PANTAI AIA MANIH

Sampai kini alun sempat mbo batanyo serius lai,
apo latar balakangnyo mangko cumpuak nan ciekko
banamo aia manih. Antah aia nyo nan
taraso manih (diminum) atau..... aia manangih
yaitu tampek mandeh malin kundang
manangih baibo ati.
Kok ado nan tau sejarahnyo, ado eloknyo
kito cucua papakan dipalantako.

Kalau sanak jo biyai alun tau jo pantai Aia manih,
lataknyo di bagian barat daya kota Padang.
Kini alah ado oto tambangan kasitu ambo raso,
karano kutiko ambo dipajalanan nak ka Taluak Bayua,
basuo jo jalan rancak bana, ruponyo itu
jalan ka Pantai Aia manih.
Nan ambo caritokan kiniko adolah carito
pai ka aia manih maso saisuak,
kiro-kiro lapan baleh tahun nan lalu,
kutiko kutiak siUjang (bukan ambo hehe...) baru baraja babulu
(maaf tuan).

Dari aia tawa perjalanan dimuloi,
ambo jo adiak ambo si Ujang
nak manuju pantai aia manih,
mungkasuik sakadar untuak bajalan-jalan malapeh rueh-rueh.
Maklumlah awak tingga dikota gadang Padang angek bakipeh.
Ukatu itu walikotanyo pak Hasan Basri Durin.

Kito aliah curito saketek, satantangan jo pak walikota kito ko
Pado kesempatan nan tapek bana, kami undang apak tu
ka asrama kami untuak sekedar bagurau-gurau jo mahasiswa asrama.
Kami layangkan undangan (bagak kami tuan).
Ruponyo surek undangan kami tu sampai ka tangan liau.
Nyo baleh surek kami tadi,
isinyo "dengan segala senang hati undangan adik-adik
akan saya penuhi, saya akan datang bertatap muka pada
tanggal sekian bulan sekian tahun sembilan belas tujuh puluh sekian",
itulah kiro-kiro isinyo.
Sasudah mambaco surektu, basorak pareman asrama sadonyo,
baa kaindak....tamu awak walikota.
Jadi, walaupun asrama kami buruak, tuan,
alah panah walikota duduak baselo dilantainyo.

Duo tahun sasudah itu, walikota batuka ka pak Syahrul Ujud,
ruponyo diambiak pulo kesempatan
dek asrama putri disabalah asrama kami untuak
mangirim surek undangan ka baliau.
Singkek curito surek undangan tu dibaleh pulo dek walikota
nan isinyo labiah kurang:
"saya akan mengadakan kunjungan lapangan ke air tawar
tanggal sekian bulan sekian, tolong adik-adik
koordinasikan dengan acara saya sehingga kita bisa
bersilaturrahmi, susunan acara terlampir"
baitulah kiro-kiro isinyo.
Basorak pulo padusi banyak tu:

"indak tuan-tuan se nan bisa maundang walikota doh, kamipun bisa"
kecek mereka tu manubo kami.
Kami (laki-laki) tantu indak namuah kalah, kami sambuang pulo:
"elok tu, tirulah taruih apo nan uda karajoan diak yo...!!"
kecek kami.
Tapi salanjuiknyo, tabuluyuak kami ("tabuluyuak", bahaso inggirih tu...
mungkasuiknyo, awak duduak seolah-olah indak ado tulang pungguang.),
ukatu silaturrahmi jo walikota tu,
mereka mintak TV kek walikota.....
bisuaknyo, lansuang TV diantakan dek pasuruah walikota ka asrama tu.
Dapek TV perainyo.

"Baa kiro-kiro, apo indak satu nol permainan kito?"
cimeeh para mahasiswi tu kek kami.
"TV nan diagiah pak walikota tun kan tujuah baleh inchi ndak?
TV kami tigo puluah inchi kurang saketek......ha.....baa kiro-kiro?"
kecek kami.
"Dima pulo ado TV baukuran "kurang saketek" bagai......"cilotehnyo.
"Nan jaleh, dengan adonyo TV di asrama situ, kan ado alasan
kami datang kasitu...!!"  cek mbo, kalua salero buruak wak
mancibia mereka tu tuan, antah sanang antah gali.
"Huh.... dasar laki-laki" keceknyo,
tapi nyo pasang galak manih.

