麻煩妹海晴~~~心煩日記

2003 年 07 月 9日 星期三【晴】

今朝早陪左MIMI去食早餐..
哈..佢真係越來越返老頑童..
感覺成個細路咁..

同佢講開旅行..
睇得出佢真係寄望我帶佢返印尼..
不過由香港搭去佢屋企真係比一般印尼地方貴..
因為佢果度O係印尼好入既地方...
佢仲好主動咁去問機票價錢..
仲話好想見佢哥哥..
我決定左陪佢去..
爭在唔知幾時同去幾耐..
不過我就係好驚悶...
話哂去度果度又唔識溝通...
不過呢D都係下個月既事..

到左下午..
有年事真係令我勁嬲..
就算到我呢刻寫日記...
我D火真係仲滾..
呢件事就係神奇打黎問我還錢...
我真係好嬲..追既數只係三百蚊..
其實佢之前兩日已經開始用PHONE CALL同MESSAGE追我..
感覺真係有D似收數公司..
佢追既時侯仲要同我講Liza迫佢還錢..所以佢追返我...
我聽完即刻無名火起...而家係我爭佢錢嗎?
其實仲要冇三百蚊咁多...因為佢話過請我食晚飯...
真係爭既都係佢幫我出果百幾蚊搭羅牌錢...
但當我再唸清楚...爭錢前後都唔過一個月...
好彩有寫日記...時間真係好清楚..
我由F.3開始識佢...佢就係咁...冇變過...
連我生日..電話都冇個..而家就狂打LAI追我還錢..
識我既人都知我唔係點爭人錢唔還既人...
我嬲既係...點解咁多年朋友...要出到好似收數公司咁既手段..
於是我好激動咁打俾佢..鬧左佢好耐..當然佢唔會覺得自己有問題..
最後既結論...我冇損失...
因為佢只會為左三百蚊冇左個識左好耐既朋友..
佢用左三百蚊去讓我睇清楚佢人格...
佢只會冇左一個真正當佢係朋友既人...
我好難去接受..我做左咁多年俾人攝時間既酒肉朋友...

神奇...
我同你既友情真真正正劃上左句號...

2003 年 07 月 8日 星期二【晴】

連續好天左多日..
好開心..
真係好憎落雨..
麻鬼煩...

朝早睇睇電視就過左半日..
到4點幾出門去..
去接阿石放工..
一齊去剪頭髮同拎佢副眼鏡..
我地拎完眼鏡後去左据扒..
哈...哈...哈...
實在太好味啦..
緊住我地去左剪頭髮...
等左好耐呀..
成兩個幾鐘..
不過個頭都OK...
勝在唔剪短我D頭髮...
緊住我地行左一陣就返屋企..

2003 年 07 月 7日 星期一【晴】

今日全日留左O係屋企..
睇睇電視..
玩玩電腦..
訓下覺..
開死左...

2003 年 07 月 6日 星期日【晴】

又再工作..
雖然係part-time..
但真係有點累..

發覺阿頭好喜歡將我與好玩既同事調開..
要我對住D好悶既人..
悶死..

夜晚同左阿石去打邊壚..
好飽...好好食..
感覺好滿足..

哈..
前兩日開始又食返藥..
瘦左一磅..
好開心...

2003 年 07 月 5日 星期六【晴】

今日又是工作天..
悶..
沒有特別..

2003 年 07 月 4日 星期五【晴】

今日睇電視睇左半日..
感覺有d悶..
所以決定出街行下..
o係出去之前..
我download左千fa同阿康既新碟聽聽先..

去到市中心..
買唔到野..
剩係買左我爛左既捷毛夾..
都幫我家姐買左mouse..

