雖然感情有增無減　我還是要牢牢把您的牽著
用紅繩把我們緊緊的連在一起
永不分離

　　唔經唔覺開學都有一段日子，因為入宿又忙碌o既緣故，所以一直係宿舍都未有電腦用，update唔到日記…好多回憶o既細節而家都變到好模糊lu，不過呢２個星期o既大學生活真係令我眼界大開呢！而家就等我briefly咁點顧一下我呢半個月o既大學生涯係點啦！

１）我而家一個星期番５日，上堂o既時間分別係４／５／４／５／２個小時。Major內容有Account，Economic，Marketing同Statistic；我另外選修左中文系o既商用中文；至於必修o既ＰＥ我就被派去體能鍛鍊度∼經過多次add科同drop科之後，今個sem我讀18分，雖然搵唔到o岩o既通識湊唔到21分，不過都無咩所謂啦！
＊Account：而家都唔覺得太難住，仲OK有趣添（因為得加減數，唔駛d同In，好開心∼^^）。個老師開始時覺得佢好廢架，而家覺得佢無聊得黎又幾搞鬼，而且教得我明，咁已經好好啦∼
＊Economic：以前CE覺得讀Econ無咩用，而家終於睇到有咩用喇！因為有左CE o既底，開始時catch up都唔係太辛苦，而且個老師難聽ｄ講就係「頹」，但係實際上係好好人，而且考試應該好易過關，真係好∼
＊Marketing：個老師都應該幾好人，不過我開左學１日已經走左佢堂，仲要次次上佢ｄ堂都hup眼訓，所以唔係太知佢教到邊（←好學生係唔應該學我架！）…佢教得好似好快咁，又好似教下跳下咁，唔係太知想點…結果都係要自己睇書……死啦，Yr 2我仲想concentrate o係marketing喎……
＊Statistic：由一個幾嚴肅o既老師教，一直都唔係好知佢教緊咩（仲要係用英文教添），但係一黎已經有project同功課，想死！=.="'"最慘就係我o係呢班入面無咩friend，真係好慘呀∼E∼我唔鍾意Stat唔鍾意Stat呀！！！
＊商用中文：本來一早已經add到，不過因為撞左PE，結果要忍痛drop，好彩之後add得番喳！我個老師係成日夜晚o係無線出見教一分鐘中文o既黃念欣老師，真人都好靚架，又有學問又幾好人，上左一堂已經覺得自己學左好多野lu∼（不過因為太遲先add到，已經miss左３次堂喇∼><），上佢堂要答問題，感覺上好似返番中學咁，好親切呀∼^^所以好鍾意上∼
＊ＰＥ：開頭好唔想入體能鍛鍊，因為又要跑千六米又要做咩屈臂懸垂等等好harsh o既野；點知入左之後發現個老師勁好人，簡直係我讀左咁多年書之中見過最好o既ＰＥ老師，而且發現原來呢一科對身體真係有好處，所以非常快樂咁就接受左呢科lu∼而家上PE堂係辛苦左ｄ，不過就覺得好好玩∼哈，估唔到入左大學反而鍾意PE，真係搞笑∼
大學ｄ野好多時候都要自己讀自己睇，老師亦唔會再提你要點讀點溫，又唔會guide住你做ｄproject，所以真係要養成自學o既習慣呢！第一個sem由９月１上到１１月２９，得３個月喳！唉，好快就要考試喇……（明明o岩o岩開學喳…）

２）我而家住係新亞書院志文５１４，呢幢宿比起ＮＡ(新亞)其他宿舍都還要細…不過都尚叫乾淨整齊，而且可以同到一個好好o既中學同學同房，好多朋友仔又住係度，所以都無所謂啦！我間房o係正toilet隔離＆廚房對面，所以都幾方便架！窗口好細，不過都有半個海境睇，仲見到吐露港公路，到左夜晚成條路著晒燈真係好靚架∼^^夜景係我係ＮＡ見過最靚o既景１，而另一靚景就係合一亭，o個度有一個水池（人稱「養蚊池」），ｄ水fill到滿晒架，咁個池後面就係一片吐露港，所以驟眼望落個水池度就會覺得個池好似join埋左個海咁，一望無際，所以個亭就叫「合一」亭喇（最後呢句係我估o既…）∼呢度真係好靚呀，次次行番宿舍時經過都會忍唔住望多眼！（好彩我唔惹蚊）不過住左宿之後真係好似同出面隔絕左，加上我呢ｄ電腦都未裝o既人就更無知，好彩hall入面大堂有即日報紙睇，得閒有得睇下先無咁後知後覺喳！而家我通常平均５餐入面有３餐都係食杯麵，唔太健康；而且住hall之後好多野都要自己管掂，衫都係自己洗呢！呢ｄ野絕對能令我更加獨立！另外而家成晚唔返hall都唔駛交代太多野，自由度極高，突然間個人感覺上好似變左大人咁，咩都自己決定自己負責，感覺真係又驚又喜呢！

