LUBUAK
MINTURUN
dari tabiang
ka pasia putiah
kakanan jalan lubuak minturun
dikualo nyiua minum kopi
bara kasantiang ilimu pakasiah
kok indak makan indak minun
cinto barubah jadi banci
sakali ko
ambo jo Ujang nak ka Lubuak Minturun
(kalau sanak jo biyai alun tau, lubuak minturun tu ado di kota
Padang,
sasuai jo pantun diateh, dari Tabiang manuju Pasia putiah,
beko awak basuo jo Simpang tigo ka kanan
ikuik-i lah tu jalan simpang kakanan tu
jan ragu-ragu, kiro-kiro ampek atau limo kilo labiah saketek
sampai wak ka Lubuak Minturun)
Sasudah makan pagi, kiro-kiro pukua satangah sambilan pagi
ari akaik tu, kami lah siap-siap untuak kabarangkek
samantaro tu,
kudo katutuih lah dibarasiah-an dek Ujang
lah bakilek,
samparono gosoknyo
indak lupo pulo barang bawaan nan paliang pantiang
yaitu........nasi bungkuih jo samba lado
samba ladonyo duo macam,
nan sirah dikanan, nan ijau dikida
(kan baitu posisinyo ndak?, ssst....main pulitik nyo)
Samba lado kuniang?.....jan bagarah ncu.....
Salain tu ado juo sayua buncih, pucuak ubi, jo kambeh
untuak kadimakan sasudah sumbayang luhua
di Lubuak Minturun tujuan wisata
kutiko ambo
jo adiak mbo pai kasitu dulu,
jalan masih ketek mak, aspalnyo alun aspal hotmix lai
tapi masih aspal hotbuton....
Tapi samantang pun baitu,
urang banyak tatap basumangaik
untuak mamanfaatkan waktu luang
untuak pai jo urang nan dicintoi ka lubuak minturun ko
Dipacapek
curito, lah barangkek kami dari rumah
ambo duduak dimuko Ujang duduak mambonceang
alah saminik duo minik lah sampai di aia tawa
indak pulo lamo antaronyo lah tibo awak di Tabiang
disabalah kanan awak nampak kapa tabang sadang parkir
antah nak kanaiak antah baru turun....
Nan jaleh nyo, ampek nan sadang parkir
indak bara minik sasudah tu,
lah sampai di stasiun kereta api
basuo jalan basimpang kakanan, lewaik-i sajo
basuo jo simpang kakanan ciek lai, ikonyo
jalan manuju lubuak minturun
tampek nak mudo basantai-santai
Simpang tigo
Stasiun kereta api lah dilewaik-i
lah babelok kakanan
lah maluncua arah ka lubuak minturun
tapi alun jauah bana lai, ado jalan manurun saketek
dianju onda buruakko supayo nak kancang
kalau indak modeltu, basiinsuik se nyo
payah awak dipandakian beko,
lah mangapopoh gas dipilin,
nan larinyo sakancang itu juo
kadang-kadang lameh wak dibueknyo
"Da.... baa
kok Lubuak minturun namonyo kampuang ko?"
batanyo siUjang kek ambo kutiko kami lah sampai disinan
"indak jaleh diden doh Jang..." jawek mbo
"mungkin coiko ndak?..... lubuak nan ciekko
dek lataknyo diilia
dinamoi lubuak minturun,
mungkin ado lubuak sabuah lai dimudiak,
namonyo lubuak minnaiak......." keceknyo
Pandai pulo sigapuakko mangarang-ngarang
"itu kan dugaan waang....dima pulo ado min turun naiak"
kecek ambo
"antah kok iyo bagai......."ceknyo, indak namuah kalah pajako
"kalau manuruik den co iko......"
"Baa...da?"
Samantaro tu, urang banyak
lah mulai badatangan katampek kami duduak-duduak.
Disitu ado banyak dangau
dibuek pamarintah mungkin.....tampek duduak-duduak
ditapi sungai balubuak dalam, babatu gadang ko
"Indak jadi
den bacarito doh, uranglah banyak .....!!"
Alasan mbo sajo tunyoh, sabananyo ambo kahabisan bahan.
Indak ado lai nan kadicaritokan ka Ujang gapuak ko,
ambo ambiak elah, maleh awak didanga rang banyak
"uda ko gadang bohak,..... indak tau kecek-an sajo ndak tau,
ma nyo nasi bungkuih tadi,.....den lah litak" kecek Ujang
Ikolah
contohnyo ngah, adiak gapuak mbo ko
kama sajo diajak bajalan, tapaso wak mambao nasi bungkuih
mangango se paruiknyo tu....!!
Samantaro urang badohai-dohai bagalak-galak,
samantaro nan lain balapak-lapak mandi sanang
siUjang bakucatak malapah nasi bungkuih
lah habih nasinyo,
bungkuihnyo nyo campak-an ka batang aia tu
"baa mangko waang campak-an sarok ka lubuak tu?"
sapatigo bangih mbo (saparo kuirang saketek)
"Bukan sarok tu da.....makanan ikan" keceknyo.
Manggeleang-geleang mbo dek ulah parangai si Ujang.
"maa panciang
wak Jang?"
rencana mbo nak mamanciang ikan disiko
parintang-rintang ari, nak baleha-leha
sambia basiua-siua ketek di Lubuak Minturun ko
"lupo den mambao" jawek Ujang
"Eeee...tumbi,... kamanga awak disiko namonyo ko?,
kamancaliak urang bapacaran? manga waang tingga-an?"
manggarumeh mbo manahan parasaan
"bukan batingga-an, cuma lupo..., kok kabangih uda,
bangihlah,...bisuak mbo caritokan di asrama awak,
bahaso uda bangih-bangih di Lubuak Minturun,
aa sababnyo, SALUANG SAJO MANYAMPAIAN...ha, baa gak ti?"
pandai bana
nyo mancari elah supayo ambo indak bangih-bangih,
ka den pangakanlah si Ujang ko koha?!
samantaro tu,
dari tampek duduak-duduak disabalah kanan kami
tadanga lagu jo garincang gitar bagai
nan dihoyak dek nak mudo barombongan,
(rombongan asrama mahasiswa nampaknyo)
basamo-samo mereka tu manyanyi
bunyinyo: cintaku sedalam lautan
"panduto
urang nan mambuek lagu tu da yo?" kecek Ujang
dialiahnyo paratian mbo ka nan lain dek Ujang
"apo?" cek mbo
"ituuu....lagu nan didendangkan pareman tuuuu..."
komentar Ujang
"panduto baa mungkasuik waang ko?"
"ambo yakin, nan mambuek lagu tu, alun panah manyalam
ka dasar lauik lai, dima nyo tau?"
nyo tantang ambo dek Ujang untuak badebaik
"mungkasuiknyo, lauik tu kan dalam, jadi cinta nan
didendangkan para mahasiswa tu,....yo...dalam...
sabana dalam...."
kecek mbo sambia tagak nak maambiak kureta katutuih
Mancaliak ambo bajalan nak maambiak kureta tu,...
Ujang balari pulo mandakek ambo,
"indak iyo kodoh, tingga den beko ko!!!" keceknyo
Samantaro
sagitu sajolah daulu, kok umua lai samo panjang,
insya Allah basuo kito baliak,
di daerah pariwisata nan lain pulo.
tantu sajo........................ tanpa kacobong kamera
Tan
Galamainda
Tutuik Jendela ko