返到屋企..
除左聽下新碟外..
就係寫返我連日來既日記..
本來真係有d想放棄..
但石石唔止一次吹我寫日記..
^^ 都好..有人留意我既野..
雖然唔知有幾多人會關心下我既野..
但至少有你一個...
好...我就寫返日記啦..
再者因為石石唔係好鍾意傾電話..
我寫日記等佢知多d我既野都好呀...
不過一次過寫幾日既日記..
感覺真係幾係下...
我第日都係唔好咁懶啦..
不過都好彩..
竟然記得之前發生過既野..
呵...

P.S.千Fa隻碟幾好聽wor...

2003 年 07 月 3日 星期四【晴】

今日朝早去左交gant load form..
 勁快..去到由輪籌至交form check資料..
五分鐘攪掂..

跟住下午同左男朋友仔出去行街街買野..
三十幾度既高溫...
但行得好開心..
因為唔知點解佢今日好有mood..
我終於買左幾件衫...
同埋終於買到藥...
而石石就終於配左副眼鏡..
哈..佢完來有百幾度近視同二百幾度散光..
佢之前又唔配..仲帶副唔arm自己度數既眼鏡..
佢仲俾個sales問佢有冇開車..
笑佢如果o係邊頭開車通知佢..
佢唔去果頭...驚俾阿石撞呀..
哈..
不過佢配副眼鏡都真係幾型..
戴左上去後生仔D..In D..
唔似之前..好老實..
淺色眼鏡岩佢D..
到左夜晚..
我地去左旺角新世紀食日本野..
然後去左睇新紮師妹...
好失望..套戲冇劇情..冇話題..
但千fa演既傻氣真係有一手..
傻到令人覺得好白痴..好好笑..
而吳彥祖..就冇第一隻咁靚仔..
套戲又做左大甘草...
又可能我對呢套戲抱左好大期望..
所以我對呢套戲好失望...

2003 年 07 月 2日 星期三【晴】

今日本來唸住出街行下..
 因為家姐俾左錢我...
好耐冇買過衫..
但因為好懶..
最終都係O係屋企....

2003 年 07 月 1日 星期二 【晴】

今日係7月1日紀念回歸既大日子...
 因為好多香港人反對廿三條立法既關係...
所以有關人士o係呢日舉行左大遊行..
可惜..我今日要返工..
因為之前請左假..加上呢輪公司興炒人..
我都唔敢請假..
如果唔係..我一定會參與今次既大遊行..
我..唔係講下既...
因為由我開工開始..直到一點幾..
我個心真係好想..好想..去參加遊行..
直到兩點幾..我見到成個圖書館都係黑衫人..
個個都準備上街遊行既時侯..
我既反廿三既情緒就更高漲..
好可惜..我失策左..我冇著黑色衫..
我冇留言新聞..所以我冇著到黑色衫..
雖然我冇著黑衫..
但我都唔執輸貼左張反廿三既貼子o係身..
結果..當日雖然我冇參與..但我真係好開心..
估唔到咁大既數目..係"五十萬"...
董建華..葉劉淑儀..你真係唔好當我地o係廢先得ga..
其實我都真係好感動..
sars..廿三條..真係令香港人好團結...
我唔能夠上街...我真係覺得好遺憾..真係好遺憾..
仲要見到好多都係知識份子同埋青年人...
呢件事好值得香港人驕傲...
我..依然堅持我既立場..
反對廿三...董建華下台...

今日過得好FREE..
因為阿腳同阿LEE都冇返..
得POWER同DADA...
感覺好冇皇管..

到左夜晚七點..終於放工..
但D人都未遊完行..
自己..當然好想參與..
但係因為知道男朋友仔唔喜歡..
再加上見到夜晚去都好似冇咁有意思..
我最終都冇去..
之後..我同左石石去打邊爐..
食完飯後..我地行左一陣街..
就各自返屋企休息..