３）細Ｏ組聚成為左開學之後最開心o既活動∼９月５組員Ａ生日，我地成班人十幾廿個一齊上左組員Ｎ荃灣個屋企玩通宵，食左好多野又吹左一晚水，到左第２朝６點我地先返中大呀！雖然第２日我上左３堂都好似聽唔到ｄ咩咁（後來仲drop埋呢科添，死未！），不過咁快就通頂，感覺好爽呀∼之後９月１０又迎月去，先ＢＢＱ後上紫霞（全中大最新起好o既宿舍，位於ＮＡ，１８０度無敵海景，簡直係５星級的家！）食甜品再幫唐美組媽預祝生日食左個美味蛋糕然後夜遊中大再去峰火台下一路食月餅一路賞月一路吹水到半夜…哈，簡直係人生一大快事呀∼下個星期我地仲好多次組聚呀，有咁好o既一家人，入到第４組真係好開心∼！

４）中大好大，不過我已經開始熟習搭車行路等等呢ｄ野∼真係有ｄ不可思議呢，一個月之前你放我係中大基本上我１定會蕩失路；只係短短o既一個月之後，雖然我唔可以話我熟晒ｄ路，不過好多地方都已經大概知道點行點去！哈，係唔係好勁呢∼？地方係就係大ｄ，行係就係支力ｄ，日頭係就係曬ｄ，不過中大而家係我心目中一直都加緊分，我發覺自己而家都OK鍾意呢個地方……哈，我都知有一日我會鍾意你架啦，估唔到咁快就真係開始鍾意∼！！！

　　２個星期發生o既野太多，９月１６日如無意外就有新電腦送入hall，到時就可以寫多ｄ日記喇，而且仲可以趕埋O Camp o個幾個日記添！哈哈∼終於有電腦啦，好開心∼^^

疲累　孤獨　困苦
然而　一想到再倦也有您在旁
力量就會油然而生

　　今個星期真係過唔係幾開心……或者係因為我對大學生活有太多憧憬啦，當現實同理想係咁唔同o既情況之下，個人難免會down起來∼

　　先係讀書方面，一直以黎我都以為入左大學讀書應該會好輕鬆，ｄ professor應該好叻教書，ｄ書又應該係唔駛點讀又或者走晒堂都跟得上…點知原來根本唔係咁！而家ｄ野都OK難，教書速度更係超快，成本Pure Maths Book 1咁厚o既書要係１個sem（３個月）入面教晒，可想而知教o既速度有幾快！（譬如上Marketing堂時我試過擰個頭用隔離位講左２句野之後個professor就已經飛左２頁書……）雖然開左學好似無耐咁，不過我已經覺得自己好似就黎考試lu！而且而家ｄ同學個個都好勁，Year 1我地BBA係同埋PAC專業會計 (2003 AL mean：2A)，HMG酒店管理 (mean：2B)，Risk Man風險管理 (mean：2A)，QFN計量財務 (mean：3A) 同IFA保險金融&精算(mean：3A)呢ｄ勁系一齊上。其實今年BBA都收得好高(mean：2A)，而讀得其他o個ｄ系o既又係ｄ好top o既人，個個ＡＬ都超級犀利咁……拍埋呢ｄ人讀書，可想而知我呢ｄ唔知點解考成咁都入到BBA o既人而家係商學院讀書o既競爭幾大壓力幾大……對我黎講，而家同ALevel好似差唔多咁辛苦，要讀o既野又多，ｄ野又唔見得淺喎，仲要同咁多人爭…唯一唔同就係唔會無得升學囉……所以依家唯有叫自己睇開ｄ，唔好太緊張成績黎舒緩下情緒啦…唔係真係人都癲∼

