(1) فيان .. رويىَ گه‌شىَ ميَرانيىَ يه
ئه‌يونيَن گه‌رم دده‌ته په‌يفا و ..,
دليَن شه‌رفانان دبشكورن
پيَنگافه‌كا زه‌به‌للاحه به‌ره‌ف ئاسمانىَ به‌رين و ,
گوليَن ده‌نگا
بيَهنا گوليَن خانييان (2) هات
به‌لاتينكىَ خوه ب كراسىَ زينىَ خه‌ملاند
دده‌ستيَن مه‌موى دا نفست و خه‌ون ديتن
خه‌ونيَن مؤر
خه‌ونيَن سه‌رمه‌دى
خه‌ونيَن كو رؤژه‌ك بيَت , بهيَنه دى
(2) سترانه‌كا ئه‌زه‌لييه
ژ ره‌نگىَ گولا و بارويتا تفه‌نگان
( گه‌ر دىَ هه‌بوا مه ئيتيفاقه‌ك
فيَكرا بكرا مه ئينقيياده‌ك .. )
خه‌ونيَن مه دا بنه راستى و ..,
دا هژييَتن .. لسه‌ر بانيَن مه به‌يداقه‌ك .
ل كوژيه‌كىَ زاگروسى , گه‌رمىَ خوه كاركر و ل كومتىَ ده‌لانپه‌ر
فؤلكان په‌قى .., بروميتوسى چرايه‌كىَ گه‌ش ژىَ هه‌لگرت , شه‌ف پىَ نفاند .. حه‌زا فيرهاى هشياركر و بلبليَن چه‌نگ
شكه‌ستى و بريندار سه‌رهه‌لاندن و سترانه‌كا زارؤكيَن نووگه‌هايى د ستراندن ….
گولستانا ره‌نگينه
مشتى گوليَن خه‌ملينه
ره‌نگ كه‌سك و سور وزه‌رن
له‌ش و جانىَ من لسه‌رن
ئاشتىيا سپى رائيَخا
ديلانه‌ك خن هه‌ل ئيَخا
ژ ره‌نگان ئالايه‌ك چيَبو
رؤژا گه‌ش ل نيفىَ بو
ئالا كوردان بلنده
گولستانا پىَ رنده
هه‌بوو نه‌بوو
په‌لاتينكه‌ك جوان هه‌بوو
فرينه‌كا خؤش و ئازاد سه‌رمه‌ست كربوو
گليزانكيَن وىَ فه‌دبوون و ئاسمانىَ دوير
ببوو خه‌تير
ئه‌ف په‌لاتينك .. كچكه‌كا جوان و شه‌يدا بوو
هيفييه‌كا هه‌لاويستى دسينگىَ ويَدا په‌يدا بوو
ديوار .. هه‌رفاندن
شيرهيَن تابوييَن ته‌بگرتى .. حه‌لاندن
سنووريَن چيَكرى .. به‌زاندن و ..,
لبه‌ر روناهيا چرايه‌كىَ باباگورگور هؤزان خواندن
ئه‌ف كچكا هه ..
نه خه‌ونه‌كا هشيارييَيه و نه هه‌پاره
نه هه‌لوه‌سا ديتنيَيه و نه كوفانه‌ك زاى دووباره
ئاسمانه‌كىَ بارانييه و.. دله‌كه مشتى هيفييه
يا ژ ئاگرىَ نه‌ورؤزىَ زاى .. له‌شه‌كىَ پر روناهييه
ئه‌ف كچكا هه .. تورينه‌كا كه‌ركوكييه .
*
پاييز .......
وه‌لاتىَ من به‌لگخه‌زامه ب وه‌غه‌ريَفه
عارف حيتو
گوله‌كىَ بده من , بيَهنا ته ژىَ بهيَت
يان تفه‌نگه‌كىَ و بيَهنا ئاخىَ (1)
ئه‌فرو ئيَفارى زوى دادا و بايه‌ك ته‌زى رويىَ من دگه‌ست
هه‌واريَن ئاسمانى
هه‌لوه‌شيانا زه‌فيا
گريا زارؤكا ..
من ده‌رىَ باژيَرى فه‌كر (2) ,
توز لبه‌ر جادده‌يان سه‌لبه‌ندانه و ,
برينيَن شوسته‌يان دفه‌كرينه لبه‌ر بارانىَ
" مرؤف .. وه‌كو مشكان ل قولاچكا دژين "
له‌شىَ من ته‌ف يىَ بويه گوه ب راديوييَفه و ,
ده‌شتيَن به‌رين دده‌ستيَن مندا يىَ دبنه ئاف ..
