop tak ciang koi sung ngam ah pai tu a, koi bangin pai tu ziam ci ih heak tu kisamh hi. Naseam tu in ngamdang pai dan sia a kitel thei pak tu in son leang, nam nii om hi. A khatna sia Kawlngam pua sia ah khualhaw theina laibu (Passport) vawt in, Work permit nga zawk ciang a maan takin kipai thei hi. A niina sia work permit ngawl taw lei lam pan ahizong, ahi thei babangin kipai hi. Kiheak pui pha, kizop pui pha a nei te permit ngawl taw pai in a khua suak zo zongh a khom khat ma ki om hi. Ahizong a pha bel hi le Ngampua sia khualhaw theina laibu ma vawtin, Work Permit taw ma in pai thei leang a pha bel ahi hi. Bang hangziam cile a maan takin ih pai ciang, ih paina ngam kumpi te ii hong mat tu, hong nawngkai sak tu cite lau om paih ngawl lei hi. Tu hun ciangin ngamdang pai nuam tam a, passport seau zongh tam mama ahikom, mihing seksol pawl khat te in sum zonna in na nei hi. Passport vawt sak thei in kinei a, ahi tu za sangin sum a tam zaw veu la thei thong hial hi. Lakh khat le lang, lakh nii ci bang sum pia in a kinga pai hi ngawl tha thum bangma hai lel in laibu vawt natu sum a pia khial ki om phei vei thong hi. Tu lai tak omzia sia numei hi ba po le pa khat in laibu a vawt nuam le a haksa mama hi tuan ngawl hi. Yangon laibu vawtna zum ah Photo kizaih in pai kul hamtang a, tua hun sungin lai vawt tu teng vawt pai le tu hun lai tak Ks. 10,000/- bo kul ngawl lai lei hi. Numei te ahi le kumpi te tungah phiangshia piakna lai ih nei kul a, pa te sangin a tamzaw pek bo kul hi. Pa a hile passport nga natu ciang sia a manlang in dei paih ci bang ahi bana le tul za khat vavaal bo kul ngawl hi. Sizang mi sung passport vawt nuam na om na uh le Zaangsi Seino te hong konlaw in, hong dongh tavun. Theam thuak ngawlin lam maan na tot natu uh in lam hong hil thei tu khu hi. Seino Thelna Sizangte ii laihawm a khaom khat ma om ngei zo a, a tam zaw muthip in a om kik kawmkaal ah Seino Thelna zing nisua bangin hong suak thak siitseet leleau hi. Kipan pheangin bangtan vei po hong haihaw zo lei him maw a ci nuam zongh kitam mama leu tu ci sia ngaisut thei sa ahi hi. Sizang la taw laihawm suak ngeite ih et ciang pawlkhat sia kipawlna pan, pawlkhat sia aituam (Personal) in a kihawm ahi hi. Aituam in a kiuak sak te sia a vawt pa, a seam pa a tuk thei nawn ngawl, a dian thei nawn ngawl hun ciang a bo suak hi. Dom ngawlin kipawlna pan a kisuak sak te zongh hun khat ciang hong bo hi. Tuate banghang ziam? ci in ih et ciang, ki aap sawnna (vufqifhurf;) a om ngawl hun lam kimu thei hi. Nasepna khat papo ah ki aap sawnna a om deiudeau ciang bek in a nungta paisuak tu hi pheang hi. Aap sawnna nei ciang zong a seam takpi tu te tung ahi tu zongh kisamh hi. A tatuan in lai nasepna ah mitheampo ii sep thei hi ngawl a, sum om hangin zongh a pha a, piang papaih ngawl ci zongh ih tel mama tu kisamh hi. Tua hi a, Seino Thelna a nuntak paisuak thei natu Sizang mi a minpiangte in eima sik thei san tek pan in ih kipanpui tek tu hi. Yangon Siyin Directory Yangon a om Sizangte le Sizang numei te ii zaamna teng ii omna heak thei natu Yangon Siyin Directory (2003), Zaangsi Seino te in kivawt tu a, hai ngawlin hong suak tu hi zo hi. Tua laibu no sungah Yangon Sizangte ii address, Telephone number, ngamsung ngampua Sizangte ii Email Address teng le Hakha, Falam, Tedim, Kalay, Thuklai, Taingen le Suangdaw (Tamdeang) khua teng paupui theina telephone number teng zongh kihel tu hi. Nei hamtang tu in ngaisun khol tek tawng. Kum 100 cin mua natu Khamtung mite ii Tapidaw sua kum 100 cin poai mai kum 2004 ciang Khuasak khua ah kivawt tu hi. Tu in Poaipi mua natu Kawl la Series khat le Sizang la Series khat kivawt nuam a, Kawl la sia Yangon a om Stidio khat ah kikhum sawm a, Sizang la ahile Tahan ah kikhum sawm hi. Tua sungah