　　另一個令我都好疲勞o既問題就係人際關係…開左學咁耐唔係話無朋友o既，不過都唔係有好多…而且我發現自已開始好唔鍾意social，以前係朋友之中我都幾多野講架，而家我就算係頗少出聲o個ｄ人。組聚時還好，因為ｄ組員個個都好好，不過一到係班房入面我就好似變左自閉人咁，好少出聲……其實我都唔想架，不過就係唔多想講野…我諗一來係因為唔熟二來係因為唔o岩咀形掛？就係因為咁，有時自己一個都幾悶…但係又無心情主動撩人講野喎…真係幾進退２難∼而且當你見到其他人可以講一隻股講投資講到瑯瑯上口時，有時真係唔到你插咀…因為真係唔知點插咀……=.="""

　　最後就係住宿問題…其實自己住真係幾free，通宵去荃灣組聚唔返hall又無人鬧，係出面過夜唔返自己房訓又唔駛同人交代，好多野都無人管。不過亦因為咁，好多野而家都要自己打理：衫要自己洗（唔識用hall ｄ洗衣機，而且又幾貴），飯要自己煮，支出又要自己manage…有時個人支力起黎真係會咩都唔想做！而且好耐無食過屋企媽咪煮o既飯，真係會好掛住好掛住……我仲記得有一晚我同同房朋友仔一齊係pantry度整野食，因為時間+技術+工具有限，我地只係將ｄ西蘭花&椰菊花用滾水汋熟再放入ｄ忌廉磨菇罐頭湯入面就食…雖然好簡單，不過我地已經覺得好好味。我地都話如果比著係以前o係屋企媽咪整呢ｄ野比我地食就咁就當一餐，我地一定會嫌棄+不滿呢∼而家要自己動手煮野食，又要自己諗有咩可以食，終於知道自己以前係有幾幸福！今個星期五晚一返到屋企，即刻食到媽咪整o既"食送"，有ｄ以前自己麻麻鍾意食o既野，而家見到都會覺得好開心；星期日媽咪仲煲埋魚翅，突然之間好唔想返番宿舍住…>_<.. 或者人只有係失去時先知自己曾經得到過幾多掛？而家要自己照顧自己+學習獨立，終於知道屋企有幾好。我諗而家o既我應該比以前更加珍惜屋企同家人，不過代價真係幾大呀……

　　只係開左學一個月都唔夠，壓力煩惱寂寞孤單就一湧而上，差ｄ就搞到自己崩潰，而且仲難為左大朋友仔……不過我已經睇開左架喇，我知道就算將來日子幾難行，我都一齊要撐落去！我唔可以比呢ｄ野打低架！

（我宿舍９月３０先有電腦用丫，下次update日記又有排等喇∼><""）

您不來電　就讓我打電話給您吧
您沒有空找我　就讓我來找您吧
您倦了不想說話　就由我來說吧

累了　請讓我為您打打氣

↓特別收錄：志文５１４之景色
　

　

