ອຸ໋ຍຍີ້ມແບບນີ້ ໂລກນີ້ຫລືຈະເສົ້າຫມອງໄດ້ຈັ່ງໃດ?	ໃຫຍ່ ມັດທຸ ເຈົ້າ ຂ້ອຍ

ພໍໄດ້ເວລາຊົງຊິແມ່ນເຈັດໂມງປາຍນີ້ລະ ພິທີຂອງພວກເຮົາກໍໄຂຂຶ້ນໂດຍແມ່ນພໍ່ເປັນຜູ້ກ່າວໄຂງານ ຈາກນັ້ນກໍເຖີງເວລາມໍ່າຊຶ່ງໃຊ້ເວລາພຽງບຸດດຽວ ເພາະຂອງກິນອ່າວຢາກຫນ້ອຍ ແຕ່ແຂກທີ່ມາຮ່ວມຄືນນັ້ນມີຮອດສາມສີ່ສິບຄົນ ກາຍຂາດຫມາຍເກືອບຮອດເຄິ່ງນຶ່ງພຸ້ນ ເປັນແນວນີ້ຊິໃຫ້ຂອງກິນຊຶ່ງກະພຽງຊາວປາຍຄົນພໍ ກໍໂພດໄປແລ້ວແມ່ນບໍ່? ໂດຍສະເພາະແນັດຂອງຂ້ອຍຮອດບໍ່ໄດ້ກິນຫມີ່ ເພາະຖ້ວຍຂອງເພິ່ນດັນເອົາໄປໃຫ້ແຂກທີ່ມາຊໍ້າ ຄິດມາແລ້ວກໍອີຕົນເຈົ້າ ເຮັດວຽກມາເມື່ອຍຫມົດມື້ບາດຮອດຍາມກິນມາ ພັດຮອດບໍ່ໄດ້ກິນນໍາຫມູ່ ແຕ່ປານນັ້ນໃບຫນ້າຂອງເຈົ້າຍັງຍີ້ມແຍ້ມແຈ່ມໃສຢູ່ສເມີ ມານະໂອກາດນີ້ ຂ້ອຍຂໍສະແດງຄວາມຄາຣະວະຕໍ່ນໍ້າໃຈອັນສູງສົ່ງຂອງເຈົ້າດ້ວຍ

ອີກອັນນຶ່ງທີ່ຂ້ອຍສຸດທີ່ຊາບຊຶ້ງໃນນໍ້າໃຈຂອງເຈົ້າຄືເຈົ້າຍອມກິນຂນົມເຄັກແຂງໆ ໂດຍເອົາຂນັມເຄັກງາມໆທີ່ຊື້ມາໄຫໃຫ້ແຂກແທນ ຊຶ່ງຖ້າເປັນຜູ້ອື່ນແລ້ວ ມີບໍ່?ທີ່ເຂົາຈະເຮັດຄືເຈົ້າ ຫລັງຈາກກິນເຂົ້າກິນນໍ້າແລ້ວ ກໍມີການຈັບສລາກໂດຍທີ່ພວກເຮົາແຕ່ລະຄົນເອົາຂອງຂວັນມາ ແລະກໍໃສ່ເລກຊຶ່ງຖ້າໃຜຈົກຖືກເລກໃດຈະເປັນຂອງໃຜກໍຕາມ ກໍຈະມີສິດໄດ້ຂອງຂວັນນັ້ນໂລດ ຂ້ອຍກໍບໍ່ຈື່ວ່າ ຈັກຂ້ອຍໄດ້ຂອງຂວັນໃຜ ແຕ່ທີ່ແນ່ໆຄືຢູ່ໃນຫໍ່ຂອງຂວັນງາມໆນັ້ນ ມີຂນົມພຽງສິບກ່ວາກ້ອນ ຂ້ອຍເຫັນແລ້ວກໍເມື່ອຍ ເຮັດແນວນັ້ນກໍເປັນນໍ ເຈົ້າຈື່ບໍ່? ຜູ້ທີ່ໄດ້ຂອງຂວັນມະຫາຊວຍຄືນາງຫລ້ານ້ອງຂອງນາງພອນ ຂອງຂວັນນັ້ນກະຫໍ່ບັ໋ກໃຫຍ່ໆຢູ່ດອກ ແຕ່ບາດໄຂອອກມາພັດແມ່ນກ້ອນດິນຈີ່ສອງກ້ອນ ຫລີ້ນເອົາຫມູ່ພວກເຮົາພາກັນຫົວເຊັງໆ ເຈົ້າຮູ້ບໍ່? ວ່າຜູ້ທີ່ເສືອກກະໂຫລກເຮັດຂອງຂວັນນີ້ ກະຄືທ້າວແບ້ຄາງງໍຈັ່ງໃດລະ ຍັງໄຄແຕ່ຖືກນາງຫລ້າຜູ້ບໍ່ອາຍແດ່ ຄັນຖືກເຈົ້າຂ້ອຍຢ້ານເຈົ້າອາຍຕາຍແທ້ໆ ແມ່ນບໍ່ແນັດ?

