ລະຍະນັ້ນ ຂ້ອຍຮັກເຈົ້າຫລາຍແລ້ວ ແຕ່ກະຍັງບໍ່ແນ່ໃຈວ່າ ເຈົ້າກະຮັກຂ້ອຍບໍ່? ເປັນແນວນີ້ທາງອອກທີ່ດີທີ່ສຸດ ກະຊູຊີເອົາຄໍາຕອບຈາກເຈົ້າຫັ້ນແຫລ້ວ ແຕ່ຜ່ານໆມາລ້ວນບໍ່ໄດ້ຜົນ ບ່າຍມື້ນັ້ນ ຈັກຄິດດີແນວໃດເລີຍຊູຊີເອົາຄໍາຕອບໃຫ້ໄດ້ ກ່ວາຈະໄດ້ເລື້ອງໄດ້ລາວ ກໍກິນເຂົ້າໄປຕັ້ງເກືອຍຫົກໂມງພຸ້ນ ຕາມທໍາມະດາຂ້ອຍບໍ່ຫ່ອນຊູຊີເກ່ງປານນັ້ນ ແຕ່ມື້ນັ້ນມີແນວພິເສດໃຫ້ຊູຊີ ກະເລີຍໄດ້ເລື້ອງ ແນວພິເສດນັ້ນກະມີຢູ່ວ່າ ເຈົ້າໃສ່ເສື້ອລາຍດໍາຂາວ ຫລັງຈາກຮຽນຫນັງສືແລ້ວເວລາຫ້າໂມງ ເຈົ້າກະມານັ່ງຕໍ່ຫນ້າຂ້ອຍ ສາຍຕາເຈົ້າເຮັງຂອງຂ້ອຍເສືອກໄປເຫັນເນື້ອນວນຂອງເຈົ້າທີ່…ບໍ່ເວົ້າດອກ ຈັກຫນ້ອຍເຈົ້າຊິຫນ້າແດງ ເອົາເປັນອັນວ່າ ກໍຍ້ອນໄດ້ມີໂອກາດແຍງຄັກໆຈັກເທື່ອ ກໍເລີຍຕັ້ງຫາເລື້ອງຂຶ້ນມາເວົ້າຍືດເວລາເມືອເຮືອນນີ້ແຫລະ ຈື່ບໍ່? ຂ້ອຍຕັ້ງແກ້ງຖາມວ່າ ເຈົ້າຮັກຂ້ອຍບໍ່? ຄໍາເກົ່າເປັນຕັ້ງສິບຊາວເທື່ອ ໃນທີ່ສຸດດ້ວຍຄວາມບໍ່ຄາດຝັນ ເຈົ້າຕອບຮັກຂ້ອຍ ຫລີ້ນເອົາຂ້ອຍດີໃຈເປັນສອງທົບເລີຍມື້ນັ້ນ ເຈົ້າຮູ້ບໍ່? ຫລັງຈາກມື້ນັ້ນມາ ຂ້ອຍຫລັບຕາຄືນໃດ ກໍອົດທີ່ຈະວາດພາບເຫັນເນື້ອນວນທີ່ຂາວຜ່ອງນັ້ນບໍ່ໄດ້ ໂອ້ຂ້ອຍນີ້ກໍຊ່າງບ້າອີກແບບນຶ່ງບໍ່?

