LUBUAK BUNTA / TAPIAN PUTI

Sabananyo ari akaik nan sakaliko ambo nak mambao Ujang
mangunjungi danau,
cuma dek alun jaleh danau nan ma kadikunjungi....
dari pado lalok dirumah, ambo bao nyo ka Lubuak Bunta,
nak mancaliak tapian puti.
(Kalau sanak jo biyai alaun tau, lubuak bunta ko indak

jauah doh dari Kayu Tanam. Kalau awak dari Padang,
manado bana merek "Lubuak Bunta" manyonsong awak,
jadi indak kasasek doh.
Kalau awak dari Padang Panjang indak manado merek tu
doh,
jadi sampai di Kayu tanam, labiah rancak batanyo kek
urang awak disinan).

Ujang adiak mbo ko, kalau urusan gadang badan,
gadang inyo dari udanyo.
Baa ka indak, ..... isi utaknyo tu cuma makan.
Pai ka Bukik tui, ka arau, ka lubuak paraku, ....
kama lai tu,..... baru sajo sampai di lokasi,
makan nan dikajanyo dulu.

Tapi kalau urusan pambangih, kalah si Ujang dek ambo,
acok ambo mahariaknyo dari padao inyo mahariak ambo
(sabananyo ........kalau bisa, ijan pambangih,
apolai kek urang nan tuo dari awak).
Nan jaleh kalau urusan makan, mambana mbo ka Ujang,
angkek tangan, mbo.

"Jang..!! baa kalau ka Lubuak Bunta kito pagi ko? Akur?"
"Kama-kama se lah.... makan pagi sen alun wak lai,
makan wak dulu,...!" jaweknyo
"kalau baitu, batanaklah capek....!!"
"Dih..."  ceknyo

Kami tingga di asrama, nyiak-ki, jadi harus batanak
supayo imaik saketek, kakawan nasi,
kalau indak ikan kariang....yo, talua ayam,
sakali-sakali babali gulai kapalo ikan,
tigo ratuih limo puluah rupiah sabalah, gadang.
Sakaliko, untuak ka kawan nasi nan kadibao kasinan,
ambo alah mambali ikan sarden, ....
jarang bana ko nyoh kami samewahko.....

Dipasingkek curito, kini kami lah salasai makan pagi,
lah kanyang paruik,
lah badangkang sandao...(sendawar?),
lah bakilek paruik si Ujang, co boto digosok,
lah basiap-siap pulo mbo mangaluakan
unto katutuih ka halaman.
Tapi disiko pulolah cilakonyo mak, si Ujang ko,
kalau inyo lah makan, taduduaknyo antah bara kalamonyo,
ngilu paruiknyo mungkin dek kanyang amek.

"Pai wak lai Jang...!"
"Tunggu nta da...!!" elahnyo
"aa juo lai, ha?"
"Paruik mbo kanyang bana" keceknyo

ko lah contohnyo,.... ndak talok diangkek badannyo tu lai,
kalau nyo lah makan.
Basanda nan katuju deknyo didindiang,......
digosok-gosoknyo juo paruik ganduik tu.

"Capeklah...!, ari lah tinggi...!!"
ambo karehkan suaro mbo saketek
"dih...da, mbo lap badan cah...."
"Waang, itulah salahnyo..... digertak mangko manggarik...!"
lah agak tinggi nada suaro mbo
mungkin kalau di lagu, refrein nyo mungkin ko

Inyo lap badannyo, tuan, sasudah tu pai nyo kabulakang,
eh, ka WC.... indak jaleh dek mbo doh
manga nyo disinan.
Indak lamo sasudah tu doh, lah kalua nyo.
Lah bapakai baju bagai.
Samantaro tu ambo lah manunggu dipungguang kudo,
manunggu sigapuak duduak maacahkan ikuanyo dibulakang.
Indak banyak curito lai, ambo lansuang tancap gas.
Alun samparono bana duduak Ujang dibalakang lai,
ambo pilin gas tu, mandongkak sikudo japang, sahinggo
takadiak pinggang Ujang kabulakang,...
ampia tajilapak.

Tapaso mbo karajoan modeltu tuan,
kalau dipaturuik-an, antah bilo kabarangkek jadinyo....!
Mako kini kami lah bajalan manuju Lubuak Bunta.

Minik partamo, aia tawa lah dileawaik-i, mini katigo
lah dibulakang pulo daerah Tabiang, duo minik sasudah tu
lah tingga pulo pasia putiah
(samo jo kapa tabang capeknyo kiah),
kiro-kiro sajam labiah saketek dipajalanan,
lah sampai awak di Lubuak Bunta.

