GUNUANG TAJADI

Untuak datang ka gunuang tajadi ko,
yo harus di sangajokan bana
sabab tampekko talatak di Bonjo
(nagariko bukan Bonjo ampek angkek, bukan kito tuan,
tapi Bonjo nan di Pasaman, cuma limo puluah kilo dari Bukik Tinggi)

Di ari akaik nan sakaliko, ari nan elok bana
langik tarang indak ba awan, janiah co ...apo yo?
(buek se lah ibaraiknyo surang-surang...
pokoknyo langiktu janiah)
Sasudah makan pagi, kiro-kiro pukua satangah lapan kurang limo
sasudah di apuih-apuihnyo pungguang kudo tuo tu
Ujang adiak amboko mulai maengkolnyo...iduik
"paneh-an sabanta jang, kiro-kiro saminik duo minik" cek mbo
"yo da....cuma salimuik jaboknyo nampaknyo paralu dituka ko"
bantuak montir bana adiak gembrot amboko,
tau pulonyo di salimuik jabok onda bagai
kalau sanak jo biyai alun tau jo salimuik jabok
nan dimukasuik si Ujang tu adolah prodo kopling
namonyo anak mudo, kan macam-macam se istilahnyo
sahinggo istilah "salimuik jabok" manjadi tamusahua pulo
"yo jang...baliak dari Bonjo nantik kito ganti" jawek mbo.

Dek masin unto alah paneh, dengan bismillahirrahmanirrahim
mako ambo jo adiak ambo nan karengkan banamo Ujang
barangkek manuju Gunuang Tajadi di Bonjo

sakaliko ambo nan manjadi pilot koreta ambuik-ambuik kami tu
(dek jalannyo maambuik-ambuik)
si Ujang jadi pasisianyo, pasisia indak mambayia
dari Bukik Tinggi kito manuju arah utara
alah saminik duo minik, lah sampai di mandiangin
minik katigo lah lewaik kami di tembok
minik ka limo lah sampai di pintu kabun
maluncua taruih ka gaduik,
lah sampai pulo di padang ijau
kiro-kiro satangah jam labiah saketek
lah mancogok pulo kami di palupuah
(sirah juo benderanyo baru tu...)
Satangah jam labiah saketek pulo sasudah tu,
lah malacam pulo kami di Kumpulan
(lah masuak Pasaman kito mak uncu)
di pasa Kumpulan tu, di Simpang tigonyo
batanyo kami ka urang lapau
"jauah Bonjo lai ni?" capek bana Ujang batanyo
"indak,...ampek kilo lai" ceknyo,
lah ampia sampai wak kironyo

mandanga jawaban nan bak kian
badan nan tadi agak loyo, tasimburek sumangaiknyo baliak
kami pacu pulo onda bagigi ampek tu arah ka Bonjo
pajalanan ruponyo manampuah jalan babelok-belok
maliyuak-liyuak co ula mudiak aia
baliku-liku caro Elly Kasimnyo
karano jalan tu barado di pinggang bukik

"iko bukik campak namonyo ko jang..." mulai ambo bacarito
"aaa da?, bukik campak? Samo jo bukik buang ndak?"
"Indak...bukik campak...yo bukik campak,
bukan bukik dicampak-campak-an alias dibuang-buang...
bukan baitu jang"
tapaso ambo manarangkannyo saketek
"ko pantunnyo jang:
Tantang mano bukik campak
Antaro bonjo jo kumpulan
Anak dagang dimano tampak
Dibao untuang parasaian

