PULAU PANJANG

Di ari nan agak senggang
ambo jo adiak ambo siUjang pai ka pulau panjang
(nan ambo mungkasuik adolah pulau panjang nan di Aia Bangih,
.......jadi bukan pulau panjang nan dakek pulau anso duo)
Kalau sanak jo biyai alun tau, pulau panjang tu latakanyo
indak jauah bana doh dari Aia Bangih, Pasaman Barat

Aia bangih dilingkuang taluak
dilingkuang taluak nan sambilan
sadang manangih anak dipaluak
coiko bana untuang parasaian

bialah buruang den lapehkan
dalam sangka indak ka makan
awak lapa takuruang pulo
bialah kampuang den tinggakan
kok untuang barubah nasib badan
dikampuang dilengahkan urang sajo

Curito dimulai dari Lubuak Basuang, dari Simpang Manggopoh
(kalau dimulai dari Padang atau dari Bukuk Tinggi,.....
lamo amek)

Diari nan rancak bana, ambo jo Ujang mamulai perjalanan
dengan bismillah
tantu sajo sasudah makan,
kami makan di rumah makan simpang manggopoh,
alhamdulillah
makan dirumah makanlah namonyo....lamak sadonyo
kalangik capak siUjang....tapaluah magek manandin
goreang ayam pangek ikan
randang dagiang nan nomor satu atau gulai ikan ameh
langkok jo pucuak ubi samba ladonyo
sirahnyo manyingangak, harumnyo baimbau-imbauan
sadonyo talatak diateh meja kito
awak tingga malantuang sajo

Sasudah makan pagi, alah bagosok onda rancak
onda katutuih mbo agiah namo
alah diengkol kudo nantun
engkol sakali duo kali, cukuik katigo inyo iduik
alah takajuik urang sakuliliang
sabab bunyi masinnyo indak tabado-bado
bunyi kapacah langik Manggopoh
balampang-lampang balopoh-lopoh
bunyi kacabiak knalpotnyo

Dek perjalanan ka Simpang Ampek alah panah kami tampuah,
dek lah yakin ujang indak kasasek jalan
ambo sarahkan stir onda ka si Ujang
"waang pacik stir Jang" kecek mbo
"bukan stir, tapi kemudi...." kecek Ujang
"baa tu?" tanyo mbo
"kalau stir, cuma untuak nan baroda labiah dari duo,...kalau stang,
cuma untuak nan baroda duo,
tapi kalau kemudi, bisa untuak nan indak baroda bagai, tamasuak nan
baroda..."
"Kalau kamudi?"
"Udako porno..."keceknyo, malehnyo manjawek pertanyaan mbo.

Singkek curito, lah sampai kami di Simpang Ampek
simpang kakida arah ka Sasak, simpang kakanan kalau nak ka Talu
dek awak nak ka Aia Bangih, jalan tapaso dipaluruih
alah saminik duo minik, alah tibo di Aia gadang
alah sampai minik ka tujuah koma tujuah,
alah tibo di Kasiak Putiah
(bukan pasia putiah, ncu, tapi Kasiak Putiah)
indak pulo lamo sasudah tu
lah sampai kito di Ujuang Gadiang, nagari nan acok
jadi takok-taki dek anak-anak samaso ambo ketek dulu
"di nagari ma padi indak bisa tumbuah?"
Lalu awak jawek: "Ujuang Gadiang"

dek ari alah taraso tinggi,
samantaro Ujang alun mengecek lapa
elok awak indak baranti di Ujuang Gadiang ko
awak taruih bajalan manuju Aia Bangih

mungkin dek lamak ota dijalan,
atau sabab dek jalan kalindungan pulo
maklumlah banyak kayu gadang di tapi jalan
indak taraso sajo
ruponyo awak lah sampai ka Simpang tigo aia balam
simpang kakanan manuju Silapiang, taruih kaateh lai
sampai pulo di Desa Baru
dek awak nak ka Aia Bangih, jalan dipaluruih sajo
kiro-kiro abih parimin sabuah dalam muncuang,
awak lah sampai di Aia Bangih

Assalamu'alaikum Aia Bangih
ambo jo adiak ambo nan cipehnyo allahu rabbi, si Ujang
kini datang,
raun sabalik bakuliliang nagari bundo