Baliak ka curito tantang Aia manih. (Lamo amek takalancok curito)
lupo mbo sampai dima tadi tu..................
Barangkek dari aia tawa, kami jo Ujang taruih
mangatutuihkan onda tuo kami ka arah kelenteng
(masak kelenteng di Padang indak tau?, di kampuang cino)
Dari sinan awak taruih manyubarang sungai
sungai nan sabana "janiah" co tangguli.
Tagak bulu mbo mancaliak sarok-sarok bakalengkongan anyuik disitu,
mudah-mudahanlah kini indak tasuo sarupo tu lai.
Untuak manyubarang ko, awak buliah mamiliah,
nak mamakai sampan (mambayia) atau
naiak jambatan barayun (perai).
Kok gamang naiak jambatan barayun, tantu tapaso naiak sampan
(kalua pitih upah takuik dek gamang).
Lah sampai disubarang,
lah sampai namonyo kito ka gunuang Padang tu,
kok nak mancari kuburan siti Nurbaya....lah dakek tu,
atau, ....kok latiah bana....
 anggaok sajo salah satu kuburan cinotu sebagai kuburan siti nurbaya,
buliah juo.
Bebas asa urang indak bangih, haha.

"ma nasi bungkuih tadi Jang?..."
cek mbo, sasudah kureta, kami tumpangkan
dirumah urang dikaki gunuang padang tu.
"Nak makan da?" jaweknyo.
"Bukan nak makan, aden ragu kalau waang tinggakan pulo
nasi dirumah tampek awak manumpangkan kureta tadi"
kecek mbo satangah kesal.
Baa ambo indak kasaketek kesal gak ti tu,
pertanyaan ambo nyo jawek jo pertanyaan pulo.
Acok bana nyo co itu tu...... Dulu di Arau baru,
urusan makan juo, ampia tapilin dek mbo talingonyo tu lai.
"Koha, lai ambo bao" keceknyo
"mantunlah dari tadi....jan ditunggu uda waang ko
bantuak tan baro pulo" cek mbo.

Kalau ari akaik, banyak bana
urang bajalan kaki sapanjang kaki gunuang padangko tuan,
sahinggo kami hanyolah duo diantaro urang nan banyak,
sero pulo...... jalan baliku-liku,
mandaki saketek manurun saketek,
kakanan saketek kakida saketek, pokoknyo santai dan .....asooy
(iko istilah nan lagi "in" ukatu itu).

Singkek curito, lah sampai kami di Pantai Aia Manih,
pantai nan landai, lauiknyo nan janiah,
tampek nak mudo jo nak mudi balari-lari manjo,
tampek ambo jo siUjang manyungkah nasi bungkuih
nan lah taraso dingin.
Lah sampai kito di pantai tampek urang bafoto-foto,
tampek urang beraksi dimuko kamera masiang-masiang,
juo tampek mancaliak batu kapa malin kundang.

"Ka kapa malin kundang wak lah!!..." ambo ajak Ujang
"Nasiko kito pasudah dulu,....bekolah urusan nan lain-lain tu"
ceknyo, iyo kaparuik se pangana adiak mbo nan surangko.
Alun sempat kama-kama lai, nasi bungkuih nan nyo ambiak dulu.
"Ujaaaang...ujang, waang kecek-an ka lari nasi tu tu !!.."
kesal saketek mbo baliak
"bukan nasiko nan lari, salero mbo nan mangaja" keceknyo,
sambarangan sajo nyo mangecek ka awak,
padahal inyo mangecek jo udanyo.
Tapasolah mbo paturuikkan kandaknyo,
ikuik pulo ambo makan samo jo adiak mbo ko.
Sasudahtu baru kami bajalan-jalan.
Kami pai ka pulau pisang, pai ka batu kapa malin kundang
(kini lah basimin bagai)
Mungkin adolah kiro-kiro
tigo satangah jam kami dipantai Aia Manih ko

Dek ari lah baransua patang, dek urang banyak
lah ado pulo nan babaliak pulang,
dek Ujang lah mintak pulang pulo, kami ansua pulo pulang lai.
Sabananyo ado jalan maminteh ka taluak Bayua,
tapi dek unto awak batumpangkan dirumah urang
di kaki gunuang Padang,
tapaso jalan nan tadi dijajak-i baliak.
Paralu ambo ulangi, bahaso iko kisah perjalanan
lapan baleh tahun nan lalu,
kutiko jalan ka pantai Aia Manih alun sarancak nan kini.
Kalau sanak pai ka Pantai Aia Manih kini,
mbo raso, alah banyak angkutan kota bukak tambangan kasinan
(kalau nak mancubo pulo naiak angkutan kota koheh...)

Samantaro sagitu sajolah daulu, kok umua lai samo panjang,
insya Allah basuo kito baliak,
di daerah pariwisata nan lain pulo.
tantu sajo...........tanpa kacobong kamera

Tan Galamaindo

Tutuik Jendela ko