......ha...ba-a gak ti?"
"Itu pantun bukan sumbarang pantun tu da.." cek ujang
antah mencime'ehnyo antah ba-a, ndak jaleh dek mbo doh
 "ba-a ka indak, rang awak bia di Agam, di 50 Koto, di Pasaman,
dimaaa sajo...suko bapantun,....ha...lah sampai kito Jang"
"maaaanyo Gunuang tajadi tu?" ndak saba si Ujang lai
"sabaaaaalah waang!!,
iko awak di pakan sinayan baru ko..."cek mbo
mako kamipun pai ka bukik
nan ado dibalakang pakan sinayan Bonjo tu
manuruik urang disinan,
itulah nyo nan disabuik gunuang tajadi tu.
samantaro ado juo urang manyabuik gunuang tak jadi
Kami daki jo si Ujang bukik tu
Lah sampai kami ka puncak bukik tu, ambo mulai pulo
manambah pelajaran sejarah untuak adiak ambo si Ujang ko

"Jang...bukik ko lah nan sangaik ba peranan
ukatu parang paderi dulu"
ambo bukak preambul sejarah parang paderi ka adiak ambo
"parang nan dipimpin Tuanku Imam Bonjo tu da?..."
Ditangkoknyo panciang ambo
"iyo.." jawek mbo sambia manambah banyak curito satantangan jo
peristiwa parang paderi tu.

"Bukik tu disabuik rang siko jo Gunuang tajadi....
Ado pulo nan manyabuik Gunuang tak jadi
nan jaleh bukik tu dipakai untuak dapua umum katiko
bakacamuaknyo parang tantara Tuanku Imam Bonjo
malawan Kompeni ukatu itu" mbo uleh saketek
Kalau kito caliak....iyo basasuaian, ncu...
Banyak barang-barang paninggalan nan masih ado dibukik tu
misalnyo tungku gadang antah babarapo pasang

Kalau awak nak mancaliak pakakeh parang tantara Imam Bonjo
tapaso kito ka Museumnyo.....sabab,
barang nan lainnyo tasimpan di Museum Imam Bonjo disiko
lataknyo di Ganggo mudiak, Bonjo juo

"jang....layangkanlah pandangan waang
ka cabang Bukik Gadang tu"
ambo suruah si Ujang mancaliak ka arah Bukik Gadang
(Cabang Bukik Barisan)
sasudah mancaliak kasinan, batanyo inyo ka ambo
"ado aaaa disinan da?"
"Persis di subaliak bukik tu,
ado nagari nan namonyo Koto Tinggi"
ambo sakadar manggantuang curito apokoh inyo masih ingek
nagari nan lah panah kami kunjungi dulu.
"Koto Tinggi nan wak kunjungi dulu da?" tanyo ujang
"iyo....dakeknyoh Jang....Pasaman dari Pikumbuah....
kalau istilah urang Koto Tinggi
nan bacarito jo uda sangkek kito disinan dulu;
keceknyo: kok bakukuak ayam di puncak bukik tu,
tadanga ka Bonjo tadanga pulo ka Koto Tinggi ko, keceknyo,
Bara ka dakek-annyo Koto Tinggi ka Bonjo gak ti waang tu"
cek mbo.
"Ck..ck..ck, ikonyo Minangkabau dilingkuang bukik tu?"
"Jan salah-salah waang....daerah awak indak sakadar
dilingkuang bukik doh,...dilingkuang adaik...
dari sipisak pisau anyuik sampai ombak nan badabua,
dari durian takuak rajo sampai ka padang antah-antah
dari tiku ka pariaman sampai sasak aia bangih, banyak lai..."
Dek ari lah agak patang, sore caro anak mudonyo
nan labiah bana, langik lah malok alias mendung
tando ari kaujan
ambo ajak si Ujang pulang lai...
"bilo wak ka museum Imam Bonjo tu da?" tanyo Ujang,
alun puehnyo ruponyo lai.
"Kito cari pulo ari lainnyo" jawek mbo.

Samantaro sagitu sajolah daulu, kok umua lai samo panjang,
insya Allah basuo kito baliak,
di daerah pariwisata nan lain pulo.
tantu sajo........................ tanpa kacobong kamera

Tan Galamaindo

Tutuik Jendela ko