2003 年 06 月 30日 星期一 【晴】

今日無聊左半日..
 無無聊聊..
睇睇電視..玩玩電腦..
到夜晚總算有D細藝..
因為阿康有function..
係新城攪既歌唱比賽...
好多嘉賓..
但自己都係比較欣賞joey同阿康..
始終都叫唱得之人ma..
不過眼見joey瘦左好多..
勁唱得..只係大我幾日就咁有成就..
其實真係有D羨慕...
不過..當然唔欣賞佢搏上位既"方法"..
阿康呢..哈..依然咁型..
不過就肥左好多...
佢今日心情好似好好..
完左Show仲出lai同fans見見面..
有好多fans都送野..又同佢傾左幾句..
當然..我都係企埋一角默默支持偶像果隻啦...
^^

2003 年 06 月 29日 星期日 【晴】

6月29日...大日子...
 係我生日...我大哂...哈!

其實我都算霸道...
我唔單止霸左全日29號當生日..
由28號6:00pm放工後我就當自己生日...
放左工後...我約左阿思同阿石去龍豉灘BBQ...
食左好多野之餘...仲收到阿思既兩份禮...
一份係Burberry化妝袋同絲巾...
另一份係一張有齊麻煩妹人物既生日card...
兩份禮..我都好鍾意..
尤其是係張生日card..好扺死...
感覺好親切..
燒完野食後...我同思去左唱k...
唱到半夜三間三點幾...
雖然大家唱到有點累..
但呢刻..我更明白朋友既心意..

思..多謝你...生日我過得好開心...

返到屋企沖涼梳洗...
搞下搞下都成四點幾就黎五點..
好累..但都開電腦望望..
因為我知阿石錄左首生日歌俾我...
佢懶神秘..所以我唔會知係咩歌...
所以..當我開左首歌..聽到音樂聲..
原來首歌就係阿康既"最深刻的愛"..
可能我好鍾意首歌再加上首歌既旋律感覺上有點浪漫..
所以令我好感動...
果種感覺好難形容...但好真實...
真係好感激...
聽完歌後..好累..所以訓左..^^

訓到十點幾...我就醒左...
雖然感覺唔係好夠訓...
但我當然唔會放過生日既每一分每一秒...
我好快打左俾大石頭商討約會既時間...
最衰都係我D拖拖拉拉既性格...
因為套衫唔靚..個袋唔襯..個妝唔好...
令我遲到左九個字...45分鐘...
阿石真係好有耐性..佢好令我佩服同感激...
我唔明白..點解我每次約佢都遲到..
佢仲依然咁信任我..然後維持返佢準時甚至早到既精神...
今次遲左咁耐...見面時佢唔單止有鬧我...冇嬲我...
返而俾我話佢唔識路都好好脾氣對我笑...
我明白..佢唔想我生日唔開心...
之後..我地好簡單咁食野同行街..
我地仲去左維園既攤位...
佢買左一件衫俾我做禮物...
到夜晚..我地去左"巴西燒烤"食自助餐...
O係呢度...我發現佢變左...哈!
因為我地坐果度冇冷氣..
佢竟然吹D侍應幫我地轉位...
原因係因為佢知我唔鍾意...
其後..食食下..我地聽到兩個負責o係餐廳獻唱既男人..
對住另一張table既小朋友唱生日歌...
哈..原來同我同日生日...
其後..講竟然主動請果兩個男人過lai..
用英文講:she is my girlfriend..today is her birthday...
呢一連串既動作..我stop都stop唔切...
佢地就o係人面前對我唱生日歌...
旁邊既人聽到..都望過lai睇下邊個生日...
感覺...真係有D "lor"..不過唸唸下..又好感動...
阿石從來都未試過咁...佢終於開竅...開始識"lum"女啦..哈..
之後..我仲聽左首"right here waiting"...好正...
唱完之後..隔離table有人見狀即刻又請果兩個男人過去..
原來果度又有個好可愛既小DD生日..
哈..見到人地同我同月同日生日..
原來感覺真係好得意...

食完野後..阿石就送我搭車...
佢仲等埋我架車走左先走..
今日既一齊..真係好難忘..入哂腦..
佢..好重視我既生日..我既一切..
最開心..當然係佢送我呢個全包宴啦..
哈...扺死到連搭車錢都幫我出埋呀...

