MUSEUM PARANG PADERI

Badan mbo sabananyo latiah bana, loyo. Tapi dek lah
tajanjian kek Ujang untuak pai ka Bonjo pado ari kini,
bapasoan juo barangkek. Kalau dipaturuikkan ati,
namuah mbo lalok se lai, ari akaik tu.
Kabatualan ukatu tu ambo sadang bakabun kacang tanah
di tanjuang Pati,
sabalun pasa Sarilamak kalau awak dari Payokumbuah.
Sakali sapakan pulang kampuang, naiak onda.
Abih dimakan angin sajo rasonyo badan mbo
sajak bakabun di Tanjuang Pati,
dek ulah banyak amek kailia kamudiak.

Kalau indak ambo turuikkan kandak Ujang,
disampiang inyo bangih kek ambo, awak badoso pulo
karano ingkar janji, khianaik caro aluihnyo.
Nabi awak mangecek (pelajaran nan diagiahkan guru agamo mbo)
bahaso tando-tando urang munapiak tu ado tigo
yaitu bakato baduto, bajanji mungkia, dan nan katigo
disarahkan amanah kek nyo tapi dikhianatinyo
(wa-iza'tu mina khana).

"Jadi juo awak pai pagi ko Jang?"
ambo cuma ingin mamastikan sajo
"pertanayaan uda tu indak bamutu, tidak RELEVAN" keceknyo
"apo Jang? VAN apo tadi tu Jang?....." tagalitik juo wak deknyo
"T I D A K   R E L E V A N.........."
keceknyo, nyi ejo uruih tu ciek-ciek.
"Dimaa pulo dapek dek ang caro Inggirih tu tu?" tanyo mbo
"Biasaaaaaa......Abang Murtopoooooooo..." keceknyo santai
Nan sabananyo adiak mbo ko ndak sanang jo
pertanyaan mbo tu doh,
indak katuju dek nyo ambo batanyo hal-hal
nan alah jaleh dan pasti dengan
kalimat tanyo angin baputa.
Nan katuju dek nyo ambo mangecek modelko ha:
"Jang.....lah, pai wak lai...!!"

Angin baraik galombang baraik
angin baputa dipagi ari
kok pandai adiak baibaraik
agiah bapucuak kayu mati

Kato tuanku Imam Bonjo "baa lo teh"
Kato Tuanku nan renceh "kabaa jano awak"
Indak elok bakato sakeh
Tuhan kuaso tampek bakandak

Saroman pantun tu banalah kiro-kiro bagalaunyo
parasaan Ujang mandanga pertanyaan ambo tadi,
risau no, bakusuak dado......
nyo sangko ambo maleh pai, ingkar janji.
Samantaro tu dalam atinyo mungkin amboko ibaraik
kayu mati nan ndak kamungkin bapucuak lai.

Kalau batua baitu kato hatinyo,
salah.....sabana salah...!!
Ambo bukan ndak namuah pai,
cuma badan agak loyo, lah "lefu"
kato penyanyi kesayangan ambo Syamsi Hasan
(mudah-mudahan baliau salamaik dialam sinan....)

"Kalau baitu, ambo mambao onda,....
uda duduak sen lah dibulakang...."
keceknyo,
padahal ambo ndak ado bagai mangecek-an
indak talok mambao onda doh,...
inyo sajo nan maambiak kasimpulan.....
"Tasarah dek waanglah,.... tapi, ijan ngebut, babayo...!"
cek mbo
"Indak da, manga pulo awak ka ngebut, ....
awak kan indak Ali Topan bagai doh..."
pandai pulo nyo maambiak tambehan ka Ali Topan
anak jalanan nan dipilemkan tu.

Sabalun pai, paralu mbo laporkan bahaso
salimuik jabok onda kami kini lah baru,
alah dituka sajak pulang dari Bukik Tajadi dulu.
Yo, babeda tanagonyo saketek

sajak batuka salimuik jabokko,
agak mancatuih ganyuaknyo....!!
Kalau dulu, kami mogok di pandakian batu gadang
jo pandakian batang palupuah,
nan sakaliko indak lai, lah lanyinnnnn.
Cuma ondako indak bisa lincah lai,
lah engak nyo bajalan
("engak" ko aa caro Nasionalnyo ko).
Kalau urang lain malenggok lenggok
kakida jo kakanan jalan jo mampacaliak-an lincahnyo,
nan awak malenggok-lenggok juo kakida jo
kakanan jalan, tapi .....
sst, supayo jan mogok....supayo indak mati tagak
(ijan kecek-an kek urang ndak?, aniang-aniang se lah muah?")

Dengan bismillahirrahmanirrahim ambo duduak mambonceang,
dengan bismillah
pulo gigi onda   masuak,
dengan bismillah pulo gas dipilin Ujang,.....
mangatutuih manuju Bonjo.

Kaba baraliah hanyo lai, sungguah baraliah sinan juo,
indak curito dirantang panjang,
dek perjalanan alah nan kaduo, indak guno banyak gorema,
nan Bonjo alah manunggu.Alah sampai pulo kami di Bonjo.......