ຫລັງຈາກການຈັບສລາກເອົາຂອງຂວັນຜ່ານໄປ ການຟ້ອນລໍາກໍເຂົ້າມາແທນທີ່ ຄືນນັ້ນຈັກເຈົ້າຄິດດີແນວໃດໃຫ້ຂ້ອຍໄປໂຄ້ງເອົານາງແຕ໋ງ (ວ່າທີ່ແຟນເກົ່າ) ເອົ໋າໂຄ້ງກະໂຄ້ງ ຄິດວ່າເຈົ້າບອກຊື່ໆໃດຈັ່ງໄປ ຖ້າເປັນຜູ້ອື່ນບອກ ຈ້າງອີກກໍບໍ່ລຸກ ແນວຟ້ອນລໍາຂ້ອຍໂລດບໍ່ເປັນຈັກຫນ້ອຍ ການຟ້ອນລໍາຂອງພວກເຮົາຄືນນັ້ນໄດ້ພຽງແຕ່ສາມສີ່ເພງ ພວກອຸບົນກໍມາກວນ (ພວກອຸບົນຫມາຍເຖີງຄວາມທີ່ຍ້າຍມາແຕ່ສູນຢູ່ອຸບົນ) ເວົ້າໂຫ່ນີ້ໃສ່ ແຖມສຸດທ້າຍພວກເຂົາດຶກຂີ້ຫິນເຂົ້າມາອີກ ເຮັດໃຫ້ງານຂອງພວກເຮົາຕ້ອງເລີກໂດຍກະທັນຫັນ ເພາະບໍ່ຢາກມີເລື້ອງ ບັງເອີນຄືນນັ້ນກໍມີຄົນລັກເຂົ້າມາຍິງພວກອຸບົນ ມັນຈຶ່ງວຸ່ນໆໂດຍສະເພາະພວກຜູ້ຍິງຫມູ່ເຈົ້າພາກັນແຕກຕື່ນ ປົບເຂົ້າໄປໃນເຮືອນຫມົດ ມີແຕ່ແນັດຈອມແກນຂອງຂ້ອຍ ອອກມາຢືນຢູ່ນອກນໍາພວກຜູ້ຊາຍຫມູ່ຂ້ອຍເຊີຍ

ຄືນນັ້ນນາງແຖວນາງຮັກເຖີງກັບໄດ້ນອນເຮືອນເຈົ້າ ເພາະຊິເມືອເຮືອນທາງຫນ້າສູນ ກໍຢ້ານພວກອຸບົນໄປລັດ ເປັນອັນວ່າງານປີໃຫມ່ປີ1983ຂອງພວກເຮົາ ຈົບລົງດ້ວຍຄວາມອົລມ່ານ ແຕ່ກໍມ່ວນເພາະມັນມີທຸກຣົດທຸກຊາດຈັ່ງໃດລະ

ໃຜນໍ ຊ່າງບໍ່ນັ່ງຄືຫມູ່ ຊິຂໍເປັນດາຣາຜູ້ດຽວຊັ໋ນບໍ່?