雖然阿石成日做天氣先生...
心情成日反覆無常..
但佢對我都好好既..
我既生日願望...
你辭職唔好再幫天文台收風睇水啦..
唔好成日冇mood..
雖然你冇mood既時侯唔發脾氣..
但都唔係太好ma..你令身邊既我好難做..
你有mood既時候..個人都好可愛既!!!

其中仲要好多謝所有向講生日快樂既朋友仔..
Candy..真係好有心特登打黎講生日快樂...
估唔到..好鬼感動..多謝哂你...

piccolor,Ong,Carol,Yan Yan,璇,神奇..
多謝你地既祝福...

我同自己講....生日快樂!!!

he he~~

2003 年 06 月 27日 星期五 【晴+雨】

一朝早開icq..
 有幾個朋友已經好早咁祝定我生日快樂...
其中一個o係阿思...
佢through icq send左張greeting card俾我..
死懶鬼..咁熟..休想咁就當生日禮物...
哈...講笑...
見到佢難得閒日online...
知佢"吞port"請左假...
緊係第一時間cher住佢陪我渡過無聊既假期..
於是我地o係2點幾出lai..
去左市中心食我地早,午夾埋既下午茶..
之後我地行左一陣街..
因為大家都太無聊...
佢帶住我睇左套"千機變"..
可能一開始對呢套戲冇乜大興趣..
對套戲既感覺好一般...
但估唔到竟然對呢套戲好有興趣既佢...
覺得套戲好垃圾...
咁套戲真係好極有限...
睇完戲之後...
我陪左佢去睇醫生..
緊住陪佢食野...
其實都好難得...
好開心可以同佢傾咁耐..
因為而家我六,日要返工..
真係好難得可以閒日一齊去下街...

走左後...
我打俾亞石..
好失望..又係果D敷衍我既態度..
我講野都唔夠五分鐘..
一句又一句"好啦...好啦..好啦"
搞到我好冇MOOD...
哈...唗氣...收線...
其實我都慣左同埋接受左...
哈..算啦!! ^^


P.S.我明白..你就是你...
都冇得唔接受啦...

2003 年 06 月 26日 星期四 【晴】

因為尋日做左劇烈運動既關係..
 對腳同個pat都勁痛..
至尋日寫日記果刻..
對腳都係維持o係忍受到既痛...
但估唔到...好戲在後頭...
到訓覺果時..對腳真係勁酸勁痛..
我好肯定..就算以前做幾劇烈既運動..
都比唔上今次咁痛...
呢D係忍受唔到既痛...
同一晚..我扎醒左四,五次..
次次都係痛醒...
到5點幾..我痛到頂唔順..
決定走出廳睇下有冇按摩膏搽...
點知係冇...果時我真係唔知點算..
因為已經痛到成個人都好清醒..
好彩..俾我搵到"必利痛"..
o係冇辦法既情形下...
我唯有"o拍"左兩粒....
(運動創傷搞到要食止痛藥我都係第一次見..
事後我話俾我家姐聽..佢都話我誇張..)
之後我就o係廳訓到6點..然後再入房訓...
好彩食完藥就冇之前咁痛..估唔到都幾駛得...
但呢隻痛..真令我沒此難忘...
緊住訓到8點幾..就俾我家姐嘈醒..
唉..我朝朝唔係俾mimi D歌聲嘈醒..
就係俾我家姐或姐夫D關門聲嘈..
我都係要唸下搬返自己間房訓先得...

之後今日一天都係睇電視同玩電腦...
本來唸住錄歌..但自己既歌聲真係越來越難聽..
連自己都頂唔順..放棄左..
真係不得不認老...把聲好似大過左好多..
唉..其實心情都好矛盾..
好想快D生日..因為可以得到俾人重視既感覺..
唔想生日..因為就快廿三啦..感覺好似咩都冇..
歲月好催人啊!!!