　　今個星期過得都算OK開心，心情比起之前一個星期好好多∼成個星期我都過得好充實呢！星期一係NABA最後一次傾莊，亦都係投票o既一日。其實我就一ｄ都唔緊張，反而豪爸就好緊張，５點半已經約左我同組員Ｍ+組員Ｅ係NA Can等，之後仲同我地傾左好多上莊可能遇上o既問題同情況，令到我更加清楚假如左上到莊之後到底會係點。之後７點去左傾最後一次莊，今次一共有２０個人黎左，而其中有１８個係有心上o既∼我地要輪流講下自己如果上到莊到底想做咩post，我地當中好多人想做IVP同EVP又或者市拓財政，反而出版竟然無咩人想做∼我個人就最想做出版呢，因為自己鍾意寫下野打下字；其次就想做宣傳，因為我都鍾意畫下公仔整下手工∼最後個個講完之後就開始投票，每個人以不記名方式可以投５至８個人，之後就NABA個Ｐ開始唱票。呢個時間有ｄｄ緊張啦，不過之後聽豪爸同勇爸話佢地係出面就勁緊張囉，真係好搞笑呢∼^^ 最後NABA第４組終於不負眾望，３個去傾莊３個都成功上到莊，正式成為候選莊員lu∼未來３個月準備諮詢期應該會開始好忙呢，又要買suit（Yeah∼買suit呀∼），又要搞promote，仲要準備係諮詢大會比人問問題ｄ野…哈，好大挑戰呀！希望我地呢一屆會做得好好睇睇啦∼選完之後我地１３個候選莊員就同現莊+上莊齊齊去左沙角食宵，沿途上成班候選莊員相處得都好融洽，希望之後都會係咁啦∼o個晚係我第一次係４條柱搭車出大學呢，原來o個度好多車搭架！而且o個晚都係我第一次睇人問人羅sponsor…現莊教我地食完宵比＄時可以問老板羅sponsor，結果我地一問個老板就比左我地＄三百cash！我地３檯夾埋食左千四左右，最後比完＄竟然有得退，感覺好神奇呀！到而家仲覺得好難以置信∼:p 最後食完宵返到房就怒趕４條account功課，之前聽人講一條要做３至４個鐘，我都覺得誇張左ｄ；點知自己真係做到零晨３點先做得一題…哈，真係支力到不得了呢，所以最後就去左訓，第２日再續∼到左星期２晚就係大Ｏ組聚食飯，因為大Ｏ甚少有組會，千人宴我又跟細Ｏ，所以就算account功課仲未做晒我都去左∼食完飯雖然最後抽唔到獎，不過見到我o個組ｄ人扮黎扮去咁出去羅禮物真係幾好笑∼組員Ｆ抽到o個條口水肩仲係我度呢！^^ 食完飯返到房擺低ｄ野就落左志文４樓食野，因為志文有糖水會∼食完之後就去左學思組聚（其實唔可以叫做組聚，因為只係得幾丁友去左）左一陣，再之後就返房繼續趕功課。就算同學仔借左佢o個份比我都無用，最後都係做到凌晨４點先做多２題！有時我覺得就算自己諗都唔諗就咁抄人地份功課都要抄幾個鐘，因為一題實在太長喇！訓左５個鐘之後９點就起身繼續做埋最後一題，最後終於交得切功課喇，好開心∼懷住疲倦o個身體星期３夜晚就去左NABA O'night，估唔到ｄ節目都幾好玩，氣氛唔錯，仲有大組長同我地一組呢！哈哈，我同朋友仔Ｍ羅到大組長o既親筆簽名呀，仲將有佢簽名張slogan紙貼係我地間房門後面呢∼哈哈∼:D 好開心咁完左個O'Night之後我地第４組又組隊去左行環迴路，由Shaw出發行番去CC，足足兜左成個中大行左一個圈！真係諗起都覺得第４組好勁∼行行下其實我都有ｄ暈，我諗係因為１來支力２來口渴∼最後我地行左去女工買野飲，之後就去左峰火台吹水∼雖然支力到嘔，不過真係由心覺得組聚好開心∼^^ 返到宿即訓，雖然星期５有Marketing考試，７課一共二百幾頁只係睇左女３十幾頁，不過都眼訓得滯去左訓∼到左星期４晚終於無野做，本來正好可以一心一意溫書；點知用朋友仔Ｍ部notebook上下網玩下icq一玩就玩左２個鐘，之後正打算收搭心情讀書時好耐無聯絡o既朋友仔又打電話黎…結果都係搞到１２點幾都無乜點讀過書，最後揭晒二百幾頁扮溫完就去左訓lu∼:p 星期５晨咁早就要考，仲要一考考個半鐘！對於我呢ｄ無讀書o既人黎講一個鐘已經做晒成份卷（因為唔識，所以無野答），結果坐就係度釣魚，釣釣下仲將成份卷+支筆推左落地下，真係好無奈…=.=""" 考完試返到宿有５個鐘空堂先到上書通，因為平日朋友仔星期６都會抹房，而我次次星期６都已經返左屋企無幫到佢手，所以今次就輪到我去左清潔房間。嘩，我地間房真係勁污漕呢，床下底有好多塵同埋頭髮呀∼><"" 單單係咁細間房已經抹左足足成個鐘呢！抹完就o岩o岩好夠鐘上書通lu∼ 上完書通之後我地就去左朋友仔間房化妝，準備出席夜晚o既千人宴。我化完之後就返左房，點知之後出番門口時見到個個個妝都似有還無咁……呀，唔係個個都化架咩？點解得我o個個咁覺眼架……=.="" 千人宴我地食盤菜，其實都OK好，不過ｄ野食有太多肉，好多雞呀鵝呀豬肉咁，唔知點解見到唔係太想食……我地第４組霸左人地２張檯，結果有２盤咁多呢∼最後當然係食極都食唔晒啦∼不過食盤菜感覺真係幾特別，好一家人呢∼食完我地就joint組出左沙角食宵，之後十二點幾時我就同組仔Ｅ一齊「返屋企」lu∼成個星期晚晚都節目豐富，行程緊湊，真係好感覺到呢ｄ就係大學多姿多采o既生活∼

↓特別收錄：千人宴之情景
　

　　下個星期電腦終於送到黎喇…（唔好再臨時打黎話仲未有貨…我會激死架…），希望到時可以寫多ｄ日記啦∼^^