Kam Za Tual (Siyan) le Pum Cin Khai (Bo Ni) te in arrangment hong vawt sak tu hi. Tua ban ah drama khat ih lak nop sia zongh YSBC pan vaihawm uh a, a vawt saan laitak ahi hi. Tu in kum 100 poai tepteena in Key chain, Ballpen, Lukhu cite kivawt zo a, mai hong pai tu hun sungah Postcard, Calendar...etc ci bangte hong suak lai tu hi. Tha a pia tu in kinging khol tek tawng. Zaangsi Seino kipat ni U Mang Hen Dal ii thuson na(A tom) Sizangte taw kisai nungsang en kik leang 1956 kum in Sizaang kipawlna ci khat om ngei hi. Minam khat ih ci thei natu in (1) ci le sa, (2) ih om na, (3) kampau (4) lai (5) ngeina le (6) ih thin (ih thin puak dan) ci te ki en hi. Sizang te thin sia, 1. Ei sang a thiam zaw - a pil zaw te ii nung bek kizui nuam hi, 2. Ih sepna papo a pha bel tu in kingeal hi. Mihing ih ci sia kicinna nei kim ngawl (kicing siat zo ngawl) ih hi ciang kipawl khawm a, na ih sep khop tu sia a kul le a kisamh mama hi Zaangsi Seino te ii sep tu sia, (1) Lei tungbup huam a na seam tu. (2) Kumpi thu(political) le Biakna thu buphu in kalsuan ngawl tu (3) Ih Sizaang ngeina keam cing tu hi. Ih kampau keamcing tawng Leitung ah mihingte kampau taw kisai in telcianna a nei (Linguists) te ii pualaak na ah "Leitung ah tu lai takin a kizangh kampau nam 6000 bang a omna sung pan kum 100 sungin a lang bang bo tu hi. Tu in kum khat sung nam 25 bang veu bo hi" ci in Newsweek, August 12, 2002 sia sungah ki at hi. Time Magazine, June 24, 2002 sung leleau ah "Kum 2050 ciangin a lang bang bek om lai tu hi" na ci hi. Tua hi a, tam ih pha bel le, mihing 10,000 bang a pha tu ei Sizang mite, kampau a bosua te, ih minam kampau a zangh nawn ngawl te sungah ih kihel ngawl natu bangbang ih ngamta tu ziam? Khuangai Thu 1. Nu Hau Cing (Lt.Col Son Za Thang ii zi) 4.1.2003 ni in Yangon ah leitung nusia hi. 2. Pa Suang Hang 6.12003 ni in Kalaymyo ah leitung nusia 3. U Suang Cin Khai (Pa Thang Ko Pau ii tapa) 17.1.2003 ni in leitung nusia 4. Nang Lua Kim 17.1.2003 ni in Theizang ah leitung nusia 5. Pa Thang Ko Vungh (Thuklai) 19.1.2003 ni in Taungngu ah leitung nusia hi. 6. Thian Za Huai (Pa Vum Kam ii tanu) 29.1.2002 ni in leitung nusia 7. Niang Ko Lian 31.1.2003 ni in Siyin Ywa ah leitung nusia 8. Tg. Mang Thian Thang, Mangpui (Lt.Col.H.Ngo Zam ii tapa) 3.2.2003 ni in Yangon ah leitung nusia 9. Man Za Huai 6.2.2003 ni in Kalaymyo ah leitung nusia 10. Kam Khai(TunHang ii tapa) 10.2.2003 ni in Theizang ah leitung nusia 11. Pa Khai Ngin (Khuasak, Cin Ko Thang ii tapa) 15.2.2003 ni in Yangon ah leitung nusia hi. 12. NuZamDim (Pa Tun Kyin ii zi) 15.2.2003 ni in Yangon ah leitung nusia 13. Dim Saan Cing (Pa Suan Za Pau ii tanu) 16.2.2003 ni in leitung nusia 14. Nu Esther Kyin (w/o Lt.Col Son Ko Pau) 8.3.2003 ni in Yangon ah leitung nusia hi. 15. Nu Dim Lamh Cing (Pa Vum Za Thang ii tanu) 20.3.2003 ni in leitung nusia hi. 16. Tg. Hau Khan Mang (Pa Kim Ko Lian ii tapa) Shwebo ah leitung nusia hi. 17. Pa En Za Cin (KSBC) 23 .3. 2003 ni in Kalaymyo ah leitung nusia hi. ----------------------- Kawlngam sung om UN Zumkhe te Kawlngam sungah a United Nation (UN) taw kisai zumkhe omte a nuai a teng ahi hi. ILO Liaison Officer 5th Fl, Yangon International Hotel, Ahlone Road, Dagon tel 227057, 227837. fax 224327 UNDP 6, Natmauk Road, Bahan tel 542910-19 fax 292739 UNFPA 6, Natmauk Road, Bahan tel 546029 UNICEF Yangon International Hotel Ahlone Road, Dagon tel 212086, 212087 fax 212063 FAO Myanmar Agriculture Service Insein Road, Insein tel 641672, 641673 fax 641561 WHO Yangon International Hotel Dagon tel 212606-9 fax 212605 UNDCP 11-A, Maylikha Road, Mayangone Tsp. tel 95 1 666903 fax 651334 UNHCR 287, Pyay Road, Sanchaung tel 524022, 524024 fax 524031 UNAIDS Yangon International Hotel Ahlone Road tel 212608-9 fax 212605