2003 年 06 月 25日 星期三 【晴+雨】

今日勁開心呀....
 同左班同事去沙田踩單車...
由兩點幾踩到六點幾..
就係o係榮瑞樓對面租車同還車...
因為之前sars既恐懼..令我非常驚..
不過我都做足哂防備..都ok 啦!!

講返今日既活動..真係好開心..
其實之前都想像到幾好玩...
但實際比我想像中更好..
初時都有D驚..
驚唔識踩..驚哂..驚累...
但實際上既開心都cover哂我驚既野...
同班同事玩都好融洽...有講有笑...
雖然到而家個PAT PAT同對腳都好痛..
但都係值得既..
因為佢地夾到時間一齊玩既好難得..
我都係因為呢個原因而一齊出黎...

今日都好好彩..
雖然有時落雨..但我地及時避到雨..
一D都冇濕...避雨OR攤抖其間..
仲可以食到波羅冰...^^
有一PART好搞笑..好難忘..
話說我地個個都踩到個Pat Pat好痛..
咁阿Lo就發揮佢直腸直肚既本色講左句:
[我個屎忽好痛]..
哈..點知俾一個路過著紅衫踩緊單車既中年男人聽到..
佢立刻拎各後面望下講野個女仔咩料...
當然...佢睇完就算...
再過一陣..我地好累..o係路邊攤抖...
抖完..我地準備起程之際...
我地都怨唔想行..因為大家既pat pat同腳都好痛...
點知阿Lo又講多句:[我個Gap gap 好痛]
o係佢講緊既一刻...咁岩有人路過...
哈...完來就係頭先果個紅衫男人...
佢一路踩單車..一路向後拎..
加上奇異"煨鎖"既眼光再搭少少淫笑望住阿Lo...
足足向前向後向前向後向前向後左三次...
真係笑到我差D踩唔到....

踩完之後..我地個個都勁累..
本來唸住唱k..但又等位..
於是我地去左食"百人一珠"..
都幾好食..
最難得同班同事可以好難得吹下水..
佢地有唸過下次去游水..
哈..如果佢地唔厭棄我..
大家又好似今日夾到時間..
一定都會玩得好開心...
希望呢日快D來臨啦...

p.s.

真係好多謝我班同事俾到我好開心既一日..

亦要多謝男朋友仔石石..呢個開心..你係有份俾我ga!!!

^^

2003 年 06 月 24日 星期二 【晴】

好悶呀...好悶呀.....
 又過左"悶"既一天....
冇錢...真係咩都唔做得.....
今日o係度唸...我真係唔想過一個平凡既生日...
不過...唉.....
悶既話...我呈願唔過.....

男朋友石石今日好好..
佢陪左我傾好耐電話..
本來佢仲唸住入lai屯門同我燒野食..
但我驚佢累..緊係唔好啦...

聽日同同事去踩單車...
不過呢排好鬼窮...
本來話唔去..
但阿Lo好好人..
佢竟然話借錢俾我..
但我其實真係唔想問任何人借錢啦..
唔好太好意思ma...
但應承人去先..
好彩石石主動叫我用佢D錢...
問男朋友借感覺好D既..
最衰都係上個月冇人工..
加上自己又好大駛...
哈..下個月唔會lor...

不過俾人睇死左..一係唔去..一係遲到...
好唔開心!!!

anyway..唔該阿lo...
仲有我男朋友仔..石石...

2003 年 06 月 23日 星期一 【晴+雨】

今日起左身後..食過早餐..
就去左隔離個運動場跑步..
跑左十分鐘...行左廿分鐘..
始終係第一日..經過以前既經驗..
都係唔好俾對腳一下子咁重既負荷..
加上狂哂既關係...
(最衰mimi唔俾人上樓拎返支防紫外線lotion)
雖然自己好想再跑多d..
但再跑對腳一定傷..
所以..聽日再續...
跑完之後..有d驚..
因為好似黑左少少..
仲唸住星期三同班同事去踩單車..
哈..到時我一定要有哂準備..
否則唔變黑人都變賓賓呀...

exercise完之後..同左mimi去食野...
好開心..唔駛返工返學都幾"他條"..
鍾意做乜就做乜...
望住佢..好有衝動帶佢返印尼..
我知佢好想見佢哥哥...
所以..我都會積極考慮呢個因素...

