HIDUIK BAPANDIRIAN

Bapikie palito hati

Nanang saribu aka

Taraso lamak jan dilulue

Taraso pahik jan diluahkan

Bajalan injek-injek langkah

Bakato paliaro lidah.

Hiduik jan bak pucuak aru

Maikuik kama angin kareh

Iokan nan diurang lalukan nan di awak  

Tujuak luruih kalingkiang bakaik

Kok lah dapek kato nan sabuah

Kok bulek pantang basuduik

Kok picak pantang basandiang

Tapauik makanan lantak

Takuruang makanan kunci

Janji musti ditapek-i

Ikrar musti dimuliakan

Pandirian tak namuah dipangaruhi

Iman tak buliah goyang

Kamudi nan tak buliah patah

Haluan nan tak buliah barubah

Walau lidah kadiguntiang

Kato bana kadisampaikan juo.

Pangulu taguah di adaik

Malin taguah di agamo

Manti taguah di buek

Dubalang taguah di nagari

Bapantang hitam dek arang

Bapantang kuniang dek kunik

Bapantanng lamak karano santan

Bapantang lapuak dek hujan

Bapantang lakang dek paneh.

Sadang ditopan indak ka ganta

Kok kunun diangin sepoi basah.

Takuik karano salah

Barani karano bana.

Janjian arek buatan taguah

Indak lapuak dek hujan

Indak lakang dek paneh.

Satapak jan suruik

Sapadi jan dianjak

Saangin tak luluih

Salangkah tak lalu.

Indak dandang mati di lauik

Antah kok lapuak di galangan.

Hitamnyo manahan tapo

Putiahnyo manahan sasah

Panungkek adaik jo pusako

Barih tatagak indak rabah.

Kok tibo di padang hana

Indak diruruik daun talang

Sasak kaganti suluah batuang

Kok tibo tapek di nan bana

Bapantang suruik ka balakang

Dadak mananti di tampuruang.

Bapandirian tatap di nan bana

Bajalan tatap di nan pasa

Kok manyauak di hilie-hilie

Kok bakato di bawah-bawah

Kok ditutuik urang banda sawah

Dianjak urang lantak pasupadan

Diubah urang kato bana,

Baribu sabab nan datang

Busuangkan dado ang buyuang

Caliakkan tando laki-laki

Namun dalam kabanaran

Jan cameh darah taserak

Jan cameh nyao kamalayang

Jan takuik tanah ka sirah

Basilang tombak dalam parang

Walau dipancuang lihie putuih

Satapak jan namuah suruik

Nan bana diubah tidak.

Bungka ganok manahan cubo

Ameh batue manahan uji

Naraco pantang bapaliang

Satapak bapantang suruik

Salangkah pantang kumbali

Sabalun aja bapantang mati.

Indak bak baliang-baliang di ateh bukik

Baputa manuruikkan kareh angin

Samo jo pimpiang tumbuah di lereang

Kama kareh angin ka sinan pulo maliuaknyo

Bak lilin caie diangekkan

Kamano kelok loyang

Ka sinan pulo kelok lilin

Sapantun gatah caie

Bantuak sasuai bak panampuang.

Pisang sikalek-kalek hutan

Pisang tambatu nan bagatah

Koto Piliang inyo bukan

Budi Caniago inyo bukan.

Bak kabau dicucuak hiduang

Umpamo langau diikue gajah

Bak mangganggam baro angek.

Raso kabarek dilapehkan

Raso kaangek dijatuahkan

Raso kasulik dielakkan.

Sapantun daun simantuang

Sabaliak hijau sabaliak putiah.

Dalam bulek bapasagi

Dalam duo tangah tigo

Angguak anggak geleang amuah

Unjuak nan indak babarikan.

Ka hilie jalan ka Padang

Ka mudiak jalan ka Ulakan

Kok musuah indak dihadang

Kok basuo pantang dielakkan.

Tak lalu dandang di aie

Di gurun ditanjakkan juo

Tabujue lalu

Tabulintang patah

Wass...