ລະຍະແມ່ເຈົ້າບໍ່ສະບາຍນັ້ນ ມີເລື້ອງນຶ່ງວຸ່ນຫົວຂ້ອຍຈົນຫົວຊິແຕກ ຄືວ່າມື້ນຶ່ງຂ້ອຍໄປຫລີ້ນເຮືອນມັດທຸ ລາວເລີຍເວົ້າໃຫ້ຂ້ອຍຟັງກ່ຽວກັບແຕ່ກີ້ວ່າມີຜູ້ຊາຍຄົນນຶ່ງມາຕິດເຈົ້າ ແລະມໍ່ໆມານີ້ກໍຍັງສົ່ງຮູບມາໃຫ້ເຈົ້າ (ລາວຢູ່ອະເມຣິກາ ແມ່ນບໍ່?) ຊຶ່ງເລື້ອງທັງຫມົດນີ້ ລາວຮູ້ມາຈາກນາງຫຍັງບຸ ຕອນຢູ່ສໍກໍທໍຫຍ້າ ລາວຢູ່ຂ້າງຫ້ອງເຈົ້າ ຟາກທາງໄປຫ້ອງນໍ້າຫັ້ນ ແຕ່ຕອນນີ້ລາວຢູ່ຂ້າງຫ້ອງມັດທຸ ເຈົ້າຮູ້ບໍ່? ພໍແຕ່ຂ້ອຍໄດ້ຍິນເລື້ອງນັ້ນ ຂ້ອຍໂລດບໍ່ເປັນອັນຢູ່ ຟ້າວໄປຖາມນາງອັນນັ້ນ ກະໄດ້ຄວາມວ່າ ຜູ້ຊາຍຄົນນັ້ນຊື່ລັງ ມັກເຈົ້າແຕ່ຢູ່CRSແລະດຽວນີ້ກະຂຽນຈົດຫມາຍຫາເຈົ້າເປັນປະຈໍາ ຊຶ່ງຖ້າບໍ່ແມ່ນແຟນເຈົ້າແລ້ວ ເຂົາຊິຂຽນມາຫາເຮັດຫຍັງ? ເມື່ອຂ້ອຍໄດ້ຍິນແນວນັ້ນ ຂ້ອຍແຮ່ງກົ້ນບໍ່ຕິດຕັ່ງ ປົບໄປເປີກສາກັບທ້າວກາເຫວົ່າເພື່ອນຮ່ວມໂຮງຮຽນແຕ່ລີເຊມານໍາກັນ (ຊື່ແນວນີ້ເພາະຕອນຢູ່ເມືອງລາວ ເພິ່ນເຂົ້ານໍາພວກຮ້ອງເຕັ້ນຂອງໂຮງຮຽນແລະກໍມັກເຮັດສຽງຄືນົກກາເຫວົ່າ) ວ່າຊິເຮັດແນວໃດດີ? ຢ່າງໃດກະຢ່າສູ່ໃຫ້ມັນເປັນຄືເພງ “ຮັກຊ້ອນຮັກ” ກໍແລ້ວກັນ ຕອນນັ້ນໃຈຂ້ອຍຮ້ອນຮຸ່ມດັ່ງໄຟເຜົາ ຢາກໃຫ້ຕາເວັນຕົກດິນໄວໆ ເພື່ອຊິໄດ້ມາຕໍ່ວ່າເຈົາໃຫ້ສົມໃຈເພາະຫຍັງລະ? ກໍເພາະຕອບຮັກຫມູ່ແລ້ວ ພັດຍັງຕິດຕໍ່ກັບຜູ້ຊາຍອື່ນອີກ ແນວນີ້ກໍຫ່ອນເປັນນໍ!

ຄືນນັ້ນທັງຂ້ອຍທັງກາເຫວົ່າເວົ້າແບບບໍ່ໃຫ້ເຈົ້າຕັ້ງໂຕເລີຍ ເບິ່ງໆແລ້ວກະເປັນຕາອີຕົນເຈົ້າ ຢູ່ບໍ່ຢູ່ກະມີຄົນມາສຸ່ມຫົວເວົ້າໃຫ້ວ່າຫລີ້ນເກມຮັກຊ້ອນຮັກ ແຕ່ເຈົ້າກະດີບໍ່ຕອກພວກຂ້ອຍຄືນ ຄັນບໍ່ຊັ້ນມີຫວັງ ຄວາມຮັກຂອງຂ້ອຍພັງ ເພາະມົວແຕ່ໄປເຊື່ອຜູ້ອື່ນຫລາຍ ຊຶ່ງຊິເວົ້າແລ້ວ ເລື້ອງນີ້ກະບໍ່ມີຫຍັງຮ້າຍແຮງ ຂ້ອຍຫາກຄິດຫລາຍໄປເອງຕ່າງຫາກ ທໍາມະດາຄົນງາມກະຕ້ອງມີຄົນມາມັກຫັ້ນແລ້ວ ແຕ່ສິ່ງສໍາຄັນເຈົ້າບໍ່ມັກເຂົາຄືນ ມັນກໍແລ້ວໄປຕົ໋ວ ຄິດມາແລ້ວ ກໍພໍຢາກທຸບຫົວຕົນເອງ ເປັນຜູ້ໃຫຍ່ລ້າ ຄວາມຄິດພັດເສືອກຄືເດັກນ້ອຍນີ້ລະ ບໍ່ໄດ້ເທື່ອຫນ້າຕ້ອງຫັດເປັນຄົນຄິດກ້ວາງເຫັນໄກກ່ວານີ້