Fyrir réttum 100 árum
- 9. október 1852 - var sveinbarn í heiminn borið
á Melum í Hrútafirði. Næsta dag
var drengurinn skírður og nefndur Þórður.
Ekki var hann sonur húsbænda á Melum og því
heldur ekki borinn til að erfa það óðal
- né neina aðra bólfestu í móðurlandi
sínu. Móðir hans var ung stúlka, Helga
Þórðardóttir frá Ytri-Knarrartungu
á Snæfellsnesi, systir Sigríðar, móður
Sigurbjörns rithöfundar Sveinssonar. Faðir Þórðar
var Sigurður Sigurðsson, þá í Núpsdalstungu
í Miðfirði, bróðursonur hins kunna
bónda Péturs í Miðhópi, Péturssonar.
Móðir Sigurðar (amma Þórðar)
var Helga Tómasdóttir stúdents á
Stóru-Ásgeirsá, Tómassonar, en kona
Tómasar og móðir Helgu var Ljótunn Jónsdóttir,
lögréttumanns á Melum, föðursystir
Jóns kammerráðs á Melum. Er og mælt,
að Jón kammerráð hafi látið
þessarar frændsemi getið, er hann leit Þórð
nýfæddan. En ekki varð dvöl Þórðar
löng á Melum. Hann fór til föður
sins þegar á fyrsta ári og ólst upp
með honum í Miðfirði til 10 ára aldurs,
en síðan með móður sinni og stjúpa
í Hrútafirði. Um fermingaraldur fór
hann í vinnumennsku til vandalausra.
Á Melum í Hrútafirði var landrými
mikið vestur og norður um fjallið, er skilur Hrútafjörð
og Dali, og suður um Holtavörðuheiði og dalinn
allann vestan Hrútafjarðarár að suðurmörkum
Strandasýslu. Smábýli eða kot hafa verið
hér og þar í landi Mela fyrr á öldum
og er þeirra getið í jarðabók Árna
Magnússonar og Páls Vídalíns, en
voru þá öll í eyði. Í lýsingu
Mela, sem undirrituð er 23.apríl 1709 segir meðal
annars:
"Í heimalandi, þar
sem selstaða hefir verið jafnaðarlega brúkuð,
sýnist hafa verið gamalt býli, kallað Grænumýrartunga.
Þar eru gamlar tóftir, girðingar og mikið
túnstæði. Veit enginn um þess byggingar
og eyðilegging. Kynni að sönnu vel að byggjast,
en ekki án sýnilegs skaða heimajarðarinnar."
Svo leið 18.öldin öll og fram yfir miðja 19.öld,
að enginn réðst í að stofna býli
í Grænumýrartungu. Má og vera, að
Melabændur hafi ekki gefið þess neinn kost, þótt
eftir væri leitað. En sama haustið og Þórður
Sigurðsson fæddist á Melum eða um veturinn
næsta á eftir, varð það að ráði,
að hjón úr Miðfirði, Jóhannes
Jónsson og Elín Jónsdóttir "tóku
upp býlið Grænumýrartungu í Melalandi"
og fluttust þau þangað vorið 1853. Þau
voru barnlaus, enda var Elín allmiklu eldri en maður
hennar og roskin, er hún giftist. Hún lést
20. Janúar 1857, tæplega sextug. Jóhannes
kvæntist nokkru síðar ungri konu, Soffíu
Gunnlaugsdóttur frá Óspaksstöðum.
Þau bjuggu í Grænumýrartungu til 1860.
Soffía lést 1. Júní 1866, 29 ára,
en Jóhannes 15.Júní 1869, rúmlega
fimmtugur. Þau áttu nokkur börn og var eitt
þeirra Jón er fór til Utah og gerðist
prestur eða biskup meðal Mormóna.
Næstu búendur í Grænumýrartungu
voru hjónin Sigurður Árnason, ættaður
af Akranesi og Ragnheiður Egilsdóttir úr Miðfirði.
Stóð að því leyti líkt á
um þau og hina fyrri búendur, Jóhannes og
Elínu, að Ragnheiður var miklu eldri en maður
hennar og þau barnlaus. - Fyrsta árið þeirra
var heimilsfólk hjá þeim ekki annað en
móðir konunnar á áttræðisaldri,
og ungur maður, vanheill, en 10 árum síðar
eru þar tveir vinnumenn og ein vinnukona. Sigurður
og Ragnheiður bjuggu í Grænumýrartungu
í 14 ár. Skömmu síðar skildu þau,
og fór Sigurður til Vesturheims. Hann lést
á Baldur í Manitoba 12. mars 1901, rúmlega
sjötugur. - Ragnheiður lést í Miðhúsum
í Hrútafirði 18. Janúar 1907, hátt
á tíræðisaldri.
Vorið 1874 fluttust að Grænumýrargungu hjónin
Árni Einarsson og Guðrún Bjarnadóttir.