食完野之後..俾人呃左去買米...
哈..返屋企途中..感覺除左重之外..
仲有d俾個天玩既感覺..
我跑步果陣就哂到死...
拎米返屋企竟然落雨...
返左屋企仲離譜..
竟然陽光譜照....
我係咪真係天生既黑仔王呢???

返到屋企...沖左涼...
介紹左家姐玩"西餐廳"..
個傻婆..低低B..成日o係度申冇客..
哈...
佢今日仲問我要唔要電話做生日禮物..
我話唔要..
講真..係..我係想買好多野..
但我只想用自己錢買..唔想用人錢...
用人錢..始終感覺有d唔好意思既..

今日睇返"向左走．向右走"既網頁..
我真係好眼淺...
因為我覺得個故事好浪漫..
我感動到喊左出lai....
再加上睇左好多愛情哲學..
唉...我真係要控制我情緒先得啦...

2003 年 06 月 22日 星期日 【雨】

今天又是工作天...
 感覺都係咁..
有錢既..真係唔返呢d鬼地方..
不過...都勝在有班同事玩o下..

放左工..同左阿思去食飯..行街..
好窮呀..所以阿思好好人咁請我食飯..
咁又過左一日..

今日自己o係度唸..
真係好想快d學搭羅牌..
好想開一間店專幫人占卜..

好想剪頭髮..
但又驚kelvin會剪短我d hair..
點好呢?

2003 年 06 月 21日 星期六 【雨】

今日返工呀!
 可能係唔需要做咁多 counter 既原故...
感覺冇之前咁累...
不過今日遲到左5分鐘...
感覺冇之前咁累...
不過今日遲到左5分鐘...
Never Mind 啦...
反正今個月我請假..所以冇BONUS..
本來唸住o係上環"飛的"過去..
唸唸下要收我三十幾蚊...
反正班老細都係賤...
駛鬼我仆心仆命...
我請願蝕六蚊俾你..
慢條斯理咁行返去..
實行睬你都傻...
反正搭羅牌話我唔會俾人抄..呵..

不出我所料..
班大既依然係咁賤..
尤其是係阿power呀(哈..呢個名好正..)
如果你覺得我地傾耐左...
你可以用禮貌d既方式叫我地做野..
並唔係用"啤" law...
雖然唔係"啤"我..
但見到咁既眼神我就火滾...
郭小姐..李小姐..同ada都未咁對我地啦..
你一星期lai得果幾日...駛唔駛呀?
本來你中左招都覺得你可憐既..
而家? 扺Q你死呀... 
唔該你出街帶返個口罩呀...
咪鬼將sars再傳來傳去..
不過我都算係咁lor..
你o係度..我就特登o係你面前噴火酒..
仲要大大聲..我要1:99預防呀...

聽講有個summer helper阿mon識搭羅牌..
我就試下..唔知點解..可能佢副牌係"清水玲子"..
我總覺得冇咁好玩..再加上佢解牌都唔係咁熟練..
令人有d懷疑既感覺...有d同事話好準..
我就覺得個答案比較大路..係又得..唔係又得..
講唔出我過去現在發生過咩事同真正感覺..
如果真心想問野..當然信professional好d啦...

2003 年 06 月 19 日 星期四 【晴】


今日好開心呀......
 今日同石石行左半日街....
好開心...可能平時冇野做比較悶..
有得行街街..仲要同男朋友仔..
真係好鬼充實...
佢仲買左"夢幻西餐廳"俾我玩...
我真係好開心呀...