(1) ماچه‌كىَ بده من بيَهنا ئاخىَ ژىَ بهيَت
يان په‌له‌كا ئاگرى
شه‌فره‌شا وارىَ مه رونكه‌ت ..
(2) ده‌رگه‌هيَن شويرها مه ل تاقن
ده‌ستىَ من تويركه‌ك ئاخيَيه
مشتى خه‌ون و هيفييَن كه‌سكن ..
ده‌هولا شه‌رى ليَدا (3) و چه‌كىَ من هؤزانه‌كه مشت ژ عشقىَ
هؤزانيَن من دچانتىَ ته‌دا دهه‌لگرتينه ..,
ئه‌زىَ بىَ چه‌ك .. دىَ چ كه‌م ل مه‌يدانا شه‌رى ؟ !
هه‌فوكه‌كا شه‌كسپيرى لسه‌ر تبليَ، من سه‌مايىَ دكه‌ت
ئه‌گه‌ر هه‌بم يان ژى نه‌بم ..
هه‌بونا من ژبه‌ر ته‌يه و نه‌بونا من ژى ژبو ته‌يه (4)
تو ئه‌وا نافىَ وىَ ژيان
جار كراسى ب له‌شىَ منفه و جار ژى ناسنامه
سپيَده باش ..
گرنژينا بيتانوكا و جادده‌ييَن فالا
روندكيَن سترانه‌كا خه‌مگين و گازنيَن سالا .. سپيَده باش
پرسياره‌كا ساويلكه‌يى ژميَژه ئه‌زمانى دخورينيت
سه‌رىَ من يىَ كرييه ده‌هؤل
ئه‌زىَ مرى دنفستنىَدا .. ما دىَ مرم ؟! !
مرن .. برينه‌كا هه‌ودايه دچافيَن من ييَن كولدا .
(3) شه‌ر .. ئه‌منييَن به‌عسييانه و ده‌م بو ده‌مى
ده‌رگه‌هىَ مالا مه دقوتن
زارؤكيَن مه ب شه‌رى دهيَنه فرشككرن
ب شه‌رى دبن و دناف شه‌ريدا مه‌زن دبن
شه‌ر دورِييه‌كىَ په‌زىَ سپييه
هيَشتا ئه‌م به‌رزه نه‌بوينه ...
(4) وه‌لات
مسته‌كا ئاخا پيرؤزه دخوينا مندا
بيَهنا مسك و عه‌نبه‌ران ..
دايه په‌يفىَ .
ئه‌ز ب تنىَ لفى ئاقارى
وه‌لاتىَ من دچانتايه‌كا ديپلوماتدا رادهيَلته من ..,
وه‌ك رويباره‌ك خوهىَ و خوينىَ
كه‌په‌نه‌كه ب ملىَ منفه .. وه‌كو گه‌رمى و خوشيا ژينىَ
نه ئالايه‌كى لسه‌ر سينگىَ من يىَ پان دچينيت
نه گوره‌كىَ فره‌و ته‌نا لسه‌ر نافىَ من تاپو دكه‌ت
چيفانوك ژ ئه‌نىييَن كه‌سك وه‌ريان (5) و ,
ئالوزيىَ له‌شىَ من يىَ كرييه كوين
خرخاله‌كا كوبارييَمه ب په‌يفيَن نه‌ء و شكه‌ستنيَفه
ما من چ مايه لبن كوينى ؟!! .. ژبلى ته
وه‌لاتىَ من ... وه‌لاتىَ خوينىَ و نيَرگزان و ئه‌فينيىَ
وه‌لاتىَ ژ رؤژىَ ئاشكراتر و ژ رازان نه‌په‌نيتر
(5) ئه‌ف ژيانا فيانا وىَ بمنفه نويسياى
پسته پستا حاجيانه ل مزگه‌فتىَ
سؤلتانه‌كىَ ئوسمانلييان په‌زىَ مه دؤت
گه‌نمىَ مه سؤت
ل به‌هه‌شتىَ .. هه‌فتىَ جاريه و رويباريَن شيرىَ سپى و خه‌مرىَ
دىَ له‌شىَ مه كه‌ته بزؤت ..
دويريىَ به‌لگيَن ته‌حل پيَفه هاتن
بارانه‌كا بوهارى , يان ستيَره‌كا گه‌لافيَژى
حه‌زا من يا نه‌په‌ن دكه‌ته گومتله‌كىَ ئاگرى و .,
خوين پىَ دفيرييَت ..