Þau höfðu áður búið á
Kjörseyri í Hrútafirði og víðar
þar í sveit, og var Árni þá
hreppsstjóri um skeið. Árni var fæddur
á Vatnsleysuströnd, en föðurætt hans
var úr Svínadal í Húnaþingi
og móðurættin úr Saurbæ í
Dalasýslu. Guðrún var dóttir Bjarna
Hallgrímssonar á Borðeyri, en lengra fram var
ætt hennar úr Miðfirði. Þau Árni
og Guðrún bjuggu í Grænumýrartungu,
meðan þeim var sambúðar auðið. En
á tuttugasta búskaparári þeirra þar,
13. nóv. 1893, drukknaði Árni ásamt
hesti sínum í síki nálægt Melum
í Hrútafirði, hálfsjötugur að
aldri. Var frásögn um atvik að þessu slysi
birt í ritinu "Heima er best" nú í
sumar. Sama rit birti og ( í öðru hefti) mynd
af Árna og nokkur æviatriði hans. Börn
Árna og Guðrúnar voru Þorleifur steinsmiður
í Reykjavík (d. 1934) og Guðrún, er
átti Tómas Tómasson á Lambastöðum
í Dalasýslu, hún er enn á lífi
komin fast að níræðu. Guðrún
Bjarnadóttir lést hjá dóttur sinni
á Lambastöðum 6.maí 1929 hátt á
níræðisaldri.
Fáar sagnir eða engar eru nú geymdar um tvo
hina fyrstu búendur í Grænumýrartungu,
Jóhannes og Sigurð. Þó munu þeir
hafa verið nokkuð kunnir meðal ferðamanna, sem
leið áttu yfir Holtavörðuheiði, einkum
að vetri til. Grænumýrartunga varð snemma
þrautalending þeirra sem mættu kröggum
í heiðarferðum, en þröng og léleg
húsakynni hafa lengi framan af hamlað því,
að þar gæti orðið áningar- og
gististaður, nema í viðlögum. Í tíð
Árna Einarssonar mun gestakoma hafa aukist og vitað
er um ýmsa tigna menn sem tóku hvíld og
þáðu hressingu hjá honum. Höfðu
þeir gaman af karli, er ræddi ófeiminn við
æðri sem lægri og kryddaði tal sitt með
orðskviðum og spakmælum, eftir því
sem honum þótti við eiga. Innanhúss var
vel á haldið, konan atorkusöm og ókvalráð
og dóttirin einn mesti skörungur meðal ungra
kvenna, hugulsöm og hjartagóð, eins og hún
reyndist jafnan síðar vera sem húsmóðir
um langa ævi.. Þegar alls er gætt má
að telja að gengi Grænumýrartungu hafi heldur
vaxið í tíð Árna Einarssonar. Verulegra
umbóta var ekki að vænta af hans hendi, enda
tíðkuðust þær þá lítt
í sveitum landsins og árferði var erfitt á
níunda tug aldarinnar.
Þó að telja megi, að Árna Einarssyni
hafi farnast allvel í Grænumýrarungu, þá
verða samt þáttaskil í aldarsögu
þessa býlis við fráfall hans. Nær
42 ár voru þá liðin, síðan
er fyrst var vakið máls á því
að taka upp býli í Grænumýrartungu.
Sú kynslóð, er þá hafði ráðið
lögum og lofum, var nú gengin til grafar eða
búin að draga sig í hlé. En börnin,
sem þá höfðu hvílt í vöggu,
voru nú komin fram yfir miðjan manndómsaldur.
Og nú kemur hann aftur til sögunnar sveinninn, sem
nefndur var í upphafi máls, fæddur á
höfuðbólinu Melum , af ætt Melamanna, en
þó umkomulítill í bernsku og fram
eftir ævi. Það varð að ráði,
að Þórður Sigurðsson fengi Grænumýrartungu
byggða, og fluttist hann þangað vorið 1894.
Hér er eigi rúm til að rekja ævikjör
Þórðar, þaðan er frá var horfið
og fram að þessum tíma. Myndu þó
gefast ærin efni til, ef eftir væri grafist. Það
er saga um baráttu og hrakninga, árvekni og þrautseigju
einyrkjans, er þreytir fang við margs kyns óáran,
háður frumstæðum kjörum. Þórður
kvæntist 6.sept. 1874 Sigríði Jónsóttur
frá Bálkastöðum, Magnússonar. Fyrstu
hjúskaparárin voru þau vinnuhjú og
í húsmennsku, en 1878 hófu þau búskap
í Gilhaga, túnlausu fjallabýli í
Melalandi, nokkru framar við heiðina en Grænumýrartunga.
Hafði Davíð Bjarnason, síðar´I
Fornahvammi, reist þar nýbýli 1862. Búskap
Þórðar í Gilhaga, þar sem hann
bjó langst af uns hann fluttist að Grænumýrartungu
er að nokkru lýst í "Óðni"
1918 og vísast hér til þess. Í Gilhaga
fæddust flest börn þeirra hjóna, en af
þeim komust sex synir til fullorðinsaldurs.