Ditampek nan agak talapang, diantaro onda-onda banyak
bacampua baua jo oto bagai
kami parkir pulo unto katutuih disinan
(parkir disiko indak mambayia doh tuan)
sasudah tu, kami pai bajalan kaki
manuju lubuak nan paliang gadang
mancari lubuak nanpaliang laweh
paliang rancak pulo tampek duduak-duduak
bisa malonjokan kaki bagai disinan,
kok latiah wak

Ujang mambao kampia, ambo jalan malenggang
kunci kontak taganggam ditangan kanan,
bajalan digaya-gayakan saketek
maklum, awak anak mudo kato urang
baonda pulo,...unto katutuih, kureta gonyek
pokoknyo, ado alasan untuak manggaya.....

Ditampek nan mbo curitokan tu, kami duduak
duduak santai malapeh angah
disampiang tu,....
manunggu manjalang badan agak dingin saketek
siUjang duduak pulo, lah nyo latak-an kampianyo
"Ahai,.....sampai wak!" keceknyo

Dek tampek disitu rami bana,
maklumlah ari tu ari libur pulo,
banyaklah nak mudo, pemuda jo pemudi datang kasinan
sahinggo lingkungan lubuak ko lah rami bana rasonyo
indak sepi lai,
indak tanang lai,
indak asoy lai
tapi samantang pun baitu, kami duduak juo
istirahahahahahahahahat diantaro urang nan banyak

Ado nan mambao gitar, mulai nyo kincah gitar tu
inyo garincang garinyiak-i gitar tu nampak dek mbo,
lah mulai badohai bagalak-galak, manyanyi basamo-samo
lagunyo peluklah diriku (dendang Rano Karno ko ncu)
sasudah tu, lagu nan lain ndak jaleh dek mbo lai
sabab ambo lah sibuk pulo mancari si Ujang
lah mailang se adiak gapuak mbo ko......
Ruponyo inyo pai malucuih kutiko urang mulai manyanyi tadi

indak lamo antaronyo, basuo dek mbo inyo sadang sibuk.....
biaso ncu, ...... sibuk manyuok, manyansang, manyungkah

"Manga waang malucuih se ?" cek mbo
"litak bana mbo da..." jaweknyo
samantaro tu ikan sarden tu lah abih dek nyo saparo
iyo luruih saleronyo, adiak mbo ko!......

"Jang,....uda nak mambao waang jalan-jalan ka tapian puti!,
Lai namuah waang?" tanyo mbo
"makanlah dulu..., koha...!" pintehnyo
nyo agiahkan kek ambo nasi sabungkuih
"lai tadanga dek waang uda mangecek tadi, Jang?"
mbo sasak-an saketek

kalau indak di coitu-an, basilaanteh angan nyo kek awak ....
"lai da, cuma bekolah sasudah makan den jawek....
makan wak lu!" keceknyo
indak jadi mbo bangih doh ngah,
daripado bangih....lebiah elok makan yo ndak?
 Ambo sungkahkan pulo nasi bungkuih nan bakawan
jo ikan sarden tu......

"mintak nasinyo stek da,..... alun kanyang mbo lai"
kecek Ujang
Alun salasai kalimaiknyo lai, tangannyo
lah masuak ka nasi bungkuih mbo!
"Ijan banyak bana makan Jang!....awak kabajalan.....
jalannyo indak data doh,
taantak-antak paruik bondek waang tu beko......ngilu..."
komentar mbo
"tangguang da!, lah semi final"
pakai semi final bagai ruponyo makanko....

Sasudah makan, ambo ajak Ujang mancaliak-caliak tapian puti
tujuah tapian nan rancak-rancak
balupak-lupak tapi barasiah
janiah co aia mato
cuma dek jalannyo indak data..... tiok sabanta baranti siUjang

"angiah paruik den da...." keceknyo, lansuang duduak taanyak
"kan lah den kecek-an tadi!....
waang, salero sajo nan bapaturuikkan"
saringik mbo
"iyo da.....tapi, ikan sarden tu lamak bana"
ado-ado sajo alasannyo untuak makan banyak.....

Dek Ujang lah mahanyak sajo dirumpuik taba ditapi jalan tu
indak sempat kami bacarito lai tantang
tujuah lupak tapian puti nan aianyo janiah bana tu
wakatu lah abih dek bangih-bangih sajo

Samantaro sagitu sajolah daulu,
kok umua lai samo panjang,
insya Allah basuo kito baliak,
di daerah pariwisata nan lain pulo.
tantu sajo......... tanpa kacobong kamera.

Tan Galamaindo

Tutuik Jendela ko