NI DIEXRÏNI KU DSUA JNA' LLUA
Nixrï fí nu niíkoö boexremi dsua nchié áni "RRÍXÖ" ndie JNA' LLUA nu bamengiemi chue, kua nee tseenaköri. Rru dajuí nde ndia na dochuï áni na dekikuï txru tö ngu zï tsingadiári nu chuakuxrïmi ndandioxï, dsua ubaa ku txrï ni bíkuri nde Ndaxra', nixrï ukata cientu ndie nká.
Kie rru NGIGUA doñue ni toöri ngu NINDUA KALATIE, ninduxrï rraküri nu arru giíllari ndi' ná doturuí kata, nu mio dochieni: "JNA' RXNDUA", JNA' NDUA" áni "JNA' LLUA". nu nduá ná gií ndi', na dotingié nu doturuí nda ni koö isá katiä, me nifí dsoo nchié, dsua RRÍXÖ. Atsó díjueri koö nu txrua nidsaxreri.
Nu arru dsoo ncha ni kuagieri dondi, dsua llurjï doñue ni doingitsami jeni jíncha udijini tiempue txrï, nu saanee rre dsua JNA' LLUA, JNA' UNDIUA KU JNA' SU NUE, isá te'é txrï nde xadë ndiá rre ingungua xadë ni dijú chaxrï.
Ndia koö nixrï kuagie ta'txrini ku lloxrï gié nu arru dajui ndatü chue, dsua llurjï xadë dondani rre dsua jna' kata nínduxrï jeni toöri ngu rru ína. Jíncha udijixrï tiempue txrï nu na dituxrë ni dazë nda', dotungutse rru xadë ku rru Kujna ku rru Tsasine mio dochua ingungua rru xadë chaxrï nu dotxrï nati kú ndie dsua JNA' JIE mio chua dsua Daá nu zuni ngu Misa ni "DOENCHAKIENI" kue ndiá tsirï txrï. Zï ni ndia toö dogie nda gitse rre kiéri, nu dotatxringa nué, doíku nirraxre, sú ku nchilla nu ndia Doenchakieni; mió doíku ni itoö dsoone ku ni dsogií nu dotinganda kie rru bioji jíncha ubigie dsua Daá nda ni dekaxrï. Jíncha kié ukuatiu nanillaalla doingadia, jeni txru dsoitse txrï nde ndiate, áni dsazë txrï nde kujï áni zï lluuxrï. Me arru nda ni toö dinda ni dsazë txrï dsua zï ni tsiojini go'ö áni denki.
Jíncha duinga, rra dsua "JNA' RXNDUA" dinda tiukú nda ni "kutsujië" ndie dsua rjuinda' rua nu nuxrï nda xoö, me ni ditxrunga ni utseena kié nu udsixrië txrï, dsua rru gie xra' nkí dsoenga nondee nu kié llurjï chekö dojú. Nu rra dsua rjuinda' rua ni llaá jna' da'jï xriö xriö, mé dinda ni kujï tsirï áni dsazë kata txrï ku isá zï ni chua. Meexra doñuni ni arru doikünani dsua RRÍXÖ ndie Jna' áni arru fiiri nixrï isá katiä, na doingitsami jíncha chuaku txrï.
Kú nká áni jíncha nanda dixrië inkua nká, jíncha dsua kï tundió, mió dotxruni ni dsua Jna' Llua itoö digie. Rra dazë lla'ä ni nabe tundió kï arru nie zï, dsua nda' natúcha ni de'ë kuantu ni kié nduaga nidichü. Dsua ni ndia digie toö dsua Jna' jeni ditaka "LLA'Ä TIE"; nu lla'ä diä nabe dotxragueni nu dazë nde niú áni Llu'ü nká, LLA'Ä TIE nabe ndiokö gié jeni dajie nu xrema kuantu ni kié natí dsua kandaxä ku ndaxië.
Nde urrirjú lládü ku urrirjú xïxrï, jíncha dijixrïni "KANIKULA" dínda ni dotingiemi jíncha ni tsiojini JNA' LLUA, jeni doñuní ni jná áni dituníikö, mió ni dotujná dsua ubaa dinga jna' nda rrínche áni rrínanajö. Denku kataja zï dodiëni íncha deélla dsakua nda ni txru jíncha chua ni túrraja nonde áni jíncha dundaá saani dotxraguenani jeni udochuxrï kié llurjï, dsua ínari, meexra dogieni respeta nu doturueni jeni rruunaa dsigiekumi ngu ni nií.
Email: zapoteco@yahoo.com
Choose a link ......
Back to Popoloca Page
