BENTEANG JO KABUN BINATANG(2)
Dijambatan pahubuang antaro benteang jo kabun
binatang ko
ado petugas nan karajonyo mangumpua-an pitih
dari urang nan mamakai jambatan.
Indak pulo banyak mambayia doh, dulu cuma saratuih rupiah sajo,
kini ndak jaleh dek ambo lai doh
Sasudah pitih kami agiah-an, kami baduo manaruih-an perjalanan
maonjak-onjaklah baduo baradiak
manuju kabun binatang. Binatang dikabunkan urang...
Nan partamo
sakali kami bakuliliang-kuliliang dulu,
bajalan manguliliangi resor kabun binatang ko
mancaliak koleksi binatang nan ado di kabun binatang ko
ado bamacam-macam buruang, ado bamacam-macam harimau,
biawak, urang utan, beruang alias baribeh, buayo de el el
salamo bakuliliang balega tu, indak mangecek amek kami doh
aniang-aniang se nyoh,
daruak-daruak karupuak sajo nan tadanga nyoh
lah panek dek bajalan,
kami duduak di halaman rumah bagonjong
nan ado di tangah-tangah kabun binatang tu.
"Indak ado nan
bantuak waang isinyo doh Jang...!!"
komentar mbo
"Itu pulolah nan takana dek mbo,
indak ado nan bantuak uda nan dalam kandang tu doh..."
keceknyo, lai ndak ilang akanyo mambaleh kato mbo kironyo doh.
Sasudah tu kami masuak ka rumah bagonjong
nan dipakai juo untuak museum mini caro kininyo.
Disitu ado bamacam-macam pakaian adat, ado pulo buku-buku
tantang kebudayaan Minangkabau, dan ado pulo barang-barang
paninggalan jaman saisuak.
Nan paliang
banyak mamakan tampek adolah
susunan tulang ikan paus.
Tulang-tulang tu disusun elok-elok baliak
seolah-olah susunan tulang kutiko inyo masih iduik.
"Kalau awak
maliek lantai rumah gadang ko, apo falsafahnyo ko Jang?"
Batanyo mbo ka si Ujang
"data balantai papan, licin badindiang camin" keceknyo
"aa tu aratinyo"
"dima pulo ado mereang balantai papan,
licin badindiang mato jo tapak tangan....!!"
apo lah nan dibaconyo dek paja gapuak ko go hah....!
Nan kalamak dinyo se mangecek
"kato-kato waang
tu samo jo kantuik haragonyo tu Jang,
... manyakik-an kapalo"
cek mbo
"yo....apo toh aratinyo...?"
nyo baliak-an pertanyaan kek ambo
"kalau kito maliek ka lantai rumah gadang ko,
iko nan disabuik bajanjang naiak batanggo turun,
hirarkis bahaso langiknyo" kecek mbo
lalu ambo tarangkan apo sababnyo lantai rumah
gadang ko batinggi-an
dibagian ujuang ka ujuangnyo.
Indak samo tinggi doh dari ujuang kida ka ujuang kanan.
"Kalau disamo tinggian kasadonyo lantai rumah gadangko,
itu menganut paham duduak samo randah tagak samo tinggi"
ambo tambah keterangan saketek.
Sahubungan jo duo istilah bajanjang naiak
batanggo turun jo istilah
duduak samo randah tagak samo tinggi nantun, iyo banyak bana
pertanyaan si Ujang. Maklumlah, urang cipeh nan kadiaja,
tahanyak wak dek nyo. Cuma, dek inyo adiak ambo,
angek dinginnyo ambo tangguangkan juo, asa si Ujang mbo ko
lai mangarati jo istilah-istilah adaik saketek-saketek
Samantaro tu, ari lah mulai malok (mendung caro
rang kampuangnyo)
tando-tando ujan katurun alah pulo nampak,
makin lamo malok tadi makin kalam,
lah mulai guruah-guruah tadanga dilangik
lah mulai kilek semba-manyemba
indak manunggu lamo, lah taraso rinai
ujan garimih nan manyakik-an kapalo
urang banyak nan di kabun binatang ko lah mulai
bagageh
tagopoh-gopoh nan tuo-tuo,... babaliak pulang
nan baranak ketek, tampak bana payahnyo
disampiang harus manjinjiang kampia makanan,
tapaso pulo manggendong anak nan mulai manangih,
indak surang duo urang tudoh nan manangih sarupo tu
pendeknyo lah bapakiak-an suaro paja-paja
Nan kami jo si
Ujang, tapaso balari pulo
baliak manuju benteang disubarang jambatan,
balari kancang....
Kalau indak kancang......tantu disiram ujan!!
iyo ngah, tapaso kami balari kancang,
sakancang-kancangnyo......
sahinggo kutiko malalui patugeh nan di jambatan tu,
tapaso disapo sambia balari sajo lai;
"maaf mandan, kami tagageh...." cek mbo
"bae-lah....." ceknyo
samantaro tu, Ujang lah tageok-geok dek balari
payah bana malari-an badan gapuakko nampaknyo
lai tau tuan?, apo sababnyo kami balari ka benteang?
Sabab,..... unto japang kami diparkir disinan.......
Bukik Tinggi kota Tri Arga
Jam gadang atok bagonjong
Kini manjadi kota wisata
Turih datang babondong-bondong
Samantaro sagitu sajolah daulu,
kok umua lai samo panjang,
insya Allah basuo kito baliak,
di daerah pariwisata nan lain pulo.
tantu sajo.......... tanpa kacobong kamera
Tan Galamaindo