KA INDROPURO
Hari pakan di Balai Salasa
Rami nan bukan alang kapalang
Gulai pakunyo lamak bana
Batambuah makan nak bujang
Balai Salasa pakannyo rami
Kadai musiman sampai kalabuah
Tasasak bagai ka kantua pulisi
Lah bagadicak jalan dek kumuah
Kok bamungkasuik masuak pasa
Guluanglah dulu sarawa pintalun
Supayo sarawa tu jan baluluak bana
Kadang-kadang lunaunyo babaun
Kantua pulisi di dakek pasa
Jambatan panjang di kidanyo
Dimukonyo ado jalan baputa
Kantua U.A. malah kironyo
Lah lapeh latiah sagalo panek
Diansua bajalan hanyo lai
Onda katutuih diracak juo
Dengan bismillah denai barangkek
Gigi satu masuak sakali
Taayuak-ayuak ka Indropuro
Gigi satu masuak taganyuak
Kadang kadang badangkang bagai
Kalau daulu jo Ujang gapuak
Sambia bajalan badendang bagai
Kini badan bajalan surang
Jo bismillah dari Balai Salasa
Lah makan pagi jo paku randang
Elok capaknyo St. Galamainda
Indropuro taraso jauah
Dek awak bajalan surang sajo
Ondeh Ujang tabayang juo
Kambiang jo bantiang banyak dilabuah
Ndak abeh dek awak sia nan punyo
Baga-bagak kasadonyo
Baa mantun denai katokan
Kambiang jo bantiang bagak bana
Gas den pilin tuter ditakan
Nan mereka icak-icak indak mandanga
Tapaso awak bajalan zigzag
Bantuak sadang ujian SIM sajo
Bajalan diantaro bantiang banyak
Nan tidua diateh aspal kasadonyo
Kadang-kadang tapaso baranti bana
Karano jalan taampang kasadonyo
Gigi ampek tasontak turun takaja
Dek bantiang mada denai marabo
Walaupun marabo dek ulah bantiang
Hati awak sanang rasonyo
Diari angek rangkuangan kariang
Nagari dituju lah dakek pulo
Ondeh bantiang sia nan punyo
Manga taranak dilapehkan sajo
Iyolah santiang nagari bundo
Jalannyo rancak hotmix sadonyo
Denai tagageh ka Indropuro
Kok lai untuang bakandak buliah
Handak manyilau kuburan tuo
Makam si bundo Mandeh Rubiah
Alah sarantang pajalanan
Pasa Kalitan lah dibalakang
Jalan baliku aspalnyo rancak
Taraso kanyang sabalun makan
Mato mangantuak barubah nyalang
Nagari dituju lah mulai tampak
Ikolah ruponyo si Indropuro
Tampek bakubua Mandeh rubiah
Puti nan dari Pagaruyuang
Sajuak taraso dikiro-kiro
Tajanguak juo kampuang sejarah
Assalamu'alaikum mandeh kanduang
(lah sampai kito)
Kalau tuan ka pakan Satu
Tolong balikan si sarikayo
Itu rasonyo nan takandak
Ranah bundo tacinto pamit daulu
Pakan muko kito sambuang pulo
Kok untuang lapeh rindu jo taragak