"Jang, awak lah sampai di Aia Bangih....
ikolah nagari nan tasabuik dalam tambo tu Jang,...
Jadi, nagariko alah dikenal juo sajak jaman Pagaruyuang
sadang jaya-jayanyo,
sajak bundo kanduang alun makan buah kalapo mudo,
sajak jilatang alun babiso,
"lai tau waang jilatang? kini, a nan takana dek waang?"
cek mbo
"makan....!!" jaweknyo.
"tumbi"

"Mungkasuik den, sanang waang ndak?
Mancaliak nagari nan data ko?"
"Beko lah den jawek, ma nasi bungkuih tadi?"
lah manyasak bana nyo

Tadi pagi, iyo kami mintak dibungkuihkan nasi kek etek
nan punyo rumah makan di Simpang tigo Manggopoh.
Lai ado nasi bungkuih,..... duo.

Nan katuju dek mbo,
kami raun-raun dulu sambia mandinginkan badan,
maklumlah awak bajalan jauah,
kudo bapacu bagaduru sen dari Manggopoh tadi
lah pakak rasonyo talingo diambuih angin....
Tapi lain bana si Ujang ko,
walaupun badan alun dingin bana,
manyansang nan katuju di nyo di paneh gadang ko.

Iyo, malah......
Ado lapangan bola kaki dimuko kantua wali nagari,
ditapi lauik,
rancak lapangan tu, kalindungan pulo
kasitulah kami maojok, lalu onda diparkir
ditampek nan agak kalindungan
kami manuju tampek lain nan kalindungan juo
untuak marealisir rencana Ujang, makan....
(ambo, dek lah tau parangai si Ujang tantang urusan makanko,
ambo palapeh se nyoh)

makan ditampek kalinduangan, diambuih angin sepoi-sepoi
diiringi musik ombak nan badabua,
batambah kareh capak si Ujang
nan manjadi sabab bana,
gulai ikan ameh nan diisikan dek etek
di rumah makan Simpang Manggopoh tadi,
langkok pulo jo gulai jariang bagai

"Tambuah ciek da..." kecek Ujang
samantaro tu tangannyo lah mangaruak nasi bungkuih mbo
"Ujaaaang, Ujang. Tahanlah makan waang saketek,
caliaklah badan waang,
makin lamo lah batambah ganduik sen...!!"
kecek mbo kek nyo
"sasudah ko,.... kanyang mbo lai da..."
maluncua se kato-kato nan indak bapikia-an
dari muluiknyo.

Sasudah makan, ambo jalan-jalan ka Kantua Wali Nagari
nan talatak di subarang labuah.
Basubarangan bana jo lapangan sipak bola ko
disuduik halaman kantua tu tampak dek mbo tugu ketek
.....runciang

dek ati batanyo-tanyo juo,
tapaso kaki diayunkan manuju tugu tu
ruponyo tugu tu adolah tugu kenang-kenangan sajo
dikaki tugu tu tatulih
"Ikatan Mahasiswa Pelajar Pasaman, Padang, 1982"
Ruponyo ado sarombongan mahasiswa Pasaman nan pai kasiko
mungkin ado bakti sosial mereka disiko
lalu mereka buek tugu ketek disuduik kantua wali nagariko

"Jang, kamarilah nta..." kecek mbo
"aa tu?"
"Nak mancaliak waang ndak?" cek mbo
"indak, paruik den angiah" pakiaknyo
itulah akibaiknyo, kalau makan banyak amek.

Sasudah tu ambo ambiak onda, mbo tumpangkan di rumah panduduak
nan indak jauah doh dari palabuahan
sasudah tu,
ambo pai batanyo kalau ado kapa nak ka pulau panjang, siangko

dek untuang sadang mujua
sadang tapek dipalangkahan
urang sadang basiap ka barangkek, awak tibo...
"naiaklah sakali" kecek apak nan punyo kapa

(alhamdulillah,...apuih muko ciek lu)
sakaliko, indak paralu ambo mahariak bana ka siUjang lai,
untuak mambaonyo ka pulau panjang
sabab inyo bana nan nak pai
lah naiak kami baduo, apak nan punyo kapa lah naiak pulo
kapa barangkek hanyo lai, manuju pulau panjang