講返尋日...
都係好充實既一天...
話說尋日去左玩搭羅牌..
玩左成粒鐘..
好正..超級勁準呀...
不過有d聽到都幾開心..例如話..
1.我唔會中sars啦..健康仲幾好tim..
2.我第日會做一個平凡既揍仔婆..(唔駛做..俾老公養果隻)
3.又話我實升班..完全冇問題啦...
4.話我一生過得都幾開心啦..
5.最搞笑係話我以前學生時期暗戀果件竟然曾經都喜歡過我..
哈! 都唔知真定假..tum我開心..(但呢個迷係好難知)
除左咁..我仲聽左好多估唔到..又難以接受既預知未來..
例如話..
1.我會俾亞石飛啦...(哈!呢個最正..佢..大擔呀!)
2.我而家part-time既老細唔妥我..會駛橫手調走我..等等...
但我一D都冇唔開心..或者猶豫...
聽完都幾得啖笑..感覺幾得意...
但我唔會因為占卜而改變自己既計劃..
話哂呢個世界上冇人真正可以預知未來..
唔死得..我都好開心啦!
最緊要窮困中的我..唔駛俾錢住..
因為平時孤寒開既神奇竟然全包我尋日既駛費..
真係多謝哂..(哈..我係唔會還錢ga^^)

睇完搭羅牌..我就同左神奇去唱K..
可惜佢冇LA LA發我脾四..
不過好彩我有個好鍚我既男朋友..
飛身走過LAI同我去睇我想睇既"六樓後座"..
可能我對呢套戲都抱有期望..所以感覺都係麻麻..
不過...冇可否認..戲中既演員真係好得好好..
尤其是鄧建宏同周永恆..
我又好喜歡盧巧音既髮型..
可惜林嘉欣就差D啦..
又肥..就連拎煙都唔識..(一睇就知唔食開)..
當然...緊係唔會漏左我最喜愛既蘇永康啦..
簡直係型呀...不過..uncle要減肥啦..
肥左好多呀佢..哈!哈!哈!
(不過我都係唔好掛住講人...
因為我都要減下先得啦..哈!)

2003 年 06 月 17 日 星期二 【晴】

今日都係咁過..
百無了事...睇電視..玩GAME...
到左6點幾..唔得..點都要死出街...
好耐都冇試過同家姐行街...
今日..都總算有D野做啦...

今日忍唔住..終於問左我好想知既問題..
點知真係俾我估中左...
我心目中幫佢唸左好多理由...
好可惜...好失望...偏偏就係我唔想聽到果個...
雖然係預左...但我始終唔想接受呢個現實...
我唔識面對...唸唔明...點解會咁GA?
ANYWAY...我唔可以怪人...因為我應該要反省自己...

聽日神奇話會同我出街..
哈..唔知真定假..
會唔會放我飛機呢?
哈...
希望聽日我會過得充實D啦!!!

2003 年 06 月 16 日 星期一 【雨】

放暑假既生活..實在太無聊..
寫日記...
既可以打發時間...又可以提醒每一日既生活...
何樂而不為...

今日又係悶蛋既一天...
落左成個星期雨啦....
搞到我連街都冇得出...
今日..又係好悶蛋咁睇下cable...
玩下電腦....
不過今日玩果個"溝女game"真係好有趣...
哈...溝女...又要洗錢...又要增加自己吸引力...
又要買野tum佢開心...又要搏命搵錢...
最衰個女仔又要高高鬥鬥咁...
搞到我追得好辛苦...
也許我唔係男仔...冇乜經驗...
不過完來追女仔都好難...
好彩我唔係男仔姐....

今日..本來心情都冇乜野...
但俾我發現左個秘密...
當我知道左某件事之後...
我成個人呆左一陣...
我唔識應對...
緊住我好唔開心...
同有D想喊...
其實...我唔知點解當事人會咁做...
當然....佢總有佢原因...佢有佢自由...
不過...果一刻...我真係好HURT...
唔緊要...我知我好快就冇事既~~
^^