برين ب پيانفه شين دبن و هه‌ر برينه‌ك ئه‌لندا سپيَده‌كيَيه
دره‌هه‌ندا ديتنيَدا
من وه‌لاتىَ خوه ديت .. لسه‌ر ده‌ستىَ عفريته‌كى و ..,
پيَنگافا من ژى كوركه‌كه .. يا فالايه
ئه‌زىَ پاشفه‌مايى
مت و بيَده‌نگ وه‌ك " بسمارا درويىَ ديواره‌كى قوتاى "
يىَ حيَنج و خورت وه‌كو ئافا هارا سيلاف هيَلاى
من پرسيارا كه‌نگرپه‌ر په‌را نه دكر ..
لىَ .., نه په‌يف ژ گه‌وريا ته دبشكفتن و نه بيَده‌نگى
تو .. ئه‌وا گه‌لگه‌له لسه‌ر ده‌ستىَ باى
كلىَ هيجرانىَ د چافا داى .. دىَ كيفه چى ؟ (6)
ژ كه‌فران ئاسمينيَن شه‌نگ پيَفه هاتن و
ژ مالبچويكىَ ئاخىَ .. ستران بوينه كه‌لات
مالا مه دىَ بيته گوند و گوندىَ مه دىَ بيته باژيَر ..
(6) ما دل دهيَلى
ئه‌فى دلىَ لبه‌ر ده‌رگه‌هىَ ته په‌ريشان
رؤناهيا ديتنىَ ژىَ ببرِى و ..,
ژيانىَ بكه‌يه تاريستان .
ديَمىَ ته گوليا گه‌نمييه و ...,
ليَفيَن منژى ييَن بوينه ده‌ستيَن گوليچن
زارؤكه‌كىَ ده‌ف برسيمه
ب سينگىَ ته‌فه يىَ بويمه نوژ
ئازريانه‌كا دله‌شىَ مندا , كه‌ل يا دهيَتىَ
نه چ حه‌بكيَن ئارامكه‌ر
نه مه‌زيقه‌كا هيَدى و ته‌نا
نه چ ئالافيَن نفاندنا موگناتيسى , من فىَ نينن
ب تنىَ .., چافيَن من و حه‌زه‌كا شه‌به‌قى (7)
له‌شيَن مه هه‌ردووا خاف دكه‌ن .
(7) ده‌وله‌ت .. ئيَچه‌يه‌كه
هه‌ر پيَنج هه‌ستيَن من بو دله‌رزن
لفىَ هه‌رايىَ ..
هه‌رايا هه‌رفاندنا شينواريَن جىَ ژفانا و ,
سلبوونا هه‌فديتنىَ
من ژ بيَهنا هه‌ناسا خوه گولافه‌ك چيَكر و .. ,
ژ بيَهنا گولافىَ .. هه‌ناسه دا پشيَن ته
هه‌كو دزفرى و ئه‌ز نفستى ..
دا بيَهنا من ژ هه‌مى له‌شىَ ته‌يىَ سپى و پاقژ بيَت
وه‌رزيَن سالىَ (8) من ريَز كرن ..
زفستان .. دناف روندكيَن ته‌دا من ديت
بوهار .. دناف سينگىَ ته‌دا من ديت
هافين .. دشه‌هوه‌تا هه‌ردوو ليَفيَن ته‌دا من ديت
پاييز .. ددويريا ته‌دا من ديت
لىَ .., ئاسمانه‌كىَ پان و فره‌هىَ مشتى ستيَر
چافيَن ته كربوونه ماله‌كا ده‌رگرتى و ,
هه‌مى نهيَنى ژىَ دوه‌ريان
من ژى خوه ديت نهيَنييه‌كا گه‌رم و جوان ل ئاسمانى ..
(8) ل زفستانىَ .. شه‌ره
ل بوهارىَ .. شه‌ره
ل هافينىَ .. شه‌ره
ل پاييزىَ .. شه‌ره
ده‌مىَ بشكوژكيَن شه‌رى فه‌بوين
ل پالا چيايه‌كىَ كه‌سكين
من رستكيَن ئاداروكا بو دلبه‌را خوه دراچنين
مالخوليانىييَن شه‌يدا و عيشقاوى دنژنين
مالىَ من .. حه‌يرانوكه‌كا ئه‌فينيىَ بوو
مالا من .. فه‌رشه‌كىَ نيَرگزان بوو
دلبه‌را من :
ئه‌وا ديَمىَ وىَ گوليه‌كا گه‌نمىَ گه‌شىَ هيَژ نه‌دورى
ب له‌شىَ منفه ببوو په‌يف و ئاف ژىَ دبارى
ئه‌ز – ئه‌زه‌كىَ – برسى و بيَزار
گه‌ر ل ليَفيَن ته چه‌رم ..
