BENTEANG JO KABUN BINATANG
Manga
disatalikan sajo benteang jo kabun binatang?
Jawabnyo: memang satali inyo kini, lah bahubungan bana.
Mbek cah, takana dek mbo lagu lamo Eddy Silitonga
nan bajudul Rindu dan cinta.
Diantaro bait-bait lagu tu ado kato-kato nan bunyinyo:
"Rindu dan cinta tak dapat dipisahkan",
kan paduto nyo namonyo tu ndak?
Nyo kecek-an rindu dan cinta tak dapat dipisahkan,
padahal lah inyo pisah-an lansuang. Apo pamisahnyo?
Tumah....DAN.
Baitu juo benteang jo kabun binatang kito satukan
karano nyo lah "bersatu" kini.
Antaro benteang jo kabun binatang kini lah ado jambatannyo
sahinggo
kalau awak nak ka benteang dari kabun binatang,
indak paralu jalan baputa sampai ka kampuang cino bana lai,
cukuik bajalan malalui jambatan itu sajo.
Cuma.....mambayia.
Kok ado diantaro
sanak jo biyai nan alun tahu
dima latak benteang jo kabun binatang, tampeknyo
di pusek kota Bukik Tinggi kota wisata (jadi, ado puseknyo).
Kalau sanak turun oto di terminal Aua Kuniang,
piliahlah angkutan kota ka jurusan pasa ateh,
lah tapek bana tibo disasaran tu mah.
Kok maleh mambayia dari terminal Aua Kuniang ka pasa ateh,
pupuahlah bajalan kaki. Indak jauah bagai doh,
kiro-kiro sajam pajalanan....kaganti olah raga,
kaganti mampataba muko,
untuang-untuang tangga tumik sipatu awak tu,
atau malatua jari kaki awak tu.
Karano dulu lah
tajanji-an ka Ujang
bahaso inyo kadibao ka benteang jo kabun binatang,
mako ambo piliah hari nan agak talapang yaitu sasudah
ujian semester.
Pado suatu pagi di hari akaik, sasudah makan pagi,
ambo ajak Ujang ka benteang,
(tantu namuahnyo), gadang bana hatinyo
"Jang...iduik-an
lah kudo waang tu...." cek mbo
"eh...iyo yo?, ampia lupo wak" keceknyo,
antah bagarahnyo, antah baa
indak lamo antaronyo doh, lah mangatutuih kudo japang tu
"naiak onda juo wak da? Kan dakek nyoh...."
Lah mulai nyo pacaliak-an banyak cik minyaknyo
"kok kabajalan kaki waang....jalanlah, den naiak onda"
cek mbo
"mungkasuik den, uda nan jalan kaki, uda kan kuaik balari,
den naiak onda...."
keceknyo, pandai pulonyo mambuek alasan, paja gapuakko.
Dek hari lai
rancak nampaknyo,
kiro-kiro puku sambilan lewaik saketek,
kami barangkek dari rumah manuju benteang.
Sangajo kami mandaulukan benteang karano disinan
ado tampek malatak-an onda.
Kalau kami ka kabun binatang daulu, kasulitan kami mancari
tampek malatak-an kudo kami,
jadi itulah alasannyo kami pai ka benteang daulu
sabalun pai ka kabun binatang.
Sabananyo ado tampek malatak-an onda, tumah...ditampek parkir
dimuko bioskop gloria, tapi kan mambayia,
awak....bukan dek pitih ndak ado,
saku tu bana nan bajaik, sampilik caro aluihnyo.
Lah salasai kudo
diparkir, mbo tanyo Ujang:
"Jang....nama nan benteang manuruik ang?" cek mbo
"tu...." jaweknyo sambia manunjuak ka menara dipuncak bukik
benteang tu.
"Itu menaranyo namonyo tu puak!!" cek mbo,
dek badannyo gapuak, mbo sabuiknyo...puak.
"kasabuah bukik-annyo ko nan benteang tu....!!"
ambo tarangan bana elok-elok.
"Baa kok indak samo bantuaknyo jo benteang buah catua tu?"
dipatelenyo mbo
"batele ang namonyo tu.....dima kabisa disamo-an buah catua jo
nan
sabananyo!!,.......Itu cuma buah catua,....
tapi iko....urek catua, batang catua, daun catua,
bungo catua, pucuak catua, disiko sadonyo......
langkap caro tan baronyo!!"
mamburansang saketek mbo.
Adolah kiro-kiro
satangah jam kami baduo
duduak-duduak disabatang mariam
nan mancodang-codang sakuliliang pungguang bukik tu,
sambia mangunyah-ngunyah gipang jo karupuak laweh.
Sabalun barangkek ka kabun binatang,
ambo tanyo Ujang jo ciek pertanyaan lai:
"baa pandapek waang Jang....kalau ado urang manyabuik
bahaso lubang japang nan dingarai sianok tu
bahubungan jo benteang ko?"
"Indak tamakan diutak den doh....., lah abih gipang tadi?"
bakandaknyo
"paruik sen pangana ang mah,.... pai wak lai" kecek ambo
indak banyak nan
kadicaritokan disiko doh ncu,
sabab banyak bana anak sikola bagarondoh poroh
datang diari akaik ko kamari
sahinggo indak dapek istirahat jambatan sirah
nan malangkuang dimuko gaduang benteng tu doh,
lanyok dipakai untuak tampek bakodak dek nan mudo-mudo
Kami manaruihan
perjalanan ka Kabun binatang malalui jambatan.
Tapi samantangpun baitu,
sabalun kaki dilangkahkan,
gipang jo karupuak laweh nan tadinyo ado duo plastik,
tingga plastiknyo sajo lai
kama toh isinyo?
Ijan ditanyo, bangih Ujang kek awak beko...
tam bakatuntam
bunyi tumik sipatu
malenggang bajalan diateh jambatan baru
nan manuju kabun binatang
pandangan dialiahkan arah ka kanan,
manado bana jalan Arif rahman Hakim
jalan kakida, jalan Minangkabau
diujuang sabalah sinan
mancodang Jam Gadang
samantaro dibawah awak adolah
kampuang cino ujuang jo pangka
indak taraso
kami lah sampai diloket
tampek mambayia (mambayia tuan),
kalau baitu kito
cut dulu curito sampai disiko
kito gantuang dulu kisahko
tantu sajo untuak disambuang
dengan edisi nan katibo.
baa gak ti?
Samantaro sagitu sajolah daulu,
kok umua lai samo panjang,
insya Allah basuo kito baliak,
dek curitoko sadang tagantuang,
tantu sasudah sambungan nan katiboko
kito basuo baliak
di daerah pariwisata nan lain pulo.
tantu sajo..........tanpa kacobong kamera
Tan Galamaindo