Þegar þau Þórður og Sigríður
fluttust að Grænumýrartungu, voru ástæður
þeirra orðnar hægari en á frumbýlingsárunum.
Elsti drenguirnn þeirra er heima voru var 17 ára.
Heimilið hafði jafnvel vinnuafl aflögu handa nágrannaheimilum.
Lífsbaráttan, sem áður hafði verið
fólgin í vörn gegn skorti og viðnámi
gegn áföllum breyttist nú í sókn
til umbóta og rýmri hags. Reynsla liðinna ára,
nógu dýrkeypt, ásamt forsjálni og
nærgætni sem þeim hjónum var í
blóð borin, var trygging þess að hagsýni
yrði gætt jafnt sem áður. Í 14 ár
bjuggu þau Þórður og Sigríður
í Grænumýrartungu, en þá lést
hún, 5.júlí 1908, sextug að aldri. Bjó
Þórður enn í 5 ár eftir lát
hennar, uns yngsti sonur hans, Gunnar, tók að fullu
við búskap í Grænumýrartungu vorið
1913.
Hér verður að segja langa sögu í fáum
orðum. Þeir, sem buggu í Grænumýrartungu
á undan Þórði, höfðu litlar
umbætur gert; um húsakost og ræktun var jörðin
enn á mörkum auðnar og byggðar. Þórður
hófst þegar handa um að byggja upp húsin,
bæta við nýjum, slétta túnið
og færa það út og girða. Var svo komið
á seinni búskaparárum hans, að Grænumýrartunga
mátti teljast meðal fremri býla í byggðarlaginu
og hafði þetta áunnist á skemmri tíma
en tveimur áratugum. Það sem einkum var rómað
um búskap Þórðar, var reglusemi og snyrtimennska.
Naut heimilið þess og, að hann var góður
smiður; hefir sá eiginleiki orðið arfgengur
meðal niðja hans.
Grænumýrartunga er í þjóðbraut.
Var því allmikil gestakoma þar í tíð
Þórðar og fór vaxandi. Þótti
öllum gott að koma til þeirra hjóna; góður
beini veittur og fyrirgreiðsla á annan hátt.
Húsmóðirin gekk kyrrlát og örugg
að störfum, en húsbóndinn glaður og
reifur. Var mikilsvert fyrir ferðamenn á fyrri tíð
að eiga vísar góðar viðtökur svo
nærri erfiðum heiðarvegi.
Þórður Sigurðsson hélt heilsu og
kröftum, fjöri og áhuga fram á elliár.
Hann lést í Grænumýrartungu 7. Júní
1926. Af sex sonum hans eru nú tveir á lífi:
Gunnar bóndi í Grænumýrartungu og
Guðmundur, áður lengi á Borðeyri, en
nú í Grænumýrartungu. Látnir
eru: Sigurður, sem ólst upp með afa sínum
og átti heima í Miðfirði, Helgi, síðast
á Skagaströnd (d.1952), Björn í Gilhaga
(d.1935) og Svanbergur á Fossi (d.1923).
Grænumýrartunga
í búskapartíð Þórðar.
Nýir tímar voru að
ganga í garð, um þær mundir er Þórður
lét af búskap. Hefir Grænumýrartunga
tekið miklum stakkaskiptum síðan eins og kunnugt
er. Um 1923 keypti Gunnar Þórðarson jörðina
af eiganda Mela, og hóf þá skjótt
að reisa þar vandað íbúðarhús
úr steinsteypu. Önnur hús hafa einnig verið
reist og bætt og rafstöð, sem knúin er
vatnsafli, komið upp til ljósa, hitunar og suðu.
Túnið hefir verið aukið mjög og hagagirðingar
reistar.
Gunnar Þórðarson kvæntist 19.okt. 1916,
Ingveldi Björnsdóttur frá Fossi Björnssonar.
Þau eiga tvær dætur: Sigríði konu
Ragnars bónda Guðmundssonar í Grænumýrartungu
og Steinunni, konu Benedikts bónda Jóhannessonar
á Saurum í Laxárdal. Heimili þeirra
Gunnars og Ingveldar var fjölsóttur gististaður,
allt þangað til hraðferðir áætlunarbíla
komu til sögunnar með bættum samgöngum.
Miklar breytingar hafa orðið í þjóðlífi
voru, ytra og innra, um næstliðið aldarskeið.
Gleymd eru nú nöfn margra þeirra, sem ruddu
brautina. En þegar vér miklumst af þeim framförum
sem gerst hafa á landi undanfarna áratugi, mættum
vér gjarnan minnast þeirra manna sem fyrr á
tíðum unnu hörðum höndum við erfið
og frumstæð kjör, en bjuggu um leið stórlega
í haginn fyrir niðja sína og síðari
kynslóðir yfirleitt. Einn slíkra frumherja
var Þórður Sigurðsson í Grænumýrartungu.
9. október 1952
Jón Guðnason |