"Manjalang pakan sinayan Bonjo ko,
ado tigo nan paralu ang caliak" cek mbo
"aa tu da?" otomatis sajo Ujang batanyo
"Nan partamo, tugu nan ditangah-tangah jalan
disimpang tigo tu,
itu tugu perjuangan rang awak dimaso bagolak dulu"
ambo tarangkan bana bantuak pak guru sejarah
(eh, ibuk guru sejarah)
"nan kaduo apo da?" yo, nak tau bana Ujang nampaknyo
"Nan kaduo, patuang tuanku Imam Bonjo
sadang diateh kudo.... nampak dek ang?"
"Nampak da, iyo ganteng tuanku Imam Bonjoko yo?" komentarnyo
"Bukan gantengnyo tu nan paralu dek rakyaik, tapi bagaknyo..."
cek mbo
"nan katigo apo da?"
"Caliak dek waang patuang dado nan talatak
dihalaman muko kantua Camaik tu,.... tuha...!!,
Lai tampak dek ang?" ambo toto-an jari tunjuak mbo
ka arah patuang tu
"lai da....hehe..."
"Baa kok galak waang?, ado nan lucu?" tanyo mbo
"mantun da.... salamoko indak ado urang batanyo doh,
kalau ado Imam Bonjo, sia pulo katik Bonjo?"
lah mulai lia sutatemen (statement)nyo....
"apo mungkasuik waang ko?" lah mulai pulo ambo
manggarumeh mancaliak paja gapuak ko
"Tuanku Katik Bonjo tu.... ambo, hahahaha"
keceknyo sambia galak tabahak-bahak.
"Kapunduang masam waang...!!" rarau mbo
"maa nasi bungkuih tadi,.....den lah litak...!!"
keceknyo, sambia mambukak kampia

Sasudah makan, perturisan (icak-icaknyo jadi turis)
dilanjuik-an ka bagian Bonjo nan lain
yaitu Ganggo Mudiak (indak barubah namonyo doh makngah),
tampek talataknyo Museum Parang Paderi.
Dek ari lah luhua, kami singgah dulu
di musajik kampuang sianok
untuak rukuak jo sujuik agak sabanta.
Disiko kami dapek pangalaman nan
indak mudah dilupokan pulo dek kami doh ncu.
Kutiko kami salasai maambiak uduak (bauluak),
datang apak tuo bana alun, mudo talampau.
Inyo mamacik kain saruang.
"Kalian nak sumbayang?" batanyo nyo ka Ujang
"iyo pak" jawek Ujang
"iko kain saruang....pakailah,
kurang elok sumbayang bapintalun sajo,
apolai lah bapaluah-paluah lo....." kecek apak tu
Tapikia dek mbo, apo apak nan datang tu iyo bana manusia ....
atau malaikaik.
Sasudah sumbayang, kutiko maagiah-an baliak
kain saruang ka apak tu, ambo tanyo inyo:
"dima rumah pak, pak?"
"Ikolah, nan disampiang musajik ko.....,
naiaklah agak sabanta, kalian mungkin auih"
keceknyo
"mokasih pak, kami agak takaja, nak ka Museum.....
sasudah tu,.... sabalun magarik,
kami lah tibo di Bukik Tinggi seharusnyo,
apolai, kini musim paujan pulo" cek mbo

Sasudah pamit dan tarimo kasih kek apak tu,
kami lansuang ka lokasi Museum Tuanku Imam Bonjo
(laweh juo lokasinyo biyai... lengkap pulo disitu,
pakai musajik rancak bagai)
Museum ko talatak ditapi jalan lintas sumatera bana,
kalau awak dari Bukik Tinggi, posisinyo
sabalah kanan awak.
Antah bara buah rasonyo gedung komplek Museum ko,
indak pulo mbo etong doh, nan jaleh, salain musajik,
gedung-gedunt tu bagonjong sadonyo.
Didalamnyo ado silsilah katurunan Tuanku Imam Bonjo,
koleksi alaik-alaik parang, pakaian tantara Imam Bonjo,
de el el nan banilai sejarah.

Disabalah kida awak ado Tugu Equator
perlambang bahaso nagari Bonjo
dilewati garih Khatulistiwa
(equatorial line caro aia tawanyo).
Indak jauah dari tugu ko ado pulo bangunan tabukak
nan kito sabuik jo Medan nan bapaneh.
Baitu juo antaro tugu jo Medan nan bapaneh ado pulo
gedung mambulek sarupo bola
(indak atoknyo sajo nan bulek doh)
nan manyimpan babagai alat kesenian tradisional awak,
dan sekaligus tampaik latihan berkesenian,
tarutamo drama tradisional, bagi pencinta kesenian.
Untuak mancapai areal tugu dari areal museum
atau nak baliak ka museum baliak....
awak indak paralu balari-lari manyubarang labuah doh,
alah ado jambatan panyubarangan,
baatok,....... kalindungan,..... sajuak awak disinan.
Babeda bana jo jambatan panyubarangan nan ado dikota-kota,
bantuak dimuko terminal lintas (alah pindah?) Padang
atau di Jakarta nan batilanjang bogek sajo.

Dek ari lah baransua patang, indak mungkin lai ko.....
Dari pado disiram ujan dipajalanan, ambo bao Ujang pulang lai
Tapi dek ambo nan maajak, tapaso ambo mamilin gas kudo
Samantaro sagitu sajolah daulu,
kok umua lai samo panjang,
insya Allah basuo kito baliak,
di daerah pariwisata nan lain pulo.
tantu sajo......... tanpa kacobong kamera

Tutuik Jendela ko