Kaba baraliah hanyo lai, sungguah baraliah sinan juo
lah sampai kami di pulau panjang,

kapa marapek di sandarannyo, lah turun urang nan banyak
kami pun turun pulo
kalau urang lain pai karumah masiang-masiang
atau pai kakadai tapatan masiang-masiang,
tapi kami pai ka tampek urang rami sadang bakarumun
ruponyo urang sadang latihan main volley
lah heboh dek sorak jo sorai,
maklumlah nan main samo-samo mudo
nan main mudo, nan basorak mudo pulo,
bacampua nan mudi bagai

diantaro urang nan banyak, tadanga dek mbo urang maimbau
manyabuik namo ambo, manyuruah masuak lapangan,.....
heran mbo,....

ruponyo pak Mu'ih urang Sasak
urang malayu nan elok baso, antah manga pulo apakko disiko
lalu kami basalaman,

"bilo apak kamari?, manga kamari?" tanyo ambo kek inyo
"bekolah kito bacurito, masuaklah kalapangan,
main volley jo anak-anak tu"
kecek pak Mu'ih sambia mandorong badan ambo masuak lapangan

"ambo ndak pandai main doh pak, si Ujang ko nan pandai"
kecek mbo, sambia manunjuak si Ujang adiak ambo nan cipehko

dek ambo nan manyuruah inyo masuak lapangan,
tapasolah siUjang mangamek-ngamek masuak lapangan volley tu,

tapi sabalun bola dimainkan, tampak dek mbo, Ujang babisiak
kek urang nan tagak disampiang inyo
sasudah tu, urang tadi gegek sajo manuju tampek mbo tagak

"ambo disuruah Ujang mambao uda ikuik main basamo-samo"
keceknyo, sambia manjujuikkan tangan mbo
ndak bisa mailak mbo lai,....
tapaso mangamek-ngamek pulo masuak lapangan

set partamo ambo jo siUjang bakawan,
dek dikampuang, kami lah acok main,
tantu sajo, lah tau bana Ujang salero ambo
ambo pun lah tau bana kode Ujang,
bola apo nan ka nyo agiah,
nak semi istilahnyo, atau nak full alias cogok,
atau nak strip lain-lainnyo
lah jaleh bana dek mbo
jadi ambo tingga manggunda bola sajo lai
sabab bola nan sabana masak diagiahkan si Ujang

set kaduo ambo jo Ujang balawanan,
itu nan katuju dek pak Mu'ih

jadilah si Ujang ibaraik bintang sapatang ari tu
bola masak nan dari tangannyo, sabana lamak untuak disemes

ado si Pudin namonyo,
tinggi badannyo labiah dari ambo
bapueh-pueh bananyo sakaliko,
maklumlah awak dikampuang, semes bola semi nan banyak
nyo agiah taruih bola semi tu dek Ujang
masak sabana masak bola semi tu...
sahinggo boneh taruih semes si Pudin
"tacaciang" kecek anak-anak mudo nan manonton
(ambo, tantu ndak namuah mbo mamblok doh....hehe)

Sasudah main volley,
sambia mandinginkan badan ditapi lauik,
ambo suruah siUjang mamandang kaarah selatan

"Jang, cubo calaiak dek waang arah kasinan,
disitu ado kampuang nan lataknyo manjorok kalautan.
Sabananyo kampuangko bisa dicapai jo jalan darek,
cuma agak jauah sahinggo urang labiah banyak
naiak sampan sajo dari Sasak" kecek mbo

"aa namo kampuang tu da?"
"Maligi" jawek mbo

Lalu, mbo curitokan juo ka siUjang
bahaso Maligi tu alamnyo rancak,
mungkin asa katonyo dari Mahligai,
namun alun pulo mbo tanyo bana kek rang tuo-tuo lai.
Nan jaleh,
urang Maligiko banyak nan kayo-kayo,
banyak nan lah jadi "urang" dirantau.
Kalau ado di Banduang atau di Bogor,
urang awak, kayo, inyo mangecek-an asanayo dari Pasaman,
mungkin inyo dari Maligi tu.
Atau inyo bapandidikan tinggi, mungkin inyo
jadi dosen bagai,
mungkin sajo apaktu dari Maligi.

"Maligi tu aratinyo maleh gosok gigi, ndak?"
mancimeeh si Ujang
"Kapunduang barajuik, waang!" kecek mbo

Samantaro sagitu sajolah daulu,
kok umua lai samo panjang,
insya Allah basuo kito baliak,
dengan curito nan lain pulo.
tantu sajo....... tanpa kacobong kamera

Tan Galamaindo

Tutuik Jendela ko