ما دىَ چه‌وا تبلا من يا شه‌هدىَ جه‌له‌بكىَ شدينيت ؟! (9)
(9) ئه‌وىَ پيَشمه‌رگه .. ل بوهارا نوت و ئيَكىَ
سينگىَ وى سه‌رادا گولله‌يان بوو
هه‌ردوو پىييَن وى سوتى بوون
دلىَ وى ئه‌لهويه‌ك ژىَ فرى و دادا سه‌ر چيا
ده‌فىَ وى سترانا ئازاديا
ده‌مىَ شيار بوى
گريا وى ديواريَن نه‌خؤشخانىَ كونكون كرن
تبلا جه‌له‌بكىَ نه‌ما بوو ..
به‌لاتينك لدور گلوپا ژوورا من خرفه دبن و دكه‌فن
په‌يفيَن كه‌ل ژىَ دبن و دبنه په‌ل
جه‌نده‌ك ريَز ب ريَز لسه‌ر كاغه‌زيَن موحسين قؤچان (10)
سه‌مايىَ دكه‌ن و عشقه‌كا مازؤشى .. ,
بو وه‌لاتىَ وه‌كو زه‌فيا دهه‌ردوو چافيَن مندا كولاى ..
دبيته سه‌يران
بو وى گورىَ ..
ژ كيَلييَن خوه , وه‌لاته‌كىَ كه‌پو بلند و جوان داناى ..
دبيته فيان
ژبو برينيَن باژيَرى و .. كولانيَن هه‌مى چال
ژبو ريَكيَن سپى ييَن ياخى و .. زه‌نگليَن لال
ژبو ههژاريَن ده‌ربه‌ده‌ر و بيَمال ..
ئه‌ف عشقا خؤش و كه‌ل و مازؤشى .. دبيته ستران .
(10) موحسين قؤچان .. تيَكهه‌له‌يه
ژ ياخيبونىَ و عشقه‌ك هار و په‌يفيَن جوان
سيَگوشه‌يه .. ژ ژنكيَن ته‌ر
ژ گوليَن زه‌ر
ژ ده‌وله‌ته‌ك ئازاد و خوسه‌ر .
ده‌هولا شه‌رى ليَدا و شه‌فىَ خوه دبن چه‌رمىَ منفه فه‌شارت
بيشه‌نگ ب بژييَن منفه هاتن و , دارچنار ژ سينگىَ من شين بوون
گوتن .. شه‌ر سه‌يرانه‌ك بوهارييه !
گه‌ر سه‌يران با ..
دا دوو لبيَن خه‌سىَ و شويشه‌كىَ مه‌يىَ دگه‌ل خوه هه‌لگرم
دا ماچه‌كا سه‌رپىَ و مسته‌كا ئافىَ ژ له‌شىَ ته فه‌گرم
دا شه‌فيَن مؤر ژ بخويرىَ داگرم
شه‌ر وه‌لاته .. وه‌لاته‌كىَ ده‌ف فه‌كرى (11)
شه‌ر كولافه .. ئه‌و كولافىَ تؤزىَ ليَداى و باى برى
شه‌ر ئاشتييه .. ئه‌و ئاشتييا لبن پيَن جه‌نگاوه‌ران مرى
شه‌ر ..
شه‌ر ..
شه‌ر ..
ما من كورپه‌يه‌ك دشه‌فستانا له‌شىَ ته‌دا هه‌يه ؟!
خه‌ونان ب چنينا گولانفه ب بينم ..
(11) گه‌له‌ك سه‌يره .. ئه‌بو زه‌ررىَ غه‌فارى
دمالا خوه‌دا خوارن نه‌بيت و ..,
شمشيَرى ژكافلان نه‌كه‌ت ژبو شه‌رى
گه‌له‌ك سه‌يره .. ملله‌ته‌كىَ ژ توخمىَ ئارى
لسه‌ر ئاخا خوه ئالا نه‌بيت
ببيت نه‌عامه و ب ته‌سليمبوونىَ بچيته سه‌رى .
ل بالگه‌هىَ من , شه‌رى خه‌ون نه ديتينه
چ پست پستيَن ئه‌فينيىَ ژى دگوهىَ مندا نه كرينه
ميَفانه‌كىَ دارگرانه دمالا مندا
تفه‌نگه‌كا لويلى ساره ب ملىَ منفه
ئه‌زىَ بىَ په‌رده
هيفى .. لسه‌ر رويىَ گولان من نكلاندن و ..,
نفيَژيَن بارانىَ بو عه‌وران كرن
خه‌ما من .. مسته‌كا گه‌نمى و كه‌سكاتيا بوهارىَ
شه‌فه‌روكيَن پاييزوكى و هه‌فبينا يارىَ
چياى ئه‌ز كربوومه سيهوانه و ترپيَن دلىَ يارىَ ..,
دناف په‌يفيَن مندا ليَددا ..
