MUSAJIK KAMPUANG LADO

Sakali kini ambo jo si Ujang pai ka Kampuang Lado
(kalau sanak jo biyai alun tau, kampuang lado ko talatak
arah ka utara Batu Sangka, lewaik saketek sungai tarok)

Supayo nak singkek curitoko
supayo indak banyak bana galemenyo,
kito mulai sajo pajalan ko dari Batu Sangka

Singkek curito, ambo jo siUjang lah tibo di Batu Sangka
Singgah kami sabanta di Limo Kaum, nak mancari lamang gadang
Kan iyo? kalau di Padang Panjang, di Bukik Tinggi, di Padang,
dikota-kota lainnyo dinagari bundoko
alah tasabuik sajak daulunyo yaitu lamang Limo Kaum
lamangnyo gadang, baminyak pulo,
sudahlah baminyak, lamak pulo

tapi ndak balaku kandak ati sakaliko doh ncu,
indak basuo lamang gadang tu doh,
tapaso pitih pambali lamang tadi dibalikan sajo
ka bensin,....lumayan

"eee...baa toh ka bensin babali-an pitih tu sadonyo?"
kalua protes Ujang
"indak sadonyo doh Jang, masih barisi juo dompet den baru!"
jawek mbo
"indak picayo den doh,........ maa?" keceknyo
Ambo bukak dompet mbo, mbo pacaliak-an ka Ujang.
Ruponyo kesempatan iko bana nan ditunggunyo.
Kutiko dompet mbo sadang tabukak tu... nyo semba...
diambiaknyo pitih tu saalai. Sasudah tu diagiah-annyo
dompet tu kek ambo baliak.

"pitih bara nan ang ambiak tu?" kecek mbo
"indak pitih gadang bagai doh da,...aden auih"
keceknyo, sambia balari kakadai ditapi jalan.

Ruponyo inyo mambali limun, diduduiknyo sakali disinan.
Abih!

Kaba baraliah hanyo lai, sungguah baraliah sinan juo
Sasudah kudo minum di pom bensin,
perjalanan dikatutuihkan manuju arah utara
lewaik sungai tarok saketek belok kida
(jalan maminteh, nak dakek)
jalanko mandaki taruih, tapi aspalnyo licin
salicin titik-titik (aaa arati titik-titik ko go ha?)
Sapuluah atau limo baleh minik dari Batu Sangka
kito lah sampai di Kampuang lado
kampuang nan agak lambek dimasuak-i listrik,
karano nomor satu manang disiko
(limo baleh tahun nan lalu, mak, ijan bangih ka ambo)

Pucuak nipah timbakau padang
Sasudah nikah hati wak sanang.....

Limo baleh taun nan lalu,
tajadi galodo ketek dipungguang gunuang marapi
tanahnyo basilonso, anyuik dibao aia ujan
makin kailia makin gadang galodo pungguang marapi tadi,
sahinggo banyak sawah nan dilendonyo
padi nan sadang masak aia, manguniang..... dilindihnyo
banyak pulo karugian masyarakat sakuliliang,
tamasuak korban nyao
ado nan anyuik dibao aia gadang tu
basuo diilia lah jadi bangkai
innalillahi wainna ilaihir raji'un
Tuhan babuek sakahandak-Nyo
itulah nasib kampuang lado kutiko itu

Sasudah galodo tu
banyaklah urang dari ampia seluruh sumatera barat
datang katampekko untuak mancaliak
bakeh-bakeh galodo nan modelnyo lain dari biaso
bukan galodo dari ulu aia,
tapi galodo dari pungguang gunuang
namun, batang aia juo nan manangguangkan
manggalonto sampai kailia
amih jo angik bacampua baua,

Mako bagadoroh pulo bantuan sosial datang kasinan
mulai dari masyarakat sakuliliang,
sampai kaurang awak diparantauan,
basaratoan jo bantuan sosial pamarintah

Dibaliak curito sadiah tu, ado nan nampak dek ambo ciek
agak mancanda nampak dek mato
istimewa kato rang kini
nan paralu rasonyo diinok dimanuangkan
yaitu tantang kabasaran Tuhan kuaso
mustahil manuruik aka,
biaso sajo manuruik ilimu Tuhan

Ado musajik gadang punyo masyarakaik kampuang lado
nan talatak agak dibaruah (dibawah, randah)
seolah-olah talatak dalam tabek gadang
sakuliliang musajik tu tanah tinggi kasadonyo,
sahinggo dari arah manopun kito, kalau nak kamusajik
jaleh manampuah jalan manurun

Tapi dihari galodo bandang tu, balain bana curitonyo
sawah ditanah katinggian, lah tandeh dialuik galodo
tabek gadang nan banyak didaerah sinan,
lah data ditimbun tanah jo batu sagalo macam
lah ado pulo urang nan anyuik bagai
tapi..... musajik nan talatak paliang dibawah
nan talatak seolah dalam tabek gadang
indak ditampuah saketek alah juo dek galodo doh
ijankan timbunan sarok nan kamalanyau,
aia sajo ndak namuah manurun kamusajik tu doh,
Tuhan babuek sakahandak-Nyo
kito lah patuik bana mambaco Allahu Akbar
tunduak sapanuah jiwa raga ka Nan Kuaso
tanyato manusio ndak ado dayo dan upayo
nan diuji jo galodo

kok ado wakatu sanak, elok dicaliak musajik nantun
musajik nan jaleh-jaleh dibela Nan Kuaso
Tuhan panguaso alam

"hoih!, maa nasi bungkuih wak?"
takajuik mbo kanai ariak si Ujang,
abih lamunan nan sadang bamain ombak dikapalo,
ilang pai antah kamano dihariak Ujang ganduik
"hah!, abih lamunan den dek ulah waang!,
tuu ha!, sungkah lah...aden kabamanuang baliak..."
kecek mbo.
"hehehe...bamanuang lah taruih...kanyang wak dek bamanuang yo?"
mancimeehnyo

Samantaro sagitu sajolah daulu,
kok umua lai samo panjang,
insya Allah basuo kito baliak,
di daerah pariwisata nan lain pulo.
tantu sajo......... tanpa kacobong kamera

Tan Galamaindo

Tutuik Jendela ko