تو چيا بوى .. دناف ته‌دا به‌رزه بووم (12)
دارستانىَ .. گوپالىَ مفره‌قىَ كره دده‌ستىَ مندا و ,
سترانه‌كا كاويس ئاغاى
باى .. ناسناما من هه‌لگرت و پف كره چراى
رؤژىَ گه‌وريا من هشككر و ب كه‌نيفه دگوته من :
هيَشتا يا ماى ..
- نه‌به‌ن .. نه‌به‌ن , به‌ختىَ وه‌مه
نارينا من نه‌به‌ن
دلىَ من يىَ دگه‌لدا .. دىَ من كه‌ته ره‌به‌ن
+ ته‌ره‌س .. نفيَژا ناكه‌ى ؟!
- نفيَژ !!
ئه‌فه ئه‌نيا من .. كه‌سكه ب ماچيكرنا شه‌ملكيَفه
ئه‌فه دلىَ من .. په‌ره‌كىَ سپييه دخلويَفه
ئه‌فه ده‌ستىَ من .. يىَ گورِى بوى ب پاقژييَفه
ئه‌فه گافا من .. يا پيَتى بوى ب چكييَفه ..
(12) نافىَ من يىَ ژمن كه‌فتى
كولان – كولان و مال ب مال
ئه‌ز ليَگه‌ريام و من نه‌ديت .. ئه‌جنا بر !!
ب ئاخيَفه سنگه پىَ بووم – يىَ خاف و شرِ
هه‌بيت نه‌بيت ژفى وه‌لاتى ده‌رنه‌كه‌تييه
پيره‌كىَ كال ..
گوتى مامو : نافىَ ته‌يىَ دوه‌لاتيدا و .. ,
ئه‌ف وه‌لاته .. يىَ به‌رزه بوى !...
شيَخ عه‌بدلسه‌لامىَ بارزانى گولله ته‌قاند
زارؤكه‌كىَ شيرخؤر چافيَن خوه فه‌كرن
گوليَن سور و خويناوى .. لبه‌ر ليَفا ديجله‌يىَ مويسل
شه‌مالكيَن خه‌ونان هه‌لكرن
ده‌ستىَ من كانيكه‌ك خه‌ونانه .. خه‌ونيَن ره‌وا
خه‌ونيَن كه‌فزىَ گرتى و بوينه به‌رچه‌ما دويكيَلىَ
ييَن نه‌فيكرى لسه‌ر ريَكيَن بيَده‌نگ و كوچكيَن سار و ره‌شاتيا سيَلىَ .
زارؤكه‌كا مهابادى برسا خوه كره په‌يفه‌كا ياخى و ,
ژئه‌نيا قازى باراند .. (13)
(13) سيَداره‌ييَن به ژنكورت و كريَت
داريَن به‌رهه‌مدار و بالا بلند پيَفه له‌قيان
فه‌زاى .. كراسىَ به‌هيىَ دخوه پيَچا
په‌يفيَن دووگيان .. ژ گه‌ورييان زان .
بارانه‌كا ئيلونى پرچا من ته‌ر كر و ,
كراسه‌كىَ گولگولى ب ئوميَدان كره به‌ر من
رويباره‌كىَ دريَژ ژ خوينىَ – خوينا گه‌نجان –
ژ سينگىَ ئادارىَ فه‌كر و كره جوگان
زارؤكا من :
لسه‌ر ده‌فته‌ركا خوه‌يا ره‌سمى ستيَر نه‌خشاندن
هيفى چاندن
گوتى بابو : بو من سترانه‌كىَ بيَژه ..
ژ خوليا په‌يفيَن دؤتى .. من سترانه‌ك كوردى چيَكر
بيَهنا شه‌هيدا و ره‌نگىَ گولا ليَكر
لىَ .., چ بيافيَن ئافى نه بوون توفىَ سترانىَ لىَ بچينم
عه‌ره‌بيىَ نزانم و په‌يفيَن منژى دبيانينه
ئه‌ز پيَدفى مسته‌كا ئاخا ئازادم :
برينيَن خوه لسه‌ر ب جه‌مينم
ئالايىَ خوه لسه‌ر ب هژينم
سترانا خوه پىَ ب فهژينم .
* * *
